دراسه : موجات اليوت و الشارت الزمني

[MasterN]

السلام عليكم ... اولا عذرا عن التطويل و الكلام باللغة العامية ..و أظن ان الكلام هيكون ممل جدا لغير المهتمين بإليوت .

من فترة لا بأس بها .. تحديدا من ساعة ما اتعلمت التحليل الموجي لسوق الفوركس بالذات .. و في مشكلة ما.. كل شوية تخطر على بالي .. هي مش مؤثرة قوي على التحليل نفسه .. بس من فترة لأخرى بيظهر انها ممكن تخلي التحليل اسهل كتير .. الفكرة باختصار ... ان وقت اليوت لما اكتشف نظريته ( الصراحة الراجل يحسد على دقة الملاحظة دي .. احنا دلوقتي عارفين الشروط و باردو بنغلط من وقت لأخر ) .. اعتمد بشكل كلى على ان التفسير هو النفسية الجماعية Mass Psychology .. و ثقافة القطيع Herd Movement ... فيما معناه ان الناس بتتحرك في جماعة و في اوقات الخوف بيغلب عليها الغريزة اكتر من التفكير المنطقي .. عشان كده دايما الاشكال بتتكرر .. لان النفس البشرية مبتتغيرش .. انا معنديش اي اختلاف مع النقطه دي .. بالعكس .. بس مع استحداث سوق العملات .. السوق بقى مفتوح 24 ساعة .. و ده اظن انه عمل مشكله صعبت ملاحظة الاشكال المتكونه و التحليل نفسه .. لان دايما بقى عندك اوقات ذروة و اوقات نايمة تماما .. فمثلا تلاقي الموجة التانية واضحة جدا قدامك .. بس الموجه الرابعة يطلع عينك عشان تحددها .. لان بطبيعة السوق غالبا شئنا ام ابينا الموجة التالتة بتحصل في اوقات لندن أونيويورك ... في الموجة الرابعة غالبا ما بتحصل في اوقات الليل و الكثافة القليلة ( سيدني و طوكيو ) .. هضرب مثلا حي من السوق كمان شوية ..

مشكله زي دي تلاقي كلام كتير عليها .. اللي يقولك ان الاوقات اللي فيها كثافة قليلة لا يعتد بيها اصلا .. و اللي يقولك ان الموجات لازم تحسب من العمر الحقيقي للسهم ( في الحالة دي الفوركس ) .. الخلاصة ان ايام اليوت .. كان الشغل مركز .. من 9 ل 5 .. فالمشكلة ماكنتش موجودة اصلا .. الجميل ان انا اظن ان دة سبب وجود تعقيدات كتيرة على الموجة الرابعة بشكل خاص و التصحيحات بشكل عام ... و وجود تشكيلات مركبة على شاكلة W X Y و Double Threes و الحاجات الحلوة دي ...


مع وجود سوق شغال 24 ساعة في اليوم والوضع في الاعتبار الاساس النفسي اللي عمله اليوت .. هتلاقي بالاضافة للاوقات ذات الكثافة الضعيفة في كمان وقت يحتاجه المتداولين عشان يدخلوا في المود نفسه يعني اكيد اللي لسة بادئ يومه في طوكيو مثلا مبيبقأش تحت ضغط عصبي يخرجة عن تفكيرة المنطقي و يدخله في ال Herd او التفكير الغريزي و هو لسة صاحي .. مش مشكلة قوي النقطة دي .. هامشية جدأ .

طيب كفاية جدا استطراد كدة ... الحاجة اللي عامله المشكلة دي كلها .. الوقت .. احنا لما بنتفرج على الشارت مبنتفرجش على الحركة السعرية بس .. احنا كمان بنتفرج على الوقت معاها .. الكلام شكله كبير و معقد انا عارف .. هاوضح حالا

الشارت اللى اغلبنا بيتابها هي شارت ال Candlestick أو الشموع اليابانية .. و كلنا اتعودنا على شكلها و ال Patterns اللي بتعملها .. بس الشارت دي بتحت في الاعتبار الزمن .. بمعنى انك ممكن تلاقي ساعة او 15 دقيقة موجودة على الشارت السعر متحركش فيها 5 نقط على بعض .. حط كذا بار من دول جامب بعض هتلاقي ان الموجة التانية اللي حصلت قبليها بفترة عبارة عن 3 او 4 بارات .. و الموجة الرابعة عبارة عن 20 بار .. اي نعم الموجة الرابعة المفروض انها اكبر من الموجة التانية .. بس لازم يبقى فيه نسبة و تناسب .. ده مثال على الشارت دي



