بالنسبة للاسترليني دولار... فيه استطلاع رأي هيصدر بكره وده هيأثر بشكل كبير على السوق وومكن نشوف فجوة تانية لفوق أو لتحت على حسب نتائج الاستطلاع من مؤسسة ICM وده بنفس أهمية استطلاع "يوجوف" السابق واللي خلى الباوند يعمل فجوة سعرية هابطة.... وهيفضل الاسترليني دولار في انتظار نتائج الاستفتاء يوم الخميس 18 سبتمبر.
وفي حالة التصويت بنعم على استقلال اسكتلندا... الاسترليني هينزل جامد عشان استقلالها هيأثر بشكل سيء على الاقتصاد البريطاني ... خاصة إن ده هيخلي دول تانية يبقى عندها أمل في الاستقلال اللي بطالب بيه من زمن زي كاتلاونيا في إسبانيا... بس يجب ملاحظة أن اسكوتلندا عايزة تستمر بالجنيه الاسترليني بالرغم إنها معندهاش بنك مركزي أو سياسة نقدية خاصة عشان كده كارني قال إن بنك إنجلترا عنده إجراءات طارئة في حال حدوث هذا الأمر.
وفي حالة التصويت بلا، الاسترليني هيرتفع جامد عشان بكده تكون الأوضاع استقرت ويرجع بنك إنجلترا تاني ينافس الاحتياطي الفيدرالي الأمريكي في رفع معدلات الفائدة... لإن الاقتصاد البريطاني هو أقوى اقتصاد سجل نمو بعد الأزمة العالمية بالمقارنة ببقية الدول المتأثرة... لكن فيه بيانات الاقتصادية مهمة اللي هتحدد إذا كان هيعاود الارتفاع أو مجرد هيعمل حركة تصحيحية... أولًا:
- بيانات مؤشر أسعار المستهلكين (CPI) اللي بيقيس معدلات التضخم من خلال أسعار السلع والخدمات، والمؤشر ده تراجع من 1.6% إلى 1.5% يوليو وده بيشير إلى ضعف النمو الاقتصادي.... بنك إنجلترا عايزه يوصل 2% فكل ما اقنرب من النسية ديه اقترب ميعاد رفع معدلات الفايدة.
- بيانات سوق العمل ومنها مؤشرات التغير في معدل التوظيف ومعدلات البطالة ومتوسط الدخل ... وبالرغم من أهمية المؤشرات ديه كلها لكن أهم واحد فيهم في الفترة الحالية هي متوسط الدخل (الأجور) عشان لو الأجور مرتفعتش بنك إنجلترا مش هيرفع معدلات الفايدة... المرة اللي فاتت المؤشر ده تراجع من 0.3% إلى -0.2% وده كان من أهم أسباب تراجع الاسترليني.
-مبيعات التجزئة مهمة برده بس هيبقى ليها رد فعل لحظي وخلاص في اليوم ده عشان في نفس الوقت بتاع التصويت على استقلال اسكتلندا.
عندك برده يوم الأربع والخميس بيانات أمريكية مهمة جدًا .... مؤشر أسعار المستهلكين بقيمته الأساسية وتوقعات لجنة الاحتياطي الفيدرالي الاقتصادية وبيان الفايدة اللي مش هيتغير ان شاء الله ونتائج الاجتماع وبعد كده حديث "يلين" يوم الخميس. وانا اتوقع أن متكنش تصريحاتها إيجابية بالشكل اللي يخلي الدولار يرتفع بشكل قوي... هتتلكم عن إنهاء التيسير النقدي خلال الشهر المقبل وهتقول أن سوق العمل تحسن لكن مش بالقدر الكافي ولازم نشتغل عليه أكتر وهتشير إلى إن السياسة النقدية الحالية هي الملائمة للوضع الحالي.
بشكل عام انصح نفسي وإياكم بعدم التداول على الزوج حتى تتضح الأمور عشان هيبقى في تقلبات عنيفة فوق وتحت حتى بداية الأسبوع المقبل. وانا حاسس كده انها مش هتستقل... ده مجرد احساس، مينفعش التنبؤ بحاجة زي ديه :0016: واتمنى لك التوفيق يا د/ مصطفى.