القيادة الآمنة... مجموعة نصائح

[احمد ابراهيم]

دي مجرد شوية تعليمات اساسية واعتقد انها مفيدة واتمنى انها تنفع الجميع يعني:-

قبل ما تشغل العربية اتعود على شوية حجات تعملها دايما:-
تشوف مستويات الزيوت بتاعتك -بس دي مش كل مرة دي مرة اسبوعيا مثلا-
تشوف الاطارات بتاعتك وتتأكد بمجرد النظر انها في المستوى المعتاد -ودي كل مرة تعملها-
تبص تحت العربية وتشوف لو فيه اي تسريبات -ودي كل مرة تركب فيها العربية تعملها برده-
ومن ثم ركبنا العربية الحمد لله اتعود انك تربط الحزام حتى لو هتطلع بالعربية منلا جراج وهتنزل تاني ولكن خليها عادة عشان متنساهاش ابدا

تأكد من ان مرايات عربيتك كلها مظبوطة وفي الوضعية اللي انت مرتاح ليها المرايات الجانبية ومرآة الصالون

يوميا باللليل وانت راجع قبل ما تطفي العربية تشوف انوارك كلها سليمة واللا لا ودي بسيطة جدا تشوفها من المراية تشوف الانوار الخلفية وقدام اكيد انت شايفها وبكدة مش هتحتاج حد معاك في العملية دي

استخدم اشاراتك دايما قبل تغيير الحارة الخاصة بيك وخليك واثق ومتأكد ان دا بأهمية لا تقل عن انك تمسك دروكسيون العربية بايدك

اهتم بالغير لأن دا من أصول اهتمامك بالقيادة
هتهتم بغيرك اكيد هتلاقي الللي هيهتم بيك ولكن هتبلطج فثق وتأكد ان ربنا هيبعتلك اللي يبلطج عليك
لما حد بيبلطج عليا بأي طريقة من الطرق مبيختفيش من مرمى نظري غير والاقي عربية تانية بتبلطج عليه فبقله شفت اهو ربنا بعتلك اللي ياخد حقي منك

انت متحكم مش في عربيتك بس ولكن انت متحكم في سبع سيارات خلينا نعدهم مع بعض:-
عربيتك ادي واحد و3 عربيات وراك بصورة افقية وعربيتين جنبيك اليمين والشمال والعربية اللي قدامك كمان
لغة الاشارات لغة مهمة جدا مع كل دول:-
لو انت ماشي على طريق فردي رايح جاي واللي وراك عايز يعدي بس انت شايف انه مش هينفع يعدي بكل هدوء اديله اشارة شمال هتلاقيه هينتظر ومش هيعدي ولو هينفع انه يعدي اديله اشارة يمين وافتح ليه الطريق وزي ما هتعمل هتلاقي اللي هيعمل معاك وغيره طبعا

خلينا نتفق ان فيه في مرآة كل عربية ما يسمى بالنقطة العمياء -blind spot- ودي النقطة اللي المراية مش بتغطيها ولازم تكون عارف النقطة دي في مراية عربيتك فين بالظبط -الأسهل انك وانت بتدي اشارة تميل براسك للحظة تتأكد ان فميش عربية جنبك او بدأت تتخطاك وانت مش شايفها في المراية لأن النقطة العمياء مش بتجيب العربية اللي بدأت تتخطاك جانبيا فمش بتشوفها - وممكن تجيب مراية صغيرة مدورة وتحطها في الجهة العليا الخارجية من مرايتك عشان تغطيلك النقطة العمياء بتاعة عربيتك -

لنفترض انك على طريق سريع:-
التزم بحارتك المرورية
بلاش تضرب غرز لأنك مش محترف كفاية عشان تاخدها بالشوكة والسكينة واحتمال الخطأ وارد سواء منك او من العربية او احتمال ان يحصل اي شيء غير متوقع زي ان عجلة تضرب او اي حاجة
لو انت مقبل على يو تيرن يبقا ابعد عن الجهة اللي العربيات هتطلع منها يبقا تاخد يمينك ودا طبيعي جدا
نفترض انك مقبل على نزلة من الطريق او طلعه ابعد برده عن النزلة عشان تفتح الرطيق للعربيات اللي نازلة انها تنزل من على الطريق
ولو طلعه ابعد عن الطلعة وخد شمالك عشان تضمن انك في امان وانك مش هتتفاجئ بعربية طالعة بسرعتها لأنه طالع مطلع وهو مش غلطان رغم ان الاولوية ليك

