"برضه نسيت..وجبت سيرة الوجع!" قصيدة لـ"أشرف الشافعي"

إسكندرية ..
بقالها اكتر من يومين .....
لبدالى جوه الحلم وشكلها مخنوق
انا يعنى ناقص قلق ؟!
باسبورى فيه تأشيرة ييجى ساعتين
مش ناوى اضيعهم
حالاً قابلنى هناك ...
وإحلف طلاق ع القاهرة !!
لملم عزال روحك من الخنقة ..
وتعالى سيبها شوية تسندنى
سمعنى شعر !!
محتاج اصالح روحى على وجعك
غنيلى " صوت الكمانجة وسورة الواقعة
مع انى ..
عمرى ف يوم ماحبيتك وانت بتنزفها
بالذات ..
" من عند أشرف الشافعى .. بتبتدى المآساه
وكأنك كنت بتقرا ف الطالع
كلمنى عن اصحابك اللى " نسيت تقولهم على حاجة
فما صدقوا وزفوك بغدر لسما ..
مافيهاش براح روحك تطير جواه
وكتبوا نعيك هزار .. وصدقوا الكدبة
يووووووووووووه !!!
برضوا نسيت وفتحت سيرة الوجع !!
معلش ..
سيبك بقى منى .. وقول انت
كلمنى عن درويش ورسايله ويا " سميح "
كلمنى عن " ناصر " ..
ونظرته القلقانه على حال الوطن والناس
كلمنى .....
كلمنى عن ..
" رابح بدير .. وأسامة حسنين .. وخشبة المسرح
وبنات اخدت العهد على روحهم
علمتهم ف قصايدك الفاجرة ..
ما يعشقوش غيرك
كلمنى ع " العياق وع المماليك "
من قد ايه واحنا ..
ساكتين ماقطعناش ف فروة التورايخ
هات "ابراهيم عبد المجيد " وياك !
نسمّعه ...
" اسكندرية عشقنا المجروح
ويقولنا حكاية "البهى " !
اللى افتروا على سيرته بالباطل
لسه " حسام " برضه مابيردش ؟! *
خليه !!
ما هو اصله مش ناقص وجع ..
وانا وانت ماعرفناش نشاركه ..
رقصه ف "الفالس الاخير
استنى ماتمدش أوى .. تعبت م النهجان
ونفسى احوّش ف صدرى ريحة البحر
أكيد هناك هحتاجلها بجنون
الساعة كام دلوقت ؟!
يااااااااااااااااه
الوقت برضه لسه بينفسن ..
وتمللى يتعفرت ؟!
وقت اما يلمحنا كده مع بعض
على كل حال
جايز قريب قوى ...
تلاقينى قدامك
لكن امانة عليك
تقرا بضمير..
الفاتحة .. وسورة " الفجر "
علشان ساعتها أكيد ..
روحى هاتحتاجهم أوى .