هنقول كلام مفيد ومهم جدا

[Mohammed_said90]

بسم الله

كان الناس كلمتني من فترة من اول ما فتحت موضوع عن ويكوف ونزلت فرص وتحليلات بطريقة ويكوف والحمد لله كلها نجحت وحققت اهداف كبيرة طلبت مني اني اشرح ويكوف وقلت ان الموضوع صعب بسبب ظروفي والوقت حتى ده مأثر عليا وصفقاتي نفسها قليلة لان التحليل بيتطلب وقت ومجهود مش مجرد بتحط رسومات وارقام لازم حاجات كتير بتشتغل عليها علشان منطقية التحليل اللي تخلي الانعكاس والخسارة صعبة

فانا حبيت استغل الوقت اللي بقى متاح ليا اليومين دول واتكلم معاكم شوية بخصوص الفوركس والتحليل

شوفوا ياجماعة انا درست هندسة ولما دخلت مجال الفوركس من 9 سنين تقريبا درست اليوت وبعدها اتنقلت لويكوف واستقريت عليه لاني بشوف انه تحليله منطقي جدا ومتوافق مع الطبيعة وقوانينها والهندسة هنا كان ليها دور رغم ان اليوت مأثرش معايا وكان جميل وعملت معاه شغل حلو ولغاية دلوقتي ساعات بدمجه مع ويكوف

نرجع لويكوف وايه هي سر قوته ببساطة لو هنفترض ان شخص عاجز ورجليه الاتنين متكسرين تقدر تشيله حمل ويطلع بيه جبل او سلم او اي شئ مرتفع ؟ استحالة وكذلك السعر علشان يتحرك لاعلى بيحتاج قوة تاخد الاسعار بسهولة وتخليه يخترق مستويات المقاومة ويصعد لكن مينفعش السعر بيديك اشارات انه عاجز حرفيا وتقول لا بس السعر هيصعد تبقى انت كده مغيب ومش فاهم السوق وتلاقي السعر بعدها حصله سقوط حر وتخسر فلوسك وانت مش مصدق نفسك وفاكر انك صح والسوق عشوائي وبيمشي صدفة

لا ياعم السوق مش عشوائي ولا حاجة هو مجرد خطاط او رسام بس رسمه وحش والحقيقة هو بيمشي وفق انماط وقوانين حاكمة وزيه زي اي حاجة في الكون لها نظامها وقانونها

فحد يسالني يعني ريتشارد ويكوف هو اللي جاب الديب من ديله يعني ؟ لا الحاج ويكوف من كتر شغله في المجال ده ومراقبته للاسواق لقى انماط وسلوكيات السعر ملتزم بيه ولقاه بيتوافق مع الطبيعة اللي اي حد حتى لو ملوش في الفوركس هتلاقيه عارفها زي مثلا قانون الجهد والنتيجة لو قلتلك مثال انت واقف قدام حيطة ومسكت دماغك وخبطها في الحيطة بكل قوة هيحصل حاجة للحيطة ؟ لا مش هيحصل الا ان دماغك هتسيح دم والحيطة زي ما هي ببساطة انت قمت بجهد كان نتيجته صفر ومهما عملت مش هيحصل حاجة

زي الاسعار وصفقة الخروف الاخيرة واللي حاولت تنعكس وفشلت السعر حاول بمنتهى القوة وفشل وجهده كله راح عالارض ومن رده فعله خلاص بقى مليون في المية مش هينزل وبعدها صعد الخروف 250 نقطة فيعني يشكر عم الحاج ويكوف وكتر خيره يعني

هنبقى نكمل بعدين واي حد عاوز يضيف حاجة او يسأل وياريت تكون الاسئلة عن ويكوف وبس

[mohammedkotp2015]

موضوع اكثر من رائع استمر اخى متابع لك بقوة

[k.e.n]

[Mohammed_said90]

نكمل كلامنا وندردش حد يقولي ما تدخل على طول على قوانين ويكوف والنماذج اللي قال عليها هاقولك والله اللي بكلمك فيه ده هو الاهم لان قوانينه ونماذجه مالية المواقع عالنت وتقدر تدخل على جوجل وتكتب طريقة ويكوف بالانجليزية وهتلاقي ماسورة معلومات ضربت في وشك ورغم كده الناس بتلاقي صعوبة في فهمة

تاني حاجة اوعى تفتكر ان حد معاه سر حاجة خصوصا لطريقة زي ويكوف وهيدخل يقولهالك ده مستحيل لان مفيش سر اصلا ايوة متتصدمش مفيش اي اسرار

