النتائج 1 إلى 2 من 2
  1. #1
    الصورة الرمزية GoldenTiger
    GoldenTiger غير متواجد حالياً عضو المتداول العربي
    تاريخ التسجيل
    Jun 2006
    العمر
    37
    المشاركات
    169

    افتراضي يوميّات همسة وخالها المصري

    يوميّات همسة وخالها المصري



    المشهد الأولانى
    نهار جوانى..داخلى يعنى
    المكان: غرفة نوم

    رجل نائم.. آنسة راقدة بجانبه ونوم شديد جدا..يدل على قيامهم بمجهود عنيف
    وفجأة.. تستيقظ البنت وتنظر إلى الرجل بتمعن ممزوج بالنعاس.. ثم تقررأن تقوم بما يدور في عقلها مهما كانت النتائج...و....و...وتصعد على صدره بحركة بهلوانية عجيبة وتجثم كالليث القابض على فريسته أو القائد الذى قتل غريمه في المعركة ...ثم فجأة تنقض على أنفه عضاً
    ثم.........
    جججغغغغغغغغغغ
    امبللللللغغغغغ
    يافتاح يا عليم يارزاق يا كريم.. انا عارف الصوت ده كويس وبحبه وبموت فيه بس مش الساعة تسعة الصبح يعنى عاوزين ننام يابنتى الله يهديكي ده جزائي انى بانيّمك جنبي

    افتّح عيونى ألاق صاحبة الصوت جاثمة على قفصي الصدري

    وش ملاك سبحان الله العظيم في خلقه
    بتلعب في وشي مراجيح.. عض وشد وخربشة وفضايح على الصبح..6 شهور من البراءة والجمال والتلقائية والظوافر السكاكين والحفاضات

    الله يسامحك ياأختى عملتينى خال بدرى وأنامش واخد خوانة
    تم اعلان حالة الطوارئ والتعبئة العامة في البيت كله
    ..
    ..
    ..
    الآنسة صحيت




    ***********

    تبص فى عيونها الصبح تنسى الدنيا كلها

    ثباح ايخييي ياخايو قوم اصحى.. ماتام اناثحيت ايبيت كيو يازم يثحى

    ترجمة فورية:صباح الخير يا خالو..قوم اصح ..مادام صحيت البيت كله لازم يصحى

    أنا: معليش يا همسة عاوز انام شوية
    همسة: قيت اثحى ايعب معايا
    أنا: عاوزة ايه ...؟؟؟
    همسة: هما ييه موث بيكيبوا سيية ايبّارة خايييث

    ((هما ليه مش بيجيبوا سيرة الأبّارة خالص؟؟))

    أنا: أنهي أبارة ؟؟
    همسة: اللي الناس نزلت فيها عند السمك
    أنا: آآآه ..والله يابنتى اسم على مسمى فعلاً أبارة بس خلاص بقى يا همسة السمك شبع واللى كان كان
    همسة: انهى سمك يا خالو ؟؟ سمك البحر ولا سمك البر..؟؟
    أنا: سمك البر..؟؟هو فيه سمك على البر ..؟؟
    همسة: ايوة ...مش السمكة الكبيرة راحت لندن ..؟؟
    أنا: اهلا.. سمك كبير..؟؟ ايوة وصلت يا هانم الفكرة...بس عرفتى منين الموضوع ده...؟؟؟
    همسة: جانى على الموبيل محشيز من واحدة زميلة في الرضاعة

    ماحدش يطلب الرقم لأن تمت مصادرة الموبيل وتحويل لخط لبيزنس ومشغلينه ايجار

    أنا: صحيح ما انتوا جيل العولمة
    همسة: اه المهم ..قولى....هو أنا بكام ..؟؟
    أنا: نعم ..؟؟ بكام ازاى يعنى..؟؟
    همسة: مش هماقالوا الواحدبـ 150 الف؟..أنا لسه صغيّرة اجيب كام....؟؟؟
    أنا: الدنيا ياماما ومافيها..قليلة عليكي
    همسة: طيب فيه واحد رافع قضية على شركة تدخين عاوز 20 مليون زورار تعويض عن وفاة ابوه..اشمعنى..؟؟؟
    أنا: مش عارف ...بس شفتى فايدة التدخين..؟؟
    تصدقي فكرة بدل الناس ماتغرق ..تروح تدخن احسن
    همسة: طيب ...دم الناس اللى ماتوا دول في رقبة مين ؟؟؟
    أنا: والله يا هموس الموضـوع
    .....



