الى اصحاب المارجن كول، ( السلم والثعبان)...portfolio manger

[portfolio manager]

العنوان: الى اصحاب المارجن كول، ( السلم والثعبان)...
مقدمه لابد منها ، معلش اصبر واقرأ للنهايه...

انا احمد محمود portfolio manager الأسم ده كان معروف كتير على منتدى البورصه المصريه لكن تركت البورصه واتجهت لسوق العمله انا عايز اقول اني تقريبا ادمرت في السوق هنا ، جاء لي 3 مارجن كول في خمس شهور ، على الرغم من اني محترف تحليل فني وفاهم اوي تاثيرات الاخبار شكلها ايه ودارس اداره محافظ استثماريه وتحليل فني ، لكن حصل مارجن كول 3 مرات ، كل مره كنت براجع نفسي باكتشف ان الخطأ مش في اتخاذ القرار!!! الخطأ كان في الطمع ثم الطمع ثم الطمع... بمعنى ،، نوضح اكتر عشان نفهم ( كل مره كنت باخد فيها قرار بدون اي عشوائيه بعد دراسه مستفيضه لاتجاهات السوق والاخبار) كان الملاحظ انه كل اربع عمليات صح بيطلع فيهم عمليه خطأ ، ولكن ولكن ولكن في العمليات اللي كانت بتكون صح ، كنت بشتغل مثلا بعقد 5000 دولار بكسب في كل عمليه مثلا 30 الى 50 نقطه بعد ثلاث عمليات بكون كسبت مثلا 120 نقطه على اساس الحساب انه 5000 دولار لو انا كنت استمريت بالعقد 5000 دولار والتزمت بـ stop loss كنت خسرت مثلا 60 نقطه وبقى معايا مكسب 60 نقطه يعني المجمل اضافه على راس المال ، لكن للاسف اللي كان بيحصل مش كده .. وهو اني ضربت بالتوصيات اللي انا اتعلمتها في الجامعه والكتب اللي قرأتها والنصائح اللي سمعتها من الكبار في السن .. عرض الحائط ، نفس الخطأ مثل الجميع وهو ، اني ملتزمتش بالاتي:ـ

1- stop loss .
2- حجم العقود.

بعد الحمد لله ما اتدمرت تماماً وقفت مع نفسي وقفه طويله اكتشف فين الخطأ لاقيت انه في التالي اني بفضل اطلع اطلع اطلع ، واقع مره واحده بس تنزلني للقاع rock bottom زي ما سماها د/الكسندر اليدر.. في كل مره كنت بعمل كده لما راجعت نفسي اكتشفت انه السبب هو الثقه المفرطه بعد العمليات اللي تمت بمكسب ، و الطمع فا وضعت استراتيجيه تغلبت بيها على ده ، هي فيها جزء من الطمع لكن لما حسبتها بالورقه والقلم ، لاقيت اني مثلا عشان اشتغل بحجم عقود 1000 دولار يعني 0.10 سنت في النقطه محتاج مثلا 5000 نقطه عشان اوصل 500 دولار .. لاقيت انه شبه مستحيل اني اكسب بشكل متواصل 5000 نقطه وفي الاخر ايه اكسب بس 500 دولار ده يبقى تهريج سوق في مخاطره عاليه زي كده تقريا خلص علي و ضيعني ، لازم انتظر منه مقابل مرتفع risk /ratio theory زي ما قال عليها جون ميرفي..عشان كده انا وضعت الاستراتيجيه ده ، هي مرتبطه باداره الاموال ، مش بالتحليل ...

كل اللي انا عايزه منك حجتين وبس 110 $ في حسابك ، والتزام بقبضه من حديد.. وبخصوص التحليل الفني فا الاخوه هنا قايمين بالواجب وزياده 3 حبات كمان ... ده على اساس انك خالص في الضياع اوي... ومش قادر تاخد اي قرار من شدة الخسائر زي اي حد...