الفكرة هي عملية اتقان وفهم لطريقة بتخلي عندك مرونة للتعامل مع كل موجة بتحصل وتفهم السوق عاوز يقولك ايه فخدها قاعدة لو حد قالك انا عرفت سر السوق وانا وانا اعرف انه موصلش لحاجة هو ببساطة طبق طريقة مشيت معاه في نوع معين من الموجات البسيطة لكن لما بيدخل في الجد ويبتدي السوق يقوم برسم موجاته المعقدة اللي تقريبا هي بتمثل الفترات الاكبر في السوق بيخسر

فالفرق بين المرونة في التفكير وتطبيق طريقة واستراتيجية كبير جدا لما يكون عندك مرونة في التفكير بتعرف تتعامل مع السوق وحتى لو عكس عليك بتفهم انه مجرد موجة تصحيحة معقدة نوعا ما لكن السوق هيرجع لمساره اللي انت حددته مسبقا ومش بتبقى خايف وواثق من نفسك لانك انت ممكن تحدد التصحيح مثلا بس متقدرش تعرف درجة تعقيده بس الميزة انك عارف هويته من البداية وعارف انه مهما عمل مش هيقلب عليك وده حصل فعلا في صفقة الخروف الاخيرة من اول محاولة لاختراق النموذج وفشله عرفت انه خلاص مش هينزل وفعلا حاول مرتين كمان وفشل واشتريته تاني من تحت وصعد 250 نقطة

لكن الاستراتيجيات والطرق المختلفة عند اول انعكاس حتى لو بسيط بتخاف وتفضل تخرج بسرعة لانك فعلا مش عارف هو ايه اللي حصل

متخافش محصلش حاجة مجرد صراع قوى زي مثلا ما جماعتين بيتخانقوا مع بعض ويفضلوا عاملين ازمة ومشكلة والناس تبعد عنهم لغاية ما تشوف مين اللي هيهزم التاني وياخد طريقه

ده كان احد قوانين ويكوف صراع العرض والطلب اللي لو واحد سيطر عالتاني السوق ياخد مسار مختلف وبرده
عنده قانون تالت ممكن اي حد هيعرفه حتى لو ملوش في الفوركس وهو قانون ان اي حاجة بتحصل اكيد ليها سبب حد بالذمة ميعرفش المعلومة دي اكيد الكل عارفها ببساطة الراجل قال السوق مش هيطلع بالقوة دي او هينهار بالسهولة دي الا لو في سبب وراه

هنكمل بعد شوية وشكرا لمروركم

[Mohammed_said90]

قبل ما اكمل عايز اعتذر عن جملة كتبتها بالغلط في المشاركة الماضية وهي انك متعرفش درجة تعقيد التصحيح انا اقصد لا نتوقع شكل التصحيح ولا درجة تعقيده لكن معرفتها ده سهل

نكمل بقى لو سألتك مين المسئول عن تحديد سياسات دولتك او مملكتك هتقول الرئيس او الحكومة او الملك المسئولين الكبار يعني ايضا الفوركس له كبار هما اللي بيحددوا طريقه وده شئ منطقي جدا ان اي سوق بيبقى فيه حيتان كبار هما اللي بيتحكموا فيه ويكوف حدد طريقة دخولهم وازاي تعرفهم واكيد اي قرار هياخدوه هيترتب عليه اللي جي واللي هيحصل للسعر مستقبلا

يعني ببساطة لو السعر هابط لفترة طويلة وشفت اشارة لدخول الكبار زي ارتفاع كبير للفوليوم والاسبريد وتغير في سلوك السعر وده طبيعي لانهم الوحيدين بما يملكوه اللي يقدروا يعملوا اللبش ده المهم تقف هنا وتاخد بالك وتشوف العالم ولاد .. عايزين ايه هل هيقلبوا السوق ويحولوه من هبوط لصعود وده مش هيحصل الا لما يكسبوه قوة بتاخد في وشها ولا الناس دي هتريح شوية وبعدها تاخد السعر وتكمل هبوط ويكوف هنا بقى وضع نماذجه وقوانيه علشان يعرفك الناس دي عاوزة ايه

على فكرة انا مش بشرح نظرية ويكوف ونماذجه لانها معروفة وسهل تجيبها انا بحاول افهمك الية السوق بطريقة سلسة ومبسطة اللي ممكن متستخدمش ويكوف بس تدعم اي تحليل ليك وتديك فكرة اعمق واقوى للسوق لان قوانينه منطقية جدا

[ابوالعلاحركات]

ايام الازمه الماليه العالميه كنت بالبورصه ولا اعلم شئ عن الفوركس في 2008 ووضعت كل تحويشه العمر بالبورصه وخسرتها لان مدير حسابي كان شغال بهذه النظريه ومعرفتش ان انها طريقة وايكوف الا من يومين بعد ما لفت نظري اليها ولا اقول انها سبب في خساره كل اموال ومديون لحد الان ولكن الحذر في الازمات العالميه الحيتان اكتفوا بما حققوه من ارباح يبقي علطول تصريف ونزول وايهام بتجميع وطلوع ويتبعه نزول عنيف انما في السوق العاديه وبعيدا عن الازمات ناجحه جدا

