البورصة اصلاح وتهذيب !!

[hatem12]

هذه القصة وصلتنى بالبريد الالكترونى وأحببت أن أشارككم بها ...


دارت أحداث هذه القصة على مدار عام 2008 .. العام الذهبى للأقتصاد العالمى بشكل عام ... وللبورصة المصرية بشكل خاص !!
استيقظت فى يوم من ايام شتاء مصر الدافىء وانا فى قمة النشوة ... والسعادة ... مطلقا صيحة قوية ارتجت لها جوانب منزلنا الموقر ... فقد كانت الصيحة هذه تعلن عن أتخاذ قرار محورى فى حياة كل من اتخذ هذا القرار مثلى فى ذلك الوقت ...
فقد قررت أن أدخل ... عالــــم البورصـــــة !!!

بعد لف وتدوير وكلام مع فلان ورغى مع علان وعجن مع ترتان ... اتفق الجميع على نصيحتى بأن أأخذ فكرة عامة عن طبيعة شغل البورصة قبل ان أدخل فيها .. وقد كان ... فذهبت وحصلت على كورس مكثف فى التحليل الفنى .. جاوره بالطبع بعض الشرح السريع من بعض المعارف فى البورصة بالاضافة الى حضور عدد جلسات ليست بالقليلة ... حتى بدأت أفهم اللعبة شيئا فشيئا ... الى ان قررت ان أنهى مرحلة التعلم ... وأدخل الى مرحلة العمل والجد ... فقد قررت أن اضخ أموالى فى البورصة بالتحديد فى مايو 2008
أول سهم وقع عليه اختيارى كان سهم شركة بوليفارا ... وقت ما كان السهم بـ 15 جنيه ... وبالفعل دخلت على هذا السعر ظنا منى ومن جميع من دخلوا معى فى هذا السهم انه فى صعود !!

وكأن لسان حال القدر يقول لى: نشنت يا فالح .. !!

المهم ماعلينا ... فات يوم ورا التانى والاسبوع ورا التالت ... والسعر واخد سكة هبوط ولا العربية اللى بتنزل من على طريق منحدر للاسفل بسرعة 120 !! ... تقريبا كل 4 ايام كان السهم بينزل جنيه ... وكل يوم الناس تسأل التريدرز ... ها ... نخلص منه .. التريدرات يردوا ... لالالالا ... اوعوا ... انتوا مجانين .. استنوا هايرد ... ده جاب الـ 12 جنيه ومفيش تحت كدة ... وهوب بقى بـ 10 جنيه .. والتريدر يقولك ... لالالالالا ... خلاص كدة ده جاب آخره ... وهوب 8 جنيه ... التريدر يقولك يا بخت اللى معاه سيولة يشترى فى السهم ده ويبقى مليونير بعد كام يوم ... حتى استقر السهم عند 5 جنيه !!

انا : ايه ياريس ... هانعمل ايه السهم بقى حاجة فللى ...

التريدر: انا رأيى بدل ما تبيع السهم .. اشتريه !!

انا : اشتريه ؟؟... تصدق انك بنى آدم مستفز .. ياراجل ده انا حاطط كل محفظتى فى السهم ده ... أجيب منين .. ده المحفظة اتبهدلت ؟!!!

التريدر بمنتهى البرود: خلاص اشترى محفظة جديدة من الوكالة .. بس ابقى هاتها جلد عشان تعيش معاك المرة دى .. نياهاهاهاها !!

طرااااااااااااااخ قلم على الهوا !

التريدر: ايه ده ... انت بتمد ايدك عليا ؟!!
انا : ده اقل واجب !!

وروحت قافش فى هدومه وماسيبتهوش الا لما الناس خلصته من ايدى !!
وجلست وحدى على أحد الكراسى اردد على طريقة اسماعيل يس فى فيلم العتبة الخضرا: فلوووووووسى ... فلوووووووسى !!

