ايه هو سر تكون القمم والقيعان ( معرفة القوة والضعف )
بسم الله
في البعض منكم يعرف طريقة تحليلي اللي بتعتمد في الاساس على وايكوف اللي من ضمن طريقته في التحليل هو العرض والطلب انا في الموضوع ده هاحاول ابسط ليكم سبب تكون القم والقيعان في السوق سواء صاعد او هابط واتمنى انها تساعدكم في فهم السوق اكتر
السوق في العموم قايم على صراع بين العرض والطلب وفيه بيحاول واحد منهم السيطرة عالاخر علشان يجبر السعر على الهبوط او الصعود
ركز كويس في الكلمتين دول لو في سوق صاعد طبيعي السوق بيحتاج قوة تقدر تكسر مستويات المقاومة وترفع السعر القوة بقى بتيجي منين من السلوك اللي اساسا بيجي من الناس نفسها يعني لو السعر تخطى مستوى معين وقام بصعود قوي هنا الناس بتشك في الحركة وبتخاف ليكون قرار فردي من كبار السوق ليهبطوا بالسعر فيخافوا ويستنوا علشان يتأكدوا ان السوق هيواصل هنا صناع السوق بيبقوا عاوزين ياخدوا السعر من مستوى اقل يعني مش عاوزين هبوط مستمر عاوزينه مؤقت وفي نفس الوقت بيحتاجو الجمهور العام يشاركهم الحركة دي علشان يكتسبوا القوة الكافية من الاموال اللي هياخدوها منهم لرفع السوق لابعد نقطة ويواصلوا تحصيل ارباحهم
فولاد الخبيثة دول بيعملوا ايه ؟ بيقوموا بالانسحاب من السوق لخفضه فتهبط الاسعار لغاية ما توصل المستوى المطلوب المهم ميوصلش للقاع السابق والا وقتها الجمهور هيدخل بقوة ويشارك في المستوى ده وتهبط الاسعار كرد فعل منطقي من الناس فالكبار يوقفوا السعر لمستوى اعلى من القاع السابق للحفاظ على السوق من الانهيار ويقوموا هنا بعمل تجميع وايضا هزات علشان ينضفوا السوق من صغار المتداولين ويحصلوا اكبر كمية من الفلوس علشان يرفعوا السوق بقوة
فتفهم من ده ان استحالة سوق بيكتسب قوة هيشارك مستوى اقل منه عمليات التجميع والا هيشجع الكل على البيع ووقتها الاسعار هتهبط فلازم يحافظ على مستويات اعلى مهما حصل ودي بتكون اشارة قوية للصعود فهنا بتلاقي السوق بيكون قمم وقيعان صاعدة ولو تكوين القاع اقترب من القاع السابق اعرف ان حصل تقل وضعف في السوق وان ممكن السوق يمشي جانبي وميقدرش يعمل ارتفاعات مؤثرة او محاولات الصعود هتفشل فلازم مخك يكون مصحصح ويفهم ان السوق العروض زادت وسيطرت عالطلب والسوق ممكن يغير سلوكه
طبعا كل اللي فات هي اشارات بتحتاج لتأكيد وتحليل سليم ومنطقي علشان تدخل وانت مطمن علشان محدش عميانا كده يشوف اشارة زي ده فيقول خلاص هدخل بيع او شراء وخلاص كده يبقى انت مش فاهم السوق اللي لازم يوصل لمرحلة التوافق علشان تدخل لانه بيقدر يغير سلوكه في اي وقت
بالتوفيق