الدايفيرجينس ببساطة ..... و استراتيجيات....

[samsam22]

تابع - الدايفيرجينس

راح الترند شادد حيله تاني ( لسة شباب ) .. و طلع لفوق اكثر من الاول .. يعني عمل هاير هاي

. و راح المؤشر بعد 15 دقيقة اخري ..راح قايس سرعة الترند ولقاها 70 ..

راح موشر المومينتم راسم نقطة ثانية عنند 70 علي الشارت

.. وهي بالطبع اعلي من النقطة اللي قبلها عند 60 ..

و بعدين راح المؤشر وصل بينها و بين النقطة اللي قبلها عند 60 .

. فظهر لنا خط المؤشر متجه لاعلي ...و عمل قمة اعلي من اللي قبلها ( هاير هاي )

لحد دلوقتي مافيش مشكلة ..

كل ما السعر يرتفع و يعمل هاير هاي ...يروح المؤشر مقلده و يعمل هاير هاي

يعني احنا في ترند صاعد

[samsam22]

تابع الدايفيرجينس

دلوقتي خد بالك هنا قوي ....لان هي ديه اهم نقطة...

و اللي حتفرق معانا كثيييير في فهم الدايفيرجينس

و حتخلينا نتخيل اللي بيحصل

و نبقي فاهمين .. مش حافظين

----------------------

الترند لسة ماشي لفوق .. بس تعب حبتين فهدي من سرعته

.. بس لسة ماشي لفوق ...يعني عمل هاير هاي

و بعد 15 دقيقة .. راح مؤشر المومينتم قايس سرعة الترند لقاها 55 ( الترند تعب و هدي من سرعته )

....راح المؤشر راسم نقطة عند 55 ...و النقطة دي اكيد تحت النقطة اللي قبلها عند 70..

و كالعادة راح المؤشر موصل النقطة ديه باللي قبلها ..

. راح الخط اللي بيرسمه المؤشر نازل لتحت ..

و عمل لوور هاي ...( عكس السعر اللي عمل هاير هاي)

--------------------------------------

فلما تيجي حضرتك تبص علي الشارت

حتلاقي ان السعر طالع لفوق ..

. و فيي نفس الوقت

المؤشر نازل لتحت

و ساعتها لو رسمت خط علي السعر ..من اعلي قمتين للسعر ( اخر قمتين)

و خط اخر علي المؤشر ... من القمتين المقابلتين له علي للسعر

حتلاقي ان فيه اختلاف في اتجاه الخطين


الخط اللي علي السعر متجه لاعلي

و الخط اللي علي المؤشر متجه لاسفل

يعني حصل دايفيرجينس

-----------------

و اكيد دلوقتي انك حتبقي عارف ليه حصل الدايفيرجينس ..

و ليه المؤشر ماشي في عكس الاتجاه للترند

لانك عارف ان السبب في حدوث الاختلاف ده اللي بنسميه دايفيرجينس

هو ان سرعة الترند الحالي بدت تقل

و ممكن يكون ده معناه ان الترند تعب و اجهد

--------------

[samsam22]

تابع الدايفيرجينس

تعالي نكمل المثال

المهم بعد ما حصل اللي حصل

فضل الترند برضه يطلع بس بالراحة و ببطأ

لانه بقي تعبان قوي

والترند لسه بييطلع فعمل هاي جديدة .. اعلي من اللي قبلها

يعني عمل هاير هاي

و بعد 15 دقيقة راح مؤشر المومينتم قايس سرعة الترند

لقاها 45 .. يعني كما اقل من السرعة اللي قبلها .

راح مؤشر المومينتم راسم نقطة عند 45 تحت النقطة اللي قبلها عند 55

و بعدين وصل خط بينهم .. و بالتاكيد الخط متجه لاسفل

يعني المؤشر عمل لوور هاي ( بدلا من هاير هاي زي السعر)

-----------------------------

طيب تفتكر لو احنت وصلنا بين اخر هايين علي السعر بخط

و اخر هايين علي المؤشر بخط حنلاقي ايه؟

تمام ...حنلاقي اختلاف في اتجاه الخطين .. خط السعر متجه لاعلي ... و خط الموشر متجه لاسفل

-----------------------

طب تقدر تقولي ده معناه ايه ؟

برافو عليك ... معناه دايفيرجينس

-------------------

طب تقدر تفسر لي.. هو ليه حصل الدايفيرجينس؟

ما شاء الله برافو عليك .. انت دلوقتي بقيت استاذ

بالضبط ... حصل لان سرعة الترند بتقل ..

