اكبر عملية نصب فى التاريخ الحديث فعلها ترامب بالاسواق المالية

[alskndry]

امبارح؛ ترامب عمل أكبر عملية نصب على الشعب الأمريكي وتربح مالي غير مشروع في تاريخ الولايات المتحدة!

أكبر عملية نصب في تاريخ أي دولة... اتعملت في عز النهار وقدام الناس وكاميرات الإعلام والصحافة وعلى عينك يا تاجر!

طب ازاي ده حصل، وازاي أمريكا كلها اتقلبت سوق جمعة... والكل كان بيتباع فيه إلا الأغنياء؟!

حضر كوباية شايك ونعناعك ☕️ وركز معايا عشان أحكيلك تفاصيل أكبر عملية نصب قام بيها رئيس أمريكي في تاريخ العالم 👇

🔵 شوف يا سيدي.. لما ترامب طلع من كام يوم وفرض الرسوم الجمركية على دول العالم كلها، الأسواق حرفيًا انهارت، وبورصات أمريكا خسرت مبالغ تقترب من ال 10 تريليون دولار.. خصوصًا كمان بعد ما دخل حرب تجارية مباشرة مع الصين وفضل يزود التعريفات الجمركية لحد ما وصلت 125% على كل البضايع الصينية..

العالم كله اتشل بعد اللي حصل ده، والبورصة وقعت بشكل محصلش من وقت الأزمة المالية في 2008 تقريبًا.. وكنتيجة لده، كل المستثمرين الصغيرين والمواطنين العاديين اللي كانوا بيتداولوا في البورصة، بدأوا يبيعوا الأسهم بتاعتهم عشان يلحقوا فلوسهم، والخوف انتشر في السوق كله..

🟣 والنتيجة؟

أسعار الأسهم نزلت جامد وبقت رخيصة جدًا.. وبعدها، بدأ ترامب المرحلة التانية من خطته..

طول فترة انهيار الأسواق دي، كان ترامب بيطلع كل شوية على منصته "تروث سوشال" وينصح الناس انهم يشتروا الأسهم دلوقتي عشان الفرصة مش هتيجي تاني..

وبعد ما فرض الضرايب على الصين، وتحديدًا امبارح الصبح، اللي هو يوم 9 ابريل الساعة 9:37 دقيقة صباحًا، ترامب نشر تغريدة على إكس بيقول فيها: "الآن وقت مناسب للشراء.. DJT"

ولو مش عارف ايه DJT دي، فهي شركة ترامب الخاصة اللي في البورصة.. واسمها على الحروف الأولى من اسمه Donald J Trump.. يعني هو من الآخر بينصح الناس القريبين منه انهم يشتروا أسهم في الشركة بتاعته وفي شركات تانية محدش يعرفها غير القريب منه..

🟠 وبعد ما نشر التويتة دي ب 4 ساعات بالضبط، فجأة أعلن ترامب إنه هيأجل الضرائب الجمركية اللي فرضها على 90 دولة من دول العالم لمدة 90 يوم.. وده بعد ما الأسعار انهارت والكل باع بخسارة..

وعلطول؛ البورصة ارتدت بشكل صاروخي، والأسهم اللي كانت رخيصة طارت فوق، وكل الأسواق قفزت قفزة جنونية..

🟡 مؤشر S&P 500 نط 9.5% في يوم واحد، وزود 4 تريليون دولار للأسواق في كام ساعة.. وأسهم شركة ترامب نفسها (DJT) ارتفعت أكتر من 22% في نفس اليوم، وزادت ثروته بمبلغ 415 مليون دولار في ساعة واحدة بس!

والمرعب بقى هو ان ده مش صدفة... ده ترتيب.. عارف ليه؟!

🟣 عشان قبل التصريح بساعات، حصلت حركة غريبة في السوق...

فجأة، حجم تداول الـ call options – اللي هي رهانات على ارتفاع الأسهم – زاد بطريقة غير طبيعية في البورصة الأمريكية، وبعد تأجيل فرض التعريفات، كل اللي كان ماسك أسهم DJT صحي لقى نفسه مليونير!

🔴 مين بقى اللي كان عارف إن ترامب هيغير رأيه فجأة؟!
ومين اشترى أسهم قبل الإعلان وحقق مليارات؟!

الطبقة الثرية ورجال الأعمال الحيتان اللي بيسموهم "الأوليجارك"، وكمان الناس السياسيين القريبين من ترامب وحكومته...

⚫️ ومين باع الأسهم بخسارة؟!

المستثمرين الصغيرين وعامة الشعب من اللي انتخبوا ترامب وكانزا واثقين ان رئيس دولتهم هيخلي مصلحتهم فوق كل حاجة، وهيرجع "أمريكا عظيمة من جديد" على حد تعبير شعار حملته الانتخابية!

🟢 وعشان تبقى فاهم الموضوع بالظبط، فاللي حصل ده يا صديقي بالضبط هو مخطط احتيالي معروف لكل المضاربين في البورصة اسمه: Pump and Dump

ومعناه باختصار هو انك تستنى لما الأسهم تقع أو توقعها انت بنفسك، وبعدين تشتريها وهي رخيصة، وبعدين تتلاعب بالسوق عشان ترفع سعرها مرة تانية بشكل مصطنع وتكسب انت مليارات، وتسيب الباقي يغرق!

🟤 والنتيجة؟
أكبر عملية نقل للثروة من الشعب للطبقة العليا حصلت في التاريخ الحديث!

4 تريليون دولار راحت كده... من جيوب الناس العادية لجيوب الأغنياء!

⭕️ طب تفتكر ده كان صدفة؟ لأ خالص... وخد الدليل 👇

1️⃣ سكوت بيسنت، وزير الخزانة الأمريكي، طلع قال صراحة بعد اعلان تأجيل الرسوم الجمركية:
"دي كانت الخطة من الأول... الضغط كان تكتيك علشان نفاوض بيه باقي الدول."
يعني من الآخر... ترامب خض السوق علشان يكسب من وراه!

2️⃣ تقارير من صحيفة بوليتيكو قالت إن خطة وقف الجمارك لمدة 90 يوم كانت مطروحة قبل الإعلان بأسبوع كامل، وكانوا بيجهزوا لها بعد انتقام الصين وفرضها 84% جمارك على البضاعة الأمريكية!

3️⃣ تغريدة ترامب نفسه صباح نفس اليوم اللي قال فيها:
"هذا وقت رائع للشراء... DJT" وبعدها بـ4 ساعات بس أعلن قرار التأجيل...


4️⃣ والدليل الأهم على الإطلاق واللي يعتبر كارثة وفضيحة بجلاجل حرفيًا، هو الفيديو اللي اتسرب بعد كده من جوه المكتب البيضاوي في البيت الأبيض، واللي ظهر فيه ترامب بيضحك مع بعض أعضاء إدارته في اجتماع، وبيقول وهو بيشاور على شخصين قاعدين جنبه:
"ده عمل 2.5 مليار دولار النهارده، وده كسب 900 مليون... مش حاجة وحشة صح؟!"

ومين اللي كسب 2.5 مليار دولار ده؟! "تشارلز شواب" صاحب شركة الاستثمار المليارية وواحد من المقربين لترامب ودايرته!

هتلاقي الفيديو سايبهولك في أول كومنت تحت 👇 والصورة اللي مع البوست دي سكرين شوت منه وهو بيشاور ع الراجل..

🟡 طبعًا زي مانت متوقع، بعد اللي حصل ده، الدنيا اتقلبت والكونجرس ولع، والنواب اتهموا ترامب بالفساد والنصب بسبب اللي عمله، ومنهم سيناتورة اسمها إليزابيث وارن وصفت اللي حصل بإنه: "أكبر مخطط تلاعب بالأسواق في العالم، ويذكرنا بفساد عصابات المال في العشرينات."

وقصاد ده، البيت الأبيض رد عليهم بتصريح بارد بيبرر التويتة بتاعت ترامب وبيقول: "الرئيس من حقه دستوريًا انه يطمن السوق".

ودلوقتي وحسب تقرير لجريدة الواشنطن بوست، صناديق التحوط بدأت تبرمج خوارزمياتها علشان تشتغل بناءً على تحليل تغريدات ترامب!

يعني الرئيس بقى "مؤشر تداول" رسمي!

🔴 وهنا بقى السؤال اللي بيطرح نفسه...

هل أمريكا أصبحت دولة بتسمح بوجود رئيس بيستغل منصبه علشان يضرب السوق ويكسب مليارات ويغرق الشعب وراه؟ وهل تويتر واخواته أصبحوا دلوقتي أدوات نصب مالي علني على الناس؟!

⚫️ اللي حصل ده مش بس فضيحة... ده زلزال اقتصادي أخد معاه مدخرات الناس، ووزّعها على طبقة فاحشة الثراء، في عملية نصب تاريخية حصلت قدام عيون العالم كله... بلمسة زر ومكالمة من المكتب البيضاوي!


منقول ...........

[Ahmed61]

اشك ان فى خبر اليوم متسرب للحبايب فيما معنا ان الصين اتصلت للتفاوض
مجرد شك
ولو الداو الليله جاب ال41000 أفتكرونى
ايضا لو الدهب كسر ال 3100

[mostafa2015m]

على العموم و بغض النظرعن اللى حصل المفروض الواحد بردوا يأمن نفسه من الخسارة لو شغال فى أى سوق مالى فى العالم

عن طريق الألتزام بوضع التيك بروفيت و الأستوب لووز و أدارة المخاطر 1% أو 2% كحد أقصى على جميع الصفقات

المفتوحة فى نفس اليوم حتى لا يتم تصفير الحساب فى وقت قصير جدا

[nader_a80]

الغريب انه يومها نصح الناس بشراء المؤشرات والاسهم

[Abdullah76119]

لم ينصب

عمل رسوم ولغاها

السوق اصلا كان معروف أنه هابط وارن بافيت تخارج من معظمه قبل فترة

[gold_scalping]

الغريب انه يومها نصح الناس بشراء المؤشرات والاسهم

فى فيديو مسرب وهو يهنئ احد اصدقائه بالمكاسب الكبيرة

[مهتاب]

ترامب عايز يعزل رئيس الاحتياطى

[gold_scalping]

ترامب عايز يعزل رئيس الاحتياطى

دى بداية الانهيار ان شاء الله

[nader_a80]

عملة ترامب ترتفع بشدة اليوم

[asmaa_salah]

عملة ترامب ترتفع بشدة اليوم

ما هى اسم العملة بتاعة ترامب

[سلطان.شمس]

انا تابعت المحللين الاقتصاديين سواء الاجانب او العرب -- كثير منهم قال انها عملية نصب من ترامب
هو اتخذ قرار اقتصادى فهبطت الاسهم ثم تراجع عن القرار فصعدت الاسهم وكانت في فتره وجيزه
انا اعتقد معهم انها نصب

[ابوالعلاحركات]

الاسواق. العالميه لها حبيبى ال Master لا يتركها لاقوال ترامب او افعاله او اقوال اى رئيس أوعضو اى بنك مركزي او قيام حرب او انتهائها
بل هو يستغل كل الاقوال والاحداث فى تحريك كميات العروض والطلبات ( موجوده فى اى وقت من 24/7 ) للوصول الى ما يريده

[ابوالعلاحركات]

الاسواق. العالميه لها حبيبى ال Master لا يتركها لاقوال ترامب او افعاله او اقوال اى رئيس أوعضو اى بنك مركزي او قيام حرب او انتهائها
بل هو يستغل كل الاقوال والاحداث فى تحريك كميات العروض والطلبات ( موجوده فى اى وقت من 24/7 ) للوصول الى ما يريده

ما أقصده
ان هؤلاء الرؤساء سواء دول او بنوك مركزيه يريدون التدخل ولن اقول التلاعب فى الاسعار هو يحقق لهم رغبتهم وفق قواعد محدده بحيث يكون الحبايب مستفدين فى كل الاحوال
ليس من قبيل الصدفه ان يكسر اليور ال واحد دولار (رغبه واستعباط من المركزى الاوربى) وكذلك والباوند وكل عملات العالم ) مقابل الدولار وذلك فى عهد الرئيس النائم بايدن وليس من قبيل الصدفه ان يصل الداو والدهب والبيتكوين وغيرهم من سلع كالنفط وحتى الكاكاو والبن لاعلى سعر فى تاريخهم فى فترة الرئيس النائم بايدن
الفرق الوحيد فى ترامب انه بيعرفك ويعرف العالم كله ماذا يريد وسيفعلون له ما يريد ولكن وفق قواعد محدده

[hamied_azez]

ترامب اكبر نصاب وسيكون سبب فى انهيار الولايات المتحدة

[ابوالعلاحركات]

الراجل ده مش سهل
توقيت ومضمون اقواله وبوستاته سواء على منصته او اى منصه او قناه تلفزيونيه محسوبه بدقه شديده ومجهز (بضم الميم) مسبقا مع حبايبى