الزوايا السعرية والهارمونيك - اقوى دمج بين الطريقتين حصري على المتداول العربي

[mohammedgaber]

ورشة موفقة ان شاءالله

اخي محمد اتمنا شرح بفيديو...





شكرا لك...

ورشة موفقة يا باشا
متابعيين معاك

متابعتكم شرف لي وان شاء الله الجميع يستفيد من الورشة

النهاردة ان شاء الله معادنا مع الدرس التاني من الاشكال المكتملة

[mohammedgaber]

سبحان الله، بقالي فترة عايز أتعلم الزوايا السعرية + التحليل الموجي علشان أدمجها مع الهارمونيك، و بالصدفة لقيت موضوع حضرتك ، سجل حضور و متابعة و مشاركة إن شاء الله.
من الآخر أي حاجة فيها هارمونيك أنا راشق فيها و خصوصاً لو كانت من تقديمك أستاذ محمد

حبيبي والله - انت استاذ هارمونيك اخي محمد وان شاء الله هتبقى استاذ زوايا برضو واي حاجة تحطها في دماغك المهم في النهاية تعرف تترجم التحليلات دي في تداولاتك الشخصية وتستفيد منها اكبر استفادة ممكنة

تحياتي يا صديقي وان شاء الله تكون معانا هنا في الورشة برضو فعال كعادتك

[mohammedgaber]

بسم الله الرحمن الرحيم

معادنا النهاردة ان شاء الله مع تقديم الجزء الثاني من القسم الأول الخاص بالاشكال الهندسية المكتملة وطريقة دمجها مع نماذج الهارمونيك الكلاسيكية او التقليدية

وهو الشكل الثلاثي أو المثلث
وهندمجه ان شاء الله مع نموذج الخفاش

......................

كنا اتكلمنا في المرة اللي فاتت عن الشكل المستقيم وازاي السعر بيروح بشكل مباشر للزاوية 180 ويصحح منها وبعدين يكمل طريقه للزاوية 360 ويعمل دورة كاملة - وشوفنا ازاي بنتعامل مع حركة السعر سواء قبل اكتمال الشكل الهندسي او بعد اكتماله بمساعدة نموذج الهارمونيك اللي دمجناه مع الشكل ..

..........................

اتفقنا ان الدورة السعرية الواحدة بتبتدي من الزاوية 0 الى الزاوية 360

والشكل المستقيم كان اول الاشكال الهندسية اللي بيسلكها السعر اثناء اتمام دورته - واللي ارتداده بيكون من الزاوية 180 بمعنى ( 360 ÷ 2 )

طيب بالنسبة للشكل الثلاثي ؟ بديهيا كدا هيكون ( 360 ÷ 3 ) النتيجة 120
معنى كدا ان الشكل الثلاثي الزاوية الاصلية اللي بيرتد منها وبيعمل أول تصحيح في طريقه بيكون عند الزاوية 120
وبيفضل يمشي السعر في طريقه بشكل ثلاثي بمعنى انه كل 120 درجة بيعمل تصحيح سعري الى ان يصل الى نهاية دورته عند الزاوية 360
بمعنى انه معانا 3 زوايا في طريق السعر في الشكل الثلاثي ( 120 - 240 - 360 )

وكمان مش شرط انه يصحح في الزاوية 240 يعني ممكن يكمل طريقه مباشرة الى الزاوية 360 - عشان كدا المهم عندنا هو اكتمال الشروط بالشكل المناسب واولها هو التصحيح من الزاوية 120 ( اصل الشكل )

....................................

