السلام عليكم و رحمة الله و بركاته

موقف كتير فكرت فيه و سألت نفسي ايه هاتكون ردة فعلي لو حصل ، عشان كده فتحت الموضوع ده :

من حوالي 6 شهور او اكتر شويه كنت ماشي الساعه 11 بليل في الشارع جمب البيت و بكلم في الموبايل و مرة واحد لقيت ايد بتحاول تشد الموبايل و انا بتكلم فيه من توكتوك انا اتخضيت و افتكرت ده واحد صاحبي بيهزر ، بعد ثواني استوعبت ان ده شويه حراميه في توكتوك كانوا بيحاولوا يسرقو الموبايل ، همه موقفوش بس و التوكتوك بيجري حاولو يعملو كده

بعدها بشهرين و انا ماشي مع واحد صاحبي جمب البيت بردو حصل نفس الموقف تاني حاولوا يشدوا منه الموبايل و هو بيتكلم في بس خبطوه جامد على راسو والتوكتوك بيجري ، يعني الواد الحرامي منشنش كويس : المهم طلعنا نجري على رجلينا ورا التوكتوك بس كان سبقنا جامد المهم لقينا تاكسي طلعنا وراه و زنقنا عليهم و نزلنا ضرب فيهم كانوا 5 عيال من سن 15 الى 18 سنه و كانو شاربيين بيره ، المهم الشارع كله جامل و اضربوا علقه كويسه و لما خدناهم على القسم في ميكروباص العيال كان مكلبشين في الميكروباص مش عايزين ينزلوا ، رحت ندهت على حد من جوه قسم العمرانيه كان في ملازم اول و امين شرطه قاعدين مفخدين قلتلهم تعالو خدوا العيال دي من بره عشان حاولوا يسرقو موبايل من صاحبي و احنا ماشيين و سكرانين كمان ، ولا حد عمل حاجه قالي طيب حاول تاني تدخلهم (ولا في دماغ الشرطه حاجه) المهم العيال قعدوا يعيطوا سبناهم

انهارده بقه حصل معايا الموقف اللي كتير سمعت عنه ، لسه داخل من شارع الهرم الى الشارع عندنا و جه عيلين على موتسكل و قالي هات اعمل دقيقه ، قلتلو معييش رصيد لان طبعا عارف انه ممكن ياخد الموبايل و يجري ، المهم لف تاني و قالي هات اعمل دقيقه قلتلو معييش ريد روح اي سنترال ، قالي انته بتتكلم كده ليه راحو نازلين الاتنين من على الموتسكل و واحد فتح مطوه و مد ايده في ثواني حطها ورا رقبتي و قالي يله هات الموبايل
مسكت ايده و قلتلو مفيش موبايل قالي الواد التاني متضيقوش ده مسجل خطر و ياما عور ناس اديلو الموبايل قلتلو مش هاتاخد حاجه المهم العيال لمو نفسهم و مشيو راحو للمتوسكل ((ليه ؟! قلقوا يتخانقوا او نشبط مع بعض الناس تتلم و خاصة ان في عربيات بتعدي في الشارع))

ركز شويه فيما بين القوسين هيه دي النصيحه
لكن ايه لو كنت في مكان معزول مثلا شارع جانبي ، ممكن كانو يقتلو او يعملوا اي حاجه براحتهم ومش هايكونوا خايفين من حاجه
الحمد لله ربنا ستر و يا رب دايما ، و خلو بالكوا يا جماعه في اختيار الشارع اللي هاتمشو فيه و دايما امشو فوق الرصيف و لو سمعت صوت توكتوك او موتوسيكل من وراك ابعد عن الطريق لحد ما يغور في داهيه

انا المواقف التلاته اللي حصلت معايا في شوارع رئيسيه مش عشوائيات ولا حواري
موقف 1 في شارع الشعب مقابل فيلا عفاف شعيب بتاعت البيتزا في الهرم
موقف 2 في شارع ويمبي الرئيسي متفرع من شارع الهرم
موقف 3 شارع شكري على بعد مترين من شارع الهرم

ربنا يحفظنا ويبعد عنا الشر و اهله