3 استراتيجيات ثمنهم 9الاف $ للعبقري بيل بولس وبصراحه يستاهلوا اكتر.... دعوه للمبرمجين

[hamadov1]

بسم الله الرحمن الرحيم
والحمد لله رب العالمين
والصلاة والسلام علي اشرف المرسلين سيدنا محمد صلي الله عليه وسلم
أما بعد ..

اخوتي في الله .. منذ يومين تقريبا سأل احد اعضاء المنتدي عن شرح ل نظام اسمه The Forex Income Engine Trade ولعيونه بحثت عنه ولقيت فيديو علي النت لشرح النظريات في كورس ثمنه 9000 دولار .
المهم اني قدرت انزل الكورسات دي والحمد لله وحاولت اتابع اللي بيقوله الاخ بيل بولس وبصراحه كنت منتظر اني اخلص المحاضره واقول انه راجل حرامي زيه زي معظم الناس اللي بيبيعه استراتيجيات ناجحه .

بس بصراحه استغربت لما حاولت اطبق الكلام اللي الراجل بيقوله علي التشارت في نفس اليوم !!! لقيت ان لما طبقت ابسط نظريه فيهم بدقه عاليه جدا ومن غير ما احاول اني اخترع كالعاده ... وجدت ان تقريبا 7 معاملات من اصل 10 وصولوا لل profit Target والباقي خرجت منهم Break Even (هي الخروج من الصفقه من سعر الدخول بمعني اخر تخرج وانت مش خسران اي حاجه ومش كسبان حاجه). وطبعا لكل قاعده شواذ لان اكيد هايكون فيه صفقات خاسره .. هي دي طبيعة الفوركس واللا ماكان حد غلب

الراجل طلع بيقول كلام زي الفل من اول تحديد انسب وقت للدخول في الصفقه لحد الخروج منها وتطبيق افضل إداره اثناء الصفقه رأيتها حتي الان عن طريق انديكيتورز معروفه للناس كلها وشويه شروط بسيطه .

طبعا حد هايقولي ياعم كفايا رغي بقي وقولنا ايه هي الاستراتيجيات
هاقوله من عنيه ... :D

بسم الله ..

طبعا اي استراتيجيه في الدنيا بيكون ليها عدة مراحل
اولا : مراقبة الماركت لحد ما يتحقق شكل التأكيد اللي منه هاندور علي وقت الدخول Setup Bar
ثانيا : وقت الدخول للصفقه وده طبعا شئ مهم انك تختار انسب وقت للدخول في الصفقه بعد الحصول علي التأكيد
ثالثا : تحديد قواعد الستوب لوس قبل الربح وتشوف اذا فتحت مداوله هل الربح يستاهل انك تدخل بالمغامره بخساره عاليه ؟
رابعا واللي كل الناس بتتمناه .. قواعد الخروج بربح من الصفقه ... تحديد امتي تقدر تقول انك وصلت للربح المطلوب Specific exit rules
قبل ما ادخل في الشرح احب اطمن الناس ان كل مثال ان شاء الله هايكون معاه صور للتوضيح اكثر علشان محدش يتلغبط :طبقا لحساباتك

زي ماقولنا قبل كده الموضوع عباره عن 3 استراتيجيات مختلفه ..


الاستراتيجيه الاولي : Overdrive Method



الانديكيتورز المستخدمه
40شمعه سيمبل موفينج افريج 40SMA5
5شمعات اكسيبينينشل موفينج افريج 5EMA (علشان تحديد قوة التريند الحالي)
ADX علشان تحديد استمراريه اتجاه السوق
20 ATR علشان يدينا قيمة متوسطه لعشرين شمعه سابقه وده مهم جدا جدا في تحديد البروفيت والستوب لوس.

