العيادة(الضلع التالت المفقود )

[infinity80]

بسم الله الرحمن الرحيم
سبب كتابتي الموضوع ده متاجر انا اعرفه علي المستوي الشخصي و اشهد ليه بالحرفية علي مستوي التحليل الفني و زيه كتير سواء علي مستوي متقدم او حتي مبتديء ممكن تشوفه حتي في نفسك و انت بتعمل حاجة انت عمرك ما كنت تفكر تعملها بالشكل ده.
التجارة في السوق محتاجة 3 اضلاع متوافر منهم اتنين في اغلبية المتاجرين او بنسبة 90% و هي دي النسبة اللي غالبا بتخسر في السوق.
الضلع الأول هو العلم سواء ده نقدر نقول عليه فهم قواعد السوق او تحليل فني او اساسي اللي منه تقدر توصل لطريقة تجارة او استراتيجية او نظام بيه تقدر تستغل راس مالك علشان تحقق اهدافك
الضلع الثاني:ادارة راس المال واللي بيها حنبدا في نتكلم في ان اي طريقة مهما كانت و مهما وصلت حرفيتك لازم تغلط و حتي لو مكنتش غلطة منك و زي ما بيقول المصريين لعبت اللعبة علي اصولها في برده احتمال و لو صغير 1 % دخول عوامل انت متعرفش عنها اي حاجة خصوصا اننا بنتعامل في سوق مفتوح 24 ساعة علي مدار العالم و مستحيل الف مرة تعرف كل المتغيرات و بالتالي مينفعش تتصرف في الوقت المناسب التصرف المناسب و عليه لازم يكون في طريقة ندير بيها راس المال للموازنة بين مكسب و خسارة و سحب ارباح و تكبير حساب

الكلام ده كله معروف طب ايه الجديد
انا عارف ان كتير وصلو للسطر ده و في انتظار الحل السحري و الضلع التالت اللي حيظبط الميزان و يا جماعة الحل ده فعلا موجود
الضلع التالت هو انت
وللموضوع بقية...

[التائب اليك]

انت ده كلمه كبيره يا باشا
انت فى هذا السوق هى النفسيه من طمع او خوف
صح
طيب استنى اكمل معاك
مستعجلش
تحياتى

[infinity80]

انا مستنيك يا باشا عشان الموضوع اصلا صعب يكمل بشخص واحد
والموضوع في الأول و الآخر حيكون مدخل لكل حاجة ممكن تكون عاوز تعملها في حياتك
و مش قادر انك تعملها لسبب أو لآخر
خلاصة الكلام يا جماعة المقدمة اللي فاتت اللي انتهت بكلمة (انت) مفادها انك توصل لمرحلة من التحكم بالذات تقدر فيها تفكر صح و تتصرف صح زي مانت مخطط و مدبر و متجيش وقت الجد و تلاقي نفسك بتعمل حاجات غريبة او بتقول حاجات عجيبة و ترجع تقول الكلمة اللي دايما بنقولها
"انا مش عارف ايه اللي خلاني اعمل كده"

[infinity80]

بداية الضلع التالت تبدا بسؤال مهم
هو ايه اللي المفروض يتعمل و ايه اللي انا فعلا بعمله
ايه الصح و ايه الغلط اللي بتعمله
دي من واحد لواحد بتفرق واللي محتاجينه دلوقتي حيكون الآتي:
-تجارب كل واحد الشخصية مع السوق و غلطاته اللي بتنتهي في الآخر بخسارته ايه اللي شايف انه ممكن يكون صح و يعمله و مش بيعمله ....ايه القاعدة اللي شايف انه لو مشي وراها حيكسب ...و ايه الغلطة اللي بيعملها و شايف انه لو بطلها حيبطل خسارة.
-مفيش متاجر رابح في العالم الا و ليه لستة قواعد بيمشي عليها و ملتزم بيها بكل صرامة ونسبة الناس اللي بتعمل كده برضه في الآخر هي نسبة ال 10 % الربحانة
-حتي مع وجود لستة القواعد دي فين الشخصية الصارمة اللي تقدر تتحكم في نفسها بالدرجة اللي تخليها اقرب للآلة في تنفيذ عمليات السوق بدون عواطف
الكلام لهنا خلص مؤقتا والكورة في ملعبكم

[infinity80]

