=== أنا الترند ===

[basuoni]

بسم الله الرحمن الرحيم
لماذا الترند ؟؟؟؟؟؟؟
,,,,البدايه ,,,,

فى بداية مشوار الفوركس كنت دايما اسمع كلمة الترند وامشى مع الترند وهو دا يبقى يور فرند فى سوق الفوركس

و عشان انا طول عمرى عنادى واحب اقاوح ومبسمعش الكلام , وعامل فيها فهلوى وناصح , كنت ببقى عايز ااعمل زى المنشار طالع واكل نازل واكل ويدوب مكملتش اسبوعين واتسحبت فى دوامه خساره على هيدج على تعزيز وعملت زى اللى بيغرق وعمال يطبش وكانت النهايه والمارجن كان بيزغرط عندى فى الحساب
........................
,,, هنعمل ايه ,,,

ضاعت فلوسك يا صابر
طب ليه انا كنت ماشى صح
= لا مكنتش ماشى صح
- انت مين يا عم
= انا الترند
- لاء انا كنت ماشى صح ياعم الترند والمفروض كان ينزل يصحح لحد هنا وبعدين ادخل اشتريه تانى
= ها ها ها ها ها .... المفروض ... ها ها ها ها ها
المفروض عند المكوجى يا امور
- اه يا ابن التيت
= متغلطش
- ماشى انا مش هغلط بس عشان انت راجل كبير والناس كلها بتحترمك
= طب لما انت جدع اوى كده محترمتنيش ليه
- ليه يا عم الترند بتقول الكلام دا
= عشان لو بتحترمنى كنت على الاقل هتعرف انك داخل صفقه تصحيح وان التصحيح اهدافه قصيره
- قال قصيره قال ما انا كنت فاكر كده وكل مره تعملها معايا وتصحح مظبوط وتضيع عليا الفرصه اشمعنى دلوقتى
=عشان قبل كده كان عندى برد
- انت هتهظر
= ما انت اصلك غشيم
- متقولش غشيم بس عشان الكلمه دى بتنرفزنى
= طب اهدى بس كده وتعالى وشوف بنفسك
- اشوف ايه
= تعالى بس .....

...............................