[amskhz123]

أخي محمد ....متابع معاك .....وموفق في مساعيك إن شاء الله

[Mohammed_said90]

ايام الازمه الماليه العالميه كنت بالبورصه ولا اعلم شئ عن الفوركس في 2008 ووضعت كل تحويشه العمر بالبورصه وخسرتها لان مدير حسابي كان شغال بهذه النظريه ومعرفتش ان انها طريقة وايكوف الا من يومين بعد ما لفت نظري اليها ولا اقول انها سبب في خساره كل اموال ومديون لحد الان ولكن الحذر في الازمات العالميه الحيتان اكتفوا بما حققوه من ارباح يبقي علطول تصريف ونزول وايهام بتجميع وطلوع ويتبعه نزول عنيف انما في السوق العاديه وبعيدا عن الازمات ناجحه جدا

كويس مشاركة الاستاذ احمد لان اللي كتبه هو محور كلامي اللي جي وربنا يعوض عليه

شوفوا ياجماعة نظرية ويكوف او ريتشارد ويكوف مجبش حاجة من عنده ولا اخترع حاجة وده اللي حاولت اوصله للناس الراجل ببساطة رصد حاجات بتتكرر في السوق متوافقة مع قوانين الطبيعية زي مثلا قوانين نيوتن وحاجة احنا بنقوم بيها يوميا يعني مثلا لو جيت قلتلك ان اي حاجة بتحصل في الكون لها سبب هل تقدر تشك في حاجة زي دي يعني مثلا لو انت في الثانوية العامة ومذاكرتش كويس فرسبت هل رسوبك وفشلك ده مكنش له سبب ولا حاجة خارقة غير طبيعية ملهاش تفسير اكيد انت عارف سبب رسوبك

فاللي عاوز اوصله ليك ان الراجل مألفش واخترع قوانين من دماغه ولسه احنا مش عارفين هي صح ولا غلط هو بالظبط بيقولك ان السوق ده زي اي حاجة بتحصل حواليك في الطبيعة له قوانين بتحصل للبشر يوميا زي الجهد والنتيجة والسبب والتأثير والعرض والطلب حاجة مفروغ منها وصحيحة مليون في المية واحنا بنعيشها كبشر كل يوم كون ان انت معرفتش تحلل فدي مش مشكلة القوانين وارد تخطأ وده ممكن يحصل لاي حد

وده اللي خلاني اتمسك بويكوف بحكم اني مهندس وفهمت الراجل كان عاوز يوصل للناس ايه للاسف الناس بصت لويكوف من منظور خاطئ افتكروا الراجل جاب شوية نماذج وقوانين من دماغه فيتضرب معاك او تفشل وده مش صحيح الراجل مقالش انه اخترع قوانين ولا حاجة هو بيقولك السوق ده زي اي حاجة في الكون بتحصل يوميا زي العرض والطلب لو العرض سيطر بتلاقي السعر بينهار والعكس لو الطلب زاد الاسعار بترتفع هل حد عنده اعتراض على ده ؟ اكيد لا لاننا عارفين ده وبنعيشه كل يوم

ارجوا تكون الناس فهمت مقصدي

بالنسبة للاخ احمد وده اللي كنت ناوي اتكلم عنه وهو انك متتخيلش مهما وصل بيك درجة اتقانك لويكوف او اي نوع من التحليل ومهما حققت من ارباح انك خلاص عرفت السر الاعظم وانك هتحط رجل على رجل وتقدر تكسب بمنتهى السهولة تبقى لسه مبتدئ ومعرفتش اي حاجة ليه بقى ؟ لان ببساطة انت بتتعامل مع سوق ضخم جدا بيديك كل ثانية معلومات ورسائل وانت بتحاول تقرا هو عاوز ايه فلو حاولت تحلل كل شمعة وتفسرها على اساس انت خلاص فهمت كل حاجة يبقى هتخسر كل فلوسك لان اي نموذج بيتكون لازم ياخد وقته بالكامل علشان بيتكون عن طريق المعلومات اللي بيديها ليك السوق بالظبط زي الطبخة اللي لازم تاخد وقتها عالنار عاوز اقولك مثلا لو عملت ناصح وحاولت تحلل كل موجة صغيرة داخل نموذج تصحيحي معقد جدا فممكن تتسوح وتخسر كل حسابك

