الخطوات الخمسة لتصبح تاجر عملات

[MajdiD]

الخطوة الأولى

Unconscious Incompetence. عدم إدراك لعدم القدرة:
تكون هذه هي الخطوة الأولى عندما تتعرف على عالم التجارة الالكترونية وتطلع على الموضوع أول مرة، فأنت تعلم أنها طريقة ممتازة لكسب المال،لأنك سمعت الكثير عن الأرباح والأرقام التي يتم تحقيقها من هذه التجارة.
ولكن لسوء الحظ الموضوع يشبه عندما تكون لديك الرغبة القوية في تعلم سواقة السيارة فأنت ترى الجميع يقودون سياراتهم وتتوقع أن الأمور ستكون بسيطة وسهلة.
وهذا السوق موضوعه بسيط فإما أن يتحرك صعود نشتري، وإما هبوط نبيع الموضوع سهل (وين المشكلة) ما في سر بالموضوع يا صعود يا هبوط، افتح حساب وخش بسرعة.
ولكن ما إن تجلس خلف مقود السيارة لأول مرة تحس بشعور غريب بأنك لا تدري ما أول شيء ستقوم فيه وتسيطر عليك مجموعة متضاربة من المشاعر والأفكار.
تبدأ بفتح العقود ودون حساب لنسبة المخاطرة ، تدخل العقد يتغير الاتجاه عكسك فتقول دخلت غلط تغلق العقد وتدخل عكس الاتجاه الذي دخلت فيه أول مرة، فيتغير الاتجاه مرة ثانية وتعيد الخطوة مرة ثانية مرة ورا مرة حتى تخسر كل الحساب .

قد تحقق أرباح في البداية وهذا أسوأ من الخسارة فتقنع نفسك تعرفت على الفوركس من أسبوع فتحت حساب وصرت ربحان أسهل من هيك ما في، الموضوع مزحة كبسة ماوس وخلصنا ما بدها تعقيد وتبدأ بزيادة العقود وحجم الدخول وتتجاهل نسبة المخاطرة الموضوع بسيط خلنا نساوي مليون بشهرين زمان.
وعندما تخسر مرة تحاول تعوض وبسرعة تدخل عقدين أو أكثر لنعوض الخسارة ، مرات تزبط وتربح ويصير اللي ببالك، ولكن الغالبية ما يحدث معهم العكس خسارة مادية وجرح للمشاعر وضيق النفسية .
وفي الحقيقة أنت غير مدرك لجهلك في المتاجرة.
تستمر هذه الخطوة من أسبوع لأسبوعين ولكن السوق سريع وخفيف الحركة وبالتالي تنتقل في تجارتك للمرحلة الثانية...................................



الخطوة الثانية
Conscious Incompetenceإدراك لعدم القدرة :
في هذه المرحلة تدرك أن المتاجرة بحاجة لبعض العمل لتصبح مربحة باستمرار، وتدرك داخليا انك تجهل الكثير من الأمور في هذا السوق(عطلات البنوك، اجتماعات اقتصادية تحرك السوق، أخبار منطقية تؤدي لحركات غير منطقية) وتدرك انك لا تملك الخبرة والنظرة العامة للسوق لتدخل عقد رابح وتستمر بالتمسك فيه.
تبدأ هنا بالدخول لمواقع التوصيات وأحيانا تدفع اشتراك وتشتري مؤشرات وتدخل كل المنتديات حتى باللغة الهندية أو الصينية وقد تشتري كتب وتبدأ عملية البحث عن نظام المتاجرة الذي لا يخسر أبدا وتدخل مرحلة جنون الاستراتجيات إستراتجية بالهندي تترجمها تشتغل فيها أسبوع أول خسارة ترميها تجيب إستراتجية بالروسي تدفع لواحد يترجمها أول عقد الثاني خسرت ارميها بالزبالة ودور على غيرها بدي إستراتجية ما تخسر مع منبه صوتي ما بدي أتغلب أقولك خلي الكمبيوتر لحاله بشتري ويبيع بدي وأنا نايم اربح مش الموضوع بسيط( يا طلوع يا نزول) مرات بيوم بتغير 3 استراتجيات وما تقتنع بتشوف وحدة شكلها صعب وكلها أرقام ومؤشرات غريبة بنمشي معاها أسبوع بالكثير و بترجع ترميها ما تلحق تعرف خيرها من شرها مش زابطة بدي أغيرها (طيب جربت تشوفها فترة شهرين وتابعها وتشوف وين النقص وتعدل عليها) لا يا خوي بدي وحدة جاهزة وإذا التمبلت عندك ابعثه أو أقلك أعطيني الماسنجر حقك وبضل أسالك ادخل الحين؟ شو أسوي؟ متى اطلع؟ وين رحت يا رجال؟ ليش ما ترد؟ ربحت خسرت شو العمل .
وكل ما تلاقي مؤشر جديد تقول هاذ اللي يرح يغير كل أشي وترمي كل اللي عملته بالزبالة.
رح تجرب كل الاكسبرتات ،وبعدها تلعب بخطوط الموفنج وما تخلي رقم إلا وتستعمله(على فكرة أي رقم تستعمله في خطوط الموفنج يعطي تقاطع ويعطي أرباح)، بعدها تكبر شوي تخش على الفيبوناتشي ، وموجات اليوت، والدايفرجنس ، وخطوط الادكس، والدعم والمقاومة وخطوط الرين وغيره و غيره وغيره، وكل ما تلاقي مؤشر جديد تتعاد نفس الحكاية على أمل انك تلاقي المؤشر السحري اللي ما فيه تذبذب و دايما ربحان وتمسك كل نقطة في السوق من أول الافتتاح حتى الإغلاق وتوصل فيك الثقة بإستراتجيتك (إذا كان صار عندك وحده) انك تضل بالعقود الخسرانه وتستمر فيها وتعززها لأنك أنت صح والسوق اللي غلط ولازم يمشي مع إستراتجيتك مش العكس.
تتطور قدراتك على المعاندة وتدخل غرفة شات أو حتى تعمل وحدة خاصة فيك وتصير تطرح توصياتك ورؤيتك للسوق أنت وكيف لازم تخلي السوق يمشي مع طريقتك حتى لو خسرت عقودك عزز ما في مشكلة أنا صح السوق بيرجع ما تخاف!!!!!!!!!!!!!!!

