العيادة(الضلع التالت المفقود )

[infinity80]

تابع الدرس الأول: STOPLOSS

في المرة اللي فاتت قفلنا الكلام علي حاجة جديدة علي مسامعنا
ازاي يبقي معايا فرصة و اسيبها ....دانا ما بصدق الاقي فرصة
ده حيكون مدخل للدرس التاني و هو نسبة الربح للخسارة و ده نتكلم عنه بالتفصيل بعدين
كل اللي محتاجين منه دلوقتي نمسك الورقة والقلم و نحسب

1- تعالو نسلم ان اي فرصة انت بتحللها و تلاقيها ماشية مع استراتيجيتك مهما كانت قوية و مهما كانت فرص نجاحها عالية لازم في احتمالية خسارة.....حتقولي استراتيجية المارد و استراتيجية العملاق ولا ايا كان حقولك لازم في نسبة للخسارة و لو حتي 1%
2-لو سلمنا لفرضية 1 يبقي بنقول ان الستوب لوس حيجيله وقت و يضرب نقول X
3-حنفترض ان استراتيجيتك ليها متوسط معين للأرباح في كل صفقة تكسبها نقول Y
4 - حنفترض ان دايما و انت بتفتح الصفقة واخد بالك ان لازم الأرباح تكون اكبر من الخساير و اقل نسبة تقبل بيها ان الأرباح تساوي الخساير بمعني مثلا انك بتحط X=Y
5-لو ضرب الستوب لوس و انت بعيد عن النقطة اللي المفروض حاسبها بعد دمج الطريقتين اللي اتكلمنا عليهم يبقي انت كده بتخلي X>Y

اووووووب.....من هنا يبدا الكلام
اساس عملية المتاجرة انك بتكسب و بتخسر..بس الهدف انك تعيش في السوق كفاية لحد ما تخلي مكاسبك اكبر من خسايرك و تحافظ علي النسبة و الفارق بين مكاسبك و خسايرك و تعليها بمعني لو بدات التجارة خسايرك اكبر من مكاسبك لمدة 3 شهور مثلا و من بعدها مكسبك اد خسايرك لمدة شهر و من بعدها مكاسبك اكبر من خسايرك بنسبة 10 عمليات كسبانة ل 5 خسرانين
و مع الوقت تزيد النسبة من 10 الي 3
دي دورة المتاجر الناجح
اهم حاجة انك تعيييييش في السوق
اهم حاجة انك تفضل في السوق

في السيناريو اللي فات
وقت ما X>Y ده مرة في مرة في مرة حياخد الحساب لتحت و عاوز اقولك انك مجرد ما حتلاقي حسابك بيتاكل حيبدا الضغط النفسي و اللي غالبا حيوديك لسيناريو واحد متكرر

تدخل بحجم كبير و من غير ستوب لوس

و نرجع لسيناريوهات الخسارة اللي اتكلمنا عليها
و اخر مسلمة حنقولها السوق موجود والفرص موجودة و انت موجود و فلوسك موجودة والوقت موجود ايه اللي ناقص عشان الأمور تمشي بالطريقة اللي انت عاوزها
ايه اللي يمنع ان علي الرغم انك شايفها فرصة انك تسيبها و تستني غيرها
مش كده و لا ايه

[مساهمكو]

يا سلام...... أسلوب شيق جداً ....

والله العالم راح يكون موضوع يكسر الحجر !!!!!