احنا اتفقنا ان الارتداد من الزاوية بنعتمده لما يكون الارتداد دة تم بنسبة تتجاوز ال30 في المية من الموجة من الزاوية 0 الى الزاوية اللي ارتد منها - وبنسبة لا تتجاوز 75 في المية
يعني التصحيح محصور ما بين ( 30 الى 75 % ) من الموجة اللي حددنا عليها الزاوية اللي هنشتغل عليها

دة الشكل المثالي للشكل الثلاثي



ارتداد من الزاوية 120 ثم التصحيح بنسبة 50 في المية للموجة الهابطة تصل الى الزاوية 60 ثم مواصلة الهبوط مباشرة الى الزاوية 360 لاتمام الدورة السعرية الأولى

نلاحظ اني قولت الدورة السعرية الأولى - ليه هو فيه تانية ؟؟

اقولك فيه تانية وتالتة كمان - الفكرة ان الشكل الثلاثي او اي شكل هندسي له حركة بيمشي فيها عشان يكمل دورته السعرية وكلهم ليهم دورة كاملة 360 درجة ممكن تكمل لدورة تانية ونوصل ل 720 ثم 1080 وهكذا



...........................................

طيب احنا ايه يعرفنا انه هيعمل كدا ؟
ايه اللي هنعملها مع الزوايا دي واستفدنا ايه ان السعر ممكن ينزل وممكن يكمل صعود ؟

اقولك بكل بساطة ان سبب فتح الورشة هو اني اشرحلك ازاي بتعامل مع الزوايا دي باسلوبي الخاص بدمج الهارمونيك مع الزوايا دي عشان اعرف امتى اشتري وامتى ابيع وامتى اعتمد وامتى الغي واتجاهل الزوايا بالمرة

..............................

الجزء الاساسي معانا النهاردة هو الشكل الهندسي الثلاثي ودمجه مع نموذج الخفاش

-- مبدئيا لازم اوضح انه مش معنى اني دمجت نموذج هارمونيك محدد مع شكل هندسي محدد يبقى كدا تم احتكار الدمج على النوعين دول --
لا طبعا ممكن تلاقي نموذج هارمونيك مع شكل هندسي تاني ولكن انا بتكلم عن الانسب والاكثر حظا في التطابق مع بعض واللي ممكن تقدر تشتغل عليه وانت مرتاح

نموذج الخفاش من اكثر النماذج اللي بتتكرر على الشارت وله شكلين

1- الخفاش Bat





ودي النسب بتاعته



2- الخفاش الممتد Alternate Bat

ودي النسب بتاعته



------------

كدا نكون اتعرفنا بشكل نظري على الشكل الهندسي وكمان نموذج الخفاش بشكليه المختلفين

المشاركة التالية هنوضح كيفية التعامل على الشارت والدمج بينهم
........................

[mohammedgaber]

بعد ما اتكلمنا عن الموضوع بشكل نظري هنشوف الكلام دة على الشارت وازاي نستفيد منه بالشكل المناسب

الصورة اللي جاية عليها شكل ثلاثي مكتمل على فريم الربع ساعة لزوج الباوند فرنك
صعود السعر من القاع الاخير للزوج ثم الارتداد من الزاوية 120 وتصحيح تجاوز الـ 30 في المية ثم مواصلة الصعود الى الزاوية 360 واتمام دورته السعرية بشكل سليم



طيب ملاحظين انه وصل للزاوية 360 قبل معاده ؟؟
عارف اننا لسة ما تطرقناش للجزء الزمني لكن واضح جدا ان المربع الازرق بيكون له خطين اصفر واحد قبل وواحد بعد - اللي ع اليمين دة السعر بيوصل للزاوية بتاعته في نفس التوقيت معاه او قبله بحاجة بسيطة لانه بيكون عنده معاد انعكاس بوصوله للزمن المحدد انه ينعكس فيه خصوصا انه نهاية دورة وبنسبة كبيرة بيكون عنده انعكاس زمني ودة مش موضوعنا دلوقتي هنتكلم عليه بعدين

اللي عايز اوضحه ان برغم وصول السعر بشكل مبكر للزاوية 360 الا انه فضل يمشي بشكل عرضي قبل عشان يكمل الشكل الثلاثي بشكله المثالي وبعدها انعكس برضو في معاده