,,, رحله مع الترند ,,,





= شايف
- اه شايف .. جامد جدا
= طول عمرى يا ابنى
- مقولتليش صحيح هو انت سموك ترند ليه
= يا نهارك مش فايت منتش عارف يعنى ايه trend
- معلش يا سيدى اصل انا ثقافتى المانى
= ابو التعليم المجانى اللى خلا واحد زيك يتاجر فى البورصه .. ترند يعنى اتجاه .. يا مقطف
- اما انك ترند لسانك طويل صحيح وانا غلطان اصلا انى اتكلمت معاك
= متزعلش يا سيدى حقك عليا .. وبعدين انت اذاى مش واخد بالك انى اتجاه وانى اقوى حاجه فى الفوركس
- ال اقوى حاجه ال
= طبعا يا ابنى .. انا الترند .. انا الاتجاه .. انا حركة السعر ... السعر يا سيدى الفاضل لازم يمشى فى اتجاه .. اما اتجاه صاعد ( ترند صاعد ) او اتجاه هابط ( ترند هابط ) او اتجاه عرضى ( يعنى تذبذب )
- ماشى ياسيدى انت الاتجاه مقولناش حاجه بس ازاى السعر بيمشى على الخط اللى مرسوم وازاى بيكسره ؟
= ههههههه .... ماتخليش دماغك ضيقه ... الخطوط اللى بترسمها دى مجرد شكليات
- شكليات ازاى ياعم متجننييش
= اما انك قفل صحيح ماتسمع وانت ساكت
- بس متغلطش
= ماشى ياسيدى بس ركز معايا .....
العبره فى الترند هيا القيعان والقمم
( يعنى لو لاقيت قيعان اعلى من بعض .. يبقى كده قدامك ترند صاعد )
( ولو لاقيت قمم اقل من بعضها ... يبقى كده ترند هابط )
- لا ياشيخ جبت التايهه انت كده ... قديمه .. ما تقصر يا عم الترند وتجيب من الاخر
= اتقل على رزقك وركز فى الكلام
( البورصه تحب الواد التقيل الراسى اللى واثق من نفسه ... لكن الخفيف المرووش مايملاش عنيها وبتقلبه وقتى على المارجن يا امور )
- والله انت بتقول حكم
= عيب عليك
نرجع لمرجوعنا
اولا الخط اللى بترسمه ساعات بتعتمد فى رسمه على هاى او لو الشموع
وفى ناس بتعتمد على اغلاق الشموع ويبداء يرسم الشموع
فا مش شرط السعر يبقى ماشى بالمللى على خط الترند
- طب ازاى يا فالح هعرف انك اتهديت واتكسرت
=هدا لما تهدك ... انا عمرى ما اتهد ... انا الترندددددددددددددددددد
- خلاص يا حج ترند اعصابك ... مقصدش والله ... اقصد لما تتكسر
=اللى متعرفوش ان انا موجود على طول
حتى لما بتكسر بيكون بسبب انى بكون ببنى ترند جديد... يعنى لما تشوف قيعان اعلى من بعض يبقى دا معناه ايه
- معناه اننا فى ترند صاعد
= فى نقطه بقى لازم تخلى بالك منها ان القيعان الصاعده دى ... لازم يكون معاها قمم صاعده ( يعنى اعلى من بعض ) صح ...
- صح
= هنا بقى لازم تخلى بالك من القمم مع القيعان لانك لو شوفت قمه اترسمت وبعدها قمه اقل منها فى ترند صاعد ..يبقى كده الترند بدأ النظام البنائى بتاعه يختل ...
- تمام وبكده يبقى فى هبوط
= متقاطعنيش تانى يا مغفل
- مغفل ... ( اما انك ترند موهزء صحيح * كلام فى سرى *) الله يسامحك يا حج ترند
= ايوه مغفل ... مفيش حاجه اسمها هبوط كده على طول .... لازم تخلى بالك من حاجه مهمه جدا فى قصة تغيير الاتجاه من صعود لهبوط
ان الترند زى البنى ادم اول ما بيتولد بيبقى ضعيف جدا وسهل كسره والعوده للمسار الاصلى السابق
- عليا النعمه منا فاهم حاجه
= هبسطهالك .....
بص يا سيدى هنعتبر مثلا ان انا جبت ترند صاعد بيبى لسه فى اللفه
- اللى جابلك يخليلك يا عم الترند
= اهمد ياض بدل ما اديك باللى فى رجلى وركز
- حاضر
= الترند البيبى دا لازم يتغذا عشان يكبر ويعيش ويقدر يستحمل اى مشاكل او كدمات او حوادث اثناء رحلته فى الشارت
- ممممممم !!
= الغذا بتاع الترند دا يبقى ايه
- ايه ؟؟
= يبقى الاخبار والاوضاع الاقتصاديه ... يعنى الترند الصاعد البيبى دا عشان يعيش ويستمر لازم يلاقى اخبار كويسه وايجابيه يتغذى عليها
- ممممم
= يفضل ياكل ويشرب فى اخبار وقرارات واجتماعات واحداث لحد ما يكبر ويعجز وينتهى
- مممممم
= خلال حياته دى سعات الاكل بتاعو بيبقى ملوث بأخبار سلبيه ممكن تقضى على حياته وتولد ترند جديد هابط وهكذا
بص على الصوره دى

- كلام جميل جدا يا عم الترند بس انا استفاد من الكلام دا ايه!!!
= اول حاجه
*عايزك تفتح الشارت وتتفرج هتلاقى السعر على طول ماشى فى ترندات
*وعايزك لما تمسك فى ترند خليك معاه ومكلبش فيه ومتسيبوش
*عايزك تركز لما تيجى ترسم خط الترند
*وتشتغل على الهاى واللو وانت بترسم
وتشتغل برضو على اغلاق الشموع
هتقولى اشتغل على الاغلاق ازاى
هقولك غير شكل الشارت من الشموع اليابنيه
الى شارت الخط او line chart
*عايزك تركز مع زاوية الميل للترند كل ما كنت صغيره كان الترند ضعيف ومتذبذب
وكل ما كانت الزاويه كبيره كل ما كان الترند قوى
*عايزك تركز مع ترند الموجه التصحيحيه ... وترند الموجه الدافعه



********** ولازم تعرف **********
******** ان انا الكبير ********
*****هتعصانى هفرمك *****
***انا ملك السوق ***
(((((((( انا الترند ))))))))

[ayman almaqtary]

الموضوع والاسلوب رائع استمر بارك الله فيك

[ALESSA]

روووووووووووووووووووووووووعه .

[Mr. Bader]

ماشاء الله عليك اسلوب راقي
متابع معاك ...

[basuoni]

الموضوع والاسلوب رائع استمر بارك الله فيك

روووووووووووووووووووووووووعه .