بعدها تصير تراقب غيرك وشو قاعد يقول عن أرباحه ليش قاعد يربح و أنا بخسر من وين جاب النقاط كيف ربح ، ما أنا شايف السوق ما في حركة ، وقتها ممكن تتنازل عن كبرياءك وتسأل أسئلة للي حواليك وأحيانا بتكون أسئلتك غبية لدرجة مش طبيعية، وتوصل لقناعة كلهم كذابين ما حدا بيربح كلهم بيشتغلوا على الديمو مش معقول الأرباح اللي يقولوا عنها. ليش هيك أنا درست كل أشي ومش قاعد اربح زي ما يقولوا أنا بعرف كل أشي يتناقشوا فيه ومستعد أناقش أي واحد فيهم وافهم عليهم أكيد أنهم كذابين ، بس الأيام تمر وكل يوم تلاقيهم موجودين وأرباحهم وحساباتهم تزيد لكن أنا بخسر وحسابي خلص وفتحت واحد ثاني و لسا بخسر أكيد أنهم كذابين.
وقتها أنت مثل الشباب المراهقين ، الناس اللي بتربح رح توجهك خطوة خطوة وتحاول توصلك النصيحة وببساطة و ببلاش ، لكن أنت عنيد مش معقول البساطة اللي بيحكوا عنها أكيد في مؤشر سري أكيد أنهم كذابين أنا درست وبعرف كل المؤشرات ما رح أرد عليهم.
ما في شي ببلاش رح أشوف شركة كبيرة ادفع فلوس ويتصلوا معاي ويقلوا لي متى ادخل واخرج أحسن طريقة أكيد عندهم ناس عندها خبرة ما يمشي الحال تغير الشركة بعد فترة نفس النتيجة في لسا خسائر.
ممكن تشوف واحد من الكبار واللي الهم اسم في السوق من شركة أجنبية تدفع له فلوس تاخذ دورة لحالك يشرحلك لحالك ( مش مهم إذا كان عبقري أو ما بعرف أشي) لما تقعد لحالك قدام الشاشة والسوق يتحرك فعليا تنسى كل أشي نظري تعلمته ويتحكم فيك مشاعرك وطمعك أنا فاهم كل أشي لازم اربح.

المرحلة هاي ممكن تستمر لسنوات( فعليا من الواقع ومن المتاجرين أصحاب الخبرة تستمر المرحلة من سنة لحد ثلاث سنوات) وخلالها ممكن تنسحب وتنسى الموضوع بعد كل الخسائر وتترك السوق ظاهريا لعدة أسباب وحجج ما الها معنى وداخليا تنكر انك ما وصلت لخبرة حقيقية لتربح.
حوالي 60% من اللي يدخلوا السوق يترك بعد 3 شهور ،وهاذ أشي ممتاز، فكر فيها لو كان الموضوع سهل كان كل الناس صاروا أصحاب ملايين (كل من دخل السوق يطلع بمليون).
و20% فقط يستمروا لمدة سنة وبالنهاية خسارة سريعة وتنتهي القصة بشكل أكيد بعد المارجن كوول.