وهنشوف احنا استفدنا من الموضوع دة ازاي دلوقتي

بص كدا على الصورة دي وتعالى اقولك احنا عملنا ايه



انا تعمدت اثناء البحث عن نماذج للشرح اني اجيب حالة تجمع ما بين النوعين المختلفين لنموذج الخفاش والخفاش الممتد على الشارت عشان اوضحلك اقوى حالات الانعكاس الممكنة اللي نقدر وقتها نقول ان دي فرصة مثالية ومش هقول مضمونة 100 % لاني مش بعترف بالكلمة دي ودايما بدخل اي صفقة وانا متوقع الخسارة قبل المكسب وراضي بيها تماما

احنا شوفنا الشارت دة وهو مجرد زوايا في الصورة الاولى - لما مسكت القمة اللي قبل الشكل الثلاثي وبدات اشوف النسب واحاول اجمع نموذج هارمونيك على الشارت - طلع معايا الأول نموذج الخفاش واللي على الشارت لونه احمر مفرغ مش مظلل

القمة الأولى طبعا بنبتدي الترقيم من عندها X
ثم قاع النموذج الثلاثي A
ثم صعود للزاوية 120 ودي النقطة B
انعكاس السعر مرة اخرى للاعلى وتكوين قاع جديد ودي النقطة C

كدا باقي معانا النقطة D ودي نقدر نحددها بشكل سهل جدا بمجرد اختراق مستوى النقطة B وطبعا هيكون عندنا اختيارين الاولى انها تساوي النسبة 88 ف المية فيبوناتشي من الضلع XA او تساوي 113
( 88 طبعا الخفاش - و 113 الخفاش الممتد )

هنلاقي ان النسبة 88 انا مش راسمها على الشارت والسبب بكل بساطة انها جاية مش في طريق انا عايزه اللي هو تطابق مع الزاوية 360 للشكل الثلاثي اللي انا بشتغل عليه - هتلاقيها جاية فوق الزاوية 240 وعشان كدا تم تجاهلها حتى ولو نجحت في هبوط السعر

استمر السعر في الصعود الى ان وصل للمنطقة المظللة على الشارت
واللي بتجمع ما بين نقطة انعكاس نموذج الهارمونيك الخفاش الممتد + الزاوية 360 نهاية الدورة السعرية الأولى للشكل الثلاثي

المنطقة دي طولها 10 نقاط بالظبط بمعنى الدخول من اي نقطة فيها هو دخول جيد جدا وبنستهدف طبعا الهبوط الى الزاوية 240 والاستوب بتاعنا هيكون اغلاق اعلى الزاوية الفرعية 420 اللي ما بين الزاوية الرئيسية 360 والزاوية الرئيسية 480
واللي انا عامل عليها خط عند السعر 1.3225 بالتحديد

هنرجع للجملة اللي انا ذكرتها بخصوص الوصول المبكر للزوج عند الزاوية 360 وازاي شوفنا حركة عرضية للسعر قبل ما يهبط - ودة كان سبب التاخير في هبوط نموذج الهارمونيك واللي لو انا شغال على الهارمونيك فقط وحصل التاخير دة كان ممكن اخرج من الصفقة لكن لما دمجت بين الزوايا والهارمونيك عرفت ان فيه سبب للتاخير وكمان استوب واضح جدا وممتاز وهدف ممتاز ايضا وقدرت افتح صفقة وانا مطمن لنقاط الدخول والخروج بشكل مناسب ...

............................