روحت فى اليوم ده البيت .. لقيت والدى منتظرنى بضحكة عريضة: نصبوا عليك يا عبيط

انا : انت عرفت ؟؟ ... بس ودينى مانا سايبهم !!
ابويا: هما مين دول اللى مانتاش سايبهم ... هو انت عارف مين اللى قلًبوك اصلا ؟!! .. تعالى يا زينب شوفى ابنك الفاشل .. طير القرشين اللى حيلته فى البورصة!!

امى: ينيلك يا موكوس ... ضيعت القرشين اللى انت مسنود عليهم !! ... طب هاتتجوز ازاى دلوقتى .. هاتأجر عروسة ؟!!!

ابويا: لالالالا تأجير ايه ... احنا نجيبله عروسة لعبة يسقف لها تروح مزمرة !!
انا : وبعدين بقىىىىى ...

فات كام يوم وقدرت انى ادبر قرشين تانيين ادخلهم فى البورصة عشان اسد العجز اللى حصل واسد فى نفس الوقت ماسورة التريقة اللى أحدتها من والدى المبجل .. وقد كان ... ففى أحد ايام شهر 9 دخلت الجلسة الصبح وقولت ربنا يجعله يوم نادى علينا .. وييسرلنا الحال ... استرها معانا يا كريم .. ده احنا غلابة !!

المهم بعد دراسة متأنية وتأمل شديد فى الشاشة ( اللى يشوفنى ساعتها وانا مركز فى الشاشة يقول انى بتفرج على فيلم من بتوع ايناس الدغيدى !! ) ..
الى ان جاءت لحظة اختيارى لأحد الاسهم ..

انا : بقولك يا هندسة ... ايه رأيك فى سهم طلعت مصطفى ؟!!

التريدر: هندسة ؟؟ ... ماعلينا ... ماله طلعت مصطفى ؟؟

انا بقرف: ابدا .. كنت عايز آخد كيس تفاح وأروح ازوره !! ... هايكون ماله يعنى ... ايه رأيك فى الشراء دلوقتى يا دكتور ؟؟

التريدر: دكتور ؟؟ ... ماعلينا ... حلو يا سيدى .. سعره حلو للدخول ... بس اصبر نص ساعة كدة نشوف الجلسه هاتقلب ولا الكلام على ايه !!

ومرت النصف ساعة وكانت الظروف مازالت مبشرة ...

انا : ها يا ريس ... تمام كدة ولا ايه ... السهم عمال يلم فى الـ 7 جنيه بقاله ساعة ... شكله هاينطلق ... عايز الحقه !!

التريدر: حاضر يا سيدى نجيبه على كام طيب ؟؟

انا : ماركت يا عم الحاج ... بسرعة ... أحسن ده هايطييييير !!

التريدر ممسكا بالهوت لاين: يا سراج .. سرااااااااج ... الهوت لاين باينه واقع ولا ايه ... ده انت عميل نحس !!

انا : بتقول ايه يا جدع انت ؟!!!

التريدر: ولا حاجة ... أهو سراج رد اهوه ... يا سراج ادينى 7 آلاف سهم فى طلعت مصطفى ماركت بسرررررعة !!

انا : ها ياعم الحاج ... حط الاوردر ولا ايه ؟؟

التريدر: مبروك يا استاذ .. لبست .. آ ... قصدى آخدت !!

انا : ماشى ... ربنا يسهل ويلم على فوق بقى !!
وبمرور الوقت بدأ سعر السهم فى النزول حتى اغلق فى هذه الجلسة على 6.85 !!
انا : عاجبك كدة ؟!! ...

التريدر: وانا مالى يا عم ... مش انت اللى كنت بتتنطط وعايز تشترى فيه .. هو فى الخسارة تقولى انا السبب وفى المكسب ولا تعبرنى بكيس شيبسى حتى ؟!! ... هو انا ايه .. فى الحزن مدعية ... وفى الفرح منسية ؟!! .. ايه يا ختى ده ( تقريبا شوية شوية وكان التريدر هايفرشلى ملاية ويردحلى !! )

انا : خلاص خلاص .. قصره ... نستنى بكرة نشوف العملية هاتمشى ازاى ..
تانى يوم ... خبر بالبنط العريض فى الجرايد: القبض على رجل الاعمال المصرى طلعت مصطفى .. فى تهمة قتل المطربة اللبنانية سوزان تميم !! ...
وانا ماكونتش لسه عرفت الخبر ... وروحت الشركة فى اليوم ده ... اول ما التريدر شافنى ..

