"ابتهالات" قصيدة جديدة لمحمد سليمان الدوم

[مصطفى شوكت]

لو هفتكر حالا
حياتى قبل هذا الوقت
مش هفتكر حاجة

ولو قلت إن من عادتى
أكون فرحان بكل الكون
هكون كداب

ولو إنى
معشتش معنى لوجودى بهذا الشكل
غير لحظة ما قلت لنفسى: ليه لأه؟!!
ولم أهتم بالباقى
ولا تأويل مرور الوقت وياكى
بهذا الشكل

ولو هغلط ف نطق الاسم ميت مرة
فمش ذنبى
ده ذنب حروف بتتمنى تكون منك

أعتقد
ممكن أكون
بالغت جدا ف ابتهالى
جوا صومعة الكتابة
لما حبيت إنى أخرج برّه أوضتى
وأرتمى ف حضن الحياة

أو أكون راهب بيحلم
كل ليلة بالملايكة يبشرُّوه
إنه صار قديس تماما زيهم

أو أكون
مجذوب زمانا منتظر
وصله بالعشق الإلهى
جوّا حضرة
قبل انتهائها وبثوانى...
اطمئـَّـن

أو مجرد كونى طفل
حس مقدار السعادة ف عين بتبكى
بعد ما اتمنِّت بحرقة
إنه يحمل اسمها

لو هقول إنى فاهم
كل فقرات القصيدة.... متصدقوش
الحقيقة
إنى مش فاهم تماما
كل تفصيلة ف مشاعرى
حابة تحتضن السطور
وتقول:
بـــحــبــــــــك

[احلام عمرنا]

قصيده جميله جدااا
فى انتظار جديد مواضيعك

[مصطفى شوكت]

شكرا لكى اختى
وشرفنى ردك فى الموضوع

[المجازف 2011]

كلمات متميزه
سلمت يداك

[مصطفى شوكت]

شكرا لك اخى وشرفنى تواجدك بالموضوع