اللي بهمنا بالموضوع إل 20% السابقين اغلبهم يستمر لمدة 3 سنوات ويفكر حاله ركب مركب السلامة ببحر الفوركس العاصف ........ لكن 5 – 10% منهم (جماعة ال20%) بس اللي يربحوا أرباح ثابتة ومستمرة وتصير حساباتهم تحقق أرباح معقولة بدون خسائر .
الأرقام السابقة مش خيال أو افتراض هي أرقام واقعية ناتجة عن إحصاءات وحتى لو استمريت لمدة 3 سنوات ما تفكر انك وصلت شط الأمان والأمور صارت سهلة.
يا ريت لو كل واحد بالمنتدى يحط تاريخ فتح الحساب الحقيقي وكم استمر معاه نفس الحساب كم سنة ويحكيلنا كم سنة أخذت منه الحكاية حتى صار يحقق أرباح ويستمر بتحقيق الأرباح وبدون خسائر تذكر، أتوقع نسبة قليلة رح يكون المدة عندهم 5 سنين أو أكثر .(يتعدوا على أصابع اليد الواحدة)

في هذه المرحلة أنت صرفت وقت وفلوس شيء كثير أكثر مما كان يخطر ببالك في بداية الموضوع وتكون خسرت حسابين أو ثلاثة، لكن في هاي المرحلة أنت أدمنت الفوركس نعم أصبحت مدمن .

في احد الأيام تكون جالس فجاءه وفي لحظة تصير مثل المجنون وقتها تدخل الخطوة الثالثة..................

[MajdiD]

الخطوة الثالثة

The Eureka Momentالإدراك :
وأنت تسير في الخطوة الثانية تبدأ تدرك أن المؤشرات والسوق والاستراتجيات ما الها دخل ومش هيه اللي تعمل الفرق في السوق، تكتشف انه أي خط موفنج (على أي إعداد وحده بدون أي مؤشرات وألوان وخطوط) يتقاطع ويعمل ربح إذا ركزت معاه وتابعت حركته وأدركت الصورة العامة للسوق مع إدارة رأس المال ونسبة المخاطرة بعدها تدخل في الموضوع النفسي والعامل النفسي وفلسفة المتاجرة ونفسية المتاجر وتقرأ كتب بالموضوع وتتعرف على العناصر الرئيسية للدور اللي تلعبه نفسية وأحاسيس المتاجر أثناء القيام بالمتاجرة.
فجاءه تجيلك لحظة الجنون أو اكتشاف الحقيقة وتطلع زي ارخميدس بدون أواعي على الشارع وتقول لقيتها ...لقيتها (هي آخرة اللي يظل متابع مع السوق) امزح

هاي اللحظة طبيعية نتيجة تطور ونضج أسلوب التفكير، وقتها تدرك انك لا أنت ولا أي واحد ثاني بالعالم أو أي مؤشر يمكن يتحكم بالسوق أو يتنبأ بالمستقبل أو شو رح يصير بشكل أكيد 100% خلال نص ساعة لقدام فما رأيك لمدة شهر (مستحيل طبعا)
نتيجة الإدراك اللي توصلت له وقتها ما رح تهتم شو فلان بتوقع أو الخبر الفلاني شو رح يعمل أو شو رح تكون ردة الفعل ، وقتها رح تلتزم بطريقتك الخاصة والشخصية وقوانينك للمتاجرة.
وقتها ترسم برنامجك الخاص يتناسب مع ظروفك وشخصيتك وأهدافك ونفسيتك.
وقتها يكون عندك مؤشر بسيط ونظام بسيط وتحدد من خلاله نسبة المخاطرة والتحمل الخاصة فيك
وقتها تدخل كل صفقة تنطبق مع شروطك إذا عكس السوق لا تغضب ولا تنفعل تخرج بكل بساطة تاخذ خسارتك وتخرج ما تظل لأنك بكل بساطة عارف إنها مجرد احتمالات وتوقعات وانه العملية خسرت مش بسببك مجرد ما شفت انه اختلف الاتجاه تخرج ببساطة السوق تحرك مثل ما بده مش مثل ما بدك
تخرج وتستنى الفرصة اللي بعدها بكل هدوء وأنت عارف انه رح تزبط أكيد لأنك التزمت بالشروط والطريقة لكن السوق ما بده فتأخذ الخسارة بسرعة وتستنى المرة الجاية
وقتها تبطل تحسب كل عقد شو ربح تصير تطلع على نهاية الأسبوع نسبة الربح للخسارة وأكيد الربح أكثر من الخسارة لأنك ملتزم وبهدوء وعارف طريقتك وشروطك فعقد خسران خلال أسبوع مش معناه طريقة فاشلة

