العيادة(الضلع التالت المفقود )

[infinity80]

السيناريو الجديد واللي في راي السيناريو القاتل اللي فيه دمار الحسابات و انك تعمله يبقي استني المارجن كول ان اجلا او عاجلا لا قدر الله طبعا
امشي معايا كده...بدات الصفقة من غير استوب لوس و عامل حسابك ان اللي موجود في الحساب دلوقتي يغطي السعر لو اتحرك ضدك و تفضل في السوق لحد ما السعر يرد ليك تاني و يمشي معاك
بعد شوية لقيت فعلا السعر مشي ضدك و سرح كتير و الأحمر زاد و من خبرتك الشخصية بالزوج انت عارف انه كده استنفد طاقته اليومية او خلص خلاص حركته و ده وقت نزوله و شايف قدامك مقاومة او دعم قوي و تضرب في دماغك فكرة انك لو زودت من هنا كمان صفقة ولا اتنين يبقي مش محتاج تستني انه يوصل لنقطة الدخول عشان تبدا تكسب و عاوز تستفيد من النزول اللي انت خلاص متاكد انه حيحصل و صعبان عليك اوي الرزق ده اللي عارف انه جاي و شايفه قدامك بس مش حتعرف تاخد منه حاجة
و هوب تلاقي ايدك جريت و فتحت صفقة تانية وفعلا ممكن تلاقي السعر مشي زي مانت مخطط و تلاقي الأحمر بيقل والأخضر بدا يزهزه و تبدا شوية تطمن و قلبك يقوي شوية بس يا خسارة...النزلة دي كانت تصحيح و مكملش السعر حركته معاك و يبدا يرجع تاني لمقاومة او الدعم و انت حتتجنن دلوقتي انت كنت كسبان و بدا المكسب يقل بس مش قادر تخرج برضه عشان عندك امل ان اللي بيحصل ده هو تصحيح لحركته معاكو بعدين حيجري لصالحك بس للأسف وصل لنقطة الدخول و بدا يكسر و انت خلاص اعصابك فلتت
دلوقتي بدل ما هي صفقة واحدة بقو اتنين و خسرانين و من غير استوب والخسارة كبيرة و مش حينفع تقفل و مستني و ايدك ولا قلبك مطاوعك
و شوية في شوية المارجن كول بيقرب و انت تقريبا مشلول مش عارف تعمل ايه غير انك تقعد تدعي و تبص للشاشة و انت عاوز تدخل جواها تحرك السعر بنفسك و يمكن كمان من كتر مانت مش مصدق تكون مديت ايدك للشاشة وعملت نفسك بتزق الشمعة....ايوة بتحصل و اكتر كمان
و شوية.............انتم عارفين ايه اللي حصل

بتشبه علي السيناريو ده؟
و يحصل اللي

[infinity80]

موضوع جميل وحوار رائع مع النفس (( الامارة بالسوء)
تفكير بصوت عالي والسيناريو الغالبية تلعب نفس الدور
ضبط النفس ( الطمع + الخوف) + دخول آمن + ادارة راس المال = نجاح

بوركت اخي انفنتي

ربنا يخليك و مشكور علي الدعوة وكلامك الجميل

[نجم برقة]

ربنا يخليك و مشكور علي الدعوة وكلامك الجميل

الحمد لله على السلامة يا غالي.. مستمتع بالحوار .. والضلع الثالث
الموضوع مهم حول البرمجة العصبية او النفسية وكيفية تدريبها وترويضها على قواعد راسخة
وارى ان الباقي كله مكمل لكل الاضلاع
استمر اخي

[RedMoon]

السلام عليكم

موضوع جيد جداً

دمتم

[infinity80]

السلام عليكم

موضوع جيد جداً

دمتم

و عليكم السلام و رحمة الله و بركاته
مشكور علي المرور

[infinity80]