قبل ما الاوروبين يكتشفوا عند اليابانيين ال CandleSticks كان فية انواع اخرى من الشارتات ( كلها بالمناسبة موجودة في الميتاترادر) ... كلهم فيهم نفس المشكلة ... الحساب الزمني .. بس قبل انواع الشارتات دي كلها كان فيه شارت اسمه Point&Figure Chart ( شارت النقطة و الرمز ) .. باختصار شديد الشارت دي بتحط حرف O اثناء الهبوط .. و حرف X اثناء الصعود .. واضعة في الاعتبار الحركة السعرية فقط ... اظن ان دلوقتي احسن وقت لضرب مثل .. اليورو دولار الفترة الاخيرة .. الصعودالاخير كان يلخبط .. اي نعم هو تصحيحي و كلنا عارفين ده .. بس ما كنش واضح المعالم .. دي شارت ال CandleStick لليورو



تلاحظ ان الموجة اللى انا مرقمها 1 ( باللون الاخضر ) انا اقدر احدد للاسف انها مكونة من A B C .. و مش كدة و بس . لو دققت هتلاقي ان انا قادر احدد الخمس موجات المكونين ل A .. و الخمس موجات المكونين ل C .. و ده قطعا مينفعش انها تبقى موجة دافعة ....بص بقى على الشارت المرفقة لنفس الحركة السعرية على P&F .. الموجة واضحه تماما انها دافعة .. مش كدة و بس دة الموجة التالتة محددة جدا .. مش دي نقطتي ...نقطتي تحديدا في الموجة الرابعة و بداية الخامسة ..تحس انها قعدت سنة بتتكون على شارت ال CandleStick ..



غير الاسباب دي كلها ..احنا عادة بنغرق في تفاصيل الموجات بسبب عدد البارات الكتير على الشارت ..الشارت التانية بسيطة الى حد كبير

اخر حاجة و بجد اسف على الاطالة و الملل اللى انا مسببهولكو ( دة اذا حد كان كمل قراءة لحد هنا و مزهقش ) ان حساب المدى الظويل و القريب مش بس بيتحسب بالزمن زي ما كلنا اتعودنا .. في النوعية دي من الشارتات بيتحسب بقيمة X و O ..يعني عايز تحسب مدى طويل ..خللي كل X = 20 نقطة ...دي غير ان فيه ميزات كتيرة للشارت نفسها خارج حدود اليوت ..بس نسيب النقطه دي لوقت تاني

[km3]

انت شخص عبقري

لو تكرمت نبي شويه ترقيمات علشان ترسخ في عقولنا

[km3]

كيف احول الشارت في الميتاتريدر الى شارت النقطة والرمز

والله الشغله ممتاز على الميتاستوك

[Mr.Mahmoud]

يعنى انت عايز توضح ان أفضل شارت للتحليل الموجى هو Point&Figure Chart
ودة يكون موجود فى اى برنامج عشان اول مرة أسمع عنة

[Pips_Factory]

كيف احول الشارت في الميتاتريدر الى شارت النقطة والرمز

والله الشغله ممتاز على الميتاستوك

نفس الطلب ارجو شرح كيفية تحويل الشارت الى شارت النقطة في الميتاتريدر

[MasterN]

انت شخص عبقري

لو تكرمت نبي شويه ترقيمات علشان ترسخ في عقولنا

كيف احول الشارت في الميتاتريدر الى شارت النقطة والرمز

والله الشغله ممتاز على الميتاستوك

بسم الله ما شاء الله ... يا راجل يا طيب عبقري اية بس ... انا اللى اتنقلت من القراءة للاستيعاب للبحث و بعدين التطبيق في ساعة و نص ..

يعنى انت عايز توضح ان أفضل شارت للتحليل الموجى هو Point&Figure Chart
ودة يكون موجود فى اى برنامج عشان اول مرة أسمع عنة

مش ده قصدي قوي ... كل ما في الموضوع انها ملاحظات اخدت بالي منها على الشارت .. ال P&F شارت موجودة في كذا حتة.. زي ما Km3 اخد باله موجود في الميتاستوك .. و برنامج AccuChart من FxSol .. و فيه مؤشرات للميتاتريدار .