تابع أخي الكريم ،،،، بارك الله فيك

[Mohammad Tawfeeq]

العدو الأكبر
الكلمة كبيرة و صعبة و اللي أصعب منها انك تكتشف ان مصير حياتك بالكامل كان دايما بين ايديك بنسبة 90 % و الباقي كان ظروف ملكش يد فيها بس مع ان المفاتيح كلها كانت معاك لكن بتبص و تلاقي نفسك علي الجانب الغلط من البحر و خايف حتي تنزل تجرب تعوم
عارف ايه اللي ناقص؟؟؟
عارف المفتاح فين؟؟؟
عارف المشكلة سببها ايه؟؟؟
اسكت كده شوية....لمدة دقيقتين...غمض عينيك....
اعمل كده فعلا...و بلاش تاخد كلامي بهزار و تضحك
اسمع كده....
مش سامع حاجة طبعا...ههههههههة
طيب اسمع بقي تاني بعد ما اقولك علي الصوت اللي فضل طول عمره جواك و انت عمرك ما فكرت ايه ده ولا جاي منين كل اللي بتعمله انك بتسمع بيقولك ايه و تعمله و فاكر ان ده انت بتفكر.
اسمع كده تاني
حط النور عليه و اسمع
اعرف ان ده مش انت
اعرف ان ده حد تاني
اسمع
دي اوووووووووووول خطوة في سبيل حييييييييييياتك كلها تعرف مين معاك و مين ضدك و انت مين وافكارك ايه والصوت اللي جواك اللي كان صاحبك طول حياتك مين واللأفكار اللي جاية منه ايه
عارف...
لو فوقت بجد و سمعت و انا قاصد كلمة سمعت عشان احنا من زمان اوي اتربينا و عشنا سنوات كتير و احنا مش عارفين و اصعب حاجة في الدنيا انك تكتشف ان كان في حد بيلعب بيك و انت مش دريان لاء و ايه طووووول حياتك اللي ممكن تكون سنيييييييييييييييين
اسمع
شوف بيقولك ايه دلوقتي.....اسمع الإيجابيات...اسمع السلبيات....اسمعه بيقولك انا تعبان و مش حقدر اسمعه بيقولك انا حخسر ....اسمعه بيقولك انا عمري ما حوصل للي انا عاوزه....اسمعه بيقولك الدنيا وحشة و الظروف دايما ضدي.....اسمع و حتلاقي كلام كتير اوي عمرك ما خت بالك منه
اسمع
بس المرة دي اسمع و انت عارف انه هناك.....متداري في ركن ضلمة

مش فاهم حاجه

أنا لحد المشاركه دى كنت متابعك بس من هنا و ضعت

ياريت تشرح بتفصيل شويه

تحياتى

[infinity80]

يا سلام...... أسلوب شيق جداً ....

والله العالم راح يكون موضوع يكسر الحجر !!!!!

تابع أخي الكريم ،،،، بارك الله فيك

الله يكرمك و يباركلك
و بعون الله يكون موضوع متكامل و يستفيد الكل

[infinity80]

مش فاهم حاجه

أنا لحد المشاركه دى كنت متابعك بس من هنا و ضعت

ياريت تشرح بتفصيل شويه

تحياتى

انا بس حطلب منك تصبر معايا شوية و تستحملني
اقرا المشاركة تاني
و لو لسه مش مستوعب ايه اللي انا قصدي عليه كمل من بعدها
الكلام اللي بعد كده لحد دلوقتي مش معتمد عليه بتاتا
و قريب جدا
حنرجعله و بشرح مستفيض عشان المشاركة دي خصوصا هي اساس الموضوع بالكامل
انا بس حطلب منك تاني تستحملني و تصبر معايا

[infinity80]

الدرس التاني:نسبة الربح للخسارة

في المشاركات اللي فاتت اتكلمنا علي وقف الخسارة وو صلنا لحقيقة ان ممكن كتير يكون قدامك فرصة خالصة مخلصة و مع زلك علي حسب دراستك لفنون وقف الخسارة تسيبها
في الحقيقة مش هي دي بس الحالة الوحيدة ...النهاردة حنتكلم علي الحالة التانية!!!!
تانية!!! ....مش كفاية عدينالك اول مرة
جايبلنا كمااااااااااااان مرة تانية
امال لما حنسيب ده كله حنشتغل امتي!!
هو كله سيب سيب سيب مفيش دخول ولا ايه