علي الرغم من ان الترند لسه ماشي في اتجاهه

----------------------

طب سؤال اخر مش من المنهج ... تفتكر ده لما يحصل بيدل علي ؟

لا ياعم مش معقول كده .. ما شاء الله عليك .. انا مش حاكمل الموضوت .. ده انت مفروض انت اللي تيجي تشرح

بالضبط .. ده بيدل علي ان الترند بيضعف من الداخل و اجهد

--------------

طب حاسألك سؤال تاني برضه مش من المنهج و عايزك ترد عليه

بس بعد ما نكتب الكلام الكثيييييييير ده اللي اتكلمناه في جملتين

[samsam22]

تابع - الدايفيرجينس

المفروض من اللي فات ده اننا نكون عرفنا

1- ليه ان المؤشر احيانا بيتأخر عن السعر

2- و عرفنا ايضا ليه المؤشر احيانا بيمشي في اتجاه عكس السعر

--------------------------

و السبب في الحالتين من غير ما نستخدم الكلام العلمي الصعب و نقول

ان السبب هو ان معدل تغير سرعة السعر ... لا يتناسب مع سرعة و حركة الترند

حانقول بالعامية

ان سرعة الترند بتبطأ

و عداد السرعة ... اسف .. قصدي مؤشر المومينتم ... بيفضح الترند .. و يبين ان سرعته قلت

------------------

يبقي عايزيين اول ما نشوف دايفيرجينس .. نفكر ان سرعة الحركة الحالية قلت و بطأت

يعني ممكن نقول ان الترند تعب و اجهد حبتين !!

و هو من بره بيحاول يخدعنا ...و يورينا انه لسه بصحته ..و لسه ماشي في اتجاهه

بس الاشاعة الطبية اللي احنا عملناها له باستعمال مؤشر المومينتم اثبتت ان فيه

نزيف داخلي مش باين من بره

و ان الترند الحالي مريض و عيان و مجهد و بينزف داخليا و علشان كده سرعته بتقل

------------------------------------------

طب السؤال دلوقتي

لما الاشاعة الطبية اللي اخدناها باستعمال مؤشر المومينتم و اثبتت ان الترند مريض و عنده دايفيرجينس

يبقي ده احتمالاته ايه !!!!!!

ممكن الدايفيرجينس ده يتعالج .. و لا المرض حياخد و قته مع الترند ؟

و سوال اخير بره المنهج برضه

طب احنا ممكن نستفيد من ده ازاي ؟

------------------

اسيبكم دلوقتي تفكروا في الاسئلة ديه

و اترككم في رعاية الله

و اذا اراد الله.. لنا عودة ان شاء الله

بالتوفيق ان شاء الله

[ALESSA]

ماشاء الله تبارك الله ....................
كم كنت اتمنى أن تضع شارت ليسهل التوضيح أكثر .

[مرعي آل عباس]

لماذا تم تجاهل مؤشر الماكد في شروحاتك الاخيرة

[samsam22]

ماشاء الله تبارك الله ....................
كم كنت اتمنى أن تضع شارت ليسهل التوضيح أكثر .

شكرا اخي الكريم

ان ما اقدرش ازعلك ابدا

ان شاء الله الشارتات جاية اثناء الشرح ... و حتكون كثييييير باذن الله

و الشرح اللي فات عملت له شارت علشان خاطرك

و هي مرفقة مع هذه المشاركة للتوضيح

بالتوفيق ان شاء الله

[samsam22]

لماذا تم تجاهل مؤشر الماكد في شروحاتك الاخيرة

اخي الكريم مرعي

اتمني ان الماكد مايكونش سمع الكلام ده .. لانه كده ممكن يزعل مني

فيه حد يقدر يتجااااهل شيخ المؤشرات .. حبيبنا عم الماكد !!!

ده الماكد ده حبيبي من زمان

انت تقريبا ما خدتش بالك .. انا باتكلم عامة عن مؤشرات المومينتم

و الماكد ده وااااحد من مؤشرات المومينتم

فيبقي كده انا ما تجاهلتوش و لا حاجة

و مين يقدر يتجاهل الماكد حبيبنا..

