هل يمكن أن يصدر البنك بطاقة فيزا مسروقة؟

[Ahmed.galal]

مشكلتى بإختصار إن ليا حساب فى بنك مصر وعملت فيزا إنترنت مسبقة الدفع من البنك ومنفصلة عن الحساب الخاص بي لأنها فيزا مستقلة
المهم عملت تحويل لدوكاسكوبي Dukascopy بمبلغ 1500 دولار فكلمني مدير حسابى وقالي إنهم إستلموا المبلغ لكنه إتعمله حجز لأن الفيزا متبلغ عنها إنها مسروقة
وطلبوا منى إنى أجيبلهم بيان عمليات من البنك متسجل فيه التحويل ليهم عشان يتأكدوا من صحة البطاقة
روحت بنك مصر وشرحتلهم الموقف وطلبت منهم بيان بالعمليات فمدير الفرع قالي إن البطاقة سليمة وفعالة وإن طالما البطاقة صدرت من البنك ده دليل على صحتها بالإضافة لإن التحويل تم خلاص وده اللى يهم الطرف التانى إنه إستلم الفلوس
بالإضافة لكده قالى إن بيان العمليات مش بيصدر إلا شهرياً لأنه ميقدرش يصدره على عملية واحدة وبالتالي فلازم أستنى مرور شهر لإستلام البيان لأن ده نظام البنك بالنسبة لفيزا الإنترنت
فهل ممكن حد يساعدنى إزاى أقدر أحل المشكلة ديه؟ وهل فعلاً البنك ممكن يطلع أرقام بطاقات مشكوك فيها؟ ومين من الطرفين اللى عنده المشكلة الأساسية ؟

[Ahmed.galal]

ديه تطورات الموضوع
حاولت أخد من بنك مصر بيان بالعمليات أو تأكيد تحويل لكن للأسف البنك قالي إن البيان ده شهري وميقدرش يطلع البيان يوميي أو على عملية واحدة وبالتالي لازم أستنى شهر كامل عشان أقدر أخد بيان تأكيد بالتحويل عشان أقدم الإثبات لدوكاسكوبي
ملحوظة : الفيزا ديه فيزا إنترنت يعنى منفصلة عن الحساب الخاص بتاعك وبالتالى متقدرش تشوف نتائج عملياتها فى حسابك
للأسف قررت وقتها إنى أرجع المبلغ من دوكاسكوبي وأعمل فيزا تانية فى بنك تانى وأبعته وده كان قرار مش سليم للأسباب التالية
أولاً المبلغ رجع وكان خسارتى فى المبلغ 100 دولار وإستلمته بعدها بإسبوع تقريباً
ثانياً لغيت فيزا بنك مصر وبلغونى إنى هستلم المبلغ الموجود فى الفيزا بعد إسبوعين
يعنى ضاع منى 3 أسابيع ده غير الـ 100 دولار الخسارة

المهم قررت أروح البنك العربي الأفريقى وأعمل فيزا إنترنت 4U لأنى لقيت الناس بتشكر فيها
وفعلاً عملت الفيزا من عدة أيام وإستلمتها فى نفس اليوم وفعتلها فى يوم حصولي عليها
المشكلة اللى ظهرت لي إنى كل ماحاول أستخدمها فى تعزيز الحساب بتاعي بتظهرلي رسالة Transaction Faild يعنى العملية فشلت
وبتجيلي رسالة من دوكاسكوبي بتقولى إن عملية التعزيز فشلت وفيها بيانات المحاولة الفاشلة وبيطلبوا منى أتأكد من البنك إن الفيزا شغالة وإن رصيدى كافي لعملية التحويل
ولما كلمت البنك العربي الأفريقي أكدلى إن معندوش مشكلة والفيزا متفعلة
لكن الغريب إنه قالى إن مافيش أى عمليات سحب حصلت على الفيزا بمعنى إن لو كان فيه أى محاولات سحب من الفيزا وفشلت فالمفروض تظهر عندهم لكن مافيش حاجة ظاهرة عندهم وده معناه إن مفيش أى محاولات أصلاً حصلت للسحب من البطاقة
وده طبعاً عكس الرسائل اللى وصلتنى من دوكاسكوبي وقت ماحاولت أودع فيها واللى بتأكد إن كان فيه محاولات سحب وفشلت
حد ممكن يكون عنده خلفية إيه سبب المشكلة ديه؟

[AlTair]

لو عندك credit card بإسمك جرب بها فى الغالب تنفع إن شاء الله...أما بالنسبة للكروت مسبقة الدفع تأكد أن الكارت مكتوب عليه إسمك و إنك بتكتب ال billing address بتاعك مظبوط كما كتبته فى أوراق فتح الحساب...أعتقد الكروت اللى أنت بتتحدث عنها دى لا يوجد عليها إسم العميل و دى ممكن تكون سبب المشكلة...ممكن تفتح حساب مع QNB و تعمل كارت إنترنت visa debit و بيكتبوا عليه إسمك و تعمل منه اللى أنت عوزه من غير مشاكل إن شاء الله...بالتوفيق أخى