تـنــبــيه هــــام .. قبل نشر اى موضوع او إيميل

[Spacer5]

ياجماعة احب انبه على شىء مهم ... فيه بعض الناس
سواء من دين تانى او ملحدين او او ..
المهم : بيتسلوا بالجماعة المسلمين الشباب اللى عندهم قلة خبرة ونية حسنة فى نشر
اى ايميل يخص ديننا بحسن نية طبعا ..
وعلى فكرة انا شفت واحد فرجنى على صور لمشاركات من منتدى ليهم
المهم البهوات الغلابة فى عقولهم دول بيعملوا ايميلات وقصص واخبار مكذوبة
ويكون فيها حاجات مش هتدخل دماغك إلا انك تقول : سبحان الله .. الله أكبر
يعنى ممكن مثلا يعملوا قصة عن واحد جه له الرسول فى المنام ولازم تنشر
الموضوع ده ل20 واحد عشان تسمع خبر حلو ولو ماعملتش كده يحصل لك كذا وكذا ..
او مثلا يعملوا إيميل عن واحدة اتحولت لحيوان غريب عشان كانت بتعوق امها
او اى قصة تانية فيها صورة إعجازية مثلا او قصة دينية مؤثرة متفبركة
وكل ده عشان يستخفوا بعقولنا ويضحكوا علينا

شوفوا الإقتباس ده :

البداية كانت موضوعاً صغيراً فتحه أحد أعضاء المنتدى تحت اسم " اختبار لذكاء المتأسلمين " ..
نعم كان هذا هو الاسم .. ويبدو أن الله عز وجل قد أعمى بصيرتهم حتى أصبحوا يسخروا من
" المتأسلمين " بدلاً من " المسلمين " كما سخر سلفهم وسب " مذمماً " في حين أن رسول الله
صلى الله عليه وسلم إنما هو " محمد " وليس " مذمم " ..

طلب كاتب الموضوع من أعضاء المنتدى أن يصنعوا شيئاً يختبرون به ذكاء المسلمين أقصد
المتأسلمين .. فخرجوا ببعض اقتراحات استقروا في النهاية على أن يكون الموضوع عبارة عن
مقال بصيغة الإعجاز العلمي في القرآن على غرار المقالات الموجودة .. وبدؤوا يختارون المقال
ويكتبونه .. فاختاروا في البداية آية " تُسَبِّحُ لَهُ السَّمَوَاتُ السَّبْعُ وَالْأَرْضُ وَمَنْ فِيهِنَّ وَإِنْ مِنْ شَيْءٍ
إِلَّا يُسَبِّحُ بِحَمْدِهِ وَلَكِنْ لَا تَفْقَهُونَ تَسْبِيحَهُمْ إِنَّهُ كَانَ حَلِيمًا غَفُورًا " لتكون هي الآية المعجزة التي
يتحدثون عنها .. ثم بعد ذلك بدؤوا يبحثوا عن تطبيق مناسب لهذه الآية من اختلاقهم .. كل هذا على
مرأى ومسمع كل من يدخل المنتدى فما بالكم بما يحاك في الخفاء .. دعونا نكمل ..


اختاروا بعد ذلك أن يكون النبات هو بطل قصتهم المزعومة .. ولكن كيف يسبح النبات ؟! سهلة دي ..
نقول إن النبات بيصدر موجات فوق صوتية .. يقوم واحد ناصح منهم يقول : لأ .. محدش في الدنيا
هيصدق إن النبات بيطلع موجات فوق صوتية .. يقوم الباقيين يقولوا له : اسكت أنت .. المسلمين
بيصدقوا كل حاجة !!!

طيب .. هنثبت إزاي إن الموجات فوق الصوتية دي فيها تسبيح ؟! ... نقول إنها كتبت على الشاشة
كلمة غريبة محدش عرفها لغاية ما جه عالم مسلم قال إنها كلمة " الله " .. أيوه فكرة برضه ..

طب نخلي الموضوع صيغته علمية إزاي ؟! اكتب يا عم .. احتار العلماء في أمريكا في الموجات
لفوق الصوتية هذه فجاء العالم الهندي فلان الفلاني اخترع أي اسم مش هتفرق وقال أن هذه كلمة
الله .. وجاء العالم الفلان الفلاني الأمريكي وأسلم بعد هذه الواقعة اخترع أي اسم برضه .. وقد
نشرت هذه الواقعة مجلة مش عارف الأمريكية اخترع أي اسم يا عم دول مسلميييييييييييين ..
عارف يعني إيه مسلمييييييييييين .. هيصدقوا على طول .. طيب طيب خلاص ..

يقوم واحد منهم يقول : تحبوا ندعم الموضوع بالصور ؟! .. آه طبعاً .. يبقى أحسن .. طيب نجيب
صورة جهاز قياس الموجات فوق الصوتية منين ؟! .. يا عم سيبك هات صورة أي جهاز وخلاص ..
جهاز رسم قلب مثلاً .. وهات يا عم الصورة نعملها ببرنامج الرسام .. الرسام ؟! مش حتى
الفوتوشوب علشان تبقى متقنة ؟! .. لأ طبعا .. دول مسلمييييييييييييين .. هات يا عم اكتب كلمة
" الله " على الشاشة ..