بصو يا رجالة....تعالو نتفق علي حاجة لو انا عارف ان معايا شارع مكسر و كله مطبات و عربيتك لو مشيت فيه نسبة انها تطلع سليمة قليلة بس الشارع ده قصير
و عرفنا ان في شارع تاني لو مشينا فيه حنلاقيه مريح العربية بس هو اطول
حتمشي في اي طريق؟

نسب الربح للخسارة مقصود بيها ان بعد تحليلك الفني و بعد تحليل وقف الخسارة و عرفت مكانه و طلع ماشي مع ادارة راس المال بتاعتك و خلاص داخل
استني
هو انت حاطط هدف كام للعملية؟؟؟
افرض وقف الخسارة X
افرض الهدف Y
احسب نسبة X:Y
بداية القول قبل اي حاجة اقل نسبة مقبولة ممكن تشتغل عليها هي نسبة 1:1
بمعني وقف الخسارة 100 يبقي مدخلش عمليات يقل هدفها عن 100


امشي معايا كده......حنفترض انك متاجر جيد و ده معناه ان عدد عملياتك الكسبانة اكتر من الخسرانة ....طيب ...حنقول مثلا بتكسب 3عمليات و تخسر 1 في الأسبوع
معني ده انك كسبان 300 نقطة و خسران 100
و عشان انت محافظ علي نسبة الربح للخسارة و بتنقي عملياتك علي الأساس ده
يبقي اخر الأسبوع حتلاقي حسابك زاد 200 نقطة
دي تعملها عن طريق استراتيجيتك بحيث ان يكون اكبر خسارة ممكن تتعرضلها قصاد اقل ربح ممكن تستهدفه تحقق النسبة اللي قلنا بدايتك 1:1 و زود لو تقدر
طبعا لو مكناش بنعمل ده ايه يحصل.....
اوووووووووبة....ده واحد من الأسباب اللي واضحة وضوح الشمس اللي مش بنشوفها و بنلاقي نفسنا بنكسب و مع كده الحساب في النازل ...الله..ايه بيحصل؟؟؟؟
اديك عرفت الخدعة كانت فين

تقدر من هنا تصحح اوضاعك؟؟؟؟
تقدر تطبق؟؟؟؟
لو حنعملها نسب حقولك انك لو فعلا قدرت تطبق الدرسين دول بس ....بس....يبقي ضمنت ان شاء الله 60 % من السوق

بس استني......حتعرف تطبق؟؟؟؟
مممممم
مش حتعرف
عارف ليه
عشان حيمنعك
عارف هو مين؟
انت

[infinity80]

كيف تغير من ذاتك

وصلنا للحظة الحاسمة
و من هنا حنسيب شوية الكلام في التحليل و ادارة راس المال و نتكلم في صميم الضلع التالت
ازاي تغير من نفسك؟؟

الدرس الأول:الصورة الذاتية
نصحصح شوية بقي...الكلام اللي حنقوله دلوقتي مفتاح تغييير حياتك بالكامل و بكل سهولة و من سهولته و تاثيره مش حتصدق نفسك.
في عقل كل واحد مننا صورة محدودة لنفسه يقدر يعمل ايه... يقدر يشتغل قد ايه ...بيتضايق من ايه
بيفرح من ايه...امتي بيكون جريء....امتي بيخاف...امتي بيتوتر...امتي بيكون قوي...امتي بيكون ضعيف...الصورة دي بيكون فيها كل ما يمكن تتخيله عن نفسك و امكانياتك.

تعالو نفترض ان الصورة الذاتية زي جهاز الكمبيوتر اللي بين ايدك دلوقتي و نفترض كمان ان امكانياتك هي البرامج اللي شغالة علي جهاز الكمبيوتر و ان تغيير البرمجة في واحد منهم بيغير الوظايف اللي ممكن يقوم بيها الكمبيوتر....زي بالظبط ما بتعمل تحديث من وندوز اكس بي لفيستا و تلاقي الجهاز بقي اسرع مثلا يعني.