باقي معانا توضيح ايه اللي ممكن نعمله في الحالة دي لو تكررت على الشارت معانا :

1- بعد تحديد ان الشكل نوعه ثلاثي بهبوط السعر من الزاوية 120 والتصحيح ثم الصعود من جديد
هنستنى اغلاق السعر فوق الزاوية 120 للتاكيد وبالتالي هيكون معانا خيار مناسب جدا للشراء باستهداف الزوايا القادمة 240 ثم 360 على التوالي
( الاستوب طبعا كسر القاع اللي احنا اشتغلنا عليه او الفشل الزمني للنموذج ودة طبعا هنتعرف عليه في الجزء الزمني )

2- بعد اكتمال الشكل ووقتها هنكون استفدنا الحمدلله من الشراء - هيكون دة وقت البيع وهو دة اصل الشغل اللي عملناه كله
واحنا حددنا فوق البيع بيتم ازاي والاستوب والاهداف فين بالظبط

..................................
كدا نكون انتهينا من الشرح الخاص بالجزئية دي وان شاء الله يكون الشرح واضح وسهل ولو فيه اي استفسارات انا في انتظاركم

مع التحية

[mohammedgaber]

غدا ان شاء الله هيكون معانا درس جديد وهندخل على طول في الشكل الرباعي

نسال الله التوفيق

[Muslim4ever]

السلام عليكم استاذ محمد
ممكن تعطينى رايك فى هذا الشكل على الباوند دولار

[mohammedgaber]

السلام عليكم استاذ محمد
ممكن تعطينى رايك فى هذا الشكل على الباوند دولار

وعليكم السلام ورحمة الله وبركاته

شكل عشاري ( من الاشكال الهندسية الغير مكتملة ) لسة مش وصلناها بس هعلق عليك في حدود الشروط المطلوبة لاعتماد اي شكل

اول شرط وقع منك وهو اللي يلغي النموذج هو نسبة التصحيح من الزاوية 36 للاعلى - لو قستها بالفيبوناتشي هتلاقيها ما وصلتش للحد الادنى من التصحيح المطلوب 30 في المية من الموجة اللي بداها الزوج من الزاوية 0 الى الزاوية 36

بالنسبالي انسب شكل حاليا ممكن نعتمده على زوج الباوند دولار هو الشكل المستقيم على فريم الساعة



طبعا مش توصية بيع او شراء لان في الورشة هنا بنعتمد فقط التطبيقات اللي بيجتمع فيها الزوايا مع الهارمونيك

تحياتي لك اخي الفاضل ودعواتي بالتوفيق ان شاء الله

[سلطآنـ]

اخي الغالي سلطان طبعا طلبك من الاولويات حتى ولو هعمل الفيديو ليك لوحدك لاني اهم حاجة عندي الكل يكون مستفيد مش مجرد نشر معلومات وعمل مشاهدات

الدروس المكتوبة مش سهلة ع فكرة واحيانا بتاخد وقت ومجهود اكتر من الفيديو بكتير بس فيه حل كويس انا توصلتله كالتالي

احنا عندنا 4 اقسام هنمشي فيهم بالترتيب وكل قسم فيهم بيتقسم لدروس متسلسلة ورا بعض - انا فكرت انه بعد نهاية كل قسم يتم عمل فيديو يشمل جميع اجزاء القسم ونكون استفدنا تجميع القسم في فيديو واحد او 2 بالاضافة لمحاولة ارضاء من يرغبون في الشرح المصور بالفيديو وان شاء الله بالحل دا نكون راضينا جميع الاطراف

اتمنى يكون الحل عجبك يا صديقي ومش عايزك تتردد في اي استفسار او طلب مهما كان وان شاء الله دايما نكون عند حسن الظن

مع التحية

معك في أي شئ
أثق في اقتراحاتك ي الغالي
وبإذن الله تعالى
بس اتقنها راح اكون متواجد بشكل كبير هنا
شكرا لك من الأعماق

[mohamedradi]

السلام عليكم ورحمة اللة
هل من مؤشر يسهل علينا اكتشاف النماذج ومن ثم نتحقق من النسب التي ذكرتها سعادتكم

شاكرومقدر

[mohammedgaber]

