بسم الله الرحمن الرحيم
الاخوة الافاضل
السلام عليكم ورحمة الله وبركاتة
نتناول اليوم في حديثنا موضوع في غاية الاهمية وهو
التلبس
والتلبس معناه مشاهدة الجريمة حال ارتكابها او اتبع المجني علية مرتكبها او تبعتة العامة مع الصياح اثر وقوعها بوقت قريب حاملا الات او اسلحة او امتعة او اشياء يستدل بها علي انة فاعل او شريك فيها او اذا وجدتة في هذا الوقت اثار او علامات تفيد ذلك
ماسبق كان هو التعريف القانوني للتلبس ولكن الكلام دة مينفعناش علشان احنا عاوزين نفهم بالبدي ومش عاوزين عقد قانونية
يعني إيه تلبّس؟
التلبس هو إن المتهم يتمسك و هو بيعمل جريمته، يعني الضابط أو حد من الشرطة يشوف بنفسه المتهم و يمسكه وقت ارتكاب الجريمة أو بعدها مباشرة، زي أن المتهم يتقفش و هو بيسرق أو بيقتل أو بعدما ارتكب الجريمة فورا و الناس بتجري وراءه و يشاوروا عليه و يصرخوا "حرامي..حرامي" أو "هو دا القاتل"، أو إن كان شايل المسروقات أو سلاح أو أداة الجريمة و يجري بها، أو إن كان على ملابسه آثار دم مثلا و تكون الحالة ال عليها المتهم تدل على أنه هو مرتكب الجريمة أو شريك فيها. يعني زي مايقولوا بالبلدي "الحرامي بشيلته".
إيه شروط التلبّس؟
أن الضابط أو الأمين يكون شاف الجريمة بنفسه أو سمعها أو شمّها و بطريقة سليمة مايكونش خالف بها القانون، يعني ما يكونش تلصص أو تنصت على حد، أو سمع بها من الناس أو حد أخبره بها، لأنه ما يجوزش أن حد يكون قال له إنه شاف الجريمة أو سمعها، لأنه لو الضابط أو الأمين خلق حالة التلبس أو تنصت أو بص من خرم الباب يبقى ما فيش حالة تلبس لأنه يبقى عمل حاجة خارج القانون و انتهك حرمات الناس دون سبب و تبقى حالة التلبس باطلة و كل إجراء ترتب عليها باطل.
إيه حالات التلبس؟
أن المتهم يتمسك وقت ارتكابه الجريمة وقت ارتكابه الجريمة _يسرق، أو يقتل أو يبيع أو يشرب المخدرات، إلخ)، أو بعد ارتكاب الجريمة بلحظات بسيطة مع وجود علامات و دلائل قوية تدل على أنه هو مرتكب الجريمة؛ يعني يشوفه الضابط بيسرق أو يقتل أو الناس تجري وراه و تشاور عليه و تصيح "حرامي..حرامي" أو "هو دا القاتل" أو شايل المسروقات أو ورق أو فلوس أو أسلحة و يجري بها تدل على أنه مرتكب الجريمة أو شارك فيها؛ أو تكون رائحة المخدرات فائحة من المكان أو ماشي في الشارع سكران و بيتطوح، أو يكون على جسمه أو على ملابسه آثار دم مثلا تدل على أنه ارتكب الجريمة.
إيه شروط القبض في حالة التلبس؟
علشان يتم القبض في حالة تلبس لازم تتوافر شروط، و هي:
أن الجريمة تكون جناية أو جنحة يعاقب عليها القانون بعقوبة الحبس أكثر من 3 أشهر لأن ما فيش تلبس في مخالفة أو جنحة الحبس فيها أقل من 3 أشهر.
وجود دلائل قوية على أن المتهم المتلبس بالجريمة هو مُرتكب الجريمة، مثلا يكون فيه بقع دم على ملابسه، أو الناس تجري وراءه و تقول "حرامي" أو هو دا القاتل" أو كان شايل المسروقات أو يتمسك و هو يرتكب الجريمة.
يكون المتهم حاضر لأن لو كان المتهم غير حاضر يبقى ما فيش تلبس و على الضابط أنه يطلع له إذن من النيابة بالضبط و الإحضار علشان يقبض عليه. تقديم شكوى من صاحب الحق في الجرائم اللازم فيها تقديم شكوى من المضرور (مثل الزنا).