    همسة: استنى..اناهازنّ شوية علشان جعانة.. هافطر وارجع نكمّل لعب

    وتزنّ همسة وتاخدها امها تفطّرها

    ***********

    البحر بلع الأبّارة.. واحنا كمان بلعناها
    الناس ماتت.. العيال اتيتمت.. الستات اترملت
    سالم غرقت

    عادي الله يرحم اللى مات

    التانية اتحرقت على الرصيف من حوالى 4 سنين وسحبوها تغرق في عرض البحر علشان الميناء..برضه عادي

    الواحدبـ 150 بس.. قررررررررب قررررب

    أقول لهمسة ايه..؟؟

    ***********

    فاصل ثم نواصل

    اشرب شاى زفتون
    علامة الذوق الوضيع

    ***********

    المشهد اللي بعد الأولاني
    نفس المكان ما غيّرناش حاجة

    هففففففااااااااا

    وصلت الهانم تاني ولسه باخدها من امها.. ما هو أنا احسن من جليسة أطفال.. المفروض يدّوني مرتّب عليها.. خايف تسألنى على القبارة تاني.. الا واسمع صوت عِرسة جاي من عند الجيران

    حاحا.. القباحة راحة ياضنايا.. وانت مابتفهمش

    نهار اسود وحواشية كحلي .. اترعبت خفت البنت تسمعها ..وكان ما اترعبت منه

    وببراءة واستغراب طفولى قالت: خايووو..مين قباحة دي؟

    أوبااا..طب هاقولها ايه دى..؟؟

    أنا: لا عادى يا همسة ..دي...دي
    همسة: عارفاها..شفت الهبلو كليب قبل كده طيب وهى يعنى لازم تعمل كده ...؟؟

    يادى الوقعة...جيل عارف كل حاجة

    همسة: طيب شوف يا خالو مادمنا فتحنا موضوع المفسديون
    أنا: نعم ....خيرياماما..؟؟
    همسة: هو صحيح قناة خير اتقفلت ..؟؟؟
    أنا: مش عارف ...يمكن عطل ولا حاجة...؟؟
    همسة: عطل ..انت فاكرنى عيلة ولا ايه ..؟؟ثم عطل ايه كووووووول ده ..؟؟

    أنا: أمّال..؟؟؟
    همسة: يا حاج قفلووووووووووها ليه طيب ...دى ..كانت بدايتها مبشرة جدا وبرامجها رائعة..,كمان كانت هترعى في برامجها سنّة الحبيب...صلى الله عليه وسلم.. وعلشان كده ..ضبة ومفتاح يا حاج
    أنا: مين اللى قال كده.؟؟
    همسة: طيب قولّي انت
    أنا: قفلوها لييييييه؟؟؟ عموماً فيه قنوات اغانى وافلام كتييييييييير
    v همسة: اتفرجوا عليها وخلاص بقى...اناكفاية عليه
    MBC3
    والعربية..على أدي
    أنا: ايوة صح ..خليكي فيهم ..الحاجات دى أكبر من سنك.. ثم الحاجات دى جت لك منين ..؟؟
    همسة: لا عادى على الايميل بتاعي

    ايميلللللل...كمان ايميل...ياحلاوة

    ماحدش يطلبه علشان بعنا الجهاز من أصله وجبابتمنه حفاضات

    وعلى ذكر الحفاضات.. الهانم بتزن تانى.. فيما معناه انها لبت نداء الطبيعة.. حقها الدستورى