تدرك انه تجارة الفوركس هدفها الالتزام والاستمرارية واخذ كل الصفقات طالما انك مدرك انه نسبة الربح بالطريقة اكبر من الخسارة وقتها تتعلم فن ادراة رأس المال والرافعة للمتاجرة ونسبة المخاطرة
وترجع تتذكر الفترة السابقة والناس اللي كانت تحكي عن حجم المخاطرة وإدارة رأس المال وتبتسم كنت غبي وقتها ما كنت جاهز ما فهمت عن شو كانوا يحكوا
لكن لحظة الإدراك حصلت أصبحت جاهز ومدرك انه لا احد في الدنيا يقدر يتحكم بسوق الفوركس

الخطوة الرابعة

Conscious Competence الإدراك والقدرة :
أصبحت تدخل كل صفقة مع شروطك، تاخذ الخسارة بسرعة وتخرج بسهولة مثل اخذ الأرباح وأنت مدرك انه أسلوبك أرباحه أكثر من خسارته وتلاحق الربح إلى أن تعكس المؤشرات الخاصة فيك وعندما تحدث خسارة تخرج بهدوء وبسرعة من دون ما تدمر الرصيد لأنه مؤشرك المرة الجاية يحقق ربح ويمسح الخسارة ويحقق نقاط أكثر من الخسارة
أصبحت الآن في مرحلة عدم الخسارة أحيانا تخرج بدون ربح أو خسارة في نهاية الأسبوع ، أحيانا تربح 100 نقطة في أسبوع وأحيانا تخسر 100 نقطة في الأسبوع ولكن في اغلب الأسابيع إما أن تخرج بتعادل أو ربح معقول لكن بدون خسائر من رأس المال
أصبح لديك احترامك في المنتديات والناس صارت تحب تسمع رأيك وقتها تلتزم بطريقتك وتحاول تحسن شروطها ، صرت تربح أكثر مما تخسر
صرت تبدأ نهارك ربح 20 نقطة بعدها خسارة 35 نقطة بطلت تحس انك رجعت أشي مش إلك أنت متأكد أنهم رح يرجعولك أعصابك هادية أرباحك في تزايد مستمر أسبوع بعد أسبوع أرقامك صارت تكبر
الخطوة تستمر معك حوالي 6 شهور

[MajdiD]

الخطوة الخامسة

Unconscious Competence القدرة بكل بساطة :
رجعنا لتعلم السواقة ، صرت تسوق بكل بساطة بطلت تحسب حساب أي شي بالشارع صار الوضع طبيعي
تصحى الصبح تفتح الكمبيوتر بكل بساطة تفتح العقد تربح تسكر العقد اللي بعده بنفس الطريقة تماما مثل الطيار الآلي الأمور ماشية بكل هدوء وقتها بتصير صياد ما عاد تعجبك النقط القليلة تستنى بكل هدوء تشوف 300 نقطة جايين تدخل تربح تطلع ببساطة كأنك ربحان نقطة ما عادت تفرق.
تصير تتفرج على المنتدى الداخلين الجدد أشي بده السعر يطلع واشي بده إياه ينزل مش عارفين وين بدهم يروحوا بحالهم وتتذكر حالك قبل 4 سنين شو كنت تعمل .

هون أنت وصلت لمرحلة التجارة المثالية ، سيطرت على مشاعرك وأعصابك صرت مضارب رصيدك بزيد بسرعة مستمرة أرباحك ثابتة خسائر شبه معدومة(في مرات رح تخسر بس ما رح تخلي الخسارة تمشي فيك)
أنت الآن احد أبطال المنتدى الكل بيسالك أسئلة أنت كنت بتسالها قبل أربع سنين
وقتها أنت بتعطي نصائح للمراهقين اللي بالسوق ( الوقت اللي كنت أنت فيه مراهق وما ترد على حدا) نفس الشي تحاول تعطي نصائح بسيطة بس ما حدا بيرد عليك أكيد في عندك سلاح سري ما بدك تحكي عنه الكل بحكي عنك كذاب أرباحك مش طبيعية معقول موفنج واستوكاستك بس يخلوك تربح أرباح خيالية أكيد في سر بالموضوع .
في النهاية الكل رح يمر بنفس المراحل السابقة في أشخاص يعلقوا في مرحلة أكثر من غيرها وفي أشخاص يمروا بمرحلة أسرع من غيرهم المهم الكل رح يمر بنفس المراحل لكن المدة تختلف من شخص لثاني (لكل مجتهد نصيب) نسبة كبيرة ما يتجاوزوا المرحلة الثانية ويطلع من اللعبة .