مدخل التغيير لأي شخصية سواء كان التغيير ده إيجابي أو سلبي بيكون من خلال شقين ممكن نكون بنقوم بيهم عن عمد أو من غير قصد و دول بيشكلو حياتنا كلها علي مدارها
الشق الأول:البرمجة اللغوية العصبية
الشق الثاني: قوة العادة
انا عارف اني فتحت في موضوعين كبار بس بجد لو عاوز تغير خسارتك لمكسب لو عاوز تغير السيء فيك للأحسن مفيش طريق تاني حيوصلك لده غير تغييرك لذاتك و لنفسك
مفيش حاجة حتوصلك غير انك تبدا تبرمج عقلك و حواسك كلها برمجة صح تكون ايجابية فيها اللي انت عاوز تعمله فعلا مش اللي بتلاقي نفسك بتكلمك و تقولك اعمله
حديك مثال انا عارف انه حصل للناس كلها عشان تعرف اهمية اللي بنتكلم عليه
انت عارف ان السعر دلوقتي مش مناسب ابدا للدخول في السوق و عارف كمان ان السعر الصح اللي المفروض تدخل منه لسه كمان عليه 60 نقطة بس مجرد ما فتحت الشارت و بصيت و حللت و عرفت و قعدت مستني السعر يجيلك بدات تبقي مش علي بعضك....صوت من جواك بيقولك السعر حيهرب منك و و يجري و مش حتطول حاجة و شوية بشوية تلاقي ايدك بتجري علي الماوس و كليك من غير ما تفكر او تحاول تفتكر تحليلك تلاقي نفسك جوه السوق و مش عارف انت دخلت ليه

حد بيشبه علي السيناريو ده؟؟؟؟

[almalek77]

الكلام جميل جدا بس برمج شبكتك العصبية على تكبير الخط وقوي العادة دي فيك ..
مشكور يا باشا

[infinity80]

هههههههههة....ادي اللي بناخده
اقوله برمجة عصبية يقولي شبكة عصبية
صباح الفل

[almalek77]

هههههههههة....ادي اللي بناخده
اقوله برمجة عصبية يقولي شبكة عصبية
صباح الفل

أمرك يا سيدي حقك علينا بس بردو كبر الخط

[infinity80]

حاضر
يا سلام غالي والطلب رخيص

[المدارج]

موضوع قوي الله يعينك ويقويك متابعينك يالغالي

[tajer]

جزاك الله خير موضوع مهم وجميل

ومتابعين معاك

[infinity80]

نستكمل كلامنا مع سيناريو تاني من الحاجات اللي بنعملها واللي بيكون نتيجتها خساير هايلة ممكن تكلفك الحساب بالكامل
بدات العملية وحاسب كل حاجة و مخطط ومحلل و عامل اللي عليك و زيادة و بالفعل مشيت في طريقك في الأول و ادتك مكسب بس لم تصل الي الهدف اللي مخططله و بدات تلف و تنزل و انت مراقب و بتقول لنفسك ده تصحيح و شوية و ترجع و تجيب الهدف
و شوية و بدا الأخضر يقلب أحمر و انت اعصابك من الهدوء للعصبية بس برده لسه مستني و بتقول لنفسك انا تحليلي صح و العملية صح مع ان التحليل الصح ده ممكن يكون من 4 ساعات فاتت و في متغيرات و عوامل جديدة دخلت والتحليل اللي عملته نفسه خلاص وقته فات و يا دوب تاثيره كان للكام نقطة اللي طلعهم لمصلحتك و نزل من بعدها
شوية كمان و تلاقي السعر قرب من الستوب لوس و تشيط اعصابك خالص و صوت من جواك بيقولك دانا كنت كسبان و العملية بتاعتي دلوقتي كمان حخسر و ايدك تروح لا اراديا علي الستوب اللي حاطه و تشيله و تقول هي شوية و حيرجع السعر يكمل في طريقي اصلها كانت كسبانة و مش ممكن تخسر
و من هنا نقدر نقول انك فقدت القدرة تماما علي اتخاذ اي قرار سليم فيما يخص السوق او العملية او حتي نفسك
كشفت نفسك و قاعد مستني القدر و مش حتفوق غير لا قدر الله والخسارة اللي بخمسين نقطة بقت الحساب كله
بتشبه علي السيناريو ده؟؟؟
الفكرة لحد دلوقتي اننا محتاجين كل السيناريوهات اللي بتوصلك للخسارة و نرسمها كلها و محدش يشيل اي حاجة لنفسه...وجودها جواك بيخليها دايما جواك حتي لو قلت لنفسك انا مش حككرها تاني بس عارف....حتكررها تاني
زي ما بيقول المصريين....اللي بيخاف من عفريت بيطلعله.
و كلنا عندنا تجارب...و سيناريوهات...احكي...طلع اللي جواك حتي لو كانت غلطة سخيفة او تافهة مادام وصلتك لخسارة يبقي عمرها ما كانت تافهة
يمكن انت خت بالك منها ..غيرك لسه ميعرفهاش و لسه محصلتش معاه
و لو غيرك عارفها يبقي لسه ميعرفش ازاي مع انه عارفها لسه بيغلط و يكرر نفس الغلط
عندك سيناريو حصلك و عاوز تشاركه؟

[infinity80]

السيناريو الجديد...
بعد ما بصيت علي الشارتات و راجعت و فحصت و محصت و مش لاقي اي فرصة تدخل بيها السوق حسب تحليلك او الإستراتيجية اللي شغال بيها لحد هنا اللي المفروض تعمله هو انك بتحدد الأسعار اللي ممكن تدخل منها و تسيب السوق و تقعد تتفرج و تتابع من برة......لكن
حاجة غريبة من جواك بتدا تتحرك و تلاقي نفسك عمال تبص علي الشارتات تاني و بتدور علي اي سبب او اي شيء علي اساسه تدخل السوق او تفتح صفقة
و قبل ما تدري ايه اللي بتعمله تلاقي نفسك ايدك جريت علي الماوس و كليك فتحت الصفقة جريت بالظبط زي ما يكون حد تاني هو اللي بيعمل كده و بيعمله من وراك و مش عاوزك تعرف ده او تلحق تمنعه و تلاقي نفسك قبل ما تفكر كفاية في الصفقة يا دوب لاقيت سبب و جريت فتحت الصفقة حتي لو السبب كان واهي
و تكتشف و انت جوه ان اللي انت عملته كان غلط في غلط بس مش قادر تقفل و تخرج عندك امل انها تمشي معاك و تخرج حتي و لو ب10 نقط بس متبقاش غلطان
و شوية العملية مشيت ضدك و جريت كمان و قربت علي الستوب و يتكرر سيناريو انك تشيل الستوب اوحتي تخليه و هوووووب
ضربت العملية الأستوب
بتشبه علي السيناريو ده؟

[نجم برقة]

السيناريو الجديد...
بعد ما بصيت علي الشارتات و راجعت و فحصت و محصت و مش لاقي اي فرصة تدخل بيها السوق حسب تحليلك او الإستراتيجية اللي شغال بيها لحد هنا اللي المفروض تعمله هو انك بتحدد الأسعار اللي ممكن تدخل منها و تسيب السوق و تقعد تتفرج و تتابع من برة......لكن
حاجة غريبة من جواك بتدا تتحرك و تلاقي نفسك عمال تبص علي الشارتات تاني و بتدور علي اي سبب او اي شيء علي اساسه تدخل السوق او تفتح صفقة
و قبل ما تدري ايه اللي بتعمله تلاقي نفسك ايدك جريت علي الماوس و كليك فتحت الصفقة جريت بالظبط زي ما يكون حد تاني هو اللي بيعمل كده و بيعمله من وراك و مش عاوزك تعرف ده او تلحق تمنعه و تلاقي نفسك قبل ما تفكر كفاية في الصفقة يا دوب لاقيت سبب و جريت فتحت الصفقة حتي لو السبب كان واهي
و تكتشف و انت جوه ان اللي انت عملته كان غلط في غلط بس مش قادر تقفل و تخرج عندك امل انها تمشي معاك و تخرج حتي و لو ب10 نقط بس متبقاش غلطان
و شوية العملية مشيت ضدك و جريت كمان و قربت علي الستوب و يتكرر سيناريو انك تشيل الستوب اوحتي تخليه و هوووووب
ضربت العملية الأستوب
بتشبه علي السيناريو ده؟

موضوع جميل وحوار رائع مع النفس (( الامارة بالسوء)
تفكير بصوت عالي والسيناريو الغالبية تلعب نفس الدور
ضبط النفس ( الطمع + الخوف) + دخول آمن + ادارة راس المال = نجاح
بوركت اخي انفنتي

[infinity80]

في البداية بعتزر عن غيابي الفترة الي فاتت ده بسبب ظروف سفر و شغل و ان شاء الله نكمل الكلام اللي اتمني يكون فيه افادة للي يقراه