الدايفيرجينس ببساطة ..... و استراتيجيات....

[samsam22]

اشكر الجميع شكرا جزيلا طيبا
علي هذه المشاركات الراقية و الكلمات الطيبة الجميلة
بارك الله فيكم جميعا
و رزقنا و رزقكم بنعمة الايمان و الصحة و البركة في كل شئ ان شاء الله
و حفظنا و حفظكم من كل سؤ ومن الخسارة
و رزقنا و رزقكم رزقا حلالا وفيرا طيبا
و اسعدنا جميعا في الدنيا و الاخرة ان شاء الله

و سنكمل باذن الله بعد قليل

[samsam22]

تابع - الدايفيرجينس


بعد ما عرفنا معني الدايفيرجينس ...و قلنا انه هو حالة يحدث فيها اختلاف في اتجاه الحركة بين السعر و المؤشر

و قلنا كمثال انك تلاقي مثلا السعر يتحرك لفوق..... و تلاقي المؤشر يتحرك لتحت ... او العكس .

===========================

و بعدين عرفنا ازاي نرسم الدايفيرجينس علي الشارت ...

و قلنا اننا لو بنرسم خط علي الهايات علي السعر .. يبقي نرسم خط اخر من الهايات المقابلة له علي المؤشر .

و لو بنرسم خط من اللوهات علي السعر .. يبقيي نرسم خط اخر من اللوهات المقابلة علي المؤشر

و لو فيه اختلاف في الاتجاه

يبقي عندنا حالة دايفيرجينيس


=========================

طب تعالوا نعرف ازاي او كيف يتكون الدايفيرجينس

[samsam22]

تابع- الدايفيرجينس


واحد دلوقتي ممكن يسالني. و يقول

. انت قلت ان الدايفيرجينس بيحدث نتيجة اختلاف الاتجاه بين حركة السعر و المؤشر صح ولا مش صح؟

فاحرد عليه و اقول له .. الله ينور عليك كلامك صح بالتاكيد

----------------

فحيقولي مش احنا دايما بنسمع جملة ان المؤشرات بتتبع السعر

.. يعني السعر يطلع لفوق .. يطلع معاه المؤشر .. ينزل السعر لتحت ينزل معاه المؤشر لتحت .. تمام ده و لا مش تمام؟

حارد عليه و اقول له هو ده المفروض

-----------------

حيقولي طب فهمني بقي ازاي المؤشر اللي مفروض بيتبع السعر ... بيمشي في انجاه عكس حركة السعر

حاقول له .. لان المؤشر لا يقيس حركة السعر ....و لكن المؤشر بيقيس معدل سرعة التغير في السعر

--------------------------

حيقولي .. بصراحة مش داخلة دماغي و مش قادر اتخيلها

ممكن توضح اكثر

حاقول له مافيش مشاكل .. انا برضه كنت مش فاهمها في الاول و مش متخيلها

حاقولك مثال ان شاء الله يقرب الفكرة لك

صلي علي النبي

عليه افضل الصلاة و السلام


يتبع

[samsam22]

تابع - الدايفيرجينس




تعال نشوف المثال ده

لو انت سايق العربية بتاعتك و مسافر من بلد في الجنوب و متجه الي بلد في الشمال مثلا

و طلعت علي الطريق فانت حتاخد الاتجاه اللي متجه للشمال علشان توصل للبلد اللي انت رايح لها

-----------------------------

و لو انت سايق و بتراقب عداد السرعة كل 15 دقيقة ( خايف من الرادار )

حتلاقي مثلا انك بدات الطريق بسرعة 50 كيلومتر/ساعة ..و بعدين و انت لسه نشيط و عايز توصل بسرعة فزودت السرعة ..

و بعدها ب 15 دقيقة بصيت علي المؤشر و هو مؤشر السرعة لقيته ارتفع لفوق و بقيت السرعة 60 كيلومتر/ ساعة ..

