بسم الله الرحمن الرحيم
نبتدي على بركة الله الشرح الخاص بكل قسم من الأقسام الـ 4 اللي اتكلمنا عنهم في الشرح التمهيدي
............................
أولا : الأشكال الهندسية المكتملة للزوايا السعرية
ودمجها مع
نماذج الهارمونيك التقليدية
- في البداية كدا انا شرحي هيكون مبسط ومختصر لسببين : الأول وجود مراجع للطريقتين سواء الزوايا السعرية او الهارمونيك
من خلال الورشتين دول
الزوايا السعرية والفواصل الزمنية التداول التوافقي ( الهارمونيك ) - تحليلات وفرص يومية
بس دة مش معناه طبعا ان كل ما اجي اشرح حاجة هقول نرجع للورش دي لكن في الشرح هنتطرق لاهم النقاط المهمة واللي هنقدر بيها نوصل المعلومة ان شاء الله لجميع المتابعين
................................
نبتدي بشكل مباشر في الحديث عن الأشكال الهندسية المكتملة اللي هي موضوعنا في القسم الأول من الشرح
ايه المقصود بالأشكال الهندسية المكتملة ؟
خلينا نعرف الاول ان طريقة الزوايا السعرية بتعتمد على نظام الدورات لحركة السعر وإن ( الدورة السعرية الواحدة ) بتبتدي من الزاوية 0 الى الزاوية 360
ومعنى كلمة شكل هندسي مكتمل - يعني الشكل بدأ من الزاوية 0 ووصل للزاوية 360 بنجاح ولم يفشل وينتهي عند احد الزوايا التي تسبق الزاوية 360
تنقسم الأشكال الهندسية المكتملة لـ 5 أشكال :
1- الخط المستقيم
2- الشكل الثلاثي
3- الشكل الرباعي
4-الشكل الخماسي
5- الشكل الدائري
الجزء الأول من الأشكال المكتملة هيكون هو المحتوى الأول لينا الخط المستقيم - لكن مش لوحده وهيكون معاه احد الاشكال المشابهة للخط المستقيم في الحركة وهو نموذج AB=CD
...........................
1- الخط المستقيم مدمج مع نموذج AB=CD
بداية كدا دة شكل الخط المستقيم ( الهابط ) في طريقة الزوايا السعرية
الملف المرفق 502437
ودة الشكل الصاعد
الملف المرفق 502438
زي ما هو واضح في الصور كدا - الخط المستقيم هو اللي بيبتدي من الزاوية صفر وبيوصل للزاوية 180 بشكل مباشر بدون انعكاس من اي زاوية تسبق الزاوية 180 ، ويصحح السعر من عندها بنسبة من 30 % الى 75 % من الحركة اللي عملها من الزاوية 0 للزاوية 180
الشكل دة من اسهل الاشكال الهندسية للزوايا السعرية واكثرها وضوحا وعشان كدا دمجته مع شبيه ليه في نماذج الهارمونيك وهو
نموذج AB=CD
- نموذج AB=CD هو اكثر النماذج التوافقية انتشارا على الشارت والأسهل في التعامل والاقتناص وكيفية الرسم
الشكل الهابط
الملف المرفق 502439
الشكل الصاعد
الملف المرفق 502440
طبعا احنا لينا طريقتين اولهم اعتماد النسب التالية في التصحيحات الخاصة بالنموذج
الأولى اعتماد النسب التالية في استخراج النقاط C و D
الملف المرفق 502441
- الثانية استخدام
أداة Fibonacci Expansion الموجودة على الميتاتريدر في كيفية اكتشاف نموذج AB=CD
ودي انا شرحتها في موضوع مستقل على الرابط دا
أسهل طريقة لرسم نموذج AB=CD بكل بساطة
- لكن مع ملحوظة صغيرة في استخدام الاداة دي وهي انك اول حاجة بتعملها بتقيس بالفيبوناتشي العادي تصحيح النقطة C من الضلع AB لو لقيته ما وصلش للـ 38 يبقى مش محتاج تستعمل الاداة لانها هتطلعلك نموذج صحيح شكلا لكن مش صحيح بناء على النسب - لان اول نسبة تصحيح بنعتمدها على نموذج AB=CD هي 38 على الأقل
- اساس الدمج بين الشكلين دول بالتحديد - الخط المستقيم ونموذج AB=CD قائم على تشابه الحركة بين الاتنين واعتمادهم على الحركة المستقيمة اللي دايما هتلاقيها شبه حرف N سواء معدول او مقلوب بس طبعا الدمج دة مش هيكون مجرد دمج عادي كدا بدون قواعد نحتكم ليها واللي هتبان معانا ان شاء الله في التطبيق وهنتكلم عنها بالتفصيل
............................