التريدر: ابوس ايدك ابعد عنى بفقر امك ده .. ده انت نحسك دكر !! ... وآدى يا عم تنازل منى عن كل مليم طلعلى عمولة منك ... انقل على اى تريدر غيرى .. انا مش مستغنى عن عمرى !!

انا : ايه يا عم انت هاتسيحلى فى وسط الشركة ... اهدى بس اهدى .. ايه اللى حصل لكل ده !!

التريدر: اهدى ايه بس .. السهم بـ 5.50 .. ده انا شارى معاك فيه .. دى عمرها ما حصلتلى !!

انا مصدوما: بـ 5.50 ؟!! ... لييييييييييييييييييييه ... ايه اللى حصل .. فى خبر وحش نزل عليه ولا ايه ؟!!!

أحد العملاء: انت مش عايش فى الدنيا ولا ايه يا محترم ؟؟ ... طلعت مصطفى اتقبض عليه النهاردة !!
انا : طلعت مصطفى مين ؟!!!

التريدر متهكما: ابن خالتك !!

نفس العميل: طلعت مصطفى يا استاذ ... صاحب سهم طلعت مصطفى اللى شغال قدامك على الشاشة ده !!

انا : طلعت مصطفى اللى انا شاريه امبارح .. اتقبض عليه النهاردة !!!
ورحت قالع القميص اللى انا لابسة ولفيته حوالين وسطى وقعدت ارقص فى وسط الشركة وانا اغنى: يا حلاوة الدنيا يا حلاوة ... يا حلولو .. يا حلاااااوة !!
الشركة كلها: لا حول ولا قوة الا بالله ... الجدع جاله لطف !!

بعد مرور عدة ايام تمت السيطرة على الوضع ... وقام التريدر بالتخلص من سهم طلعت مصطفى وخرج منه بأقل خساير ... وطبعا قعدت فى بيتنا حوالى اسبوعين مابخرجش ملازم للفراش وسط حالة من الاكتئاب ... وأخيرا قررت ان اقاوم احزانى وأخرج فى العشرة الاواخر من رمضان من بيتنا واعود للشغل فى البورصة مرة أخرى .. وقررت الشراء من جديد فى مجموعة من الاسهم قبل العيد بـ 3 آيام ... وقعدت احسبها مع التريدر !!

انا : اظن لما نوزع المحفظة كدة احسن .. عشان لو حصلت مصيبة فى سهم ... يبقى التانى يسد

التريدر: عين العقل ... آهو ده الكلام .. وانا ياما اتحايلت عليك توزع محفظتك من الاول .. وانت اللى كنت مندفع ومابتسمعش الكلام .. عموما حمد الله على سلامتك ... وربنا يجعلها آخر الآحزان .. وان شاء الله تيجى بعد العيد تلاقى الدنيا بقت 100 فل و 14 !!

ولاحظت التريدر ساعتها وهو بيقول فى سره: ربنا يستر !!
وبدأنا فى أجازة العيد .. حيث بدأت الأجازة فى البورصة والبنوك من ليلة العيد ... وما ان دخل أول يوم فى العيد .. حتى توالت الاخبار بالصحف والفضائيات كالتالى:
خبر: انهيار كبير يصيب السوق الامريكى بسبب ازمة الرهن العقارى !!
خبر آخر: أعلان افلاس بنك ليمان برازرز رابع اكبر بنك امريكى !!
خبر آخر: انهيارات بالجملة فى البورصات الاوروبية بسبب الازمة الاقتصادية الامريكية !!

خبر آخر: مؤشر البورصة الروسية يخسر فى اسبوع واحد فقط ما يزيد عن 32% من قيمته والرئيس بوتين يعلن عن جام غضبه من السياسة الاقتصادية الامريكية !!

تقريبا انا كنت مقضى معظم ايام العيد فى الحمام .. اول ما اطلع منه اتفرج على النشرة الاقتصادية أروح داخله تانى !!

