بص يا باشا (بعد اذن الجميع ارد عليك ويصححلي الأستاذ الكبير لما يرجع بالسلامة)اقتباس:
المشاركة الأصلية كتبت بواسطة karim yahia
دلوقتي استراتيجية الدكتور جمال مبنية على خبرته زي ماهو في عنوان الموضوع
إيه معنى الكلام ده؟
معناه أن الدكتور بالاستراتيجيات بتاعته بيضع شروط و خطوط عريضة لطريقة العمل بس بيأكد في كل مشاركاته على التعايش مع السعر ومراقبة السلوك السعري اللي عمره مايغدر بيك (على حد قوله)
يعني الشروط مش قرآن (زي ما قال في مشاركة قبل كده) يعني كل ماتشتغل اكتر وتراقب سلوك السعر اكتر هتفهمه وتحس بيه اكتر
طيب تطبيقا على الكلام الكتير (اللي شكله غلس ده ومايأكلش عيش)
تعالى نجاوب على استفسارك اللي بالأعلى:
الكابل صعد مسافة كبيرة لغاية ما اقترب من تغطية الرينج اليومي يعني الناس بدأت تجهز لفكرة انه هيرتد (بس لسة شروط الاستراتيجية مكملتش, من قفل شمعة اعلى الخط والكلام ده...) ثم تكونت شمعة انعكاسية أنت أشرت ليها في المشاركة اللي قبل دي....... هنا أول مجموعة قلبها جامد شوية أو معندهاش صبر قلتلك لأ كده خلاص السعر جاب اخره ومش هيقدر يعدي الخط الاحمر والدليل الشمعة الانعكسية اللي تكونت (وده كان رأي المجموعة الأولى بناءا على السلوك السعري)
في مجموعة تانية اكثر تحفظا (مبدأهم فرصة رابح تضيع احسن من خسارة تيجي) وقالوا لأ احنا مش هنبيع ألا بتوافر كل الشروط كاملة (اغلاق شمعة ساعة فوق الخط الاحمر ثم البيع من الهاي بتاعها) وده بعد شوية فعلا حصل والمجموعة دي قالت البيع كده تمام التمام, (وده كان رأي المجموعة التانية بناءا على السلوك السعري)
في مجموعة تالتة (مبدأهم أن السعر لازم يتحايل عليَّ ويبوس ايدي علشان ادخل, وممنوع أن السعر يرتد خالص, وممكن منهم من يدخل بلوت علي) دول بقى استنوا لما الشروط كلها تكمل (اغلاق شمعة ساعة فوق الخط الاحمر ثم البيع من الهاي بتاعها) وكمان انتظروا يشوفوا السلوك السعري (زي تكون شمعة falling of the roof دلوقتي) وبعد ماتقفل ويتأكدوا أن السعر هابط يدخلوا بييع
(وده كان رأي المجموعة التالتة بناءا على السلوك السعري)
والكلام ده كمان مش شرط, يعني على حسب السعر واللي بيعمله , يعني ممكن واحد شايف السعر بيتدلع وبيتحرك ببطء النهارده فيبقى من المجموعة التالتة المتحفظة أوي ونفس الشخص بكرة يلاقي السعر بيتحرك بعنف وبسرعة فيدخل زي المجموعة الاولى سريع سريع
اتمنى مكُنش صدعتك بكتر الكلام واكون افدتك
حق التصحيح طبعا محفوظ لأستاذنا دكتور جمال