نفس الطلب ارجو شرح كيفية تحويل الشارت الى شارت النقطة في الميتاتريدر

غالي و الطلب رخيص ... بس الاول بس عايز اوضح ان شارت ال P&F .. محتاجة فهم بسيط الاول عشان تعرف تشتغل عليها .. اكيد اخدت وقت عشان تبقى متفاعل مع الشموع اليابانية .. بس الخبر الحلو .. ان تعلمها مبيحتاجش وقت زي الشموع اليابانية .. اظن يوم واحد متابعة هيخليك مستريح للتعامل معها جدا .. انا بس للامانه هحاول اشرح بسرعة طريقة قراءة الشارت قبل رفع المؤشرات ..و لو في طلب ممكن نفتح موضوع تاني بعيد عن الموجات خاص بيها مع شرح مفصل .

[Pips_Factory]

بسم الله ما شاء الله ... يا راجل يا طيب عبقري اية بس ... انا اللى اتنقلت من القراءة للاستيعاب للبحث و بعدين التطبيق في ساعة و نص ..



مش ده قصدي قوي ... كل ما في الموضوع انها ملاحظات اخدت بالي منها على الشارت .. ال P&F شارت موجودة في كذا حتة.. زي ما Km3 اخد باله موجود في الميتاستوك .. و برنامج AccuChart من FxSol .. و فيه مؤشرات للميتاتريدار .



غالي و الطلب رخيص ... بس الاول بس عايز اوضح ان شارت ال P&F .. محتاجة فهم بسيط الاول عشان تعرف تشتغل عليها .. اكيد اخدت وقت عشان تبقى متفاعل مع الشموع اليابانية .. بس الخبر الحلو .. ان تعلمها مبيحتاجش وقت زي الشموع اليابانية .. اظن يوم واحد متابعة هيخليك مستريح للتعامل معها جدا .. انا بس للامانه هحاول اشرح بسرعة طريقة قراءة الشارت قبل رفع المؤشرات ..و لو في طلب ممكن نفتح موضوع تاني بعيد عن الموجات خاص بيها مع شرح مفصل .

شكرا لك اخي الكريم وفي انتظار الشرح ان شاء الله

[MasterN]

مقدمة :
اظن كلنا سمعنا قبل كده مقولة ان السعر هو افضل مؤشر على الشارت و ان كل ما عدى ذلك من مؤشرات متأخرة عن السعر Lagging .. اعترف ان الشموع تعطي بيانات كتيرة .. بس مين اللي قال ان الكم دة من البيانات مفيد .. كلنا اول ما اتعلمنا كنا بنجري ورا المؤشرات و نحط خمس او ست مؤشرات على الشارت .. من كتر البيانات اللى المؤشرات دي بتطلعها ( اذا اتفقوا اصلا ) على ما نبص عليها كلها بيكون السعر سبنا و مشي .

نبذة تاريخية :
الطريقة نفسها اخترعت من اكتر من 100 سنة .. حسب علمي ان مخترعها تشارلز داو .. مخترع نظرية الداو و مؤسس جريدة الداوجونز و الاندكس .. اظن ان العلم نفسه بقى شبة منقرض .. لو دورت عليه مش هتلاقي كلام عنه ولا 10 % اللى مكتوب عن اي حاجة تانية متعلقة بالتداول .. قبل اختراع الطريقة دي .. كان المضاربين بيعملوا جداول بأسعار السعر .. اكيد كان الموضوع متعب فلجأوا الى وضع رموز او حروف تدل على الحركة السعرية لتسهيل تحديث البيانات .. و ساعتها ده كان مكمن قوة الطريقة دي .. عشان كده كان طبيعي جدا مع ظهور الحواسب ان يقل استخدام الطريقة دي تدريجيا مع ظهور طرق براقه زي الشموع اليابانية .

