"عنيد الحلم".. قصيدة للشاعر سعيد حامد شحاتة

[مصطفى شوكت]

الشاعر سعيد حامد شحاتة


عنيد الحلم يا خاله
عنيد الحلم وولادك
برغم الظلم حمّاله
عنيد الحلم والأحلام
بتخلق فينا رجّاله
عنيد الحلم يا أم البطن حبّاله
عنيد الحلم يا أم البطن بتعافر
وتتمخّض...
تجيب للحلم خيّاله
يصحّوا الشمس نصّ الليل....
تصير الضلمه قيّاله
يهزّوا الصمت.. يتحوّل بفعْل القدره لقْوَاله
تصير الأرض قوّاله لمعانى البوح
عنيد الحلم يا خاله وعنيده الروح
عنيده الفرحه فى القلب اللى عاش مفتوح
عنيده الضحكه ع الوش المُتيّم نوح
عنيده ضلوعى وضلوعك وطن مدبوح
أعيش راجل وأموت راجل
وصوتى يخالف المسموح
وأعيش العمر متمرّد على المطروح
وأناطح بالكلام وأنطح...
وأدوس فى المعركه المنطوح
يعيش الفارس المشبوح على حصانه
يباهى الناس بسلطانه
يعيش البيت وسبْع البيت
وكلب البيت وسجّانه
تعيش العركه بالنبابيت
وطوب الحيط وجدرانه
يعيش التشط والحلّه
وماجور الغلّه والقُلّه
وغناوى الضلّه والمُلّه
وعجين الغيط وعجّانه
يعيش الذل والمذلول
ونار الغدر فى المحصول
وقاتل عذبه المقتول
وغِلّ بياكل المغلول
وصول البيه وصلبانه
تعيش الضحكه فى الشريان
وغلب بينهش الغلبان
وغول بينشّف القنيان
وشاعر غرّبه النسيان
ووزّان كلمته ميزانه
تعيش العزه فى الغاره
وملامح ضحكة الجاره
وبطل داخل على حماره
واميره بتكنس الحاره
وحضاره سرقها غربانه
يعيش السيّد السلطان
عظيم الشّان وخرفانه
يعيش القصر وحيطانه وحدادى الخوف
عنيد الحلم يا خاله وضعيف الشّوف
عنيد الحلم والمارد وقف مكشوف
عنيد الحلم والساكت طلع بعد الكلام حلّوف
عنيد الحلم يا خاله (اعملى معروف)
سيبينى أرسم كلامى سيوف
وسيبى سيوفى تتمرد على المألوف
عنيد الحلم والمكسوف صبح فاجر
عنيد الحلم والكلب اشتغل تاجر
وطير الجنه بعد الفجر هيهاجر أراضى النور
عنيد الحلم يا خاله وعلينا الدور
ولادك مصلوبين ع السور
ونخلك سكنوه البور
ونيلك جفّفوه بالزور
وطينك طلعوه مأجور
عنيد الحلم يا خاله...
وسواقى الضىّ رافضه تدور
ودور الحىّ قافله الباب على البنّور
عنيد الحلم والحالم أكيد معذور
عنيد الحلم والمندور صبح نادر
عنيد الحلم وترابك ماهوش قادر
عنيد الحلم....
والأحلام بقت شادر سخيف الناس
حلِمنا كتير...
وكُنّا كتير...
وعشّمناكى بالمواتير
وزوّقناكى فى البناوير
............... وكتّف حلمنا الحرّاس
عنيده الكلمه فوق ترابيزة الإحساس
عنيده الضحكه لو بصّت على الأنجاس
عنيده الورده لو رسموها ع الكراس
عنيد وسواسك الواقف ورا الوسواس
عنيد الحلم يا خاله وعنيده الرّاس
عنيد الحلم والحالم.....
طلع بعد الرهان قرطاس

[حياتى لله]

قصيده جميله
جزاك الله خيرا

[مصطفى شوكت]

تواجدك هو الاجمل حياتى لله