... خبرتى ...

[عبدالله2010]

دكتور جمال


موضوع مشرق

[Abu Yaser]

والله العظيم لا تتخيلوا مدى سعادتى لما فتحت ولقيت مشاركاتكم
أولا هناك تفاعل من الأعضاء
ثانيا الناس بالفعل محترمة (بصراحة انا كنت متخيل لما ابص هلاقى ناس كالعادة كاتبة هجوم شديد وهو فين الموضوع وادخل فى الصميم بسرعة وبلاش تدينى سمكة وعلّمنى العوم والنبى ياحمد ) ولكن بالعكس كل المشاركات مشجعة
ثالثا لقيت ان فعلا فيه ناس بتستفاد وتحتاج للموضوع وهو ده الهدف الأساسى لفتح أى موضوع (المفروض)

ولذلك استسمحكم انى أرد الآن على كل من شارك وأحضّر باقى الموضوع فى المساء، لأن فعلا الناس تستاهل

[Abu Yaser]

تحدثث عن الدعوم والمقاومات وهي شيئ مهم في هذا السوق
ربما تكون لك نظرة مختلفة لها لان هذا السوق عامر بالمفاجئات
في انتظار تكملة سلسلة شروحك

بالفعل أخى النظرة ستكون مختلفة
ولإضفاء بعض التشويق (ويوم السبت مش بعيد) هاتكون فى منتهى السهولة حتى للى مابيعرفش يرسم ترند ولا دعوم ولا مقاومات

يارب يا مسهل

[Abu Yaser]

حاضر يا دكتووور جمال

اشكرك على الرد وعذرا على عدم الاقتباس
اياك ان تختفي
ههههههه

مستنييييييييين

معلش على الاطالة، ولا مجال للتشويق
الموضوع بدأ يا جماعة بالفعل، ولكنها مقدمة لابد منها
يمكن فيكم ناس مش محتاجاها انما يمكن يكون فيه حد يستفيد ولو بكلمة
فالشرح أساسا بدأ، لأن المقدمة جزء لا يتجزأ

منوّرين

[Abu Yaser]

أستاذي العزيز

لا تتخيل كم السعادة التي اشعر بها بفتح موضوع كهذا
ولا تتخيل كم الناس المحتاجة لمواضيع مثل هذه

ألف مليون شكر لحضرتك

سؤال على جنب: بما أن حضرتك متابع للمنتدى منذ زمان كبير فاكيد قراءت كثيرا عن المواضيع التي تتحدث عن الطرق التي تربح 100% والمعادلات المكتشفة التي تحوي سر الفوركس وما إلى ذلك
فهل حضرتك تؤمن بهذه الاشياء؟

انت اللى لا تتخيل كم السعادة عندما رايت مشاركتك وان فيه بالفعل ناس تحتاج للكلام اللى اتقال
ويارب اكون عند حسن ظنكم بى

بالنسبة لسؤالك المهم
أعتقد من وجهة نظرى الشخصية ومن اللى انا شوفته والموضوع أساسا اسمه (خبرتى) يعنى مش باتكلم من وجهة نظر حد تانى
أعتقد ان الفوركس اسهل من كده بكتير
انا من الناس اللى كنت بادوّر على المعادلة أو المؤشر الوهمى الذى لا يخسر
ومافيش حد قال فكرة أو استراتيجية الا لما كنت ببرمجها واعمل لها باك تيست رهيب قبل ما اقرر انها فاشلة للأسف
وفى الآخر لقيت ان السر هو امام عينيك فى الشارت (ناس كتير قالوا كده وانا ماكنتش مقتنع زمان)
عارف!! لما تكون الدنيا ظلام شديد وانت مش شايف وبتخبط فى كل حاجة وماشى تحسس، يمكن مش شايف الشمعة اللى تحت ايدك عشان تنورها
وفجأة من كتر ما عينك أخدت على الظلام ده تلاقيك ابتديت تشوف واحدة واحدة
لحد لما تبقى بتشوف كانك منوّر النور عادى (هى دى اللى بيسموها الخبرة، من كتر المتابعة)
وبعدين تبقى شايف اللى لسه داخل من برّة ومش شايف حاجة (زيك زمان) وبيخبط فى الترابيزة اللى واضحة جدا (بالنسبالك) وهو مش شايفها
ولكن للأسف
لما تحاول تقوله يمشى ازاى عشان ما يخبطش، مش ممكن يثق فى كلامك، ليه؟؟
عشان هو مش شايف فبيفترض ان الكل كده ، وزى الشاعر لما قال
قد تُنكِرُ العين ضوءَ الشمس من رمد
يعنى العيب فى العين هى اللى مريضة ومش شايفة الشمس، ولكنها تنكر ضوء الشمس وتقول لا دى ماطلعتش
ده زى اللى بيقولك الفوركس ده وهم كبير وماحدش بيكسب منه وانه مصيدة و و

معلش طولت عليك
انما الخلاصة
موضوع 100% صعب جدا (انما مش مستحيل)
ولكن
اللى يهمّنى ان تكون المحصلة فى الآخر موجبة، ممكن تكون فيه صفقات خاسرة، ولكن المهم ان الكسبانة تغطى الخسارة وتزيد

بس

[Abu Yaser]

نعم أخي صدقت في ماقلت طول ما الإنسان عايش فهو بيتعلم وأنا لست في مرتبة أستاد فأنا مازلت طالب وسأبقة طالب للأبد بإدن الله
والأصفار اللي قصدت هي التي يكون معها الرقم الأساسي من الأرقام 1 والواحد هو الله سبحانه وتعالى
في إنتظارك

أهل وسهلاً أخي الكريم ،،،
فعلاً الجميع محتاج لهذه الخبرات التي مارست تجارة الفوركس بتأني وهدوء

في إنتظارك على أحر من الجمر ...

السلام عليكم د.جمال و ان شاء الله تكون سبب ربح جميع اعضاء المنتدى و جزاك الله كل خير

يا رب يا رب أكون عند حسن ظنكم بى
اشكركم شكرا جزيلا
ردودكم تدفعنى للأمام وبقوة

[azzoug]

موضوع 100% صعب جدا (انما مش مستحيل)

ولكن
اللى يهمّنى ان تكون المحصلة فى الآخر موجبة، ممكن تكون فيه صفقات خاسرة، ولكن المهم ان الكسبانة تغطى الخسارة وتزيد

بس

+1

[Abu Yaser]

شكله حيكون موضوع ممتاز فى الانتظار للتعلم و الاستفاده

ربنا يخليك، باذن الله سأبذل قصارى جهدى
حلو توقيعك

بارك الله فيك وجزاك كل الخير دكتور جمال واتشرف انى اكون متابعة مع حضرتك وانى ارجع للفوركس مرة اخرى واستعيد نشاطى بيه من خلال متابعة موضوع حضرتك فأنا بعيدة بقالى اكتر من 6 اشهر عن السوق بعد سنة تخبط وخسارة فأخذت فترة راحة وناوية باذن الله ارجع اتعلم تانى واصلح كل الاخطاء الى وقعت بيها

ده شرف كبير لى
ويارب توصلى لكل ما تتمنين

دكتور جمال


موضوع مشرق

مشرق بيك أخ عبد الله

[Abu Yaser]

تفنن الناس فى كيفية رسم الترند وكل واحد يدافع عن اسلوبه ان هو ده الصح والباقى غلط، ويجيب من الشارت اللى يدعم كلامه، ولكن التانى بيعمل نفس الكلام، وما شاء الله الشارت مليان لده ولده

فمنهم اللى بيرسمه على قاعين أو قمتين كفاية، ومنهم اللى بيقول لا لازم 3 قيعان أو 3 قمم حتى نعترف بإن ده ترند (انا لا مع ده ولا مع ده انا محايد)

ومنهم اللى بيقول لازم نرسم خط الترند على الهاى او اللو للشموع، وأى اختراق للترند ولو بنقطة لابد من تعديل رسم الترند على الشكل الجديد

ومنهم اللى بيرسم على الكلوز ولا يعترف بالهاى واللو تماما حتى لو اخترق الترند فيكون الترند سليما

والمشكلة الكبرى فين بقى؟؟

لما الصفقة تكسب يبقى ده العادى والترند تمام، ولما تخسر (طبعا بيبان بعدها) يقولك انت مش راسم الترند على القمم والقيعان مظبوط، ودى كده الرسمة الصح، طيب مانا ساعتها ماكنتش عارف انه هايعمل قاع مثلا اقل وعشان كده المقولة المشهورة (ما أسهل ان تكون محللاً بعد الحدث)

فكيفية رسم الترند بالطريقة السليمة ليس متاحاً للجميع، وعشان كده الناس اتجهت للمؤشرات اللى بترسم الترند لوحدها (ولا تعليق)

وطلع من هنا كمية استراتيجيات كتير زى الشغل على الارتداد أو الشغل على الاختراق فقط ولما كثر موضوع الاختراق الوهمى (كما يسمونه) عمل مؤشرات مساعده للترند لفضح الاختراق الوهمى مثل توليفة موفينج او استوك او آر اس آى وغيره من المساعدات

وفيه اللى ساب ده كله واشتغل دعوم ومقاومات على شكل دوائر أو بيضاوى

كل ده كويس على فكرة

ومش غلط

بالمناسبة، مافيش حاجة اسمها غلط فى الفوركس، كله كويس، وبيمشى، ولكن المهم هو هايمشى امتى (فى التذبذب ولا الترند)؟؟ ولفترة اد ايه (كل وقت وله نظامه)؟؟

فأنا مش باقول على اى حاجة غلط، كل واحد وله طريقته المهم انه يكون بيقدر يكسب بيها معظم الوقت

نرجع تانى للأساسيات

الدعوم والمقاومات اللى انبثق منها الترند

فيه ناس بتحب تتعامل معاها كخطوط افقية فقط ولا تتعامل مع الترند المائل (ومنهم أساتذة أجانب)، فيرسم خط من نقطة الدعم بالعرض وخط من نقطة المقاومة ويتعامل مع السعر من حيث الارتداد أو الاختراق زيه زى الترند العادى

ولو تبص لأصل المواضيع كلها هاتلاقى ان الدعوم والمقاومات أو بمعنى آخر القيعان والقمم هم أصل كل شىء

يعنى

جان اللى مدوخ الناس بحركاته السحرية واللولبية كل اللى بيحاول يعمله انه يتنبأ بالقمة القادمة أو القاع القادم من خلال السابق

اليوت ونظرياته واسلوب العدّ اللى اختلف فيه الكثيرون، ما هو الا نفس الشىء، فالموجة اللى بتجرى ورا الموجة عبارة عن قمة أو قاع

وغيره من فايبوناتشى، وفايبوناتشى اكستنشن والنسب الذهبية لإيجاد القمة القادمة أو القاع المحتمل

ومنها انبثق الهارمونيك بأشكاله ليتوقع نفس الشىء

يبقى الفكرة واحدة ولكن كل واحد بيختار حسب شخصيته

يعنى فيه ناس بتحب الغموض والكلكعة ومعادلات سحرية وجان (مع الاحترام للكل) بس القصة ابسط بكثيييييير

وعلى فكرة قبل ما حد من المؤيدين للحاجات دى يهاجمنى ، انا دارس اليوت كويس اوى اوى وعارف جان وناقشت واحد كان عامل كتاب عن جان وبيبيعه ب 110$ وطلعت له حاجات فى معادلاته غلط لدرجة انه ماكانش مصدق

فأنا مش معترض عليهم، والا ماكنتش اديتهم من وقتى كل ده حتى احترفهم

بس الفكرة فين؟؟

نرجع تانى نقول، لما يكون الفوركس هو مصدر اكل عيشك وفاتح بيتك بيكون همّك الأول والأخير هو الربح (بس بجد مش زى ما البعض بيدّعى) عشان كده مش مهتم بالحركات اللولبية والمستخبية، المهم الربببححححح

فلما تلاقى انك ممكن تحقق الهدف المطلوب وبدون وجع راس واستعراض حاجات غريبة وعجيبة لجذب الانتباه، فأكيد انت مش هاتعذب نفسك هههههه

المهم

وده بجد المهم

ويمكن أهم من الموضوع الأساسى

يا ريت يا إخوانى تاخدوا كلامى ده على محمل من الجديّة

إوعى تخلّى حد يدير لك حسابك مهماً كان

ولا حتى أنا

وادينى باقولها بالبنط العرييييييييض

ومش هاقبل اى حد ولا على الخاص ولا على العام

وبكل صراحة

اسأل نفسك أولا

اذا بالفعل اللى هايديرلك حسابك بيربح الأرباح اللى قالك عليها

هايدير حسابك لييييييييييييييييييييه؟؟؟؟؟؟؟؟؟؟؟؟؟

يعنى بقى بعد ما ربنا فتح عليه باسلوب بيعرف يتاجر بيه لنفسه لدرجة انه تفرّغ من عمله واشتغل فوركس (مش بيقلّب عيشه بحاجة جانبية) يرجع يخلّى حد يحاسبه تانى ويراجع وراه وفين ده وليه ده، ويرجع تااااانى زى الشغل القديم (ده اذا كان هايشتغل بما يرضى الله)؟؟؟؟

انما هو عامل حسابه انها فلوس زيادة، جابت أرباح هايقاسمك فيها، خسرت ربنا يعوض عليك بقى انا هاعمل لك ايه انت اللى نحس ههههههههه

وانا عارف انه هايطلع واحد يقولى ماهو ممكن يكون عارف طريقة حلوة بس مافيش راس مال، أو فيه بس قليل وهو مستعجل

صدقنى لو 100$ وماظنش ان المبلغ ده مش موجود، واستراتيجيته حلوة هايعمل منه اى راس مال كان بيحلم بيه

بس الصبر

فتااااااااانى اوعى تدى حسابك لحد مهما برهن لك على شطارته، ومش هاقول لك ورّالك ريبورت مضروب لا، ده لو اشتغل كل صفقاته قدامك لايف

امال ايه؟؟

إتعلّم واشتغل انت بنفسك

قال الإمام على بن أبى طالب

ما حَكّ جلدك مثل ظِفرك فتوَلَّ أنت أمر نفسك

طيب ما عرفتش؟؟

يبقى مش مجالك، ومش كل الناس تنفع تبقى دكاترة وجراحين مع انهم بياخدوا مئات الآلاف فى ساعتين جراحة، بس انت مش منهم ومش شغلتك، ولاعب الكرة اللى بالملايين، ماكانش حد غلب، وهو مين مابيعرفش يلعب كورة؟؟

أظن انا المرة دى طولت عليكم بجد

ده اذا كنتم لسه بتقرأوا اساسا وماسيبتوش الموضوع ومشيتم

أشوفكم على خير بالليل (وياريت اللى يدخل الموضوع جديد ويشوف المشاركة دى يقرأ الموضوع من اوله لآخره عشان ده موضوع مسلسل ومايجيش فى النص يسأل عن حاجة اتشرحت فى الأول)

والسلام عليكم ورحمة الله وبركاته

د/ جمال ممدوح

[مصطفى خالد]

والله العظيم لا تتخيلوا مدى سعادتى لما فتحت ولقيت مشاركاتكم
أولا هناك تفاعل من الأعضاء
ثانيا الناس بالفعل محترمة (بصراحة انا كنت متخيل لما ابص هلاقى ناس كالعادة كاتبة هجوم شديد وهو فين الموضوع وادخل فى الصميم بسرعة وبلاش تدينى سمكة وعلّمنى العوم والنبى ياحمد ) ولكن بالعكس كل المشاركات مشجعة
ثالثا لقيت ان فعلا فيه ناس بتستفاد وتحتاج للموضوع وهو ده الهدف الأساسى لفتح أى موضوع (المفروض)

ولذلك استسمحكم انى أرد الآن على كل من شارك وأحضّر باقى الموضوع فى المساء، لأن فعلا الناس تستاهل

و الله دمك خفيف

[عبدالله2010]

أسلوب ممتع وشيق ومقنع .....وفقك الله....مقدرين جهدك ووقتك ....جزاك الله خير ...وغفر الله لك ولوالديك

[azzoug]

اشوفكم بالليل ؟
باين الموضوع حيطول والشباب حتفقد الصبر

[kingooo]

تخيل؟

أنا من يوم ما دخلت الفوركس وعملت عضوية في المنتديات وأنا نفسي اسمع كلمة واحدة زي اللي حضرتك بتقوله ده

الله يباركلك الله يباركلك الله يباركلك

ملحوظة: بالنسبة أن حضرتك خايف لحسن نكون زهقنا من طول الكلام, بالعكس تماما, وأنا اقرا مشاركتك ببقى خايف لحسن الكلام يخلص وبرجع اقرا المشاركة من الاول تاني اكتر من مرة

الف مليون مليون مليون شكر

منتظرك بشغف واستمتاع كبير.....

[اشرف عبد العزيز]

لغاية دلوقتى الكلام زى الفل وفعلا فى ناس مبتدئة لأ وكمان خبرة عايزين يسمعوه احنا متابعين معاك ياغالى لعلنا نجد ضالتنا.

اخيك/ الاسكندرانى

[hussamammar]

بارك الله فيك كلام منطقي و جميل و نابع من القلب و اتمنى ان يصل الى قلوب و عقول كل الناس ...لك مني كل التحيه و الاحترام