السلام عليكم ورحمة اللة
هل من مؤشر يسهل علينا اكتشاف النماذج ومن ثم نتحقق من النسب التي ذكرتها سعادتكم

شاكرومقدر

وعليكم السلام ورحمة الله وبركاته

جميع مؤشرات الهارمونيك اللي تم برمجتها لاقتناص النماذج كانت نتايجها فاشلة وعشان كدا دايما الافضل هو العمل اليدوي في اكتشاف نماذج الهارمونيك

هو في البداية بتحس ببعض اللخبطة لكن مع الوقت بتلاقي الموضوع سهل جدا وبمجرد النظر ممكن تكتشف تكوين النموذج على الشارت وتعرف نوعه كمان قبل ما تقيس النسب بتاعته

[mohammedgaber]

معك في أي شئ
أثق في اقتراحاتك ي الغالي
وبإذن الله تعالى
بس اتقنها راح اكون متواجد بشكل كبير هنا
شكرا لك من الأعماق

شكرا على ثقتك الغالية اخي سلطان

ان شاء الله تتقنها وتبقى فيها بروفيسور يا صديقي

كل التحية والتقدير

[mohammedgaber]

وعليكم السلام ورحمة الله وبركاته

شكل عشاري ( من الاشكال الهندسية الغير مكتملة ) لسة مش وصلناها بس هعلق عليك في حدود الشروط المطلوبة لاعتماد اي شكل

اول شرط وقع منك وهو اللي يلغي النموذج هو نسبة التصحيح من الزاوية 36 للاعلى - لو قستها بالفيبوناتشي هتلاقيها ما وصلتش للحد الادنى من التصحيح المطلوب 30 في المية من الموجة اللي بداها الزوج من الزاوية 0 الى الزاوية 36

بالنسبالي انسب شكل حاليا ممكن نعتمده على زوج الباوند دولار هو الشكل المستقيم على فريم الساعة



طبعا مش توصية بيع او شراء لان في الورشة هنا بنعتمد فقط التطبيقات اللي بيجتمع فيها الزوايا مع الهارمونيك

تحياتي لك اخي الفاضل ودعواتي بالتوفيق ان شاء الله

زي ما قولنا دي ما كانتش توصية بس كانت مثال حي يوضح اهمية الرسم الصحيح والسليم واختيار الموجة اللي تشتغل عليها عشان تلاقي نتيجة مرضية

اكثر من 100 نقطة هبوط بعد اعادة اختبار الزاوية 180 وهبوط للزاوية الفرعية ثم ارتداد تصحيحي واتوقع ان شاء الله مواصلة الهبوط الى ان يكتمل الشكل المستقيم

[mohammedgaber]

بسم الله الرحمن الرحيم

اليوم ان شاء الله هنتكلم على الشكل الرباعي وانا دايما بدمج معاه نموذج الكراب

ليه تحديدا تم اختيار نموذج الكراب من نماذج الهارمونيك واللي ممكن كمان نلاقيه مع اكتر من شكل هندسي مختلف - ودة اللي قولناه في بداية الموضوع لانه هو اكتر نموذج مع التجربة لقيته بيتكرر على الاشكال الهندسية المختلفة للزوايا السعرية

................................

الشكل الرباعي هو احد الاشكال المكتملة للزوايا السعرية

رباعي لانه بيعمل الدورة بتاعته في حركة رباعية تبتدي من من الزاوية 90 ( 360 ÷ 4 )

يعني اول زاوية بيرتد منها السعر بتكون الزاوية 90
ويصحح منها بنسبة لا تقل عن 30 % ولا تزيد عن 75 % تصحيح للموجة اللي من الزاوية 0 الى الزاوية 90

دة الشكل الرباعي الهابط



ودة الشكل الرباعي الصاعد



من افضل الاشكال اللي ممكن تتعامل معاها خصوصا على مستوى التداول لانك بمجرد تاكيد الشكل ممكن تدخل بعد الزاوية 90 وتستهدف الزاوية 360 وانت مطمن - لكن طبعا بعد ما تكون عرفت ازاي تستخرج الاشكال الهندسية بطريقة سليمة عشان تقدر تتداول عليها

لكن احنا هنا في الورشة بنتكلم اننا لازم نلاقي نموذج هارمونيك ندمجه مع الشكل عشان نقدر نستخدمه في التداول بشكل يزيد الامان ونسبة النجاح

................................