----------------------------

رحت مزود السرعة . تاني .و بعدها ب 15 دقيقة ..

رجعت بصيت علي مؤشر السرعة .. لقيته ارتفع من 60 كيلومتر/ ساعة و .. و بقي 70 كيلومتر/ساعة

-----------------------------

المهم انت ابتديت تتعب او خايف من الرادار و بعد 15 دقيقة رجعت تبص علي مؤشر السرعة .

..لقيته رجع للخلف و نزل من 70 كيلومتر / ساعة الي 55 كيلومتر / ساعة

خد بالك هنا انت لسة سايق في اتجاهك من الجنوب الي شمال ... لكن المؤشر رجع للوراء ( لان سرعة العربية قلت)

--------------------------------

و بعدين تعبك زاد و قررت تهدي اكثر.... بس لسه ماشي في اتجاهك الي الشمال ..و بعد 15 دقيقة بصيت تاني للمؤشر ...

.لقيته رجع للوراء مرة اخري ....من 55 كيلومتر/ساعة و نزل الي 45 كيلومتر/ساعة

-----------------------

يعني المؤشر اللي بيقيس السرعة قاعد بيرجع للوراء .. علي الرغم من ان اتجاه الحركة ثابت و ما تغيرش

-----------------------------

طب ليه المؤشر بيعمل كده

لان المؤشر هنا ملهوش دعوة باتجاه الحركة من الجنوب الي الشمال

و المؤشر هنا لايقيس اتجاه الحركة ..

و لكن بيقيس فقط التغير في سرعة العربية

لو لسه مش متخيلها قوي تعالي نحاول نقربها اكتر من كده

يتبع

[samsam22]

تابع - الدايفيرجينس


طيب لو جينا و رسمنا رسم بياني .. للمسافة المقطوعة.. بعد كل 15 دقيقة

و خلينا الخط الافقي يمثل الزمن .. و الخط الرأ سي يمثل المسافة المقطوعة

و كل 15 دقيقة نرسم عمود رأسي يمثل المسافة المقطوعة ( لونه ازرق )

حنلاقي ان المنظر عامل زي السلم .. والعمود كل 15 دقيقة في ارتفاع

و ان اتجاه الحركة لاعلي ( حركة السيارة )

-----------------------------------------

طب تعالي نرسم تحته رسم بياني يوضح سرعة العربية ...كل 15 دقيقة

و يكون الخط الافقي برضه يمثل الزمن... و الخط الرأسي يمثل السرعة

و كل 15 دقيقة نحط نقطة للسرعة و نمثلها بعامود رأسي ( لونه ازرق)

فحنلاقي انه اول نقطة هي 50 وبعدها 60 وو بعدها 70 و بعدهها 55 و بعدها 45

وحنلاقي انه في الاول كان شكل سلم طالع .. و بعدين غير اتجاهه و بقي شكل السلم نازل ( لما السرعة قلت)

-----------------------------------------------------------------

طب لو قارنا الشكلين ببعض

حنلاقي انهم في الاول كان الاتجاه في الحركة واحد بينهم

و بعدين حصل اختلاف في اتجاه الحركة بينهم

و زي ما قلنا قبل كده ان اختلاف معناه ( دايفيرجينس)

--------------------

يعني حصل اختلاف بين اتجاه حركة السيارة و بين اتجاه التغير في سرعة السيارة

علي الرغم من ان السيارة لسة ماشية في اتجاهها و هو المطلوب اثباته



مرفق شكل للتوضيح

----------------------------------


طب تعالي دلوقتي نربط ده بالشارت و الدايفيرجينس

يتبع

[samsam22]

تابع - الدايفيرجينس

واحد دلوقتي ممكن يقول انا كنت فاهم مثال العربيية و السرعة ..