شروط الدخول الخاصه ب Overdrive Method بالنسبه للشراء

1- ان يكون الموفينج 40 في وضع مسطح او صاعد ....مايكونش نازل (مهم جدا)
2-ان يكون الموفينج 5 في تقاطع مع ال 40 ال 5 اعلي من 40
3- ان يكون هناك شمعتان متتالين في القفل اعلي من الموفينج 5
4- أقل ظل للشمعه الثانيه يكون لمس موفينج 5 ورجع قفل فوقيه تاني , هي دي ال اسمها Setup Bar (ماتقلقوش كله هايتفهم مع الصور)
5- الشمعه التانيه تكون هي اعلي سعر من 5 شمعات سابقه HH2=HH5 اعلي سعر يعني اعلي ظل .
6- هانضيف Level علي مؤشر ADX وهي نسبة 25 ولازم يكون شمعة ال Setup عند تحقيقها يكون مؤشر ال ADX اعلي من 25 علشان نتأكد ان الماركت ثابت علي تريند .. اقل من 25 معناها الماركت لسه بيحدد اتجاه


تعالوا بقي نشوف صوره للكلام اللي بيتقال ده

الملف المرفق 294445

تماااااااااام اوي لحد كده .. نيجي بقي لتحديد الستوب لوس


تحديد قيمة الخساره

هنا بقي يجي دور ATR انديكاتور
قيمة شمعة الدخول من علي ال ATR هي قيمة الستوب + 2 + السبريد ...
بمعني اني شمعة الدخول مثلا كانت قيمة ال ATR بتاعتها 33 بيب.. الستوب بتاعي هايبقي 33+2+السبريد زي مايكون ..يعني تقريبا 37 نقطه .

لحد كده كويس تعالوا بقي نشوف لم الغنائم هايتحسب ازاي

تحديد قيمة الربح

نفس الكلام في تحديد هدف الربح برده عن طريق ال ATR
الراجل عمل حاجه مهمه جدا .. وهي انه قسم الربح علي مرتين بمعني انه فرضا احنا دخلنا من سعر 1.305 والربح كان ال ATR محدده 35 نقطه مثلا ... يبقي لما الربح يوصل ل 75% من ال35 نقطه نقفل نص اللوت والنص التاني هايكمل والتارجيت بتاعه هايبقي 35 تاني فوق الاولانيه...يعني لو انا كنت مشتري 1 لوت يبقي بعد 75%من اصل 35 نقطه هاقفل نصل لوت واخلي النص التاني التارجيت بتاعه 35 نقطه برده
بس الميزه الكبيره هي اني لما هاقفل النص لوت هاغير ال ستوب لوس بتاعتي لنقطة الدخول وبكده يبقي انا بتاجر بنص لوت ببلاش حتي لو ضرب الستوب يبقي انا كسبان ال 75& من 35 نقطه في جيبي .

نقطه تانيه لازم اشرحها بعد الجزء بتاع قيمة الربح .. لوحده علشان اللغبطه .. بس نقطه مهمه ومفيده جدا !
بعد ما اقفل نص اللوت اللي كنت شاريه علي ربح 75% في الميه من القيمه الرئيسيه اللي كان محددهالي ال ATRمن شمعة الدخول .....والله اذا الترند فضل شغال ولسه النص الباقي ماضربش الستوب يبقي لازم نستفيد من الموضوع ده ... بس ازاي ! ......كل شمعه خلال التريند بعد معدل صعودها مايكون اكتر من 75% من قيمة ال ATR بتاعها نخلي الستوب لوس بتاعنا يبقي عند اقل ظل ليها .

بمعني بعد ماقفل نص اللوت بتاعي علي 75% من قيمة الربح وبقي فاضل النص التاني ..والدنيا ماشيه كويسه ومفيش سوينجات حاصله ..وجات شمعه في اتجاه التريند قيمة ال ATR بتاعها 10 نقط .. والشمعه دي وصلت فعليا ل 7.5 نقطه اي مايعادل 75& من الATR بتاعها معني كده ان التريند عنده فرصه اكتر انه يسمتر والشمعه دي متوسط نقاطها ماشي مع المعدل الطبيعي ..فالبالتالي لازم نستفيد منها ونحرك الستوب لوس بتاعنا عند اقل ظل ليها وبكده نبقي رفعنا الستوب بتاعنا عند ربح مش بس Breakeven