فالحل انك تكون في قمة برودك وهدوئك وتسيب السوق يديك كل المعلومات لغاية ما السوق بنفسه يحط راسه تحت ايدك لان السوق بمنتهى الواقعية والمنطقية لازم يوصل لمرحلة الخلل اللي بتقولك خلاص انا هنهار دلوقتي او السوق هيصعد الان لان من ضمن قوانين ويكوف او بلاش ويكوف طبيعيا اي حركة قوية لفترة طويلة لازم يكون لها سبب والا يبقى ملهاش قيمة وتلاقي الحركة المفاجئة دي وقفت بسرعة ورجع السعر لمساره السابق

هنكمل قريب

[EakaTrading]

بارك الله فيك و كلام جميل في انتظار مزيدا من الطرح

[alskndry]

تسلم ايديك اخى الحبيب

[مهتاب]

كلام عقلانى ولشخص محترف

[Mohammed_said90]

نكمل كلامنا ياجماعة وبالمناسبة دي اخر مشاركة ليا هنا علشان محدش يحس بالملل من كتر الكلام . المهم ندخل على اهم شئ انا بشوفه في اي تحليل عاما وهو المنطقية وهنا بقى عاوزك تهدى كده وتصفي ذهنك علشان الكلام اللي جي ده مهم جدا وممكن يساعدك في تحليلك للسوق اللي انت مش عارفله مالكة ده

شوف ياصديقي وركز انا هاحاول ابسطلك الموضوع سوق الفوركس ده اللي يعتبر زي اي سوق بيعتمد على ايه ؟ علينا احنا البشر بائعين ومشتريين والمادة نفسها يعني بيتحرك وفق قوانينك انت المرتبطة بالزمان والمكان اللي انت فيه ده مش جاي من عالم اخر له قوانينه الخاصة بزمان ومكان اخر علشان منعرفهاش ونفضل نخبط في بعض يعني بيمشي بمنطقية من الاخر بمبدأ 1+1 = 2

حد يقولي يعني ايه هو ده بيظهر عالشارت ؟ ايوة بيظهر هقولك مثال يعني مثلا المشتريين اشتروا بحجم معين والبائعين بحجم اخر بناء على معلومات وبيانات ايه اللي بيظهر عالشارت ؟ اللي بيظهر نتاج عملية منطقية حصلت ظهرت عالشارت عرفتك الدنيا مالها ايه اللي بيحصل وبيتخطط ليه ... خدها قاعدة وامشي بيها مفيش سوق هيقلب ولا هيصنع ترند الا لو له سبب منطقي هيسلمه في ايدك يعني السوق مش من نفسه كده هيقرر يصعد او يهبط لو انت معتقد كده وفر فلوسك وسيبك من الفوركس وانت الكسبان

بالظبط الشارت ده زي نتيجة فحص الاجهزة الطبية اللي بتفحص الانسان وتديك بيانات بكل شئ وعليك انك تقرا ده وتعرف حالة السوق ايه وقت التوتر الضعف القوة العجز الضغط يعني مينفعش السوق عمال يزعق في وشك ويقولك عند احدى المناطق اني مضغوط وعاجز عن اختراق منطقة وبيقوم بردات فعل قوية وتقوله لا بأذن الله هتعملها وتنزل علشان معشم نفسك بحاجة لا صحصح كده انت بتضيع هنا السوق وفق لقانون الجهد والنتيجة بيقوم بجهد خارق والنتيجة صفرية عجز كامل ومؤشر لازم يكون في حساباتك وانت بتقوم بتحليل النموذج علشان تدي منطقية وواقعية لكل خطوة يقوم بيها السوق

واخيرا قبل ما انهي الموضوع خليك دايما في تحليلك منطقي جدا وكل حركة خدها السوق لازم يكون لها تفسير بالشكل ده صعب السوق يخالفك هتتعامل بخطوط ومستويات فقط هتبقى عامل زي اللي متغطي بالهوا لازم تعرف هو اضغط هنا ليه طب تخطى المستوى دا وارتد من هنا ليه طب ليه كون الشكل ده لو لقيت نفسك بتجاوب على الاسئلة دي يبقى انت كده ماشي مع السوق على خط واحد

[nahed_ebrahem]

لماذا استاذ محمد كلامك من ذهب واستفيد كثيرا ومن توصياتك

[Mohammed_said90]

لماذا استاذ محمد كلامك من ذهب واستفيد كثيرا ومن توصياتك

هنزل فرص وهعمل مواضيع تانية لو سمح الوقت انا بتكلم عن الصفحة دي بس كفاية كده علشان انا اتكلمت كتير وده ممكن يحسس بعض الناس بالملل لاني للاسف معنديش الوقت الكافي للتدعيم بالصور والشرح الكامل

[amrmahdy20]

كلامك جميل اخى أكمل لنستفيد منك