معقول اللي بتقوله ده...يعني معني كده اني لو غيرت البرمجة حتغير؟؟
شفت حتي السؤال و انت بتساله جه سهل اوي و جابته اسهل......
ايوة ايوة ايوة
غير برمجتك لصورتك الذاتية حتلاقي نفسك اتغيرت
غير برمجتك لصورتك الذاتية حتلاقي نفسك اتغيرت
غير برمجتك لصورتك الذاتية حتلاقي نفسك اتغيرت

عارف...اول عقبة قصادنا دلوقتي انك تصدق الجملتين اللي فاتو دول
و لوووووو حصل ده......لو حصل ده ياخوااااانا......يانهار ابيض...الدنيا ان شاء الله حتبقي بين ايديك
اللي عاوزين نوصله الفترة دي و ننجح فيه واجب بسيط اوي ......اقتنع و صدق الجملة اللي قاتت

بس

اطلب منك طلب و متضحكش و تعمله بجد؟؟؟
هات ورقة و اكتب 10 مرات و ببطء

تغييربرمجة صورتي الذاتية حيغير نفسي

اووووووووب.....شفت بقي دانا لسه مقفلتش معاك حتي و سامع صوتك بينك و بين نفسك بتتريق و تقول ايه يا عم اللي بيقوله ده احنا رجعنا الحضانة ولا ايه
وواحد تاني بيقول سيبك مش دلوقتي حنعملها بعدين
وواحد تالت بيقول اصل انا مش لاقي ورقة و قلم
اقولك علي حاجة .....اللي بيحركك في اللحظة دي و بيكلمك حد جواك عاجبه اللي انت فيه وميحبش ابدا ابدا ابدا التغيير واول ما بيشم ريحته بيعمل اي حاجة عشان يهبط عزيمتك و يمنع التغيير...و حنا عاوزين نغير

اللي طالبه مش حياخد دقيقتين

مستني ايه
يالا

[infinity80]

يا تري الناس لسه معايا ولا وقعتو مني؟؟؟

[infinity80]

بارك الله فيك
نحن بأنتظار باقي الشرح

شكرا اخي علي الدعاء و ربنا يجعله بخير ان شاء الله
و لباقي الأخوة يمكن انا موضحتش قبل كده تسلسل الموضوع ماشي ازاي بس احب انوه انه بعون الله حيكون شامل 3 مواضيع تكون ما يعرف باسم نظام التداول
1- الأستراتيجية(مفاجأة و حتبقي مسك الختام)
2-أدارة راس المال واللي قطعنا منها حوالي تلات اربع الشوط
3-تغيير النفس و ده دور العيادة و اللي احنا شغالين فيه دلوقتي

علي فكرة حكرر تاني يا جماعة التمارين اللي بنقول عليها من بره شكلها تافه و بسيط اوي و مش ممكن تصدق انها حتفرق معاك بس انا بقولك اهو لو كنت مشيت معايا و قريت لحد دلوقتي و اقتنعت و لو بنسبة بسيطة اوي ان بقول كلام يدخل العقل و فيه حقايق كتيرة كنت عارفها او غايبة عنك يبقي امشي معايا في دي كمان و صدقها

في حد عمل الواجب ؟؟؟

[infinity80]

كيف تغير من ذاتك

انتهينا في المشاركة السابقة إلي نتيجة مهمة....انت بتقول اني لو غيرت البرمجة حتغير
طب هو احنا نغير البرمجة ازاي اساسا؟؟
اقولك سؤال قوي جدا و حيكون الرد عليه طويل و حنبدأ اول رد النهاردة