وانتهت الأجازة !!

وقد قررت الا أذهب فى اول يوم عمل حتى لا تتعب اعصابى أكثر وأكثر .. وقولت اتابع فى التليفزيون لحد ما الدنيا تهدى ابقى اروح .. واهو ابقى جنب الحمام !! ... لقيت أول خبر فى وشى بعد انتهاء الجلسة فى اول يوم عمل بعد أجازة العيد: مؤشر البورصة المصرية CASE 30هبط 16% من قيمته فى جلسة واحدة !! ..

تقريبا اليوم ده انا نمت فى الحمام .. وقولت ما بدهاش لازم اروح الشركة بكرة اشوف المصايب وصلت لغاية فين ؟؟؟

تانى يوم .. صحيت هايم وتايه .. ولبست اى حاجة ونسيت البس الجزمة .. ولقيت نفسى ماشى فى الطريق للشركة وانا لابس شبشب !! .. المهم دخلت الشركة ... لقيت الناس كلها قاعدة متنحة ... وكل واحد هايم فى ملكوت من هول الصدمات المتتالية ... وقعدت اسأل الناس .. كاللأتى ..

انا : هو ايه الاخبار ياباشا ؟؟

عميل: العيد فرحة .. ماااااااااااااء ( وراح سايبنى وخرج برة الشركة !! )
انا مجددا: هو ايه الاخبار يا باشا ؟؟

عميل آخر: الدنيا حلوة وأحلى سنين ... بنعيشها واحنا ياناس عاشقين .. انــــــســـــــــــى ( وراح ماسك الشاشة ودشها على الارض سبعتلاف حتة !! )
وبصيت على الستات لقيتهم شاريين كوسة وبتنجان وبامية وحاطينها جنبهم وقاعدين يرغوا بصوت عالى ويضحكوا ...

انا قولت هى ايه جنينة الحيوانات اللى انا دخلتها دى .. !!
المهم قعدت ادور على التريدر بتاعى مالقتهوش !! ... قولت أسأل عليه التريدر اللى جنبه .. ببص .. لقيت التريدر اللى جنبه قاعد ناكش شعره وقالع النضارة وجايب شيشة وقاعد يشد وفى الايد التانية ماسك سيجارة !! .. ياخد نفس شيشة وبعد كدة نفس من السيجارة !! ... فسألته عن التريدر بتاعى لقيته بيقوللى: التريدر بتاعك قدم استقالته النهاردة .. وراح فتح كشك سجاير .. ماهو السجاير والشيشة اللى انت شايفهم دول هدية الافتتاح !! ... وهو سايبلك الورقة دى ..
ببص فى الورقة لقيت مكتوب فيها: سايبها لك مخضرة .. حسبى الله ونعم الوكيل !!

فى نفس اللحظة كان التليفزيون الموجود بالشركة مفتوح على القناة الفضائية المصرية حيث نشرة اخبار البورصة المصرية حيث ظهر سيادة الوزير ( شفاه الله وعافاه ) وهو يقول: البورصة المصرية لن تتأثر بالازمة العالمية ... والاقتصاد المصرى بخير !!

هنا انتهت النشرة ودخل فاصل بأغنية فريد الاطرش
تقول: الحياة حلوة ... بس نفهمهــــا .. الحياة حلوة .. محلى انغامـــــها

[Tato4all]

ههههههههههههههههههههه جامدة انا مت من الضحك
ربنا يعوض خسايره

[سمير صيام]

ربنا يعوضه ان شاء الله وربنا يستر منشفهوش مع اللى قتل اولاده ومراته وانتحر وللاسف نجح فى قتلهم وفشل فى قتل نفسه

[max2007]

ههههههههه والله ضحكتني

[وليد الامور]

ربنا يعوضه ان شاء الله وربنا يستر منشفهوش مع اللى قتل اولاده ومراته وانتحر وللاسف نجح فى قتلهم وفشل فى قتل نفسه