بس لما رسمت الرسم البياني .. اتعقدت تاني

فاحرد عليه واقول .. لو مش فاهم الرسم البياني مش مهم ... المهم تكون فاهم مثال العربية و السرعة

علشان ان شاء الله حنربط بينه وبين الشارت و الدايفيرجينس

يتبع

[samsam22]

تابع- الدايفيرجينس

تعالوا نربط ببن مثال العربية و الشارت و الدايفيرجينس


دايما حنلاقي ان المؤشرات المستخدمة لمعرفة الدايفيرجينس هي مؤشرات

اسمها مؤشرات المومينتم (Momentum Indicators)

طيب يعني ايه كلمة مومينتم ديه ( Momentum).. اللي انا دايما بسمع عنها و مش متخيلها قوي

مش مومينتم ديه اللي بنقولها لما بنقول لحد معلش اديني مومينتم علشان افكر شوية .. مش ديه معناها يعني اديني دقيفة من فضلك

لا .. لا مش ده معناها ..

هي ببساطة هنا معناها معدل تغير قيمة السعر

يعني ممكن تقول السرعة اللي بيتغير بيها السعر

يعني ممكن تقول انها بتقيس سرعة تغير السعر

يعني مؤشر المومينتم عامل زي مؤشر السرعة في العربية


------------------------
و احد دلوقتي انا سمعه بيقول طب بيقيسها ازاي

حاقول له مش مهم ازاي .. علشان ما يحسش حد ان العملية صعبة .. و مش حاتفرق معانا دلوقتي

.. بس لو حابب تعرف بيني و بينك ( يتم قياس معدل التغير في قيمة السعر عن طريق معادلات رياضية مختلفة باستخدام اسعار الاغلاق و الافتتاح و الهاي و اللو لفترة معينة مختارة و مقارنتها بطريقة رياضية معينة مع السعر الحالي ... و يمثل الناتج النهائي علي الشارت بخط )
-----------------------------------------------------

يبقي المهم هنا و المختصر المفيد

هو اننا حاليا ممكن نفكر في مؤشر المومينتم علي انه هو مؤشر السرعة في العربية

و هو بيقيس فقط سرعة تغير السعر او ممكن مجازا نقول سرعة الحركة الحالية

و هو لا يقيس او يعبر عن اتجاه الحركة الحالية

-------------------------------

يتبع

[samsam22]

تابع - الدايفيرجينس



دلوقتي المفروض اننا نكون عرفنا

1- اننا بنستخدم مؤشرات المومينتم لاكتشاف الدايفيرجينس

2- و عرفنا ان مؤشرات المومينتم عاملة زي عداد السرعة في العرببة

3- و عرفنا انها بتقيس سرعة

4-و السرعة اللي بتقيسها هي سرعة التغير في قيمة السعر

-----------------------------------

لو فهمنا كل ده ... نقدر دلوقتي نربط بين مثال العربية و الشارت

و نفهم ليه مؤشر المومينتم ممكن احيانا انه يتاخر عن السعر

و نفهم التاخر ده ...و و اختلاف الانجاه بين المؤشر و السعرمعناه ايه؟

و بعدها نفهم ازاي ممكن ان نستفيد من الحالة ديه و اللي اسمها الدايفيرجينيس

--------------------------------

اسيبكم دلوقتي تفكروا في الأسئلة دي و ايضا و طريقة الربط ببن العربية و الدايفيرجينس

اترككم الان في رعاية الله

و اذا اراد الله ... لنا تكملة ان شاء الله

يتبع

[مرعي آل عباس]

بسم الله ما شاء الله
اللهم صلي على سيدنا محمد

[youness29677]

السلام عليكم
ما شاء الله شرح روووووووووووعة
حقيقة كل المواضيع التي كانت من قبل مشكورين أصحابها على الشرح و لكن لم تكن بهذه السهولة و الدقة
واصل من فضلك

[الخاطف]

بارك الله فيك شرح وافي سلسل بسيط تفهم غصباً عنك حتى لو ماحبيت تفهم !!!