الدرس الثاني:الحديث الذاتي السلبي

فاكرين لما اتكلمت قبل كده عن صوت بتسمعه جواك و دايما شغال في ودانك و مالي وجدانك كله عمال يعلق علي تصرفاتك و يقولك اعمل ده و متعملش ده...من هنا و رايح انا عاوزك دايما تتعامل مع الصوت ده علي انه حد تاني غيرك

في الكتب الإنجليزية بيسمو الحد التاني اللي بيكلمك ده هايد نسبة للرواية الشهيرة دكتور جيكل و مستر هايد و سموه كده عشان غالبا بتكون افكاره و كلامه من النوع الهدام او زي ما بنقول يا مصريين بيكسر المجاديف

هايد ده يا سيدي حكايته حكاية بكل بساطة مستخبي جواك و عامل نفسه صاحبك و دايما بيكلمك و صوته دايما مسموع حتي لو انت مش واخد بالك بس هو موجود....موجود حتي في اللحظة اللي انت بتقرا حالا دلوقتي....لو وقفت لحظة عن القراية و بصيت جواك حتلاقي الصوت شغال مش عاتقك.....و غالبا عمال يقول اييييييييييييييييييه التخاريف اللي بيقولها دي

هايد في نقطة ضعف قوية جدا جدا جدا ممكن تقلبه من عدوك اللدود لصاحبك الأنتيم اللي ممكن يطلعك سابع سما ....هايد بيبقي قوي جدا و انت مش واخد بالك منه لكن وقت ما تسلط عليه الضوء و تكشفه بيبقي طوع ايدك

هو احنا محتاجينه في ايه؟؟؟
فاكر لما قلنا يا برمجة؟؟؟ هو احنا حنبرمج ايه؟؟؟ قولنا يا سيدي صورة ذاتية و مفهمناش انت بتقول ايه...حقولهالك بصورة تانية و متزعلش
صورتك الذاتية مطبوعة في عقلك الباطن....اووووووووووبة دخلتنا في الكلام الكبير
لا يا سيدي ولا كبير ولا حاجة اسمعني

العقل الباطن هو اللي قلنا عليه المرة اللي فاتت زي الكمبيوتر و احنا عاوزين نبرمج الكمبيوتر و هايد حريف برمجة كمبيوتر يبقي نجند هايد يبرمج الكمبيوتر

طيب و انا محتاج الباطن ده في ايه ما الواعي كويس...حلووووووو اوي السؤال ده

بس يا سيدي مربط الفرس هو ان وقت التفكير الرايق المنظم الواعي يسد معاك كويس اوي و يكفيك بس وقت الأزمات و الإنفعالات الباطن ليه الكلمة العليا و بيتصرف زي ما هو متبرمج و اوتوماتيك بدون تفكير و هو ده اللي عاوزين نوصله

اتصرف وقت الإنفعالات اوتوماتيك باللي انا مبرمجه ....يعني وقت مالسعر يعكس عليا انا حاطط ستوب لوس و مش بشيله ...وقت ما السعر يجيب الهدف انا بخرج و مش بستني...وقت مالفرصة مش موجودة مش بدخل السوق...و ارجع للسيناريوهات و شوف لو كل سيناريو من دول لو كنت متبرمج صح كان ايه حصل

هو ده يا سيدي اللي عاوزين نعمله....برمج ...ظبط...و عيييييييش

وللحديث بقية

[infinity80]

انا بس حطلب منك تصبر معايا شوية و تستحملني
اقرا المشاركة تاني
و لو لسه مش مستوعب ايه اللي انا قصدي عليه كمل من بعدها
الكلام اللي بعد كده لحد دلوقتي مش معتمد عليه بتاتا
و قريب جدا
حنرجعله و بشرح مستفيض عشان المشاركة دي خصوصا هي اساس الموضوع بالكامل
انا بس حطلب منك تاني تستحملني و تصبر معايا