ودي كانت استراتيجية Overdrive ..انا عارف ان الكلام كتير لكن ان شاء الله علي الشارت بسيطه وسهله اهم حاجه الالتزام الحرفي بالكلام ....
وأدي التيمبليت هديه من عندي كمان ... التيمليت هو هو علي ال 3 استراتيجيات

OverDrive _Ignition_Spring Methods Template.rar

وبكده يبقي ناقص باقي الاستراتيجيات ignition_method & spring_method

بسم الله الرحمن الرحيم
والحمد لله رب العالمين
والصلاة والسلام علي اشرف المرسلين سيد الخلق محمد صلي الله عليه وسلم
اما بعد

هانبدا ان شاء الله في شرح الاستراتيجيه التانيه Ignition Method

ودي بتستخدم لما يكون الاتجاه مستمر ويحاول يعمل تصحيح ولكن بيفشل ...هنا بيتكون تشكيله من الشموع تدينا تأكيد علي استمراريه الاتجاه الاصلي ومنها يمكننا الدخول وفتح مداوله سليمة بنسبه كبيره ان شاء الله
الاستراتيجيه دي في تطبيقها من حيث الدخول والخروج اصعب شويه من استراتيجية Overdrive Method

علشان كده هانحاول نوضح حاجه مهمه محتاجينها في اسلوب التعرف علي عدد الشمعات المناسبه في حسابتنا التحليليه

لفظ Inside bar
اللفظ ده هانقابله كتير نظرا لأهمية في التحليل في نظرية ignition ...معناه ايه بقي اللفظ ده ؟

معناه ان لو عندنا شمعه فتحت علي سعر 1.00 وقفلت علي سعر 2.00 واقل ظل وصلتله الشمعه كان 0.8 واعلي ظل وصلتله الشمعه كان 2.15 ....يبقي الشمعه اللي بعديها لو اقصي ظل ليها ماطلعش بعد اعلي ظل للشمعه اللي قبليها .. وكذلك لو اقل ظل للشمعه برده ماكانش اقل من اقل سعر للشمعه اللي قبليها ...دي اسمها inside bar
انظر للصوره


تعالوا بقي نتكلم شويه عن المؤشرات المستخدمه في النظريه دي ...
المؤشرات المستخدمه في ال 3 استراتيجيات هما هما مافيهمش اي تغير .. كل اللي هايتغير هو شكل المؤشر وتعامل الشمعات معاه ..يعني مثلا كان في الاستراتيجيه الاولي لازم المؤشر 5ايما يكون اعلي من 40 سما ولازم يقفل عليه ال 5 ايما شمعتين متتاليتين ويكون ال ADX اعلي من 25 ويكون مؤشر مؤشر 40 سما في وضع مسطح او في اتجاه التريند اللي عاوزين ندخل معاه في الصفقه سواء لو كنا عاوزين ندخل شرا يبقي ال سما مسطح او صاعد ولو كان بيع يبقي ال سما مسطح او هابط ........ وشويه شروط ياريت مراجعة اول مشاركه ......

لكن هنا في استراتيجية Ignition Metohd برده هايكون ال 40SMA في وضع مسطح او في إتجاه التريند المراد الدخول منه .... تعالوا نتكلم عن الشرا علشان يكون الكلام مرتب اكتر وطبعا البيع هايبقي عكس الكلام

المهم ......الانديكيتورز المستخدمه :
نفس الانديكيتورز بنفس القيم في الاستراتيجيه الاولي OVERDRIVE وياريت لو تستخدموا التيمبليت وتريحوا دماغكم lol موجود برده في اول مشاركه

طب ايه بقي اللي مختلف في النظريه دي طالما نفس الانديكيتورز ... اقولكم

تركيبة الدخول للشراء :
1- ان يكون 40SMA في وضع مسطح او صاعد
2- ان يكون ال 5 EMA .... ركز في دي اوي .... يكون اعلي من ال 40 وكان بيفكر ينزل تحت الاربعين
3- يوجد 5 شمعات هابطين محققين اقل ظل في كل مره.... وتتجاهل وانت بتعد 5 شمعات .. ال inside bar >>
يعني ممكن يكون فيه 20 شمعه بس اللي محققين اقل ظل 5 شمعات بس ..هاتفهم من الصوره