نشرح الاستراتيجيه مع بعض:ـ

الفكره هنا مستواحه من المقامرين، ولعبه السلم والثعبان ، والتدمير اللي انا مريت بيه في الفوركس.. هاتلاقي في الملف الاكسيل المرفق الاستراتيجيه من بدايتها بتقول انك محتاج 110 $ مش هنشتغل نهائياً غير بعقد و احد في اي عمليه هندخلها هو عقد واحد بس lot size 1000$ وده لغايه ما اوصل بالمحفظه بتاعتي من 110$ اوصل لغايه 130 $ يعني محتاج اكسب 200 نقطه ، مش مهم امتى نهائياً شيل الوقت من حساباتك عشان ما تتعبش،،، بعد انشاء الله ما نحقق ال 200 نقطه انا بقول 200 نقطه عشان 200 نقطه × .10 = 20 $ وبس .. دلوقتي بقى معايا في المرحله التاثيه زي ما هو واضح 130 $ دلوقتي بس اقدر انقل حجم العقد من 1000 $ الى 2000 $ وكاني لسه عامل ايداع دلوقتي ، طب ليه عشان يا جميل لو العمليه مجتش في صفك وتاكد هيحصل لازم تغلط ، تقوم عامل وقف خسائر stop loss اوعى تنسى التزام بقبضه من حديد معلش ادبح نفسك تعمل وقف خسائر عند 100 نقطه ، يعني الخسائر بتاعتك هي 20 $ وبس يبقى انت عملت ايه كده رجعت للخطوه اللي قبلها ، عند 110 $ دولار لو لاقدر الله ده حصل ورجعت لل 110 $ تعمل حجتين ، تقفل جهاز الكمبيوتر بالظبط 15 ساعه ما تقربش منه ، ولما ترجع تنزل حجم العقد 1000 $ تاني وترجع للخطه من البدايه ،اسمع كلامي واقفل الجهاز ما تفتكرش اني عايز اريح اعصابك لا ده شيء طبيعي جدا لانه عاده هتكون دخلت في فترة جديده سوق اسيوي مثلا او سوق تاني وعاده الاتجاه بيكون هدي شويه ، لانك غالبا هتبدا تتحدى السوق من جديد ده طلع جامد لا ده لازم ينزل من هنا ده طالع مش عارفه كام نقطه يبقى لازم يرتد لا يا سيدي سيبه وقوم اسمع الكلام ، لو قدرت تغيب 24 ساعه يكون اجمل ، اوعى تتردد اسمع الكلام ،، ولما ترجع نزل حجم العقد 1000 $ معلش ،،، طيب لما انشاء الله ربنا يوفقك وقدرت تتحرك لرقم بعيد مثلا المرحله رقم 14 وربنا بعت لك رزق ووصلت دلوقت 2000 $ دولار هتعمل ايه ، زي ما هو مكتوب التزم بحجم العقود الظاهره قصادك وهو وقتها هيكون lot size 40.000 $ طب ليه كده عشان لو لاقدر الله خسرت 100 نقطه، هتخسر كام دولار 400 $ صح تقوم تنزل من 2000 $ توصل لغايه 1600 دولار يبقى انت فوق المرحله رقم 13 يبقى انت نزلت سلمه واحده بس ما وصلتش لغايه باب العماره ، فهمت ليه اسمها السلم والثعبان طب لو حصل وانك وصلت للخطوه رقم 13 التزم بحجم العقود وخفض انزل 30.000 $ والوقف برده عند 100 نقطه عشان لو خسرت تبقى خسرت 300 دولار ورجعت تاني للخطوه رقم 12 هيبقى معاك 1300 $ يعني واقف عند السلمه رقم 12 وبرده ما رجعتش لباب العماره ... صح كده .. وهكذا بالتوالي لغايه ما توصل للهدف اللي في النهايه هو 20 الف دولار انا كاتب حجم النقط المطلوب في كل سلمه كام اسعى انك تحققه بس بس بس بس ، شيل ،الغي ، امسح ، احذف الاطار الزمني من حسابتك ما تقولش عايز احقق ال 140 نقطه دول في يومين لا يا حبيبي مش كده ده رزق يجي براحته وقت ما ربنا ياذن ويقول، مش وقت ما انت تقول انت هتسعى ربنا بعت لك في العمليه ده عشر نقطه الحمد لله نعمه وفضل بعت خمسين خير ، نقطف دول ونشوف غيرهم حسب ما انت بتشتغل بقى المهم التزم بالخطوات ده وربنا يعينك ، انا بقى لي كام طلب كده في السريع من غيرهم انا مش مسئول عنك التزم بما هو قادم ، تسلك وربنا يوفقك...