وضحت الدنيا كده معاك ؟
ولا في حاجة مش متابعني فيها؟

[infinity80]

كيف تغير من ذاتك

الدرس الثاني:الحديث الذاتي السلبي

استكمالا لحديثنا السابق حول طرق البرمجة للعقل الباطن اول طريقة معانا و السلاح ذو الحدين اللي لو اشتغل ضدك يضيعك و لو استغليته صح يرفع من شأنك هو الحديث الذاتي
بكل بساطة من صغرنا و احنا دايما بيتقلنا نعمل ايه ..من الأهل و من المدرسين و من حد كبير و كل كلمة اتقالت اتحفرت جواك و من غير ما تشعر بتطلع في كل موقف مشابه
يعني لو و انت صغير جيت تعاكس بنوتة أمورة و باباك قفشك مثلا ووبخك لو عدت السنين و جيت تعمل نفس العمل تاني مع الرغم إن والدك مش موجود بس حتلاقي الصوت الداخلي بيزن علي ودانك و حتلاقي نفسك بتقف

انا ليه بقول الكلام ده........افتكر اول تجربة خسارة ليك و احساسك بيها و الكلام اللي قلته لنفسك
و ازاي كنت ماسك كرباج و بتجلدها ...كل كلمة قلتها ساعتها اتحفرت جواك و ارتبطت بتجربة المتاجرة و مع كل مرة تيجي تفتح فيها صفقة بتكون ايدك مرعوشة مش واثقة

قيس علي كده كل تجربة ممكن بنمر بيها و احنا بنتاجر....ستوب لوس ينضرب ....هدف يتحقق...غلطة و تخسر....سوق بيرد عليك يخسرك و بعدين يرجع ....عملية من غير ستوب و مارجن كول...كتييير ...كتييير....و في كل موقف من دول الكرباج شغال و كل كلمة بتقولها لنفسك بتتحفر جواك و تبقي جاهزة تشتغل اوتوماتيك اول ما تيجي تعيد التجربة

اظن انت بدات تفهمني....الصوت الداخلي شغال بيقول حاجات عن تجارب سابقة و احنا قلنا الصوت الداخلي بيبرمج العقل الباطن....عارف السحر في الموضوع ايه....

عقلك الباطن عمره ما بيعرف يفرق ما بين الحاجة الحقيقية و الخيال ....يعني اللي بيسمعه بيروح يعمله.....يعني انت بكل بساطة لما هايد يفضل يزن علي دماغك بكلام عن الخسارة....خمن كده
حتخسسسسسسسسسسسر......قالوها زمان.....اللي بيخاف من عفريت بيطلعله

عمرك جربت انك تفضل تفكر في حاجة و فجأءة تلاقيها بتتحقق بكل تفاصيلها و تضرب كف علي كف

عرفت ليه؟؟؟
حطيت ايدك علي الخيط؟؟؟
جرب كده؟؟؟
خلي الصوت الداخلي اللي جواك دايما تحت ملاحظتك....شوف من كللللللل الكلام اللي بيقوله ده اد ايه كلام سلبي بيقولهولك....و كله برمجة و انت تستغرب هو انا ليه بعمل كده مع ان انا مش كده

الحل السحري.....سيطر انت بقي علي الكلام ده......هات ورقة و قلم.....شوف نفسك تبقي ايه.....شوف عاوز تبرمج ايه....اكتب فكرة واحدة كل مرة....ركز عليها ....و كررها في سرك
كررها ...طول مانت واعي كررها.....كررها.....خلي الفكرة معقولة....متسرحش و تتخيل اني حخليك تبقي سوبرمان و تطير و بعدين تجيبلي مصيبة و تقول ده هو اللي قالي

