المشاركة الأصلية كتبت بواسطة Abu Yaser
بسم الله الرحمن الرحيم
هاحاول اختصر على اد ماقدر، بس بدون اغفال اى نقطة مهمة
اولا
استراتيجية الرينج اللى هانقولها بالنظام ده تصلح للكيبل فقط (الباوند دولار)، اما باقى العملات فتنفع معاهم برضة، بس مش بالشكل ده، ممكن انت تعمل تعديلات حسب كل عملة ونظامها
ثانيا
انا هاشرح افضل الحالات (مع ان هناك حالات اخرى) بس عشان نبقى فى المضمون، وان قلّت الفرص، اما الاستفاضة وباقى الحالات فهم مشروحين فى الموضوع الاصلى (خبرتى...)، واللى لو الناس كانت قرته ماكناش بنكتب الملخص هنا الوقتى ههههه
العمل هايكون بنفس الترتيب ده
1- هانبص على الرينح المتوسط، لو كان اقل من 145 يبقى هانشتغل كانه 150، يعنى لو كان الرينج 130 مثلا، فهانشتغل كإن الخط عند 150، اما لو كان اكبر من 150 فخلاص هانشتغل على الخط المرسوم
يبقى النقطة الاولى، الاستراتيجية تعتمد لما يكون الرينج اكبر من 140
2- بمنتهى البساطة والسلاسة، تقفل شمعة فوق خط الرينج الاحمر (تقفل مش تلمس) نقوم ندخل بيع من الهاى بتاع الشمعة دى او افضل شوية
والعكس فى حالة الشرا، تقفل شمعة تحت الخط الاخضر للرينج فندخل شرا من اللو بتاعها
3- الهدف فى حدود تلت الرينج المتوسط (مش الرينج اللى حصل النهاردة) ممكن يزيد، وممكن يقل
يعنى مثلا كان الرينج 150 وانت دخلت بهدف 50، وجاب منهم 40، فمافيش اى مشكلة لما تحجز شوية ارباح... ولا تسيبه يا اما ال 50 يا اما يقلب بخسارة؟؟؟
وطبعا ده على حسب السلوك السعر (راجع الموضوع الاصلى)
بس هم ال 3 خطوات دول
فيبقى ملخص الملخص للملخص
هابص على الرينج لو اكتر من 145 هاعتمده، لما الشمعة تقفل بعد الخط بتاع الرينج ادخل فى الاتجاه المعاكس بهدف التلت بسسسسسسسسسسسسسس
نيجى بقى لادارة راس المال، ودى اللى عاملة مشاكل مع الناس عشان عدم الالتزام واللى اساسه الطمع والاستعجال للربح
احنا بندخل بعقد واحد لكل 2500 نقطة، وبنشتغل على التعزيز
هانقول مثل واقعى عشان نفهم
حسابك فيه 2500 دولار
فهاتدخل بعقد واحد مينى، يعنى النقطة بدولار
كان مثلا الرينج 150 والشمعة قفلت تحته فهاندخل من اللو بتاعها شرا، فلنفترض اننا دخلنا من سعر 1.6500 شرا بعقد واحد
هايكون الهدف تلت الرينج يعنى سعر 1.6550
طيب السعر عكس علينا نعمل ايه؟
التعزيز الاول بعد تلتين الرينج من نقطة الدخول، يعنى فى المثل بتاعنا ده الرينج 150، تلتينه 100 نقطة
فيبقى التعزيز شرا من 1.6400 بعقدين (يعنى ضعف العقد الاصلى)
وساعتها نغير الهدف لأقل من نقطة الدخول الاصلية بشوية
فعلى المثال بتاعنا نعمل الهدف للكل عند 1.6480
فتبقى المحصلة 80 هدف تعزيز اول ضرب عقدين، وناقص 20 للعقد الاصلى
160-20=140 نقطة صافى
السيناريو الاخير، لو السعر عكس كمان زيادة
التعزيز هايتم للمرة التانية والاخيرة بعد مقدار الرينج بالكامل من اخر تعزيز
فعلى المثال بتاعنا الرينج 150، وعززنا من 1.6400
فيبقى التعزيز التانى والاخير من 1.6250 ويكون ب 4 اضعاف العقد الاصلى
فيكون معانا مجمل العقود 7 (عقد اصلى، وعقدين تعزيز اول، و4 عقود تعزيز تانى واخير)
وفى الحالة دى يتم تعديل الهدف للكل على نقطة دخول التعزيز الاول (يعنى على مثالنا 1.6400)
فتكون المحصلة 150 ضرب 4 عقود تعزيز تانى، صفر التعزيز الاول ناقص 100 العقد الاصلى
600+0-100=500 نقطة صافى
يعنى اذا حصل ده بنكون طلعنا بربح 20% من راس المال فى صفقة
المهم الالتزام
بس كده، هو ده الشرح الملخص واكتر من كده ملخص بصراحة مش هاعرف اعمل هههههه
اشوفكم على خير
واى استفسار انا موجود فى الموضوع الاصلى (خبرتى...)
اخوكم
د/جمال ممدوح