تحليل الأوضاع الاقتصادية الحالية وتوقع التحركات القادمة
هناقش معاكوا في الموضوع ده تحليل كل عملة من الناحية الأساسية والفنية عشان نعرف مدى قوة العملة قصاد التانية وخلينا نبتدي بالدولار:
طبعا كله ملاحظ ارتفاع الدولار بشكل قوي أمام معظم العملات الرئيسية، وبيرجع الارتفاع ده بسبب اقتراب إنهاء التيسير النقدي واللي من المتوقع أنه هيتم خلال اجتماع لجنة الاحتياطي الفيدرالي الأمريكي خلال الشهر اللي جي، وقيمته الحالية هي 25 مليار دولار شهريًا ويعتبر إنهاء التيسير النقدي من أول الخطوات اللي بتشير لرفع معدلات الفايدة.
وطبعًا رفع معدلات الفايدة هيخلي الدولار يكمل ارتفاع، ومن المتوقع ان الاحتياطي الفيدرالي الأمريكي يرفع معدلات الفايدة خلال النصف الثاني السنة القادمة.
وممكن أنتوا تعرفوا تحددوا بالتقريب كده ميعاد رفع معدلات الفايدة، هقولكوا ازاي:
معدلات التضخم أو CPI مؤشر اسعار المستهلكين، وطبعًا معدلات التضخم عامل مهم جدًا في تحديد رفع معدلات الفايدة وكل ما اقتربت من هدف لجنة الاحتياطي الفيدرالي عند 2% كا ما اقترب موعد رفعها.
بيانات مؤشر التغير في أعداد التوظيف بالقطاع غير الزراعي (NFP) ومعدلات البطالة... عشان أوضاع سوق العمل هي اللي بتحدد قوة النمو الاقتصادي بالنسبة للجنة الاحتياطي الفيدرالي الأمريكي... عشان كده خلوا بالكوا من اي اصدار للبيانات أول جمعة من كل شهر.
خلو بالكوا بردو من معدلات الأجور، لأن مينفعش أن مؤشر أسعار المستهلكين يزيد (أسعار السلع والخدمات) والأجور مش بتزيد وبالتالي مينفعش يتم رفع معدلات الفايدة إلا لما الأجور ترتفع هي كمان، وشوفنا ده في الاقتصاد البريطاني.... كانت كل البيانات إيجابية ومعدلات البطالة تراجعت بأكثر من بنك إنجلترا متوقعه لكن ضعف بيانات الأجور هي اللي خلت التوقعات اللي بتقول أن رفع معدلات الفايدة قرب تتراجع وعشان كده الاسترليني تراجع بقوة وهنتكلم برده عن الاسترليني وأسباب تراجعه في فقرة تانية خاصة مع موضوع استقلال اسكتلندا.
وبكده يكون الاحتياطي الفيدرالي الأمريكي هو أقرب واحد لرفع معدلات الفايدة عشان كده الدولار مرتفع بشكل قوي.
وديه توقعات أزواج الدولار اللي هو فيها عملة رئيسية:
الدولار ين إلى 110 ان شاء الله، وانا اشرت للموضوع ده من شهر نوفمبر اللي فات لما كان عند مستويات 101.... عندنا دلوقتي ارتفاع الدولار بسبب قوة النمو الاقتصادي واللي بيقابله الناحية التانية الاستمرار بالتيسير النقدي في بنك اليابان عشان يحفز النمو.... واي دولة تعمل تيسير نقدي، تعرف علطول أن عملتها هتنزل.
الدولار فرنك لسه هيكمل صعود عشان هو عكس اليورو دولار، كمان انخفاض قيمة الفرنك بيبقى في صالح سويسرا ... واليورو دولار لسه قدامه هبوط لحد 1.27 خاصة مع بداية التيسير النقدي الشهر اللي جي وضعف النمو بمنطقة اليورو واللي سجل 0.3% الشهر اللي فات وهم عايزينوا 2%!! الله يكون في عونك يا دراجي :0016:
الدولار الكندي في اتجاه صاعد بشكل عام لكن النمو الاقتصادي في أمريكا أحسن من اللي في كندا... انا بقولكوا كده بناء على بيانات وتحليلات مش كده وخلاص وهو دلوقتي بيختبر مقاومة عند 1.0995 خلينا مستنيين الارتداد أو الاختراق عشان في احتمالية انه يصحح الأول قبل ما يكمل صعود... كمان خلي بالكوا أن فيه دول من مصلحتها أن عملتها تنزل عشان قطاع الصادرات ومنهم كندا واليابان ومنطقة اليورو بتفضل أن اليورو دولار يوصل 1.25 عشان سعر الصرف بيشكل جزء في معدلات النمو برده.
لو حد عنده اي استفسار يشاركنا بيه عشان نستفيد من بعض، وان شاء الله هيكون في فقرات تانية لبقية العملات :)