    غياااااااااااااااااااااااااااااااااااارر



    ***********

    فاصل ثم نواصل

    ....هى دى الشوربة
    حياتى من غيرك...قشطة

    ***********

    المشهد اللي بعد اللي بعد الاولاني
    نهارخارجي
    المكان: استقبال طوارئ احدى المستشفيات

    همسة: خالو ..هو احنا هنا ليه ..؟؟؟
    أنا: علشان بابا شوية بس تعبان.. وهنطمن عليه ونمشي على طول
    همسة: طيب وهما الممرضين والدكاترة مكشرين ليه؟؟.. انتوا عليكوا فلوس ليهم
    أنا: لا والله يا بنتي ولا شلن.. ممكن اروح البى نداء الطبيعة يا هموس
    همسة: عادي يا خالو براحتك

    ورحت البّي النداء.. وياريتني مارحت
    مش هاحكي شكل حمامات المستشفى علشان ما نخسرش بعض

    ورجعت أنا وهمسة نفس المكان..
    لقيت همسة مركزة فى مكان بعيد قوى كده
    وقالت لي: خايو بص على المسرحية دى.. هتعجبك أوي

    زائر ومعاه واحدة ست: سلام عليكم ...افتح الباب لو سمحت
    موظف الأمن: خير.. حتى ماردّش السلام
    الزائر: لا بس طالع لبنتى محجوزة فوق
    الموظف: تعالي كمان شوية
    الزائر: ليه ؟
    الموظف: كده
    الزائر: ازاى يعنى كده وخلاص
    الموظف: ياعم اصطبح هوّ كده وخلاص ..مالك؟؟
    الزائر: مالي ايه عاوز اطلع لبنتي؟
    الموظف: كمان شوية قلنا

    وتطور الحوار إلى حد السب والقذف في الاعراض والاشتباك بالايدي

    أساساً الزائر غلطان.. يعني ايه بنته فوق تبقى له ايه يعنى..؟؟ حيا الله بنته..من بعيد يعني

    المهم الشجيع بتاع الأمن غلط غلطة عمره وشتم الناس كلهم وطلع بره هو اتنين زملاؤه عاوز يضرب الراجل والست اللى معاه

    واستلموهم الناس اللى بره..والباقى انتوا عارفينه

    المهم جه البيه ابو كرافتة: ايه ده فيه ايه

    انا ومجموعة تانية: الموظف بتاعكم اللي غلطان.. لأنه عمل كذا كذا ..وحكينا اللي شفناه
    ابو كرافتة: غلطان..؟؟ خلاص نمشيه..مش عاوزين مشاكل

    ونادى على الموظفين بتوع البوابة والله ده حصل بالحرف
    ابو كرافتة: اللي ييجي من قسم الفندقة..بفلوس يعنى.. او يقول لكم طالع الحضانة..طلعوه علطوووووووول..اى حد تانى قولوا له تعالى الساعة 11 ميعاد الزيارة

    NO COMMENT

    همسة: خايو هوّ احنا شعب مش متربي؟؟؟؟؟
    أنا: ايوة يا همسة.. للأسف يا بنتي معظمنا واول واحد أنا.. ما اتربيتش خمس دقايق على بعض.. علشان خليتك تشوفى منظر زى ده

    ***********

    فاصل ونواصل

    يا اللى ما معاكمش فلوس
    موتوووووووووووووا

    ***********

    المشهد اللى بعد اللى فاتوا دول كلهم
    نهارخارجى
    المكان: بنك الدم

    واحد: يا بيه عاوز صفائح
    البيه: الكيس بـ 640 جنيه
    الواحد: طيب انا معايا ناس هتتبرع
    البيه: ماشي ..بس هيخشوا بنك الدم تبعنا احنا
    الواحد: ازاي يعني ؟؟مش تبديل ؟؟
    البيه: خلاص الكيس بـ 540
    الواحد: يابيه ده انا عاوز 13 كيس
    البيه: هو ده نظام المعهد