4- يكون في الخمس شمعات دول علي الاقل فيه شمعتين نزول متتالي يعني الاتنين قافلين علي نزول ..مش شرط يكونوا في الاول او في الاخر المهم انهم يكونوا ورا بعض خلال ال 5 شمعات
بص علي الصوره اللي فاتت وانت هاتفهم احسن ان شاء الله

5-بكده يبقي ناقص تأكيد واحد بس .. .. معلش ركز شويه معايا في دي
المطلوب .. ان ال SETUP BAR تكون قافله علي ارتفاع ... بمعني ان احنا كان عندنا 5 شمعات بينخفضوا طبعا بعد تجاهل ال INSIDE BAR ...طيب طالما عندي 5 شمعات منخفضين يبقي ازاي انا هادخل شرا!!!
هاقولك لا ماهو ال5 شمعات دول ما قفلوش تحت ال SMA40... طب هادخل في انسب لحظه ازاي ؟!! ................... لما الشمعه الجديده بعد ال5 شمعات تكون قافله علي ارتفاع سواء ان كان تحت ال EMA5 او فوقه وياريت تكون فوقه علشان يبقي التأكيد اقوي ان الماركت رفض التصحيح وهايكمل في الابتريند
وبكده يبقي تم التأكيد علي تشكيله الشموع اللي هابدأ منها المتاجره ......طب فرضا كانت الشامعه الجديده اللي بعد ال5 شمعات برده قافله علي نزول وبرده فوق ال SMA40 ... ساعتها يبقي لسه في نزول وهاستني لحد ماتظهر الشمعه اللي تقولي ان الماركت هايبدأ يطلع ....بص علي الصوره




6- شمعة الSetup Bar لازم يكون ال ADX وقتها اعلي من 25


وبكده يبقي احنا وصلنا للشكل بتاع الاستراتيجيه ...نيجي بقي لقواعد الدخول والخروج

اولا الدخول ....

اذا كانت شمعة ال Setup Bar اللي هي قافله علي صعود .. قفلت تحت ال EMA5 يبقي ساعتها نقطة الدخول هاتكون بعد نقطتين +السبريد.. من اعلي ظل لشمعة السيتب نسيب جزء للشك حتي يكون التأكيد
ثانيا الدخول ... اذا كانت شمعة ال سيتب قفلت علي ارتفاع واعلي من EMA5 ... يبقي ساعتها ندخل بعد قفلها مباشرة لاننا مش محتاجين تأكيد تاني



ثانيا ... الستوب لووس

تحت اقل ظل لشمعة ال SETUP بنقطتين + السبريد

ثالثا الخروج ...بربح ان شاء الله

هو هو نفس الخروج بربح من النظريه الاولي ... ATR شمعة الدخول لو فرضا بيساوي 30 بيب يبقي اول ربح ليه عند 75% من ال 30 بيب اقفل نص لوط.. واسيب النص التاني ل 35 كمان ..اول ما اقفل اول نص اخلي الستوب لووس بتاعي عند سعر الدخول وبكده يبقي انا اخدت ربح محترم .. ونص اللوت داخل بيه ببلاش لاني مش هاخسر حاجه

فيه خيار تاني للخروج بربح من الصفقه ان النص التاني من اللوت بتاعك ماتقفلوش !! .. وترفع الاستوب عند اقل ظل لكل شمعه تقفل.. يعني مجرد ماخدت ربح من اول نص ترفع علي طول الستوب لووس لأقل ظل لاخر شمعه قفله ولما اللي بعديها تقفل اعلي ..ارفع الستوب لووس عند اقل ظل ليها ... وهكذا وهكذا لحد مالمعامله تقفل

ودي امثله علي الاستراتيجيه

بالتوفيق ان شاء الله

[JeDi]