للاسف الجدع دة مش هيلاقى يتجوز يا حاج سمير ولو فكر فى واحدة هتولع تانى يوم اصل بينى وبينك الشغلانة دة اقدام ربنا يستر علينا اجمعين.
مبروك يا عم على البرونزية ولو ان عندنا واحد بيتحدى عبد الرحمن (اسمة حوكشة) 7 سنين ومن تحت الربع ودخل الاولومبية 3 مرات ونص ومعاة 12 ميدالية منوع !! اية رايك؟

[cut guy]

جااااااااااااامده موووووت يامان
دا انا بقالى كتير ماضحكتش كده
ربنا يرزقك المسلمين جميعا
تقبل ودى

[ميرو]

ياراجل حرام عليك
انا كنت هروح فيها من كتر الضحك

[سمير صيام]

للاسف الجدع دة مش هيلاقى يتجوز يا حاج سمير ولو فكر فى واحدة هتولع تانى يوم اصل بينى وبينك الشغلانة دة اقدام ربنا يستر علينا اجمعين.
مبروك يا عم على البرونزية ولو ان عندنا واحد بيتحدى عبد الرحمن (اسمة حوكشة) 7 سنين ومن تحت الربع ودخل الاولومبية 3 مرات ونص ومعاة 12 ميدالية منوع !! اية رايك؟

ابو سبع سنين ده اجيبله محمد ومحمد اخذ الذهبية لانه لم يوجد منافس له فى وزنه
وعندى يوسف برضه اخذ المركز الخامس فى البطولة لكن الميداليات حتى الثالث فقط وان شاء الله المرة الجاية يقدر يحقق افضل خصوصا انها اول بطولة له

بالنسبة لصاحبنا بتاع البورصة انا اعرف ناس كده بالضبط لدرجة انه باع شقته ياعم سيبها على الله

[thecreativex]

ههههههههههههه
بجد جامده جدا جدا و بتعكس واقع البورصه بشكل عام
ربنا يبعد عنا الخساير

[احمد_هيكل]

ربنا يعوضه ان شاء الله وربنا يستر منشفهوش مع اللى قتل اولاده ومراته وانتحر وللاسف نجح فى قتلهم وفشل فى قتل نفسه

ألسلام عليكم ورحمه الله وبركاته فينك ياغالى بقالك كام يوم كدا مش ظاهر فى المنتدى خالص حمد لله على السلامه والسلام عليكم ورحمه الله وبركاته

[سمير صيام]

ألسلام عليكم ورحمه الله وبركاته فينك ياغالى بقالك كام يوم كدا مش ظاهر فى المنتدى خالص حمد لله على السلامه والسلام عليكم ورحمه الله وبركاته

وعليكم السلام ورحمة الله
موجود ياغالى اهو وانا كنت مسافر عشان اولادى كانوا فى بطولة تايكوندو بالاسكندرية

[jnene]

هههههههه حلوة والله الله يعوض عليك وعلى جميع المسلمين بالخير
طيب شوف أنا حصل معاي موقف مش عارف ايش أسميه
انا دخلت للبورصة الفلسطينية وشريت أسهم بشركة عريقة جدا وطبعا مش بشطارتي ولكن والدي يتعمال معهم منذ اكثر من 25 سنة فأنا غافلته وقلت ليش هو يربح لوحده مدام أنها شركة موثوقة وهو دائما يمدحها فقررت الأتصال مع الوسيط لشراء أسهم بالشركة وعندما كلمتني عرفت ليش الوالد صارله 25 سنة معهم المهم عرفتها بنفسي وقلت لها اني أريد شراء أسهم بالشركة الفلانية فقالت ok تريدهم لحساب الوالد بصراحة لم أعرف ماذا أرد ( أي والد وغيره ) قلت أريدهم لحسابي أنا فقالت طيب يا أستاذ لازم تفتح محفظة عنا وبعدين تبيع وتشتري طبعا محسوبك مفتكر الموضوع مثل الفوركس تحويل النقود وبيع وأشترى على طول ولكن حتى لا تقول عني أني .......... علت نبرة صوتي قليلا وقلت لها يا ستي الأن ستضيعون الفرصة على من أجل فتح حساب وأوراق وكلام فاضي أنا أريد الشراء اليوم وحالا وبعدين نعمل الأوراق .. فحست البنت نفسها أنها أمام هاموووور بالبورصة وحولتني للمدير المالي الذي عجز حتى أقنعني بضرورة فتح الحساب أولا وغد يشترون لي الأسهم حيث أن السوق بعد 5 دقائق سيغلق وهذه طبعا معلومة أيضا جديدة على محسوبك المهم وافقت على فتح الحساب وكله تمام
المهم أنه في ثاني يوم كان السهم قد أرتفع دينار واحد ولا يزال بأرتفاع وعندما كلمت البنت هناك قالت أنه لم يحدث أن أرتفع السهم بهذه السرعة وأعتذرت عن عدم شرائها لي بالأمس وقدرت وضعي حيث أني متأكد جدا من أرتفاع هذا السهم ... طيب تصدق بالله أني أول مرة بحياتي أتعامل بالأسهم وهي غيرة من والدي لا أكثر لكن شائت الظروف أن تأتي لصالحي وجعلت من بالشركة لوسيطة الأن يكلمونني على أني خبير بهذا السهم وأنا والله لا أعلم ما هي المحفظة وما هو وقت أفتتاح السوق وأغلاقه
والحمد لله لا زال السهم بأرتفاع بالنسبة لي من سعر شرائي ولكن بالنسبة لوالدي فهو هابط وخسران فيه وطبعا قيمة سهم والدي كبيرة جدا مقارنة معي ولكني لا أعلم فأنا سعيد جدا لأرتفاع أسهمي ومع ذلك غير مكترث كثيرا لخسارة الوالد مع أنه بالنهاية أسهمي وأسهمه تعتبر واحدة

[ninjawy]

ههههههههه إنت مشكلة والله

نصيحة بجد ومفيهاش هزار ( سيبك من البورصة خالص وإتجه للتأليف الأدبى وخاصة فى النقد الساخر )

بجد أسلوبك فى الكتابة يرشحك تبقى أديب

البورصة زى أى مجال فى العالم محتاجة موهبة مش واحد يحط أوردرات ( طبعاً كلامى للعام )

أصحاب الموهبة دى قليلين زى أى مجال تانى

يعنى ممكن يكون واحد موهوب فى التجارة ويبقى تاجر ناجح لكن مثلاً لو مسك ورقة وقلم وحاول يألف هيبقى أفشل واحد فى التاريخ وممكن العكس

وممكن برضه واحد يبقى رسام محترف وعبقرى لكن إجتماعياً فاشل وإذا إشتغل فى السياسة هيخربها

وبرضه ده ميمنعش إن الممارسة ليها عامل كبير فى أى حاجة والخبرة تتفوق على الموهبة فى بعض الأحيان

يعنى أنا أظن إن كل الناس ممكن تكسب من البورصة إذا إستمرت فيها لأن الخبرة بتزيد والسيطرة على النفس بتتطور إذا كان فيه صبر

لكن فيه واحد بيبدأ يكسب بعد سنة وواحد بعد سنتين وواحد بعد 4 و5...هنا الموهبة بتبقى متحكمة لأن اللى بدأ يكسب بشكل منتظم بعد سنة موهوب فى المجال مثلاً

واللى بيكسب فى أقل من سنة من بدايته بشكل منتظم ربنا موفقه مش موهوب

الفكرة إن المشى مع الترند مثلاً ليه نظام

يعنى مش ألاقيها طالعة أطلع وألاقيها نازلة أنزل

لأن السعر بيتحرك بشكل موجى مش فى خط مستقيم

والموج ده بالضبط زى موج البحر كل واحدة ليها حجمها وسرعتها وقوتها

فممكن تركب موجة مثلاً تتفاجىء إن السحب بدأ وده سبب 90% من الخسائر فى البورصة

فعشان تعرف حجم الموجة وسرعتها وقوتها فى البورصة لازم تدرس صح وتعرف تستعمل إيه إمتى