ان شاء الله كل مؤشر و استعماله حيكون له مشاركة خاصة به

و الماكد علشان خاطرك انت .. ان شاء الله حيكون له

برضه مشاركة

بضحك معاك حبيبي

و القادم افضل ان شاء الله

بالتوفيق ان شاء الله

[مرعي آل عباس]

ممكن توضيح اكثر اخي السمسم اللذيذ ل مؤشرات المومينتم

هل هو مؤشر واحد او اسم لعدت مؤشرات و ما هو اسمه الأجنبي

بارك الله فيك و في مالك

[samsam22]

ممكن توضيح اكثر اخي السمسم اللذيذ ل مؤشرات المومينتم

هل هو مؤشر واحد او اسم لعدت مؤشرات و ما هو اسمه الأجنبي

بارك الله فيك و في مالك

شكرا اخي الكريم مرعي علي الدعاء

و لك مثله ان شاء الله

---------------

المومينتم ديه هي خاصية معناها معدل التغير في السعر هنا

و هناك مؤشرات عديدة لقياس المومينتم

منها علي سبيل المثال و ليس الحصر

الماكد و ال RSI و ال CCI و ال ستوكاستيك و الويليام و مؤشر المومينتم

---------------

و انا كنت شارح شرح مبسط جدا لل ال RSI و ...ال CCI في موضوع استراتيجيات سهلة

ال RSI

https://forum.arabictrader.com/t1569...ml#post2548692

https://forum.arabictrader.com/t1569...ml#post2548706

https://forum.arabictrader.com/t1569...ml#post2549315

-------------------------------------

ال CCI

https://forum.arabictrader.com/t1569...ml#post2570548

https://forum.arabictrader.com/t1569...ml#post2571393

https://forum.arabictrader.com/t1569...ml#post2572147

https://forum.arabictrader.com/t1569...ml#post2572693

https://forum.arabictrader.com/t1569...ml#post2573715

https://forum.arabictrader.com/t1569...ml#post2577204

https://forum.arabictrader.com/t1569...ml#post2578418

---------------------------------

و ياريت اي حد متابع ياخد فكرة عنهم .. لانها حتسهل المتابعة هنا ان شاء الله

-------------------

و ان شاء الله حيبقي فيه شرح للمومينتم و طريقة عمل مؤشراتها هنا

لمعرفة كيفية استخدامهم في الدايفيرجينس ... من المغزي و المعني لاستخدامهم .... و طرق دخول

و الشرح ده عن قريب ان شاء الله

------------------------


ملاحظة

قد لا استطيع المتابعة و الكتابة في الايام القادمة لظروف خاصة (حوالي اسبوع )

.. و لكن ساحاول ان شاء الله وضع مشاركة او اكثر كلما سمح الوقت خلال هذه الفترة

نسألكم الدعاء

و اذا اراد الله ... لنا عودة ان شاء الله

بالتوفيق ان شاء الله

[مرعي آل عباس]

الله يردك سالم غانم سعيد البال و الحال راضي الوالدين ل يرضا عنك الله في الدارين

[albusaidy99]

ماشاء الله شرح متميز تابع بارك الله فيك.

[samsam22]

تابع- الدايفيرجينس


بعد ما عرفنا معني الدايفيرجينس ... و ازاي نرسمه ... و ازاي نستكشفه

و عرفنا ايضا ليه ازاي بيتكون

و عرفنا ان تكوينه بيدل علي ضعف في الترند الحالي ... او ممكن نقول ضعف داخلي

لولسه فاكر الاجابة علي الأسئلة اللي فاتت ... يبقي تقدر تكمل قرأءة الموضوع

-----------------------------



كان فيه بعض الأسئلة اللي ذكرتها عن الدايفيرجينس في اخر مشاركة

و كان اول سؤال هو لما نشوف حالة دايفيرجينس

يبقي ده احتمالاته ايه

و الاجابة علي هذا السؤال مهمة جدا

لانها حتغير عند البعض بعض المفاهيم عند استعمال الدايفيرجينس

و منها ايضا حنعرف اجابة باقي الأسئلة

و علشان نجاوب علي السؤال ده

تعالوا مع بعض الاول نشوف هذا المثال





يتبع

[samsam22]