السيناريوهات كتير و في الأخر النتيجة واحدة....تعب و ألم و خسارة
بداية الطريق نحو تغيير النفس هو انك تتعرف من اول و جديد علي نفسك....ايوة زي ما سمعتني
واحد من المواقف اللي الواحد بيقف عندها و مش بيبقي عارف يرد يقول ايه هو لما حد يساله و يقوله
كلمني عن نفسك
السؤال مشكلته انك عمرك ما وقفت للحظة بينك و بين نفسك و عرفت انت ايه و هي ايه
اوب....ايه الكلام ده هو انا حاجة و نفسي حاجة
اقولك هو ده المفتاح اللي حيحللك كل مشاكل حياتك
والأجابة ايوة
انت حاجة و نفسك حاجة و الناس الناجحة اللي بتقدر توصل في حياتها و تحقق اهدافها مهما كان شكل الهدف ده هو الشخص اللي بيقدر يتوحد مع نفسه
عاوزني اثبتلك انك انت مش انت ؟؟؟
راجع معايا السيناريوهات اللي فاتت و اللي كنت بحكيها لهدف اني ارجع ليها دلوقتي
- انت كنت عارف ان من غير الستوب حتخسر و حسابك ممكن يتدمر و فلوسك تضيع و مع كده شيلته
-انت كنت عارف ان لما تدخل بعمليات كتير حسابك مش حيستحمل و لو مشي السوق عكسك انت مع السلامة و مع كده كبرت حجم الصفقة
-انت برده كنت عارف ان لما متلاقيش فرصة في السوق و تدخل و خلاص علي امل السوق يديك ان ممكن يقلب ضدك و مع كده دخلت
-انت كنت عارف ان تحليلك بيقولك السوق مش حيديك اكتر من كده مكسب ومن عند المستوي السعري ده ممكن يرد عليك و مع كده طمعت و استنيت
و انت ... و انت...و انت....و انت
طب هو اللي بيعمل كده فعلا انت؟؟؟
ولا في حد تاني فضل طول عمره مستخبي عنك و لا تعرف عنه حاجة و ان الأوان نسلط عليه النور و يطلع و تعرف ان اكبر اعداءك اللي كان طول عمره بينغص عليك عيشتك .......
عايش جواك

[infinity80]

العدو الأكبر
الكلمة كبيرة و صعبة و اللي أصعب منها انك تكتشف ان مصير حياتك بالكامل كان دايما بين ايديك بنسبة 90 % و الباقي كان ظروف ملكش يد فيها بس مع ان المفاتيح كلها كانت معاك لكن بتبص و تلاقي نفسك علي الجانب الغلط من البحر و خايف حتي تنزل تجرب تعوم
عارف ايه اللي ناقص؟؟؟
عارف المفتاح فين؟؟؟
عارف المشكلة سببها ايه؟؟؟
اسكت كده شوية....لمدة دقيقتين...غمض عينيك....
اعمل كده فعلا...و بلاش تاخد كلامي بهزار و تضحك
اسمع كده....
مش سامع حاجة طبعا...ههههههههة
طيب اسمع بقي تاني بعد ما اقولك علي الصوت اللي فضل طول عمره جواك و انت عمرك ما فكرت ايه ده ولا جاي منين كل اللي بتعمله انك بتسمع بيقولك ايه و تعمله و فاكر ان ده انت بتفكر.
اسمع كده تاني
حط النور عليه و اسمع
اعرف ان ده مش انت
اعرف ان ده حد تاني
اسمع
دي اوووووووووووول خطوة في سبيل حييييييييييياتك كلها تعرف مين معاك و مين ضدك و انت مين وافكارك ايه والصوت اللي جواك اللي كان صاحبك طول حياتك مين واللأفكار اللي جاية منه ايه
عارف...
لو فوقت بجد و سمعت و انا قاصد كلمة سمعت عشان احنا من زمان اوي اتربينا و عشنا سنوات كتير و احنا مش عارفين و اصعب حاجة في الدنيا انك تكتشف ان كان في حد بيلعب بيك و انت مش دريان لاء و ايه طووووول حياتك اللي ممكن تكون سنيييييييييييييييين
اسمع
شوف بيقولك ايه دلوقتي.....اسمع الإيجابيات...اسمع السلبيات....اسمعه بيقولك انا تعبان و مش حقدر اسمعه بيقولك انا حخسر ....اسمعه بيقولك انا عمري ما حوصل للي انا عاوزه....اسمعه بيقولك الدنيا وحشة و الظروف دايما ضدي.....اسمع و حتلاقي كلام كتير اوي عمرك ما خت بالك منه
اسمع
بس المرة دي اسمع و انت عارف انه هناك.....متداري في ركن ضلمة