1- لو انت بتعمل حاجه غلط مع ربنا وانت عارف الحاجه الغلط ده ياريت تبطلها وتعاهد نفسك انك مش هترجع لها تاني توب توبه نصحوه عشان الملك سبحانه وتعالي يهديك ويفتح بصرك لما هو خير..
2- ابعد تماما ، ونهائياً عن الازواج ذات التشتت العالي ومعروفه زي الباوند دولار ، مش عارف المجنون الحجات اللي انت عارفها ده وخليك مع الحجات اللي التطاير فيها منخفض للغايه ، للغايه ، بالنسبه لي مثلا الدولار كندي ، والنيوزلاندي دولار ويعني في بعض الاوقات الدولار ين ، انا شايف كده انت حدد بس عشان خاطري ابعد عن الازواج اصحاب التشتت العالي ، عشان تكون فاهم الحاجه اللي هتخليك تشتغل في الازواج الغبيه ده اسف اه الغبيه زي الباوند دولار هو طمعك فا انك شايفه عنيف في الحركه هتقول ياه لو اخد واحده من دول الازمه تنحل لا عشان خاطري لا . خليك بالراحه في التوابع...
3- نصيحه كمان لما يجي الوقت اللي خلاص هتشتغل فيه باكتر من عقد هتعمل ايه مثلا لو هتشتغل بحجم عقود 5000 دولار اظبط البرنامج بتاعك على اساس ان العقد 1000 دولار بس وخد القرار كالاتي لو افترضنا انك مثلا قررت بعد دراسه انه شراء من عند مثلا المنطقه ده 1.5200 ده هيكون سعر الشراء لا اشتري بالشكل ده، على خمس مرات في كل مره 1000 $ بس وبين كل عقد 10 او 15 نقطه يعني كده 1.5200 – 1.5190 – 1.5180 – 1.5170 – 1.5160 طب عملت ايه اديت نفسك فرصه كويسه اوي اوي وعملت متوسط كويس جدا بدل ما بقيت شاري ب 1.5200 بقيت شاري مثلا 1.5180 فا بقى متوسط حلو لما يرجع تاني لغايه 1.5200 يبقى مش يدوب جبت فلوسك من غير ما تغطي العموله لا ده انت تبقى قربت توصل لمكسب قريب من 20 نقطه ، ميه ميه في احلى من كده ايه ، طب لو لاقدر الله كنت مخطئ وهتقف بعد 100 نقطه اديت نفسك فرصه اكبر شويه يعني بدل ما هتقفل عند 1.5100 لا ممكن تقفل عند 1.5080 مثلا شفت عملت ايه وبكده تبقى قضيت ولو بنسبه بسيطه على التشتت العالي في السوق وعلى الانحراف اللي دايما بيحصل معاك مع كل قرار بس ارجوك ما تشتغلش في الازواج اصحاب التشتت العالي عشان ما تخلصش على نفسك ارجوك...

وكلمه اخيره لو في حياتك انت مش قادر تتغلب على مشاعرك وتضغط على نفسك ... وتبطل الاخطاء اللي بتعملها مش هتقدر تلتزم بالاستراتيجيه .. بمعنى انك لما تنزل سلمه مش هتقلل حجم العقود بما يتناسب مع هذه الخطوه او تلك ، وهتفضل تايه ومش عارف تعمل ايه وفاكر ان العيب في الفوركس ، وشايل فوق دماغك هم الاله الحاسبه وتقول ياه اللي انا خسرته محتاج عشان اعوضه ليل مع نهار كام الف نقطه بحجم عقود مش عارف كام عشان اعوض بس المبلغ اللي دخلت بيه، والاحباط يمسك فيك ، وتياس اكتر لا ، الفوركس ما يعرفش انت اسمك اصلا ايه ولا انت منين ، هو يعرف حجم عقودك ورصيدك وبس ، فا اذا اديته فرصه يضحك عليك انت حر ، اما اذا وقفت مع نفسك تاكد انه مش هيتغلب عليك... معلش انا اتكلمت كتير لكن انا تعبت عقبال ما وصلت لده ومتاكد انكم هتوصلوا محدش يقولي انت معاك كام دلوقتي لاني بخاف من الحسد بصراحه... انا مقتنع بحجتين ، حكايه المليون دولار ده انا مش قادر ابلعها مش عارف مش هاضمها مش شايف انك تعمل مليون دولار مش بالسهوله ده ، لالا خلينا في اهداف بسيطه دلوقتي يعني اجيب عربيه اتجوز اجيب شقه اعمل شركه صغيره ابدا بيها حياتي ، كده ، لكن انسى موضوع الدخل الثابت ده من هنا ، انسى تماما ،،، وياريت تشيل من حسابتك المليون لسبب اللي عايز يطلع قمه الهرم وهو على الارض عقبال ما يرفع راسه ويثبتها شويه على القمه جذور رقبته زي ما بنقول بالمصري هتكون وجعته يقوم يقول ينهاري ، انا تعبت وانا واقف امال هطلع ازاي لا يا عم سلاموا عليكم ، اما لو انت باصص على الدور اللي فوقيك وبس مش هتحس بتعب اصلا لانك تقريبا واقف عليه ده انت راسك شايفه الدور ده من غير ما تتحرك عينك قادره توصله هو ده الهدف من الاستراتيجه بتاعتي ، لما اوصل عشرين الف دولار ابقى اكتب الاستراتيجه من اول وجديد مش ببدايه 110 دولار لا اسحب من العشرين دول اسحب 10 الاف واسيب 11 الف واغير صفر من الاستراتيجيه من اولها لاخرها اقوم اطلع 200 الف دولار اسحب ميه وسيب ميه وازود الاصفار وهكذا هو المال عشان يدار بيدار كده ده اللي درسته واتعلمته غير كده سلم لي على الترماي ، ياريت اللي مش عجباه اهوه كلام زي بقية الكلام واللي اقتنع مش عايز منه حاجه غير انه لما ربنا يفرجها عليه ، يعمل حاجه لله وبس كده.. شكرا للجميع وربنا يوفق الكل...