تابع - الدايفيرجينس

فاكرين مثال العربية اللي كان صاحبها مسافر من الجنوب الي الشمال

و بدأ الطريق بسرعة 50 كيلو/ساعة ... و زادت السرعة الي ان وصلت 70 كيلو/ ساعة

و بعدين تعب فهدي السرعة ( داس علي الفرامل ) و نزلت السرعة ل 55 كيلو / ساعة

و العربية فضلت ماشية في اتجاهها

و رسمنا الكلام ده علي الرسم البياني و لقينا اتجاه السرعة للعربية .. يختلف عن اتجاه حركة العربية


قلنا هنا ان ده دايفيرجينس

-----------

يبقي من هنا كل اللي عايزيين نعرفه ان

الراجل لما يدوس علي الفرامل و يهدي السرعة بيحصل دايفيرجينس ..


تمام كده

--------------

طيب كلنا عارفين ان لما بندوس علي الفرامل ... بيظهر ضوء احمر في الخلف من العربية

و الضوء ده علشان ينبه و يحذر العربية اللي خلفها ان العربية اللي قدامه صاحبها بيدوس فرامل

فبالتالي هو حياخذ حذره و يتنبه




---------------------

طب لو انت اللي سايق وراء هذا الرجل اللي في المثال

و شوفت الضوء الاحمر ...: اكيد حتاخذ حذرك و تنتبه ان فيه شئ بيحصل في العربية اللي قدامك

طب الضوء الاحمر هل عرفت منه ان العربية اللي قدامك حتقف ...

.ولا بس حتهدي و بعدين تكمل طريقها عادي

و لا انها ممكن تلف و تعود للخلف في الطريق المعاكس

------------

طبعا بالتأكيد ولا حاجة من دول انت عرفتها من الضوء الاحمر

انت بس عرفت انك لازم تاخذ حذرك و تنتبه من العربية اللي قدامك ..

بس ما تعرفش حيحصل ايه

--------------

و ده بالمثل هو الدايفيرجينس اللي علي الشارت

هو عبارة عن الضوء الاحمر للفرامل

هو بينبهك و بيحذرك ان فيه حاجة حتحصل ..

بس ما بيقولش او يعطي لك اشارة بيع او شراء

-----------------------------

بالمثل زي العربية لما الترند هدي من سرعته و شفت حضرتك الدايفيرجينس ...انت هنا لسا ما تعرفش الترند حيعمل ايه

هل هو زي العربية ممكن يكون بيهدي من سرعته ( بيعمل تصحيح) و بعدين حيكمل في اتجاهه؟

و لا هو بيهدي زي العربية ..علشان ناوي يلف و يعود للخلف... و يمشي في الاتجاه المعاكس ( تغيير اتجاه للترند )؟

ولا هو بيهدي و حيقف حبه... و يحود يمين و يمشي في تذبذب ؟.

بالطبع كل ده حتي الان لا نعرفه

و بالتالي حتي الان لا نعرف ان نقرر ان نقوم بعملية شراء او بيع

-------------------------------


و هي ديه الغلطة اليي بيقع فيها الكثير من المتداولين .. وانهم يشتروا او يبيعوا بمجرد ظهور اي دايفيرجينس


------------------

يبقي الخلاصة هنا

ان الدايفيرجينس ما هو الا اشارة تحذير و تنبيه ... و ليس اشارة بيع او شراء

فلما نشوف الدايفيرجينس علينا ان ننتبه و ناخذ حذرنا .. و لا نتسرع باخذ قرار بالبيع او الشراء

----------------

و انا حبيت اوضح هذه النقطة قبل ما نشرح انواع الدايفيرجينس

لان الكثير من المتداولين يفتحون صفقات بيع او شراء بمجرد ظهور الدايفيرجينس و التعرف علي نوعه..

و هذا خطأ شائع يؤدي الي الخسارة في احيان كثيرة

-------------------

و سنتعرف ان شاء الله لاحقا علي انواع الدايفيرجينس ...و افضل الاماكن لاستخدامها

و افضل الشروط التي تزيد من احتمال نجاح الدايفيرجينس ان شاء الله

-------------

اترككم الان في رعاية الله

و اذا اراد الله ....لنا عودة ان شاء الله

و لا نسألكم الا الدعاء

بالتوفيق ان شاء الله

[سعد اليتيم]

ما شاء الله شرح سلس و وافي ...
في انتظارك بارك الله فيك ...