مميزات شارت النقطة و الرمز :

• بسيطة , سهلة التعلم الى حد كبير ..من نقط قوتها وجود ارقام بعينها للدعوم والمقاومات .. اظن كلنا لما بنيجي نحدد اماكن الدعوم و المقاومات بنحدد منطقة معينة مش رقم .. بسبب البيانات الكتير على الشارت .. انما مع النوعية دي من الشارتات الدنيا محددة و اوضح بمراحل .
• تعمل بشكل فعال اكتر مع الاسواق ذات الكثافة العالية .. بمعنا انها بتشيل الحركات التصحيحية الصغيرة قوي "الضوضاء السعرية" ..و ده بيعمل على فلترة الحركة السعرية .. فبيبقى عندك وضوح اكبر لرؤية الترند .
• عدد الانماط و الاشكال في النوع ده من الشارتات محدود ( 18 نمط فقط ) طبعا دة للترند الصاعد و الهابط معا .. م هما نسخة طبق الاصل من بعض .. يعني من الاخر هما 9 انماط فقط اللى هتتعلمهم .. نسبة صحة الانماط هنا كبيرة و محددة بأرقام .. يعني لو السعر كسر الرقم كذا تدخل مع وجود هدف يحدد من الشارت و كمان وقف محدد .

كيفية قراءة الشارت :
كما اشرت سابقا .. الشارت مكونة من X و O .. الرمز X للترند الترند الصاعد و ال O للترند الهابط .. هنا نوصل لنقطة محورية .. اية اللي بيحدد قيمة X .. يعني امتى الشارت بترسم رمز جديد .. ده بحسب العملة او السهم .. يعني مينفعش العملة تبقى بيتحرك 100 نقطة في اليوم ( تخلي قيمة X ب 50 نقطة .. يعني يرسم رمز صاعد جديد بعد كل 50 نقطة ).. و تبقى عايز تشتغل على الترندات الصغيرة ..

طيب امتى الشارت بترسم O ؟! .. دي احنا بنحددها بمعامل ( مثلا و دة الاكتر استخداما الرقم 3 ) .. الرقم دة بيضرب في قيمة X اللي انت محددها .. نفترض ان احنا اخترنا X = 10 ..( يعني هيرسم رمز جديد كل ما السعر يتحرك 10 نقط ).. بالضرب يبقى احنا بنقول للشارت مترسملناش الحركة التصحيحية الا لو زادت عن ( 3 × 10 = 30 نقطة ) ..ساعتها بيرسم تلات رموز محدده للتصحيح .. و من هنا كل 10 نقط تصحيحية بيرسم رمز كمان . ( لو النقطة دي مش واضحة حد يقوللي و هدعمها برسوم توضيحية ) ... بما ان احنا خلصنا النقطة المعقدة دي .. نروح بقى لأهم و اروع ما في التكنيك ده .

الأنماط :
احب اوضح بس الاول ان مفيش حاجة مضمونة 100 % في اسواق البورصة بوجه عام و اسواق العملات بوجه خاص .. بس نسب نجاح الانماط دي بجد حلو .. هبدأ بأقوى الانماط اللى استخدمها لحد دلوقتي ثم الاضعف ( معلش ترجمتي للاسماء مش قد كده لو حد عنده ترجمة احسن يقولها )

1. Quadruple Top/Bottom BreakOuts ( كسر قمم رباعية أو قيعان رباعية) : اول حاجة لازم تتقال ان الاسماء هنا عكس الشموع اليابانية..يعني وجود قمه رباعية هنا دلالة على ترند صاعد و العكس صحيح . يعني هنا انت تدخل بيع من لحظة ظهور O جديدة على الشارت تكسر الخط المرسوم و تحط الوقف فوق المقاومة الاخيرة اللي سهل جدا تشوفها على المثل ده
2. Triple Top/Bottom Breaskouts (كسر قمم ثلاثية أو قيعان ثلاثية) : برده نفس الكلام .. الصور موضحة الكلام احسن و ده المثل
3. Double Top/Bottom Breakouts ( كسر قمم ثنائية أو قيعان ثنائية ) : المثال
4. Bullish/Bearish Catapult ( طبعا الترجمة الحرفية منجنيق بس دي تبقى ترجمه وحشة فعلا ) : للاسف مش لاقي شكل يوضح ينفع اجيبه هنا .. بس فية مثال عندي

بس كده .. قلت شرح سريع و مبسط و العملية فتحت مني .. فاضل حاجة اخيرة اقولها .. كل الامثلة اللى فاتت دي جبتها من الحركة السعرية لليورو في اليومين اللى فاتو بس ... لو بصيت على شارت الشموع المقابل للشارت ده .. اكيد كنت هتدخل بدري و ممكن متعرفش تحط و قف مظبوط و تفوتك الحركة دي .. انما هنا انت مستني شكل محدد يظهر .. قبل ما النمط يظهر انت عارف ان كل ده ضوضاء سعرية طالعة و نازلة .