    مش هاكمّل علشان ماحدش يزعل مني

    كفاية منظر دموع الراجل وهو بيكلم اللى معاه

    همسة: خايو هو اللى ما معاهوش فلوس وجاله مرض.. يعمل ايه؟

    أنا: ؟؟؟؟؟؟؟؟؟؟؟؟؟؟؟؟؟؟؟؟
    ؟؟؟؟؟؟؟؟؟؟؟؟
    ؟؟؟؟؟

    ***********

    فاصل ثم نواصل

    شوكولاته بالاقسي
    نفس الطعم المنيّل في شكل اكتر من منيّل

    ***********

    المشهد الاخير
    مساء داخلى
    المكان: عيادة

    همسة: خايو هوّ الدكتور ده بيكشف بكام ..؟؟
    أنا: بـ 63 جنيه يا حبيبتي
    همسة: مش كتير ..؟؟
    أنا: اصله استاذ كبير...ومعلق ورق كتير على الحيطة.. إشي انجليزى وإشي عربي.. وفرنساوي.. وبطيخاوي.. وتقدير.. وتحرير.. وترب الغفير
    همسة: طيب بس فيه ناس كتير شكلها تعبان قوى ويا عالم معاهم ولا ما معاهمش.. وبعدين انت شفت كام واحد ييجى يسأل عن قيمة الكشف ويمشي زعلان؟؟.. ما يكشف زى دكاترة تانيين بـ 5 أو 20
    أنا: يابنتي هما اللي غلطانين..حد قالهم يعيو ؟؟؟

    ***********

    فـاصل أخير

    ياللي ما معاكمش فلوس موتوا تاني

    ***********

    النهايـــة

    ***********

    عاوز اجاوب همسة على الأسئلة مش عارف أجاوب بإيه...؟؟؟؟
    امتحان صعب قوى
    ممكن حد يجاوبها
    شوية رحمة يا خلق
    شوية أخلاق ده احنا مسلمين
    شوية ضمير.. خافوا من القبر
    والله هنتحاسب
    هنتحاسب...طب احنا خلاص راحت علينا.. والأجيال دى هيعملوا ايه طيب؟؟

    جاوبوا.. حد يفهّمنا
    احنا ليه كده وحشين مع بعض ؟؟
    ليهم ربنا ....احسن مننا كلنا



    بحبك يا همسة وخايف عليكى انتي وكل اللي زيّك من اللي جاي

    بحبك يا بلدي وزعلان عليكي أوي

    ***********

    من إســــلام

  2. #2
    الصورة الرمزية ahmed hanafy
    ahmed hanafy غير متواجد حالياً عضو المتداول العربي
    تاريخ التسجيل
    Jun 2006
    الإقامة
    Cairo-Egypt
    العمر
    72
    المشاركات
    6,986

    افتراضي مشاركة: يوميّات همسة وخالها المصري

    الصور جميلة

المواضيع المتشابهه

  1. همسة في أذن صائم
    By شذى22 in forum استراحة اعضاء المتداول العربي
    مشاركات: 0
    آخر مشاركة: 11-08-2010, 11:06 AM
  2. همسة من مبتدء لمبتدء
    By tajernabil in forum سوق تداول العملات الأجنبية والسلع والنفط والمعادن
    مشاركات: 9
    آخر مشاركة: 15-05-2009, 02:32 PM
  3. همسة في أذنك
    By ابن الهيثم in forum سوق تداول العملات الأجنبية والسلع والنفط والمعادن
    مشاركات: 28
    آخر مشاركة: 28-03-2008, 02:41 AM
  4. همسة في أذن الوافي .
    By خالد الفهد in forum سوق تداول العملات الأجنبية والسلع والنفط والمعادن
    مشاركات: 15
    آخر مشاركة: 13-02-2005, 02:32 PM

الاوسمة لهذا الموضوع


1 2 3 4 5 6 7 8 9 10 11 12 13 14 15 16 17