بس .. الموضوع جاهز وتمام التمام .. عايزين ننشره في كل المنتديات بقه ... لا يا حبيبي .. خلينا
نخلي الاختبار أسهل من كده .. نكتبه في منتدى واحد فقط لا غير .. وهما اللي هينشروه بعد كده
لوحدهم في كل المنتديات ..

طيب يا عم .. انشر الموضوع ....

وقام هؤلاء العلمانيون بوضع المقالة المخترعة مع الصورة في منتدى واحد فقط لا غير ..
والنتيجة ؟!


بعد عدة أسابيع ....

إيه الأخبار يا عم ؟! الموضوع انتشر ولا لسه ؟!

آه طبعا انتشر انتشار النار في الهشيم .. ده حتى في منتدى من المنتديات كان فيه واحد ناشر
الموضوع دخلت بعضوية جديدة باسم متخف أشكك في الموضوع يمكن العقلية النقدية لهؤلاء
الأغبياء تشتغل شوية .. لكن لقيت إن ناقل الموضوع بدأ يدافع عنه
ويتهمني أنني أشكك في قدرة الله .. تخيلوا !

والموضوع انتشر للدرجة دي ؟! ايوه يا عم .. لو مش مصدق ادخل على جوجل واكتب عنوان
الموضوع في خانة البحث وشوف .....

ايوه أيوه .. أنا دخلت بحثت ولقيته منتشر في مئات المنتديات ... لكن ! هو الموضوع انتشر بكل
التخريف اللي فيه ده والكل مصدقه محدش بيشك فيه أصلاً ؟!!!!!!

ايوه .. الكل مصدق ونسبة التصديق أكثر من 99% .. مفيش غير منتدى الدفاع عن العلف هو اللي
اكتشفه ولم يكتشفه لذكاء أو عقلية نقدية .. بل لأن أحد أعضائه يدخل منتدانا هنا وقرأ تدبيرنا
للموضوع ففهم اللعبة .. الغريبة إن الموضوع واحد نشره في منتدى للمعلمين ولم يشك فيه أحد
هناك .. واضح إن المتأسلمين دول في الضياع خالص .. هههههههههههههههههه

وتنتهي القصة المؤلمة عند هذا الحد .. وعلى الرغم من ذلك لا تنتهي سلسلة نشر هذا الموضوع في
المنتديات .. صحيح قل الإقبال عليه والمواضيع القديمة التي كانت تتحدث عنه في المنتديات أغلبها
قد حذف .. إلا أنه مازال هناك من يقرأ هذا الموضوع فيكبر ويهلل ويقوم بنقله من جديد إلى منتدى
جديد ويعيد توجيهه في الرسائل للإخوة والأخوات من جديد ..

وليس هذا الموضوع فقط في قضية الإعجاز العلمي .. بل هناك عشرات المواضيع التي إما اختلقها
أعداء الإسلام أو ظن بعض المسلمين الطيبين أنها قد تؤيد الإسلام فقام بتلفيقها ..

- صورة الغابة التي ترسم عبارة " لا إله إلا الله .. محمد رسول الله " وتقول المقالة أنها في
ألمانيا والسلطات الألمانية أغلقتها ومنعت الناس من زيارتها ... هذه الصورة رسمها فنان مصري
كلوحة فنية ولم يدع الإعجاز العلمي فيها ..
- صورة للحرم الشريف يشع ضوءً وكل ما حوله ظلام .. الصورة تم التقاطها بالنهار وتم تغميق
الصورة حول الحرم وتركوا الحرم ليبدو أن النور يغشاه ..
- صور عشرات الأشياء التي كتب عليها اسم الله .. كالطماطم وخلية النحل والبطيخة والشمامة
والتفاحة ... إلخ .. بعضها حقيقي وبعضها ملفق ..
- صورة الأمواج في تاسونامي تكتب اسم الله ..

وغير ذلك الكثير والكثير من الأشياء الملفقة التي لا يصح منها شيء مطلقاً ونصدقها ونقتنع بها ..

الرجاء الحرص وعدم نشر اى موضوع او ايميل غير موثوق من مصدره

وشكرا

[hatemgabr]

أقتباس :وغير ذلك الكثير والكثير من الأشياء الملفقة التي لا يصح منها شيء مطلقاً


شكرا أخى على موضوعك الهام .. وقد ذكرت أحد الأمثلة .. وجميعنا مرت علينا العديد من الأمثلة . تختلف بعض الشئ . أو تتشابه .. ولكنها تدور فى نفس الفلك ..
وأشير هنا أيضا الى موضوع الأخ / أبو عبد الله .. بعنوان .. أنشر هذه الرسالة .. والا
https://forum.arabictrader.com/t18037.html
جزاكم الله كل خير