عارف ليه المُضاربة في البورصة هي أعظم وظيفة في العالم؟
عارف ليه المُضاربة في البورصة هي أعظم وظيفة في العالم؟
.
لسببين الأول هو أن المُضاربة هي الوظيفة الوحيدة ومجال العمل الوحيد اللي ممكن تتحكم فيه في المخاطر بنسبة أكثر من 90%... طب إزاي؟ ... شوف يا سيدي...
.
لما حضرتك بتفتح أي تجارة أو تبني مصنع أو تشتغل في أي مجال عمل حر حضرتك بـ تواجهه مخاطر غير محدودة... يعني مثلا لو عملت مزرعة أبقار ممكن تقابل مشاكل كثير زي نقص مواد العلف والأمراض الفيروسية والبكتيرية... ده غير المجهود المبذول... وممكن في الآخر تيجي تبيع منتجات المزرعة فتلاقيها مش مغطية التكلفة بسبب المنافسة والكساد...
.
حتى لو فكرت في مشروع شكله من وجهة نظرك مضمون زي كافتيريا أو صيدلية برضوا حـ تواجه مشاكل وصعوبات كثير ممكن تخلي خسائرك تعدي قيمة الاستثمار الأصلي...
.
لكن في البورصة حضرتك بـ تحدد حجم الخسارة في الصفقة الواحدة لو حصلت قبل ما تشتري أو تبيع... فتكون النتيجة إنك لو خسرتك بـ تخسر اللي أنت حددته من البداية... ولو كسبت بتكسب برضوا اللي أنت حددته من البداية... يعني النهايات بـ تكون متوقعة فلا بـ تفرح لمكسب ولا بـ تزعل على خسارة... فتفضل دائما متوازن نفسيا...
.
طب إزاي أحسب خسائري قبل ما ادخل أي صفقة؟ ...
.
شوف يا سيدي خليني اضرب لك مثل للتوضيح... لنفترض أن حضرتك معاك 100،000 ج ومش عايز تخاطر بأكثر من 5% منهم يعني 5000 جنية... وبفرض إنك ناوي تشتري سهم سعره الحالي 20 ج وشايف إن وقف الخسائر بتاعك حـ يكون عند 18 ج يبقى قيمة الخسارة لو اشتريت سهم واحد هي 2 ج.
.
دلوقتي أقسم الخسائر اللي ممكن تخاطر بيها على مخاطر السهم الواحد يطلع لك عدد الأسهم اللي ممكن تشتريه وهو 2500 سهم ( = 5000 ج ÷ 2ج)
يبقى لو سعر السهم نزل لا قدر الله ووصل لوقف الخسائر حضرتك مش حـ تخسر غير اللي حددته من البداية وهو 5000 ج ... وزي ما حضرتك شايف أنت اللي بـ تحدد مقدار الخسارة مش السوق... دلوقتي بقي ممكن تقولي على تجارة ثانية ممكن تعمل فيها كدة غير المضاربة في البورصة والفوركس؟
.
ثاني سبب يخليني أقول على المضاربة في البورصة والفوركس أعظم مهنة في العالم هو إنها أكثر مهنة محتاجة إن الشخص يكون صادق وخصوصا مع نفسه... ليه؟ ... لأن المضاربة في البورصة هي علاقة بين المضارب وخط الأسعار... المضاربة في البورصة هي المهنة الوحيدة تقريبا اللي أعرفها ما فيهاش بشر... ما فيهاش أي نوع من التعامل بين البشر بعضهم وبعض... لأن حضرتك بتبيع للشاشة وبـ تشتري من الشاشة... واي علاقة ثانية سواء كانت علاقتك مع السمسار أو مضاربين ثانين هي علاقات ثانوية ممكن تستغنى عنها... لكن علاقتك بالشاشة هي علاقة رئيسية لا يمكن الاستغناء عنها... وهي علاقة تتطلب منك كل الصدق الموجود في نفسك... ولا شيء غير الصدق... فشاشة الأسعار هي مجموعة من الأرقام المجردة من أي مشاعر... لا تعرف طمع ولا خوف ولا غضب... عشان كدة أنت لازم تكون صادق مع نفسك جدا عشان تنجح في المجال ده... على عكس مهن ثانية كثير ممكن يكون الكذب أو التجمُل وتزويق الكلام والأفعال فيها سبب رئيسي للنجاح...
.
الخلاصة هي أن البورصة أصدق مهنة في العالم لسببين: الأول هو التحكم شبة الكامل في المخاطر... والثاني هو الصدق مع النفس ثم مع الآخرين
.
#محمد_البرماوي، CMT