[samsam22]

اشكر الجميع شكرا جزيلا طيبا
علي هذه المشاركات الراقية و الكلمات الطيبة الجميلة
بارك الله فيكم جميعا
و رزقنا و رزقكم بنعمة الايمان و الصحة و البركة في كل شئ ان شاء الله
و حفظنا و حفظكم من كل سؤ ومن الخسارة
و رزقنا و رزقكم رزقا حلالا وفيرا طيبا
و اسعدنا جميعا في الدنيا و الاخرة ان شاء الله

و سنكمل باذن الله بعد قليل

[samsam22]

تابع - الدايفيرجينس

بعد ما شرحنا مثال العربية اللي ماشية في اتجاه معين .. و عداد او موشر السرعة اللي بيقيس السرعة

و شوفنا ان العداد او المؤشر ممكن يرجع للوراء ... علي الرغم من ان الحركة لسة مستمرة في نفس الاتجاه

و شوفنا اننا لو رسمنا ده علي الرسم البياني

حنلاقي ان اتجاه الرسم للسرعة كان في الاول في نفس اتجاه الحركة للعربية

و خد بالك هنا

لما السرعة قلت

اتجاه السرعة عكس اتجاهه ...

و بقي اتجاه مؤشر السرعة ..ماشي في اتجاه عكس حركة السيارة

طب تعال نربط الكلام ده مع الشارت و الدايفيرجينس

يتبع

[samsam22]

تابع - الدايفيرجينس

طيب احنا قلنا اننا بنستخدم مؤشرات المومينتم لاكتشاف الدايفيرجينس

و قلنا ان مؤشرات المومينتم بتقيس معدل سرعة التغير في السعر

و خلينا نقول انها بتقيس سرعة الحركة الحالية او الترند الحالي

-------------------------

يبقي السيارة و هي ماشية .. هي بالنسبة لنا هي الترند الحالي

و اتجاه حركة السيارة من الجنوب الي الشمال ... هو اتجاه الترند الحالي يعني نقول هنا انه ترند صاعد

و مؤشر المومينتم بالنسبة لنا ....هو عداد السرعة في العربية

يعني مؤشر المومينتم بيقيس لنا مجازا سرعة الترند او الحركة الحالية

----------------

يبقي الخلاصة اننا حنتصور ان

الترند هو العربية ... و موشر المومينتم هو عداد السرعة

لو لحد كدة تمام يبقي اللي جاي اسهل ان شاء الله

يتبع

[samsam22]

تابع - الدايفيرجينس

يبقي بالمثل

لو السعر ( اللي هو العربية) ماشي في اتجاه معين .... مثلا في ترند صاعد (من الجنوب للشمال في مثال العربية)

و موشر المومينتم ( عداد السرعة في العربية ) ...بيقيس معدل تغير السعر .

. يعني مجازا بيقيس سرعة الترند ( زي عداد السرعة اللي بيقيس سرعة حركة العربية)

و بدأ الترند الحركة ... و احنا اخترنا فريم ال 15 دقيقة ...( مثل العربية لما بتبص علي عداد السرعة كل 15 دقيقة)

و بعد 15 دقيقة و الترند متجه لاعلي ...راح مؤشر المومينتم عمل حسبته

و قاس سرعة الترند و كانت 50 مثلا .... و راح راسم نقطة عند 50 علي الشارت

----------------------------------

راح الترند ( الترند فيه نشاط و حيوية ) .. اتحرك لفوق بسرعة و عمل قمة اعلي

.. و بعد 15 دقيقة اخري .. راح مؤشر المومينتم قايس السرعة للترند ..لقاها 60

..راح راسم المؤشر نقطة اخري عند 60 ( اللي هي فوق ال 50 )

.. ووصل المؤشر بين النقطة اللي قبلها عند 50 ... و نقطة ال 60 .
.
فظهر لنا خط اتجاهه لاعلي ..

يعني عمل المؤشر قمة لاعلي .. مثل السعر لما عمل قمة لاعلي ..