مَن مِن حقه يقبض على المتهم في حالة تلبس؟
من حق من لهم سلطة الضبطية فقط من الشرطة يقبضوا على المتهم المتلبس بجريمة و هم الضباط و الأمناء و الصولات و العمد و مشايخ البلاد و مشايخ الخفر، بشرط أن يكونوا داخل دائرة القسم الشغالين فيه، لكن ما يجوزش مندوب الشرطة أو العسكري يقبض على حد أو يفتشه لأن مالهمش سطلة الضبطية أو حتى ضابط يقبض على متهم متلبس بجريمة خارج دائرة اختصاص القسم الشغال فيه.
يعني إيه سلطة الضبطية؟
ال لهم سلطة الضبطية حددهم القانون على وجه التحديد و هم:
- أعضاء النيابة العامة و معاونين النيابة
ضباط الشرطة من ملازم حتى لواء و أمناء الشرطة و الصولات
رؤساء نقط الشرطة
العمد و مشايخ البلاد و مشايخ الخفر
نظار و وكلاء محطات السكك الحديدية.
إيه سلطتهم في أحوال التلبس؟
من سلطتهم القبض على المتهم و تفتيشه و يسمعوا أقوال أقوال الشهود الموجودين في المكان ال وقعت فيه الجريمة و من حقهم منع الناس الموجودين إنهم يتركوا المكان أو يبعدوا عن المكان ال وقعت فيه الجريمة لحدما يعملوا محضر، و من سلطتهم يستدعوا الناس الممكن يستوضحوا منهم معلومات عن الجريمة.
هل من حق مندوب الشرطة أو العسكري القبض على المتهم المتلبس بجريمة؟
مش من حقهم القبض لأنهم ماعندهمش سلطة الضبطية، لكن يقدروا يمسكوا المتهم بجريمة عقوبتها الحبس و السلاح ال معه أو المسروقات ال شايلها و يسلموه لأقرب ضابط أو أمين شرطة في أقرب مكان أو ياخذوه القسم بدونما يفتشوه.
لو كان الضابط خارج دائرة القسم الشغال فيه من حقه القبض على الناس؟
الضابط لو كان خارج دائرة القسم الشغال فيه يبقى مش من حقه يقوم بالقبض على حد، حتى لو كان المتهم في حالة تلبس، و يكون الضابط زيه زي أي حد من الشرطة ال ما لهمش سلطة الضبطية، لكن يقدر يمسك المتهم و يسلمه لأقرب ضابط أو أمين شغال في دائرة القسم ال وقعت فيه الجريمة دونما يقبض عليه أو يفتشه.
يعني إيه دائرة اختصاصه؟
يعني يكون في دائرة اختصاص القسم الشغال فيه، بمعنى أنه ما يجوزش ضابط شغال في قسم الهرم يقبض على حد موجود في دائرة قسم مدينة نصر أو العكس.
هل في حالات لا يمكن القبض فيها على متهم رغم وجوده في حالة تلبس بجريمة؟
فيه حالات لا يمكن القبض فيها على متهم رغم وجوده في حالة من حالات التلبس، لأن فيه جرائم لازم الشخص المضرور أو صاحب الحق في الشكوى يتقدم بالشكوى للسلطات، سواء كانت شكوى مكتوبة أو شفوية للضابط، زي جريمة زنا الزوجة مثلا، لازم الزوج يقدم شكوى في زوجته المتلبسة بالزنا مع رجل غريب، أو لو الزوجة سرقت زوجها أو ابن يسرق أبوه، لازم الأب يشتكي الأول، و في جرايم السب و القذف، و في الأحوال دي لا يجوز للشرطة القبض إلا بعد تقديم الشكوى من المضرور رغم وجود المتهم أو المتهمة في حالة تلبس.
تسليم الأهالي
يعني إيه تسليم أهالي؟
يعني لو الناس العاديين ال مش من الشرطة شافوا مجرم متلبس و هو بيعمل جريمة أو جناية أو جنحة عقوبتها الحبس يقدروا يفتشوه و يمسكوه بمعرفتهم و يسيطروا عليه و يسلموه للقسم أو للمركز أو للنقطة أو لأقرب ضابط أو أمين شرطة دون أمر بالقبض من النيابة أو المحكمة.