دة مثال عملي لحالة دمج بين الشكلين الملف المرفق 502433
صعود السعر من الزاوية 0 الى الزاوية 180 ثم تصحيح تجاوز الـ 30 في المية
بالتالي بعد تكوين الشكل المفروض انه رايح للزاوية 360 خاصة بعد احترام الزاوية 270 الواقعة بين الزوايا 180 و 360 زي ما احنا شايفين ارتداد منها وبعد كدا صعود مباشر للزاوية 360
الارتداد اللي حصل من الزاوية 270 دة هو اللي أكدلنا إمكانية نجاح التصور الخاص بتكوين نموذج AB=CD وأيضا استمرار الشكل الهندسي في طريقه السليم هشرح ازاي احنا قدرنا نستنتج الشكل خطوة خطوة :
- التصحيح اللي حصل للسعر من الزاوية 180 دة خلانا نتنبأ بأول نقطة معانا وهي النقطة A لكن مش عارفين السعر رايح فين لحد دلوقتي
- الزاوية 270 اللي ردت السعر بتقولنا يا جماعة انا كدا عملت النقطة B دوروا بقى على النقطة C رايحة فين
- اول ما هنستخدم الفيبوناتشي من النقطة A للنقطة B هنلاقي ان السعر بيديلنا إشارة مباشرة ان فيه إمكانية فتح صفقة شراء من النقطة C تستهدف مباشرة الزاوية 360 للشكل المستقيم واللي هي هتكون النقطة D لنموذج ABCD
- بوصول صفقة الشراء للهدف بنجاح هنا نوصل لأصل العملية وهو البيع لان الشراء دة عملية استباقية قبل تكوين النماذج واكتمالها
هنفتح صفقة بيع من الزاوية 360 اللي هي نفسها النقطة D لنموذج الهارمونيك ونستهدف معاها الزاوية 270 هدف اول ثم الزاوية 180 هدف أخير
الملف المرفق 502436
.......................
الأهداف احنا اتكلمنا عليها في المثال الاستوب لوز :
- استوب الشراء هو اغلاق اسفل الزاوية السابقة بمعنى لو دخلنا من الزاوية 180 يبقى الاستوب اغلاق اسفل الزاوية 90 وهكذا
- استوب البيع هو اغلاق اعلى الزاوية التالية بمعنى لو دخلنا من الزاوية 360 يبقى الاستوب اغلاق اعلى الزاوية 450 وهكذا
.......................
ملاحظات بسيطة كدا على الشرح بعد ما انتهينا منه :
- مش معنى اننا استخدمنا نموذج AB=CD يبقى كدا اختصرنا النموذج دا فقط للدمج بينه وبين الشكل المستقيم
بس احنا استخدمنا اقرب النماذج تشابها مع الشكل دا وممكن جدا في التطبيقات العملية نلاقي وجود نماذج هارمونيك أخرى متطابقة مع الشكل المستقيم لكن بنسبة تتجاوز ال70 ف المية يحتكر نموذج AB=CD احتمالية التواجد على الشكل الهندسي المستقيم للزوايا السعرية
- اختيار القاع الموضح على الشارت لبداية رسم نموذج AB=CD يعتمد في الأصل على عنصر الزمن لان لو اخترنا قاع البداية هنلاقي ان الزمن اختل عنده والنقطة D هتطلع عند نقطة لا متزامنة سعريا ولا زمنيا مع الزوايا السعرية او الزمنية
واحنا في الأساس بنتبنى فقط الحالات المتطابقة فقط لا غير بمعنى انه مش هندخل في الحالات اللي فيه تعارض فيها ما بين الطريقتين
- اختيار القاع اللي رسمنا عليه نموذج AB=CD مهم جدا انه يكون قاع صحيح وسليم - بمعنى اما انه يكون بداية ترند او جاي بعد تصحيح لا يقل عن 38 ف المية من الموجة اللي حصل عليها تصحيح
..................................
كدا نكون انتهينا من اول حالة معانا من حالات الأشكال الهندسية وعرفنا ازاي بندمجها مع نموذج الهارمونيك بشكل مبسط
في انتظار أي استفسار بخصوص الجزئية دي واي حاجة مش واضحة
وان شاء الله مستمرون في الشرح
:asvc: