الفوليوم اللي واجع دماغ الناس والكلام المفيد فيه
بسم الله
شوفوا ياجماعة بالنسبة للفوليوم اللي جايب صداع للناس وعمالين يتكلموا عن الدقة في بياناته ومركزية السوق وان بيتنصب علينا وهنضيع بسبب الفوليوم بتاع الميتاتريدر فاحب اقولك اهدى على نفسك لا في نصب ولا حاجة انت اللي مش عارف الفوليوم ولا عارف تتعامل معاه واحب اقولك الكبيرة كمان ان معرفة ارقام الفوليوم بدقة متناهية ممكن يسوحك ويخسرك مادام مش عارف تتعامل معاه صح
للاسف مش هعرف اشرح كل حاجة تخص الفوليوم لانه موضوع كبير ومش هعرف اشرحه هنا بس هحاول ابسطلك الفكرة بامثلة من الحياة لو فرضنا مثلا انت ماسك شاكوش وبتضرب بيه على خشب وقمنا بقياس قوة كل ضربة على الخشب ولو فرضنا قوة الضربة الاولى 90 والتانية 85 والتالتة 70 والرابعة 85 السؤال هنا هل معرفة قيمة كل ضربة هنا بدقة متناهية هتفرق في حاجة ؟ الاجابة لا لان معدل الضربات في العموم مرتفع مهما كان في بينهم اختلاف بس مش فارق بل العكس انت لو عرفت دقة كل ضربة واعتمدت عليها مثلا في الفوركس عن طريق قياس كل بار للفوليوم هتضيع لان الفوركس مش بيتعامل بالطريقة دي
طيب ايه هي الطريقة الصحيحة للتعامل مع الفوليوم ؟ الطريقة الصحيحة هو معرفة الاسعار نفسها بتتحرك ازاي وقتها لما تبص عالفوليوم هتفهم هو ماشي ازاي . السوق عاما بيمشي وفق لموجات ما بين صاعدة وهابطة من صغيرة لكبيرة وكبيرة جدا يبقى لو انت بصيت عالفوليوم اياك تبص له بار بار هنا دقة البار مش مطلوبة انت كل اللي محتاجه هو شكل قريب من الحقيقة ومش شرط الحقيقة نفسها
حد يقولي مش فاهم هاقولك نرجع لمثال الشاكوش وضرب الخشب لو انت فضلت تضرب بمعدل 90 - 85 - 70 -88 وفجأة قام واحد ضرب بمعدل 10 - 15 - 12 -9 ايه هنا اللي هتلاحظه هتلاقي ان اللي بيضرب عالخشب بقى ضربه خفيف جدا لدرجة انت ممكن متسمعش صوت الضرب ووقتها هتلاحظ التباين والاختلاف الشديد وقتها هل الدقة في قراءة كل ضرب هتفرق ؟ اكيد لا ده حاجة انت شفتها بعينك وحسيتها ومش محتاج قراية اصلا لان انت حسيت وشفت وسمعت بشئ قريب من الحقيقة خلاك تعرف وتدرك الاختلاف الشديد بين معدل الضرب
للاسف الموضوع كبير وعاوز شرح اكبر بس اتمنى تكون وصلت للناس حاجة وفي النهاية احب اقول لاي حد يتحجج بموضوع الفوليوم ده اقوله اطمن وريح بالك لو سوق الفوركس نفسه حط كل البيانات بمنتهى الدقة تحت ايدك برده هتخسر مادام مش عارف تتعامل معاها صح
شكرا وبالتوفيق للجميع