اتكلمنا انه نموذج الهارمونيك الاكثر تكرارا مع الشكل الرباعي هو نموذج الكراب





ودي نسب الفيبوناتشي الخاصة بنموذج الكراب



.......................

نروح لكيفية التطبيق على الشارت



دا زوج الكندي ين فريم الساعة

شكل رباعي مكتمل + نموذج كراب

مراحل التعامل مع النموذج زي ما متعود عليها :

- تم تحديد نوع الشكل رباعي بعد ارتداد السعر من الزاوية 90 والتصحيح ثم الصعود مجددا
- مراقبة حركة الزوج لاكتشاف نموذج هارمونيك طور التكوين على الشارت
- تم تاكيد النموذج مع استمرار الصعود والوصول الى الزاوية الثانية 180
- بعد وصول السعر الى الزاوية الثالثة 270 تم مراقبة السعر لمحاولى اكتشاف نموذج هارمونيك مرة اخرى

- العودة مجددا الى الزاوية 180 اتاحت لنا محاولة تكوين نموذج بمجرد وضع اداة الفييبوناتشي على الضلع الهابط المكون من الزاوية 270 الى الزاوية 180 هنلاقي النسبة 161 % موجودة عند الزاوية 360 نهاية الدورة الأولى للشكل الرباعي اللي معانا

- كدا هنستنى تاكيد النموذج بتكوين النقطة B والنقطة C وبالفعل تم التكوين

- بمجرد صعود السعر من النقطة C واختراق مستوى النقطة B كما هو موضح على الشارت بالخط الأصفر يتم الدخول شراء باستهداف النسبة 161 لنموذج الكراب عند نهاية الشكل الهندسي عند الزاوية 360
( وكدا نكون استفدنا من الشكل قبل اكتماله )

- يتبقى الدخول بيع بعد اكتمال تكوين الشكل والدخول من المنطقة المظللة التي تجمع ما بين نقطة انعكاس نموذج الكراب والزاوية 360 - ونستهدف معها الزاوية 270
( وكدا نكون استفدنا من الشكل بعد اكتماله )

..............................

ملحوظة متكررة دايما : مش معنى استخدام نموذج هارمونيك معين يبقى تم اختصار النموذج دة فقط من نماذج الهارمونيك مع الشكل الهندسي دة وبس - بالعكس ممكن نلاقي تكرار اكتر من نموذج على شكل هندسي مختلف
لكن انا بتعمد اختيار نماذج للشرح تكون مناسبة للحالات اللي بتتكرر بشكل كبير عشان دة الاهم عندنا

....................

في انتظار اي استفسار لو في اي حاجة مش واضحة

بالتوفيق ان شاء الله

[MZahran]

حبيبي والله - انت استاذ هارمونيك اخي محمد وان شاء الله هتبقى استاذ زوايا برضو واي حاجة تحطها في دماغك المهم في النهاية تعرف تترجم التحليلات دي في تداولاتك الشخصية وتستفيد منها اكبر استفادة ممكنة

تحياتي يا صديقي وان شاء الله تكون معانا هنا في الورشة برضو فعال كعادتك

جزاك الله خيراً أستاذ محمد، إن شاء نستفاد كلنا

[mohammedgaber]

جزاك الله خيراً أستاذ محمد، إن شاء نستفاد كلنا

ان شاء الله يا صديقي

جمعة مباركة على الجميع بإذن الله