شاكر لكم مروركم الكريم
ويارب يكون الموضوع مفيد
والناس تستفاد من الترند مع استراتجياتهم واساليب عملهم
.............................
وبالتوفيق للجميع ان شاء الله

[mazen123]

الموضوع ده يخلي الواحد نفسه يتعرف على الترند وجها لوجه ماينفعش تشرفني انتا والترند على كوباية شاي هههههههههههههههه
موضوع رائع ياغالي بصراحة رغم انه طويل وانا مش من هواة المواضيع الطويلة بس بين السطور حكم وامور لازم الواحد ينتبه لها ويركز معاها
شكرا على الموضوع الجميل يامعلم

[طلال العلي]

جزاك الله كل خير

[عزيزغامد]

رائع حوار رائع شكراً لك لاتحافنا بمشاكستك مع الترند بس ايه لاتسكت له , والا اقول لك داري على ترندك يقيك

[basuoni]

ماشاء الله عليك اسلوب راقي
متابع معاك ...

ربنا يخليك ... جزاك الله خيرا على مرورك الجميل

الموضوع ده يخلي الواحد نفسه يتعرف على الترند وجها لوجه ماينفعش تشرفني انتا والترند على كوباية شاي هههههههههههههههه
موضوع رائع ياغالي بصراحة رغم انه طويل وانا مش من هواة المواضيع الطويلة بس بين السطور حكم وامور لازم الواحد ينتبه لها ويركز معاها
شكرا على الموضوع الجميل يامعلم

والله دا يبقى شرف ليا وهتبقى احلى كوبايه شاى ههههه.. بس زى ما انت شايف ( ترند لوكال للغايه )
وطلع عينى وبهدلنى على ما اخدت منه معلومه
وشكرا ليك على مرورك الجميل

جزاك الله كل خير

ربنا يخليك استاذ طلال ... وشكرا على مرورك الكريم

رائع حوار رائع شكراً لك لاتحافنا بمشاكستك مع الترند بس ايه لاتسكت له , والا اقول لك داري على ترندك يقيك

وهو دا حد عارف ياخد معاه حق ولا باطل ... ترند مفترى
وشاكر ليك مرورك الكريم

[soufianhriz]

أخي بسيوني عندي لك سؤال على الماشي:
هل لديك فكرة أو طريقة تكشف بها عن تغيير الموجة التصحيحية إلى دافعة؟؟؟
لأنه في بعض الأحيان تتشابه الموجتان كثيرا في جل الخواص التي تفرق بينهما، فتظن أن الموجة التصحيحية أصبحت دافعة، و فجأة تنعكس لتكمل طريقها مع الدافعة والعكس صحيح.
أشرت إلى نقطة في غاية الأهمية و هي زاوية انحناء خط الترند. فهي خير مؤشر للدلالة على قوة و تماسك السعر أو ضعفه و الدخول في دوامة التذبذب. لكن بعد ذلك لا ندري أي اتجاه سيقرر السعر اتباعه.
على ما أتذكر قد صرح الأستاد محمود بغدادي على أن بنية الترند تفقد مفعولها بمجرد كسر قاعين هابطين أو قمتين صاعدتين سابقين.
لكن للأمانة لم أجد لحد الآن من يشفي غليلي بجواب علمي منطقي و مقنع في الكيفية المطلقة للتفريق بين الموجتين الدافعة و التصحيحية !!!!!!

[المضارب القادم]

جميل جدا يا بسيوني
ابدعت حق الابداع
تقبل تحياتي وودي وتقديري

[Mo3Ty]

ايه الجمال ده
روعة يا بسيوني.. فى اسلوب الموضوع
الله ينور عليك
تقبل تحياتي

[femtogold4]

اما انك صحيح بسيونى بسيونى هههههههههه ...... استمر يا صاحبى بالتوفيق

[basuoni]

أخي بسيوني عندي لك سؤال على الماشي:
هل لديك فكرة أو طريقة تكشف بها عن تغيير الموجة التصحيحية إلى دافعة؟؟؟
لأنه في بعض الأحيان تتشابه الموجتان كثيرا في جل الخواص التي تفرق بينهما، فتظن أن الموجة التصحيحية أصبحت دافعة، و فجأة تنعكس لتكمل طريقها مع الدافعة والعكس صحيح.
أشرت إلى نقطة في غاية الأهمية و هي زاوية انحناء خط الترند. فهي خير مؤشر للدلالة على قوة و تماسك السعر أو ضعفه و الدخول في دوامة التذبذب. لكن بعد ذلك لا ندري أي اتجاه سيقرر السعر اتباعه.
على ما أتذكر قد صرح الأستاد محمود بغدادي على أن بنية الترند تفقد مفعولها بمجرد كسر قاعين هابطين أو قمتين صاعدتين سابقين.
لكن للأمانة لم أجد لحد الآن من يشفي غليلي بجواب علمي منطقي و مقنع في الكيفية المطلقة للتفريق بين الموجتين الدافعة و التصحيحية !!!!!!