الفكرة لازم تكون :
1-معقولة ممكن تتحقق
2-تقولها بصورة الحاضر ...يعني مثلا لو عاوز تكون جريء...قول انا جريء
3- تكون بصورة الإيجاب مش السلب ...نفس المعني ممكن توصله بطريقتين بس عقلك الباطن عمره ما بيشوف النفي.....يعني لو عاوز تبقي شجاع ...قول انا شجاع....متقولش انا مش جبان....عقلك الباطن مش حيشوف كلمة "مش جبان" حيشوف بس "جبان" و يبقي انت جيت تكحلها عمتها

علي فكرة يا جماعة ...نتائج الصوت الداخلي سريعة جدا ما دمت مقتنع بالكلام لو عارف ان اللي بتعمله حيجيب نتيجة يبقي خلصت ...البرمجة صح ...و استني النتيجة
عارف الممرضين في احدي المستشفيات كانو بيعملو ايه مع المرضي عشان يعملو تجربة ...بدل الدوا كانو بيدوهم فيتامينات بس و بياكدولهم ان ده دوا جديد و مفعوله اكيد و الناس صدقت و خفت

يبقي اول خطوة نحو النجاااح.......الغي الكلام السلبي .....برمج بالإيجابي ...استني النتيجة
و قربنا اوووووووي يا جماعة

[mofa]

كلام كبير من ناس كبره

روح ياراجل الله يوفقك
والله جبتها عل الجرح

[infinity80]

كلام كبير من ناس كبره

روح ياراجل الله يوفقك

والله جبتها عل الجرح

ربنا يخليك يا باشا
و يوفقنا كلنا ان شاء الله
اهوووو الجرح بقي ده اللي انا قاصد انه يطلع و يبان و الناس تتكلم عنه
عاوزه يظهر و يبان و عليه الأمان
الجرح ده اللي عاوزين نسلط عليه الكشاف و منتكسفش منه
دفنته جوا حيخليه موجود و يبوظلك كللللللللللل شغلك

اظهر و بان عليك الأمان

[infinity80]

كيف تغير من ذاتك

الدرس الثاني:مكافئة النفس:

تاني طريقة من طرق البرمجة الذاتية و اللي مشهود ليها بالكفائة هي انك تكافيء نفسك
يعني ايه يا عم الكلام ده؟

اقولك.....بص يا سيدي بكل بساطة كل لما تعمل حاجة و عاوز ثبتها جواك بشرط طبعا تكون صح كافيء نفسك بحاجة تكون بتحبها

كل واحد منا عارف ايه بيبسطه و بيحبه و يخليه مرتاح....يعني مثلا في ناس بتحب الشيكولاتة و الجاتوه...في ناس بتحب تروح سينما...في ناس تحب تعمل تليفون...كل واحد و عارف نفسه
الفكرة في الموضوع...ارجع برده لزمان و افتكر لما كنت بتذاكر كويس و تدخل الإمتحان و لما تجيب درجات كويسة اوي ترجع البيت تلاقي فرح معمولك بقي و كلام حلو يعجبك و يخليك حابب نفسك و طاير من علي الأرض طير

و تعدي السنين و تلاقي نفسك في لحظة داخل علي امتحانات و من جواك تروح لا إراديا تذاكر كويس فاكر لسه احساس الفرحة اللي حسيته اول مرة و كل المشاعر الجميلة اللي كانت بتجري جواك زي الخيل

بكل بساطة ....الفعل يتبعه مكافأءة ...هايد حيحبك و عشان هو حابب المكافأءة حيروح منه لنفسه بعد كده يعملك نفس الفعل تاني لا إراديا

شفت هايد ساذج ازاي....هوووووووو كده بالظبط...طريقك ليه سهل بس تعرف مفاتيحه و ادي المفاتيح معاك...اديك عرفت تدخله منين و عرفت هو ممكن يدخلك منين

سر التنفيذ هو انك تكرر ...لما قلنا الحديث الذاتي قلنا كرر ....و برده هنا بقولك كرر الفعل و كرر مكافئتك عليه في كل مرة

و للحديث بقية