المشهد الاول
يفتح الستار ( سعد ) يملك مبلغ من المال ، يبحث عن استثمار جيد وعالي الارباح ...
سعد : أقول ياحمد سمعت بالفوريكس حق امريكا ؟
حمد : أي والله سمعت يقولون تربح دولارات بالقلابي واحياناً حمولة تريله ..
سعد : ياخي يقولون هذا مثل المكينة اللي شفناها انا واياك بالتلفزيون اللي تحط فيها قرش وتسحب عصا وتنّهل عليك الفلوس ..
حمد : ايه بس هذيك مكينة قمار والقمار حرام .
سعد : ياخي من قال لك هذي قمار ؟ اقول مثلها ، مثلههههها يعني هذي ام المكاسب .
حمد : طيب خلنا نفتح موقهم بالانترنيت ونشوف .
المشهد الثانييفتح الستار في احد مقاهي الانترنيت وسعد وحمد قد استأجروا جهازاً واحداً رغبة بالظفر بالكنز المزعوم .
سعد : شف شف شف لقيته ياحمد هذا يقولون اسمه هنا ( الفوريكس ) اللي قلت لك عليه .
حمد : شف ، ناصر ولد خالتي قايل لي ان فيه حساب تجرب فيه ببلاش .
سعد : وش نجرب ، حنا فاضين للتجارب ؟
شف خلنا نروح لـ محمد ونقول له يحول لنا فلوس علشان نشتغل .
حمد : طيب يالله ..
المشهد الثالثسعد و حمد في المنزل امام شاشة الكمبيوتر وقد حّول لهم محمد المبلغ البسيط الذي جمعوه من اجل الفوريكس ..
حمد : يالله عجّل افتح ودخل الرقم السري .
سعد : ياخي اصبر شوي تأدب حنا صرنا رجال اعمال ، كلها شهر ونصفق بالملايين يمين وشمال .
حمد : يالله دخل الرقم السري انت انا ما اعرف انقليزي ...
سعد : والا انا !!!!!
حمد : طيب وش نسوي ؟
سعد : دق على محمد وقل له وش معنى رقم سري بالانقليزي ...
حمد : والباقي ؟؟؟؟
سعد : الباقي اعرفه قريته بمنتدى ، يقولون الزر اللي على اليسار بيع والزر اللي على اليمين بيع والمستطيل اللي فوق الرصيد ... يالله دق بلا فلسفة ، انا شارب البرنامج شرب ...
حمد : يالله سو كذا ، واكتب كذا ...
سعد : ايوه فتح ،،، يالله بسرعة نبي نبيع اليورو بالرصيد كله ، هاه وش رايك ؟
حمد : توكل على الله ، شورك مبارك .
المشهد الاخيرالنتيجة صاروا اصحاب ملايين ....
ضربت معهم كم صفقة ....
كانت الاخبار لصالحهم ....
....
طبعاً نهاية غير متوقعة ....
توقعتوا اقول خسروا واستدانوا وسجنوا وتبهذلوا ....
ملينا من كلمة خسروا ، وخسارة ، وخسرنا
.....
وش رأيكم ، النهاية كذا ماهي احسن ... :)
يغلق الستار