أخيرا تزهق من المنتدى والنقاشات السخيفة بين المستجدين والأخطاء اللي بتكرر كل مرة مع كل واحد جديد يدخل السوق، بتشوفللك واحد أو اثنين وبتصير علاقتك شخصية معاهم وحتى بتبطل تحكي عن السوق والتجارة ( لما تسوق سيارتك ما بتشرح كيف دعست بنزين أو شغلت الغماز أو لفيت الدوار ) الأمور بتصير عادية طبيعية ونقاشك معهم بيكون عن أشياء عادية ما الها علاقة بالسوق.
بنفس الوقت يتحسن شروطك لطريقتك بتحقق أعلى الأرباح فيها بدون أي مخاطرة طريقتك ما تتغير بس شروطك تتحسن.
الآن بترفع راسك وبتقول أنا مضارب بالعملات بس وقتها تخجل تحكي هيك (مش كل واحد بتشوفه بالشارع بنقله أنا بعرف أسوق سيارة) الوضع صار عادي عندك حتى انك ما بتحب الناس تعرف انك بتاجر بالعملة لأنه صارت عادية بالنسبة إلك.


بتمنى انه الموضوع يكون في فائدة وخلال القراءة يكون حدد نقاط رئيسية لأسلوب التجارة ، اتمنى يكون الموضوع اعطى اجوبة لبعض الاسئلة المنتشرة في المنتدى مؤخرا.

وفي النهاية بس( 5%) ينجحوا في السوق فقط (من جماعة ال20%) الموضوع يتعلق بالاستمرارية والقدرة على تغيير الإدراك والقواعد الأساسية حسب المعلومات الجديدة التي تتغير كل يوم .

الخاسرين في هذا السوق هم من أرادوا تحقيق الأرباح بسرعة أسلوبهم يراقب زوج من العملات خلال 6 أشهر على زمن ال 5 دقائق ويقللك أنا صح وشايف السوق لوين رايح ، من دون ما يراقب التغييرات التي تحصل والتجديدات التي بتأثر على حركة العالم وما بشوف الصورة الكبيرة الشهرية والمؤثرات عليها ويتأقلم ويجدد من وضعه بناءا على التجديدات.


إذا بتفكر تترك السوق عندي سؤال واحد..................
كم سنة عندك استعداد تروح الجامعة وتدرس بتخصص محدد ، إذا كنت متأكد بشكل حاسم انه لما تتخرج من التخصص رح يعطوك وظيفة راتبها مليون دولار؟!!!!!!!!!!

[barrais]

[npoleon]

[المدارج]

دراسة حالة(تشخيص)..الوقوف على اسبابها ...العلاج
لكن وين المستفيد
شكرا أخي الكريم

[mahmoudh7]

الخطوة السادسة

ضربة غدر واعلان أفلاس

ويمكن ضغط الدم يكون لية رأي اخر

هاهاهاها

موضوع رائع اخي الغالي

لكن كان ناقص تحديد فترات زمنية تقريبية لكل خطوة
( كما تعتقد )

[omaraiad]

ميت فل وورد على موضوع رائع ودسم بارك الله لك

[ahmed000]

موضوع اكثر من رائع
فعلا منتهى الواقعية
واسأل مجرب!!

تحياتي لك اخي الكريم

[عبدالرحمن السليم]

بصراحة هذي هي الخمس خطوات الي مريت فيها

والحمدلله أني أصبحت مضارب عملات

[mahmoudh7]

بصراحة هذي هي الخمس خطوات الي مريت فيها

والحمدلله أني أصبحت مضارب عملات

انا لسة فضلي كتييييييييييييير اوي علشان اكون مضارب

[trender]

واالله يا اخوان قريت الموضوع هذا قبل عدة سنوات... بس وين ما ادري؟!

[يورو2006]

واالله يا اخوان قريت الموضوع هذا قبل عدة سنوات... بس وين ما ادري؟!

[trender]

قريته في منتدى موني تيك قبل 3 سنوات تقريبا ...
http://www.moneytec.com/forums/f14/l...-trader-12879/

[السوهاجى]

موضوع

كلام واقعى جدا