هل من حق الناس العاديين في الشارع يقبضوا على حد لو كان متلبس بارتكاب جريمة؟
مش من حقهم القبض لكن من حق الناس العاديين في الشارع لو شافوا حد متلبس بجريمة عقوبتها الحبس يمسكوه فقط بالحاجات ال سرقها و يسلموه لأقرب ضابط أو أمين شرطة بالحالة ال يكون عليها، و يمسكوا السلاح ال معه و ارتكب به الجريمة أو الحاجات ال سرقها و بيحاول يهرب بها، و هو دا ال اسمه تسليم الأهالي، لكن ما يعتبرش قبض2.
أعمل إيه لو شفت حد بيرتكب جريمة؟
القانون أعطاك الحق تسمكه إذا كان بيرتكب جريمة عقوبتها الحبس و تسلمه لأقرب ضابط أو أمين شرطة أو لأقرب قسم أو مركز أو نقطة شرطة أو تثبته في مكان الجريمة و تطلب له النجدةن لكن متقبضش عليه أو تفتشه.
لو الناس مسكوا المتهم متلبس بجريمة من حقهم يفتشوه؟
مش من حقهم يفتشوه، لكن من حقهم يمسكوا السلاح ال معه لو كان معه سلاح علشان ما يصيبش حد منهم أو نفسه، و يمسكوا الحاجات ال سرقها ال تدل على أنه ارتكب الجريمة و يسلموه لأقرب ضابط أو أمين شرطة أو لأقرب قسم أو مركز أو نقطة شرطة بالحاجات ال تدل على أنه مرتكب الجريمة، و الشرطة من حقها تفتشه أو الناس تثبته في مكانه و تسيطر عليه و تاخد السلاح ال معه، و يطلبوا النجدة و النجدة تاخذه القسم.
لو كان المتهم مخبئ الحاجات ال سرقها في هدومه؟
مش من حقهم يفتشوه لكن يتحفظوا عليه بالحالة ال هو عليها و يمنعوه يرميها، لكن لو رمى السلاح أو المسروقات ال معه ياخذوها و يتحفظوا عليها و يسلموها معه للضابط أو لأمين الشرطة.
ليه الشرطة ساعات هي ال تبقى ماسكة الحرامي و تعمل له المحضر على أنه تم تسليمه بمعرفة الأهالي؟
لأنهم ساعات بيمسكوا حرامي أو متهم و يضربوه ضرب شديد بعد القبض عليه و تكون آثار الضرب قوية و واضحة، و لو عرضوه على النيابة هتعمل لم مشكلة على ضربهم المتهم، فيعملوا المحضر على أنه تسليم أهالي علشان يبقى أن هم ال مسكوه و ضربوه وقت مسكهم المتهم، مش الشرطة؛ و مش معقول النيابة هتعمل محضر لاهالي المنطقة كلها.
هل ما فيش مسؤولية على الناس لو مسكوا حرامي أو واحد عامل جريمة؟
ما فيش أي مسؤولية عليهم و لا حاجة لأنهم بيكونوا شهود عليه و القانون أعطاهم الحق دا.
لكن في القسم ممكن يعطلونا وقت طويل لحدما يعملوا المحضر؟
لو كل الناس خافت من العطلة في الأقسام يبقى الحرامية و المجرمين ماحدش هيمسكهم، و أكيد المرة الجاية هيسرقك أنت أو حد من أهلك.
ما فيش علينا مسؤولية لو طلبوا منا نشهد على المتهم في القسم؟
ما فيش أي مشكلة على الشاهد طالما بيشهد بالحق و الشهادة دي لله، و الساكت عن شهادة الحق حرام عليه في حق نفسه و في حق الناس، و خلينا نخلص من العيال الأشقياء دي علشان البلد تنضف منهم و من أذاهم للناس و نساعد الشرطة في تنضيف البلد من شرهم.
لو الواحد مش عاوز يشهد؟
مش من حق حد يجبره على الشهادة.
للموضوع بقية