مظنش إن فيه حد إستمر 5 سنين مثلاً ومبدأش يكسب فى البورصة بشكل منتظم ولو موجود أنصحه بترك المجال فوراً وبلا رجعة مش عشان العيب فيه ولكن عشان ده مش مجاله زى ما قلنا عن إختلاف المواهب عند الناس

لكن المشكلة إن البورصة مصيدة للأخطاء النفسية البشرية

يعنى لما واحد يبقى جديد ويخاطر بمبلغ كبير لازم هياخد أول قلم بسرعة وقسوة ويخرج بدرى بدرى

ولما واحد بيخسر ومتعلمش حاجة وفاكرها فهلوة وكل ما يخسر حساب حقيقى صغير يفتح غيره بسرعة وفاكر إنه واقف قدام طرابيزة روليت ويمكن تضرب معاه المرة دى هيعمل زى صاحبنا اللى قال تعيش البورصة المصرية الأمريكية ويمسك إيد الهون ويجرى ورا أهله ( طيب هما مالهم يعنى ههههههه )

طبعاً أنا برضه لسه بتعلم ومبدأتش أكسب بإنتظام وبتعلم لغاية دلوقتى بحساب حقيقى عشان الضرب يعلم فيا من غير ما يقتلنى وعامل النقطة بسنت واحد بس فيبقى كأنى باخد كورس على الطبيعة

البورصة عايزة صبر كبير جداً والموهبة فى البورصة عبارة عن ( صبر- ذكاء - شجاعة - ثبات إنفعالى ) ودول بيزيدوا بالممارسة والخبرة والإستراتيجيات تأتى بعد ذلك

مفيش حاجة إسمها نحس وحظ لأن المؤمن مصاب ومبتلى

فلو كانت الدنيا ماشية تمام معاك يبقى خاف على نفسك لأن الدنيا سجن المؤمن وجنة الكافر

والنحس والحظ كلمتين مرفوضين من الأساس لأن فيه إله مدبر لكل شىء ولا يمكن أى شىء يحصلك بالصدفة أبداً

لكن برضه المفروض نفكر ونحسب صح لأن مش هروح أرمى فلوسى فى النيل مثلاً وأقول ده بلاء وإختبار من ربنا

فاللى بيدخل البورصة من غير دراسة وعلم وخبرة وتدريب فى السيطرة على النفس يبقى بيرمى فلوسه

ومينفعش واحد عنده ظروف صعبة من كل ناحية وديون ومشاكل ويدخل البورصة ومتوقع إنه هيكسب مبلغ كبير فجأة لأن أول شىء مش هيعرف يتحكم فى نفسه مع طلوع أو نزول السعر وبكل تأكيد هيخسر إذا كان شغال من نفسه وإعتماداً على نفسه فقط

يعنى البورصة زيها زى أى مجال فى الدنيا محتاجة دراسة وخبرة لأن مفيش واحد هيبقى عالم آثار لمجرد انه إتفرج على الهرم ومفيش واحد هيبقى عالم كيميائى لمجرد انه سخن ميه وكثفها على غطاء حلة بارد

ولكل قاعدة شواذ

يعنى ممكن تبقى دارس وفاهم وخبير وعندك طريقة متخرش الميه وفجأة يحصل موضوع زى بتاع طلعت مصطفى

يبقى ساعتها عملت اللى عليك لكن حصلت ظروف خارجة عن إرادتك وده ميخليكش ترمى كل مجهودك السنين دى فى الأرض وتسيب البورصة ولو عملت كده تبقى متعلمتش حاجة من الدنيا مش من البورصة

عموماً ربنا يوفق الجميع وربنا يجعلها آخر الأحزان

[جمال عمر]

ممكن اسئل الاخ صاحب المقال انت معنا هنا من امتى
ربنا يسترعلينا
هههههههههه

[hatem12]

ممكن اسئل الاخ صاحب المقال انت معنا هنا من امتى

ربنا يسترعلينا
هههههههههه

القصة دى وصاتنى بالبريد,,,,, فأنا لست بطلها بالطبع والحمد لله وأدعو الله لى وللجميع أن لا يتعرضوا لمثل هذه المواقف الكارثية.......

تحياتى للجميع