[Pips_Factory]

متابعين معك اخي الكريم حبذا لو ترفق لنا المصدر والمؤشر اللي يرسم لنا هذا الشارت جزاك الله خير

[MasterN]

اتفضل

المؤشر الاول مجاني ..هيتعبك شوية لغاية ما تظبطة بس محترم فعلا , النسخة الاحدث منه مش مجانية بس للاسف مش عندي ..
Cute_PnF_indicator_v1.1_for_4_digits_MT4.zip

المؤشر التاني اي نعم هو ب 99 دولار بس مبيظهرش الحركة السعرية على شكل X و O .. بيظهرها على شكل مربعات .. بس هي نفس الفكرة .الميزة اللي هنا انه بيديك تنبيه لما بيشوف ان فيه نمط تحقق .. مع المؤشر كتاب 99 صفحة مش وحش الصراحة .
Forex Point & Figure Trading Formula.rar

اما بخصوص ذكر لينك لمصدر ..معرفش اذا ده مسموح به في المنتدى ولا لأ .

ملحوظة : للحصول على افضل و ادق النتائج ..المفروض انك تعمل تحديث لبيانات الزوج على شارت ال M1.. قبل ما تشغل المؤشر .

[Pips_Factory]

اتفضل

المؤشر الاول مجاني ..هيتعبك شوية لغاية ما تظبطة بس محترم فعلا , النسخة الاحدث منه مش مجانية بس للاسف مش عندي ..
Cute_PnF_indicator_v1.1_for_4_digits_MT4.zip

المؤشر التاني اي نعم هو ب 99 دولار بس مبيظهرش الحركة السعرية على شكل X و O .. بيظهرها على شكل مربعات .. بس هي نفس الفكرة .الميزة اللي هنا انه بيديك تنبيه لما بيشوف ان فيه نمط تحقق .. مع المؤشر كتاب 99 صفحة مش وحش الصراحة .
Forex Point & Figure Trading Formula.rar

اما بخصوص ذكر لينك لمصدر ..معرفش اذا ده مسموح به في المنتدى ولا لأ .

ملحوظة : للحصول على افضل و ادق النتائج ..المفروض انك تعمل تحديث لبيانات الزوج على شارت ال M1.. قبل ما تشغل المؤشر .

شكرا لك اخي وبارك الله فيك

[km3]

بسم الله ما شاء الله

مش عبقري وبس وكمان معلم حريف في خدمة الناس الغلابه

اتمنى الموضوع يستمر لكشف اسرار شارت النقطة والرمز

[MasterN]

شكرا لك اخي وبارك الله فيك

لا شكر على واجب يا اخي ..

بسم الله ما شاء الله

مش عبقري وبس وكمان معلم حريف في خدمة الناس الغلابه

اتمنى الموضوع يستمر لكشف اسرار شارت النقطة والرمز

لو هنكمل الموضوع عن الشارت يبقى اظن ان المفروض نبدأ موضوع جديد خارج القسم الخاص بموجات اليوت .. يا ريت لو حد من المشرفين يقولنا فين المكان المناسب لبدأ موضوع عن شارت ال Point&Figure و نفهم الاول اذا كنا هنشرح تركيب الشارت و الانماط ولا هنتكلم عن الفرص اللي الشارت بتوضحها !!... و بجد شكرا على الكلام الكبير ده

[km3]

لا شكر على واجب يا اخي ..


لو هنكمل الموضوع عن الشارت يبقى اظن ان المفروض نبدأ موضوع جديد خارج القسم الخاص بموجات اليوت .. يا ريت لو حد من المشرفين يقولنا فين المكان المناسب لبدأ موضوع عن شارت ال Point&Figure و نفهم الاول اذا كنا هنشرح تركيب الشارت و الانماط ولا هنتكلم عن الفرص اللي الشارت بتوضحها !!... و بجد شكرا على الكلام الكبير ده

لك الحريه المطلقه في الشرح يا معلم يا كبير

[صبا]

قرأت الموضوع وكان نفسي اني استفيد منه
لأني ناوية اتعلم الموجات
لكن ما فهمت كثير الصراحة لأني بالاساس ما اشتغل على العملات انا فقط اشتغل بالسوق السعودي

الف شكر