[infinity80]

الدرس الأول: STOPLOSS

في حياة المتاجرين سواء المبتديء منهم او المحترف يوجد 3 انواع من السلوكيات اللي بنتبعها لما بنبدا نفتح صفقة و نجهز الدخول والخروج
1- في ناس بتقول ان الحساب اللي معايا فيه مبلغ x و العملة دي عمرها ما بتعدي نقطة Y و لما ادخل بعدد صفقات Z يبقي حكون دايما في المضمون مهما انعكس عليا السعر و عليه ممكن استغني عن وقف الخسارة و مش استخدمه

2-في ناس بتحسب و تحلل العملية و تبقي عارفة ايه هو السعر اللي لو العملة كسرته او اخترقته يبقي حتتحرك في اتجاه معاكس للصفقة و بعدد كبير من النقاط يفضل معاه الخروج من الصفقة و بتخلي النقطة دي في دماغها و تقول لما يجي السعر عندها ابقي اقفل الصفقة و ليه بيعمل كده؟ عشان يبقي عنده فرصة لو السعر و ظروف السوق عدت النقطة بشوية و لقي ان ممكن السعر بدا يبين علامات ضعف و حيرد تاني في صالحه يبقي ميقفلش الصفقة و ميبقاش خسر علي الفاضي

3-في الناس اللي بتحلل و تحدد وقف الخسارة و منه تبرمجه في الصفقة بحيث يعزل نفسه عن ظروف السوق و مشاعره طبعا بفرض انه يقدر يعمل ده و ميجيش يطبق واحد من سيناريوهات الخسارة اللي اتكلمنا عليها

طبعا الكلام في وقف الخسارة و طرقه اتقتل بحث و اللي قلت عليه دلوقتي ملخص تقريبا لأغلب سلوكياتنا كمتاجرين ...طب لو حبينا نحلل سلوك الأول والتاني والتالت حنقول ايه

انت ايه رايك؟؟
انت مين فيهم؟؟؟
يا ريت نسمع

[kingstars]

السلام عليكم ورحمة الله وبركاته
موضوع رائع
متابع ...

[مسافر إلى الله]

موضوع رائع للغاية الحقيقة وقعدت أضحك كتييييييير على تصرفاتنا ...وضعتنا أمام أنفسنا والله مشكوووووووووووو

[infinity80]

السلام عليكم ورحمة الله وبركاته
موضوع رائع
متابع ...

موضوع رائع للغاية الحقيقة وقعدت أضحك كتييييييير على تصرفاتنا ...وضعتنا أمام أنفسنا والله مشكوووووووووووو

شكرا علي المتابعة و يا رب يكون الموضوع مفيد للجميع
و تابعوووووونا.....التقيل لسه مجاش

[TapeReader]

موفق

[infinity80]

تابع الدرس الأول: STOPLOSS

حنسيب الجانب النفسي شوية و نبدأ ندرس الموضوع من وجهة النظر الجميلة اللي الناس ما بتصدق تشوفها و تفتح علي الرابع وهي التحليلي الفني
ممكن يكون الشارت هو الشارت و نقطة الدخول واحدة و الظروف تكاد تكون متطابقة حتي التوقيت ممكن يكون واحد بس عمليتين اتفتحو مع بعض واحدة تكسب والتانية تخسر عشان واحدة ضربت ستوب والتانية لاء

