قصه وعبرة حدثت معى هذا الاسبوع

[Epic]

السلام عليكم ورحمة الله وبركاته

فى البداية احمد ربى واشكر فضله لما حدث لى فى هذه القصه المحزنه

القصه باختصار ان هناك احد مدرسى المرحله الاعداديه ويسكن قريبا منى .. اعزه جدا واعتبره من ابرز المدرسين ولم انسى فضله حتى دخولى الجامعه

كانت علاقتنا باختصار سلامو عليكوا وعليكم السلام .. ازي اخبارك ايه ... وكده
كان صديقا مقربا الى عمى وهو يعمل مدرس ايضا

الحكايه ابتدت من حوالى 5 ايام طلب هذا الاستاذ من عمى احد يتبرع بالدم لزوجته المريضه والتى نقلها الى مستشفى فى احد المحافظات القريبه مننا

طبعا عمى قال لى وقالى اقول لاصحابى اللى كانو عنده واللى يعرفوه عشان زوجته مريضه بمرض ما فى الكبد وتريد نقل دم باستمرار

فى الاول طبعا انا بصراحه بخاف من عمليات نقل الدم هذه لان لى حادثه معه من قبل فمن سنه تقريبا ذهبت للتبرع لاخ واحد صاحبى وبمجرد ان اخذ الدكتور منى عينه لمعرفة الفصيله وهل تطابق ام لا ... دخت جدا وحسيت ان الدنيا بتلف بيا فقلت ما بال لو كان خد منى كيس دم كان ايه حصلى وقتها ... طبعا فصيلتى لم تكن نفس فصيلته

فأنا اخاف من هذه الاشياء ...

المهم حينما قال لى ففكرت فى حجه اقولها عشان اهرب من الموضوع

بس بصراحه دخلت صليت العصر بعدين قعدت لوحدى حوالى ساعه واستصغرت نفسى جدا لما كنت سافعله وقلت لو لا قدر الله حصل لهذه السيده شىء سأعيش بذنبها ... ومش هخلى الشيطان يخلق لى اعذار ... انا عارف انى جسمى مش قوى اوى بس ممكن اتبرع وانا معنديش اى مرض يمنعنى

فتوكلت على الله بهمه انا واحد اصدقائى وذهبنا الى بعض اصدقائنا وايضا اخى واصدقائه ... يعنى اصبحنا حوالى 10 افراد

كلمت عمى وقلت له احنا جاهزين هنروح امتى ... قالى مش هينفع انهارده لان فيه ناس راحوا فخلينا احنا لبكره ... وجه بكره وعمى متصلش ولا كلمنى

فسألته تانى يوم قالى هو بيقول لو احتاج هيكلمكوا ... صدقونى والله العظيم حزنت جدا لضياع هذا الثواب سبحان الله انا كنت خايف اول ما عرفت بس دلوقتى عندى استعداد غير عادى ولاول مره فى حياتى احس ان فيه شىء بداخلى بهذه القوه ... واصدقائى لم يختلفوا عنى والحمد لله

لحد اليوم تفاجئت بخبر وفاتها وكانت كالصدمه بالنسبه لى رغم اننى لا اعرفها الا اننى حزنت جدا لوفاتها

اتجمعت انا واصدقائى وكلهم قالوا الحمد لله ان احنا لم نقصر معها صحيح احنا مرحناش بس مكنشى بايدينا وسألت بعدها علمت ان حالتها كانت متدهوره جدا والطبيب قال ان نسبه نجاح هذه العمله ضعيفه ...

متتصوروش انا حمدت ربنا انه هدانى لهذا والحمد لله لم يغلبنى الشيطان ولا حجج الضعفاء ... وتصوروا لو خلقت الاعذار كيف كنت ساعيش بقيه حياتى

هذه قصه اردت ان اكتبها هنا كى لا يتأخر اى احد منا على فعل الخير مهما كان وربنا سيجازيك خيرا لا تقلق فالدنيا فانيه وكن قريبا من ربك دائما سيهديك

واخيرا ادعو الله ان يرحم هذه السيده ويدخلها فسيح جناته

[أحمد السعيد]

بارك الله فيك
وان شاء الله لا تتأخر عن مساعدة أحد
ورحم من مات من موتى المسلمين

[تريدر2000]

بارك الله فيك

[جاردينيا]

رحمة الله عليها وعلى جميع موتى المسلمين

[faissal]

انما الاعمال بالنيات

وانت نويت وبيت النيه الحسنه
وان شاء الله كتب لك الاجر ولاصحابك باذن الله

[hamoksha208]

فعلا قصة مفيدة جدا
انا بخاف اتبرع بدمى عشان الامراض