شكرا على الشرح الوافي بارك الله فيك .. بالتوفيق انشاءالله

[alsafir]

شكرا على الشرح الوافي بارك الله فيك .. بالتوفيق انشاءالله

[hamadov1]

شكرا علي مروركم ياشباب ورجاء الهمه في تجربة الاستراتيجيات ولو فيهم خير نطلب من الباشا الكبير مستر دولار يعملنا اكسبيرت يضم التلت استراتيجيات
ان شاء الله خير بس اجتهدوا

[hamadov1]

[Entry Short @ 07768 TP .7637 SL .07901

تحققت جميع الشروط 40موفينج في وضع النزول لان هذه الحاله بيع
شمعتين نزول متتالي اسفل الموفينح 5
الشمعه الثانيه هي اقل انخفاض لخمس شمعات من قبلها
ADX اكبر من 25
ال ATR لشمعة الدخول كان 132 pip وده معناه ان ال STOP والبروفيت في الرينج ده
والله الموفق ...

ATTACH=CONFIG]294480[/ATTACH]

[Ahmed Shihab]

جزاك الله تعالى خيرا اخى

[MAMDOH111]

جزاك الله خيرا ياباشا

ولكن التمبلت غير موجود واى فريم قمت بتجربة الاستراتيجية عليه ياباشا

ولو سمحت رابط شرح الفيديو ولو تقدر تشرحه انت ياغالى بالفيديو يكون أفضل

[mahdy1]

جزاك الله خيرا ياباشا

ولكن التمبلت غير موجود واى فريم قمت بتجربة الاستراتيجية عليه ياباشا

ولو سمحت رابط شرح الفيديو ولو تقدر تشرحه انت ياغالى بالفيديو يكون أفضل

اؤيد طلب عمى ممدوح
والشكر موصول لصاحب الموضوع

[hamadov1]

اؤيد طلب عمى ممدوح
والشكر موصول لصاحب الموضوع

انا التيمبليت موجود عندي في الموضوع وعموما ده اللينك بتاعه https://forum.arabictrader.com/attac...s-template.rar

[MAMDOH111]

اؤيد طلب عمى ممدوح
والشكر موصول لصاحب الموضوع

يا مهدى باشا

ده أنت عمنا ياغالى

انا التيمبليت موجود عندي في الموضوع وعموما ده اللينك بتاعه https://forum.arabictrader.com/attac...s-template.rar

جزاك الله خيرا ياباشا

وقعلا انا لقيت التمبلت متعلق فى اول الموضوع

وعشان كده تلاقينى سألتك لأننى لم أجده بالمرفقات أو تحت ما كتبته من أن التمبلت هدية منك

حصل خير ياغالى

وفى انتظار متابعتك للأستراتيجية ياباشا

[MR.dollar]

بارك الله فيك
هذا الموضوع يستحق أن يكون له متابعة أكبر من هذه ما رأيك بنقل الموضوع إلى القسم العام وسنتابع معك

[hamadov1]

بارك الله فيك
هذا الموضوع يستحق أن يكون له متابعة أكبر من هذه ما رأيك بنقل الموضوع إلى القسم العام وسنتابع معك

توكل علي الله يا اسامه باشا طالما هايكون فيه اكبر منفعه للجميع

[Forexsawy]

توكل علي الله يا اسامه باشا طالما هايكون فيه اكبر منفعه للجميع

ما هو رابط المنتدى العام ؟؟؟؟

[رانيا وجدي]

ما هو رابط المنتدى العام ؟؟؟؟

https://forum.arabictrader.com/f4.html

[رانيا وجدي]

جزاك الله خيرا أخي الفاضل صاحب الموضوع

شكرا جزيلا لمشاركتنا بهذه الطرق بارك الله فيك

أستأذنك بالتعديل على المشاركة الأولى ونسخ المرفقات المرفوعة أسفل الشرح لكي يتمكن الإخوة المتابعين من رؤيتها بوضوح لان موقعها الحالي غير واضح

تحياتي وتقديري