عروس البحر ....ام مدينه اللصوص

[حكيم سلماني]

السلام عليكم ورحمه الله و بركاته

ظاهره غريبه تحدث الان في الاسكندريه عروس البحر المتوسط،
الا وهي كثره حالات السرقه بشكل اصبح مخيف جدا .....اخوكم عربيته اتسرقت مرتين مره كاسيت والمره التانيه بطاريه

والغريبه ان كل ما اقول لواحد ، اسكت ده انا حصل معايا كده وكده يقولي يا عم احمد ربنا دانا اتسرقت
انا كمان في كذا وكذا

قصص يوميه عن حالات السرقه بمختلف انواعها مره عربيات مره بيوت مره محافظ ...... علي ودنووووووووووا

اخر حاجه سمعتها والتي تدعوا للعجب انهم سرقوا كابل تلفونات بحاله من حي العامريه
تخيلوا كابل تلفونات ثقيل جدا محتاج حفر ومحتاج عربيه نصف نقل عشان تسحبه
وفي حي المهندسين بالحضره الجديده سرقوا 12 عربيه مختلفه بردوا كاسيتات وبطاريتات
وجنوط وكاوتش وخلافه وحطوا المسروقات في عربيتين وطلعوا بيهم كاملين .......تخيلوا

طبعا السبب كل اسكندراني عارفه الان وهو سياسه المحافظ الجديد كرم الله وجهه
والذي جاء مكان الرجل المحترم والخلوق الواء عبد السلام المحجوب الذي اعاد بناء الاسكندريه والي شاف الاسكندريه من 7 سنيين يعرف بجد انجازات ذلك الرجل

المهم الخير علي قدوم الواردين طبعا وسياسه المحافظ الجديد هي هدم البيوت الغير مرخصه عمال علي بطال .....طبعا ده ادي الي وقف كامل لقطاع البناء الي بعتمد عليه فئه كبيره جدا من العمال في اكل عيشهم .......

بالاضافه الي حملات الازاله المستمره علي العيال الي بفرشوا بمولاعات ومشاط وملابس في الميادين والمحطات

والي كان الحال واقف معاهم اساسا عشان ظروف فصل الشتاء ........

طبعا كل دول مش حيتجهوا الي الفوركس .....

والنتيجه حالات سرقه انتقاميه ......

لدرجه اني لما رحت اصلح الزجاج الي اتكسر الراجل بتاع الزجاج قالي يوميا في مش اقل من
10 حالتهم زي حالتك .......واحيانا اكثر ...............
( رزق ناس علي ناس )

المهم لما تنوا زياره الاسكندريه ابقوا خلوا بالكم من محافظكم .....

وياريت لو اخت بتحب تلبس دهب كثير متجبش دهبها معاها ...يعني كفايه اوي دبله

ولو فضه يكون احسن


دعواتكم

[Peace4all]

استاذي العزيز مش الاسكندرية بس دي البلد كلها ودا طبيعي ومنطقي لعده اسباب اولها التسيب وعدم وجود سلطة تنفيذية نزيهه + الرشاوي وبعد كدا طبعا البطالة اللي في زيادة دائمة دا غير ان اللي بيشتغل او محسوب انه بيشتغل شغلة مش بياكلة حتي عيش + زيادة الاسعار علي سلع كثير بدون داعي لان زي ما قلتلك في تسيب يعني مفيش رقابة يعني تخيل حضرتك كدا لما تدخل مطعم زي جاد وتطلب ساندوتش بطاطس صغير ب 2 جنية او 1.50 دا في شرع مين دا يعني كان معروف ان محلات الفول والطعمية هي للغلابة حاليا ممكن تشتري ساندوتش كفتة بجنية حتي ولو كان مش لحمة لكن اسمه من ريحتها ولا اني اكل طاعمية بزيت محروق , الخلاصة البلد كل مدي بتزداد سوء في كل شيء ولا حياة لمن تنادي واللي مش عاجبة يشرب من البحر الملوث ويموت ويرتاح , صدقني احنا ايام الاحتلال الانجليزي كان حالنا افضل من الاحتلال الحالي

[محـمـود ربـيـع]

استاذي العزيز مش الاسكندرية بس دي البلد كلها ودا طبيعي ومنطقي لعده اسباب اولها التسيب وعدم وجود سلطة تنفيذية

يا عم عندنا فى مصر مافيش سُلطه

لكن ممكن تسميها وبكل ثقه سَـلَـطـه بفنح السين واللام
ولو حبيت بفتح الدماغ كمان