الفكرة في الموضوع ان طريقة وضع الستوب لوس نفسها تختلف من شخص للتاني علي حسب نوع الستوب لوس
الله.....هو الستوب لوس ليه انواع؟؟؟!!!
هو ده الجديد النهاردة

1-ستوب لوس البسيط(الكمي):
في الحالة دي بنطبق القاعدة اللي كلنا بنكررها من زمان اوي لما بنقول اوعي تدخل باكتر من 10% من حسابك في عملية واحدة....فاكرها دي...دي اول حاجة كنت بتشوفها اول ما جيت تتعلم فوركس
و من هنا يبدا اول انواع الإختلافات بينا ...ليه....اقولك عشان في ناس بتغير في النسبة دي و بالتالي بتغير في وضع نقطة الخروج بمعني ان في ناس شغالة 10 في ناس شغالة 5 في ناس شغالة 3 في ناس شغالة 2 وفي ناس شغالة 50
طيب نتكلم بالأرقام عشان تكون المسائل واضحة نفترض ان انت شغال علي نسبة 10 % و معاك في رصيدك 1000$ يبقي انت كده الريسك او المخاطرة عندك 100$ للعملية الواحدة يعني لو لا قدر الله خسرت 10 عمليات ورا بعض حسابك يقفل
طيب ال 100$ دي معناها كام نقطة اقولك علي حسب انت النقطة عندك بكام
0.5-------> 200 نقطة
1--------->100 نقطة
1.5------->75 نقطة
2--------->50 نقطة
و هكذا..........
يبقي بكل بساطة عشان نحطها في صورة فورمة عامة او معادلة رياضية
لو فرضنا النسبة هي R والرصيد B و نقطة الدخول E و قيمة النقطة P
يبقي ممكن نقول علي طول ان ستوب لوس يساوي

SL=E+(B*R)/P
و ده في حالة البيع
SL=E-(B*R)/P
و ده في حالة الشراء

و من هنا بان كمان نقطة اختلاف بين المتاجرين و هي نقطة الدخول ....احنا مش بندخل من نقطة واحدة مع ان التحليل نفسه ممكن يكون واحد ...بس يبدا يبان هنا تاثير العامل النفسي او الصوت الداخلي اللي اتكلمنا عنه بيخليك تخاف السعر يهرب منك فتدخل بسرعة دلوقتي مع ان السعر بعيد عن نقطة الدخول الصح و طبعا ده ينعكس بشكل مباشر من المعادلة علي الستوب

و للموضوع بقية.....

[infinity80]

تابع الدرس الأول: STOPLOSS

2- ستوب لوس الفني:
بيعتمد النوع ده علي التحليل الفني للشارت و استخراج مستويات الدعم والمقاومة اللي متوقع ان السعر لا يتعداها او يخترقها او يكسرها ايا كان المسمي
مستويات الدعم والمقاومة نفسها مختلفة تختلف علي حسب نوع التحليل ....و الإستراتيجية كمان ده برده اللي بيرجعنا نقول سبب ان في عمليات بتنجح و عمليات تانية لاء لإن الستوب نفسه اتوضع من خلال تحاليل مختلفة
في التحاليل الرقمية و من تحتها انواع كتير في شغال بكامريلا و في شغال ببيفوت و في شغال ميوري و طرق كتير
و في تحاليل الشارت من عند القمم والقيعان يبدا يتحدد مستوي سعري بيلف السعر عنده
وفي كل التحاليل دي اصلا انا ببص علي فريم ايه
يعني النقط اللي طلعتها دي علي التحليل ده في اي فريم علي الساعة ولا الأربع ساعات ولا اليومي
شفت ازاي انها مش سهلة اوي زي ما كنت فاكر
علي اد الوقت اللي حتقعده تحسب نقطة الستوب تحطها فين علي اد احتمالات نجاح العملية دي بتزيد
حنحط شارت سريع كده نوضح بيه الكلام بحيث تبقي الناس عارفة بنقول ايه

[infinity80]

تابع الدرس الأول: STOPLOSS

نلخص الكلام النظري علشان نبدأ في العملي
فاكرين السيناريوهات
كنا حكينا عنها و عرفنا ايه اللي بيحصل فيها بس مقولناش جت منين....من هنا و رايح حنفصص واحدة واحدة و نجيب اصل السيناريو بيجي منين
في المرات اللي فاتت استعرضنا طريقتين لوضع الستوب لوس طب ايه الكلام.....نستخدم اي منهم..... حقولك ولا واحدة!!!
الله...أمال انت بتقول عليهم ليه....و لما مش حنستخدم ولا واحدة امال نشتغل ازاي..
اقولك صبرك عليا بس استني اسمع مني...لكل طريقة منهم مساؤي حتخليك بدل ما تستفيد يبقي في ضرر و دي سبب مهم جدا جدا جدا بيخليك بعد كده تفكر تشتغل من غير ستوب لوس و ينضاف عليها عامل انك تسمع ان في حد تاني سمعت انه بيشتغل و يكسب من غير ستوبات و نضيف كمان ان الصوت اللي جواك يبدا يلعب علي وجعك اللي اتولد لما خسرت و يكمل السيناريو

الطريقة الأولي : هو مين اللي قال ان عدد النقط اللي حددته ده حيقف عنده السعر و هو بيتحرك ولا حيبصله حتي؟؟؟؟
الطريقة التانية : النقطة اللي طلعتها من علي الشارت بالنسبة لسعر الدخول اللي ممكن تبدا بيه الصفقة حتكون بعيدة عدد كبير من النقط و اكيد مش حتكون ماشية مع رصيدك و حساباتك
طب ايه الحل؟؟؟؟؟؟

الحل السحري
هو ولا سحري ولا حاجة بس من بساطته و تاثيره اللي ممكن يخلي عملياتك الخسرانة بنسبة 50 % علي الأقل تقلب تبقي كسبانة يخليه سحري
بكل بساطة ندمج الطريقتين
ايوة زي ما سمعتني.....الأولي مع التانية
حنشرح ازاي

رقم 1- اعمل الطريقة الأولي و طلع حسابك ياهلك تشتغل علي ستوب لوس كام نقطة
رقم 2-طلع الشارت و حلل فني حسب استراتيجيتك و شوف الستوب يطلع كام نقطة
رقم 3- قارن الرقمين ببعض من الأولي و من التانية
رقم 4- و هي دي المفاجأة واللي نقدر نقول عليها زي لعيبة الكورة السهل الممتنع
تعمل ايه لما تلاقي الرقمين مش زي بعض

تعالو نتفق علي اتفاق
الستوب اللي حيطلع من رقم 1 هو الأساس يعني ده اللي انا مربوط بيه لا محالة
و عليه

أ - ستوب من رقم 2 اصغر منه يبقي نتوكل علي الله و نفتح الصفقة
ب -ستوب من رقم اتنين يساويه يبقي علي بركة الله و افتح الصفقة
ج-ستوب من رقم اتنين اكبر منه بعدد قليل من النقط يعني في حدود 30 نقطة
يبقي ممكن تفتح الصفقة علي حسب ارتياحك الشخصي للتحليل
د-ستوب من رقم اتنين اكبر بكتير يبقي نقف و نقول لاء

يعني انت عاوز تقولي يبقي التحليل الفني تمام والإشارة بتقولي ادخل والعملية قدامي بتناديني
و مدخلش

ايووووووة هو ده بعينه اللي بقولهولك

و لينا تكملة المرة الجاية مع كلام قوي جدا في الموضوع ده