نصيحه اخيره اطبع الاستراتيجه ده ، واطبع ورقه كبيره اوي اسمها الالتزام ... والصق الاثنين فوق شاشة الكمبيوتر اللي بتشتغل من عليها ، وفكر نفسك كل ثانيه بالهدف بتاعك هتقدر تصدقه.. وتسعى اليه من غير ما تياس ولا تزهق ولا تمل .. ربنا يوفق الجميع...

[saamm]

شكرا لك اخي

[MaZaGAngeE]

كلام ممتاز جدا و أنا موافق عليه , فعلا حكاية الملايين دي مش بالعها مع ان فيه ناس محققة الاهداف فيها زي ما سمعت ....
أما الطمع ده بقى مفيش كلام ممكن يتقال عليه يا ريس دي مصيبة وحلت علينا الظاهر
فوركس = طمع
مش بالظبط يعني بس مش عارف اعمل ايه في طمعي ...............................

[MaZaGAngeE]

ليا اعتراض صغير على الفكرة وهو الاستوب لوز , ممكن أستعمل الهيدج كبديل عنه ؟
أنا لا استعمل الاستوب لوز

[portfolio manager]

لا معلش
بص يا سيدي بخصوص الطمع ، حقيقي لو مش قادر تسيطر انسى انك تنجح ، وبعدين الاستراتيجيه ده واضح انه فيها طمع ، لكن طمع منظم انا قلت اني اخدتها من نمط تفكير المقامرين ، ده شيء اما بخصوص الهيدج ، فا خد بالك ان عمولات الترحيل هتبهدلك ، يعني لو افترضنا انك كنت بايع الباوند دولار مثلا عند 1.8850 تقدري تقولي كنت هتعمل ايه دلوقت هتعمل هيدج وتفك يطلع اكتر ، وتعمل هيدج تاني وتفكه بعد شويه يطلع اكتر لغايه ما هوب ، انت بره السوق ، مش ده اللي حصل ، بص انت ممكن لو مش قادر تقتل نفسك ، تعمل ايه ، لو افترضنا انك هتلتزم بيها زي ما انا قلت ، يعني هتعمل ستوب لوز بعد ميه نقطه بص ممكن تعمل ايه ، ممكن تيجي عند مثلا خمسين نقطه غالبا ده ممكن يكون بكسر منطقه دعم او مقاومه ، اعمل هيدج اوك ، سيبه يجري شويه مثلا خمسين نقطه كمان، يبقى انت عملت ايه وفرت خمسين نقطه بعيده عن الستوب لوز ، وفكه بس اول ما تفكه حط برده ستوب لوز بعد خمسين نقطه من السعر اللي فكت منه ، طالما انت مش قادر اوي كده ، وتبقى اديت نفسك فرصه كمان ... ربنا يوفق

[The_Fox]

كلام رائع
بس من سيلتزم ؟؟

[portfolio manager]

مش هيلتزم غير اللي قادر يحلم ومصدق حلمه وواثق في الله اولا ثم نفسه ، هو ده وبس

[portfolio manager]

يا ترى حد معايا في الاستراتيجه ده ولا ايه النظام محدش قال !!

[N4X]

السلام عليكم

استراتيجية جيدة جدا
الالتزام هو اهم شيء




إنفوركس...