طريقة تداول شخص غير مفاهيم السوق بالكامل !
السلام عليكم
قبل لا ابدا كلامي احب اتكلم عن نفسي بشكل مختصر ، تداولت في الفوركس في 2012 واخذت كورسات مع المحلل وليد الحلو على ايام ماكان في المتداول العربي بالرياض ودخلت السوق بـ مبلغ 1000 دولار وبعدها بـ 5000 وبعدها بـ 10000 وكلها بائت بالفشل ، كانت عذري في خسارتي الاولى ان راس مالي صغير فـ لذلك اخاطر بعقود كبيره وفي خسارتي الثانيه ان ماعندي ستوب لوز ثابت وفي الثالثه اقتنعت ان يبي لي فتره لين مااصبح متداول ناجح لان هالشي يتطلب فتره زمنيه ماهي سالفه كورس تاخذه والا مقطع يوتيوب تتابعه وتطبق اللي تعلمته وتبدا في الارباح فـ لذلك بعد الاحباط اللي صابني ومحاولاتي الخاسره قررت اوقف مع ان هواية تحليل الشارت ومعرفه اتجاه السوق لازالت شي يمتعني كثيرا فـ ارجع بين فتره وفتره واقرا واتعلم بدون ماادخل السوق بحساب حقييقي . ماابي اطول في سرد قصتي واتجنب الموضوع الفعلي الا وهو
شخص غير مفاهيم التداول بشكل كامل . لايعترف بـ موشرات ولا موجات ولا شموع ولاشي من اللي تعرفونه يستخدمه ابدا ويقول عنها انها اموره تافهه وغير دقيقه .
الغريب في الموضوع طريقته تمشي مع كل شي : فوركس ، عملات رقميه ، اسهم وكل شي تقريبا فيه شارت :)
في البدايه مثله مثل اغلب المتداولين اللي نجحوا في السوق وبدوا ينشرون ماتعلموه بمبلغ مالي ولكن بعد مااكتفى ماديا بـدا ينزل مقاطع في قناته في اليوتيوب مجانا وهنا بدايه معرفتي بهالشخص لاني لقيت له احد مقاطعه بالصدفه وبديت اتابعه وصراحه انبهرت بـما رايت من دقه تحديد لـ اماكن ارتداد السعر ، احيان يجيب السعر بالسنت موب بالدولار . صار لي سنه تقريبا اتابع مقاطعه ومريت على كل شي تم طرحه في قناته وبعض المصلحات اللي انشاها يبي لك تعيد المقطع اكثر من مره عشان تفهم عليه.
المختصر يااخوان انني اعلم ان موقع المتداول العربي فيه دكاتره وعباقره ومحلليل اكثر كفاءة مني يستطيعون ان يتعلمووا من هذا الشخص اسرع مني ومع خبراتهم والسنين اللي قضوها في السوق يمكن يكون هالشي اللي كان ناقصهم بحيث يتمكنون حرفيا من السوق . السبب اللي خلاني اطرح هالموضوع ان بعد رجوعي للسوق وكان في العملات الرقميه فقط بحكم منصات مثل بينانس وبايبت لسهوله السحب والايداع قبل سنه تقريبا . تذكرت المتداول العربي واخذت فره في المواضيع المكتوبه وشفت مايضحكني من بعض الاخوه الذين يزعمون انهم تمكنوا من السوق وان كان ذلك صحيح فـ لله يبارك لهم ويزيدهم من فضله ولكن لاتطرح مواضيع وتمتنع عن الاجابه بحكم انه سر ولا تريد من احد ان يعرفه ! كل مااقوله ان ربحت الناس بفضل علم او طريقة عرفتها فـ ذلك لين ينقص من رصيدك شي بالعكس حسنات تحسب لك ودعوه بالغيب تسوى الدنيا ومافيها
واكبر مثال اخونا الوافي لله يرحمه ، كل ماجابوا سيرته في هالمنتدى دعوا له وهذا اكبر شي يحصله المرء من ورى هالسوق .
على العموم لااريد الاطاله اكثر من ذلك ، قلت ماعندي من باب حب لـ اخيك ماتحب لنفسك ولذلك حبيت اشاركم علم وطريقه تداول هالشخص لانها مفتاح خير للجميع ولااريد سوى دعوه في علم الغيب .
وهذا رابط اول درس له :
https://youtu.be/x93pkv044Ro
ملاحظة : يتم شرح في قناته مصلحات انشاها من ضمنها ( backside , frontside , origin lvl . ) وهي مناطق يرتد منها السعر بشكل قوي وبدقه متناهيه واحيان يعرفها بالسنت مثل ماذكرت سابقا .