سؤال جميل استاذ سفيان وزى ما انت بتقول بتبقى فاكرها موجه تصحيحيه تطلع دافعه والعكس برضو
الفكره فى ان الموجه التصحيحيه بتمشى فى ترند
ومدام بتمشى فى ترند يبقى انتهائها يأتى بكسر هذا الترند( اضف اللى تحليلك مع الترند ما تشاء من فايبو وزوايا وموفينجات )لكن الاساس هو كسر هذا الترند
...........
وزى ما الحج ترند قال ... ان الكسر بيبقى بدايته تكوين ترند معاكس ... هذا الترند يبداء يكبر ويستمر لحد ميكسر خط الترند القديم ويكمل وهكذا
.........
هناخد مثال لترند هابط رخم ومستفز ( ترند غير منتظم )
بص على الصوره دى
هتلاقى الصعر فيها كل شويه يكسر الترند ويرجع ينزل تانى
وكل ما تغير وترسم خط الترند من جديد
يطلع يكسره وينزل تانى
بارد جدا ومستفز جدا




طب تعالى كده نجرب الكلام اللى الحج ترند قالو كده
وبص معايا على الصورة دى
هتلاقى ان الترند هابط
لكن كل ما يفكر يغير اتجاهه ويبنى ترند صاعد يتدهول على عينه
وينزل تانى وهكذا
مش قادر يبنى ترند صاعد جديد ( بالرغم من انه بيكسر خط الترند الهابط اكتر من مره )




يبقى الفكره هيا بناء ترند جديد
......
بس فى نقطه مهمه برضو
ان زى ما احنا قلنا الترند الجديد بيبقى عايز يتغذى وياكل
وان الاكل بتاعو بيبقى الاخبار والاوضاع الاقتصاديه
...
يبقى لو لاقينا مثلا ترند هابط قوى ( يبقى معناه ان الترند دا عمال ياكل فى اخبار سلبيه واوضاع متدهوره والدنيا خربانه فى بلد هذه العمله )
طب اول ما يكسر الترند الهابط دا ويبداء يرسم ترند صاعد جديد
هل تتوقع ان الترند الصاعد دا هيبقى قوى ( زاوية الميل بتاعته قويه )
طبعا لا ( لانه من المستحيل تتغير الدنيا فى يوم وليله )
يبقى من الطبيعى تلاقى فترة تذبذب ولو الترند الجديد الصاعد دا زاويته كبيره توقع كسره ودخول السعر فى فترة تذبذب
لحد ما الترند يلاقى اكل ( سواء بقى اكل سلبى او اكل ايجابى ويبداء يتحرك )

زى الاسترلينى فى الصورة دى



يارب تكون الفكره وضحت اكتر
اهم حاجه تمشى مع الترند
وانا معاك فى اى سؤال او استفسار
او حتى معلومه تحب تضيفها
او ملحوظه شوفتها وانت بتجرب ترسم الترند
وكلو للأفاده

تقبل تحياتى

[basuoni]

جميل جدا يا بسيوني
ابدعت حق الابداع
تقبل تحياتي وودي وتقديري

ربنا يكرمك اخى العزيز
انت اللى مبدع بحق
فى موضوعك حكاية خالده
موضوع رائع
وشاكر ليك مرورك العطر
تقبل خالص تحياتى واحترامى

ايه الجمال ده
روعة يا بسيوني.. فى اسلوب الموضوع
الله ينور عليك
تقبل تحياتي

استاذى الغالى معطى باشا
منور الموضوع والله
ومرورك دا شهاده اعتز بيها
والله ينور عليك انت فى مواضيعك المميزه
ربنا يجازيك على مجهودك وتعبك كل خير
ربنا يبارك فيك

اما انك صحيح بسيونى بسيونى هههههههههه ...... استمر يا صاحبى بالتوفيق

بسيونى بسيونى طول عمرى ..
شاكر مرورك يا غالى