الفليشر مهم جدا في حالة حدوث اي طاريء في الطريق
لو انت اضطررت انك تفرمل مفاجيء على طول في لمح البصر وانت بتدوس فرامل بصباعك مباشرة تشغل الفليشر عشان اللي وراك يفهم على طول ان فيه شيء مفاجيء وانك محتمل تقف في اي لحظة

*لغة الاشارات:-
دي هوضحها بسرعة عشان ممكن يكون فيه ناس متعرفهاش ودا مش عيب لأن محدش يعرف كل حاجة:-
* هتتجاوز حد من الشمال يبقا هتدي اشارة شمال
* هتنزل يمين يبقا تدي اشارة يمين
* طريق رايح جاي وعايز تعدي العربية اللي قدامك تديله نور عالي -لو بالليل- او كلاكس لو بالنهار وتدي اشارة شمال وانتظر انه يسمحلك بالمرورو ولو مكانش محترم في سواقته يبقا بكل تأني تبدأ تميل بعربيتك شمال عشان تشوف الطريق فاضي واللا لا واعمل حساب اللي جاي في الجهة المقابلة لأن دا مهم جدا
* الطريق رايح جاي ووراك حد بيستئذنك انه هيعدي منك ولقيت عربية جاية في المقابل فورا اديله اشارة شمال ودي بكدة انت بترفض انه يعدي منك وبتقله الطريق مش فاضي اما لو الطريق فاضي ققدامك يبقا اديله اشارة يمين وبكدة تسمحله انه يعدي منك
* الفليشر من الاشارات المهمة جدا :-
-لو انت تفاجأت بحاجة طارئة على الطريق بتشغل فليشر فاللي وراك يفهم ان فيه حاجة غلط وانك ممكن تقف في اي لحظة فبيعمل حسابه وبدوره بيشغل الفليشر عشان ينبه اللي وراه وهكذا
-اما لو انت معاك شيء طاريء انت شخصيا ومستعجل في الطريق فبتقول للجميع يوسع من قدامك وتشغل الفليشر وبكدة كل اللي قدامك بيفهم انك مستعجل على غير سرعة الطريق فبيبدأ يفتح ليك الطريق

دائما وابدا متخليش نظرتك للطريق مقتصرة على العربية اللي قدامك لا ابدا
بص لما بعد اللي قدامك وادي مساحة للتصرف
لو عربية على يمينك وانت الطريق قدامك يخليك تتوقع انه هيرمي شمال شوية يبقا متكبسش عليه واديله فرصة يرمي شمال وهيعدل نفسه وتقدر تعدي منه طبعا
وخلي عندك حس انك تتوقع حالة الطريق ايه من سرعة اللي قدامك واوعا تكبس عليه جامد


الطريق ساحة للوصول وليس ساحة للسباق -نصيحة ليا وليكم جميعا رغم اني مبقدرش اعملها دايما- متتفرعنش بامكانيات عربيتك وخلي دايما في دماغك ان فيه عربية احسن من عربيتك دايما وهتعمل فيك اللي بتعمله في غيرك

حافظ على مسافة بينك وبين اللي قدامك تتناسب مع امكانيات عربيتك في الفرامل يعني اعرف امكانيات عربيتك في الفرامل وتعامل مع اللي قدامك على الاساس دا وطبعا متلزقش فيه عشان دا قمة الخطر لو هو فرمل مفاجيء

عود نفسك انك تستعمل الفرامل دون دبرياج عشان تستفيد من الفرملة الاوتوماتيكية للموتور

الناس متخصصة السرعة والسباقات:-
*السرعة الزائدة عن الحد خطر كبير ولكن انا عارف ان فيه البعض بتجيله لحظات نشوة بيحب يجري فيها وانا واحد منهم برده اكيد يعني فإن كان ولا بد:-
-اختار طريق فاضي نسبيا مفيش فيه عربيات كتير
-الغرز ممنوعة على سرعات عالية تتجاوز ال 120
-نقل الحارات لازم يتم بفنية عالية جدا ومهارة مش عادية عشان هنا الغلطة بفورة
-اعمل حساب الفرامل بتاعتك لأنك تجاوزت الحدود القياسية فمش هتلاقي استجابة الفرامل اللي انت متعود عليها وهنا الخطورة طبعا
-حاول تكون قافل ازاز الابواب كلها عشان تقلل من مقاومة الهوا وبالتالي تقلل من استهلاك البنزين ونوعا ما تحافظ على ثبات العربية بصورة افضل
-متجازفش وتكون عارف ان ثبات عربيتك سيء وبرغم كدة تدخل التحدي وانت مش قده لمجرد التحدي

[مصرى وافتخر]

نصائح رائعه
جزاك الله خيرا

[احمد ابراهيم]

تواجدك هو الاروع مصرى وافتخر
وجزانا واياك كل خير