حوار بينى وبين المارجن كول فى احدى حفلات المجنون

[Amro]

بسم الله الرحمن الرحيم

الحمد لله والصلاة والسلام على رسول الله

بينما اتجول فى احدى حفلات المجنون اليومية وجدت العدو اللدود للمضرب ( المارجن كول ) بترقب من بعيد ويتابع الحسابات لينقض على فريسته التاليه بعد اودى بحيات حسابات الآلاف من المضاربين فقررت ان اشغله بعض الوقت عن الترقب ولعلى استطيع اقناعه بترك حسابت الأمه العربيه ويرحل عنها فأجريت معه ذلك الحوار لأعرف لماذا هو دائماً مترقب حسابات الكثير منا , فأرجوا ان تتفهموا الحوار جيداً و ولسهوله المتابعه فسيكون كلامى معه بهذا اللون وكلامه معى بهذا اللون

السلام عليكم ورحمة الله وبركاته

اهلاً

عموماً مش مشكله , وعليكم السلام ورحمة الله وبركاته اخذ انا ال120 حسنه

نعم اقدر اساعدك

يا ريت تساعدنى

اتفضل بس لا تطول الله يخليك

انت مشغول للدرجه دى

نعم .. قصادى كام حساب اوشكوا على تقديم دعوه ليه بالزيارة

زيارة ! مش فاهم

اتفضل قول حضرتك عاوز ايه عشان مش فاضى بجد

طيب هدى اعصابك بس واسمحلى اسألك سؤال

هيه لسه فيها اسئله

معلش اتحملنى شويه الله يخلك

اتفضل معاك

مش انت بردو المارجن كول اللى بيصفر الحسابات

ااااااااااه هيه كده الأسئله , طب عن اذنك بقى عشان مش فاضى

يا عم معلش بس اصبر إن الله مع الصابرين

قول يا سيدى وخلصنى

طيب انت ليه مصمم انك تأذى الناس وتصفر حساباتهم

انا !

ايوه انت

يا سيدى الفاضل انا مجرد نظام وضعته شركات الوساطه عشان تحافظ على اموالها ليس اكثر ولا اقل

يعنى انتو تحافظو على اموالكو على حساب الناس التانيه

هدى اعصابك انت بس وروق انا هفهمك

ياريت

مش انت لسه سامعنى دلوقتى وانا بقولك منتظر كام حساب يقدمولى دعوه لزيارتهم

ايوه ايه حكايه الدعوه دى كمان

انا اقولك

اتفضل

انا مش بروح لأى حساب من نفسى كده لازم هو - او بمعنى اصح - صاحب الحساب يقدملى دعوه عشان اروح ازورة واصفرله الحساب

دعوه ازاى يعنى , بيبعتلك على الإيميل ولا SMS ولا ايه فى يومك ده

لا يا سيدى لا ايميل ولا حاجه الموضوع وما فيه ان الدعوه دى بتبقى عبارة عن استخدام صاحب الحساب لراس ماله اسوء استخدام

يا عم راس ماله وهو حر فيه انت مالك انت

اصبر بس احنا اتفقنا إن انا نظام يعنى مليش عواطف عشان احس بيها ان ده محتاج ولا ده ظروفه وحشه ولا ده مزنوق وباع عفش بيته عشان يشتغل فى الفوركس , انا بنفذ تعليمات او أوامر بتبرمج عليها

هممممممممم يعنى من الأخر زيك زى الكرسى الى انت قاعد عليه

تقدر تقول كده بس الفرق ان انا استخدماتى اكتر من الكرسى

طب المهم عشان انا اللى مش فاضى بقى طالما طلعت كده , لخص يعنى

المهم يا سيدى خلينى بس اسألك سؤال قبل ما افهمك اكتر

اتفضل يا سيدى ..... يا صبور صبرنى

ممكن تقولى يعنى ايه إدارة راس مال ؟ أو ايه مفهومك عن إدارة راس المال ؟

والله إللى انا اعرفه ان ادراة راس المال هو انى اتاجر بنسبه معينه من راس مالى لا تتجاوز ال10 % عشان افضل مستمر فى السوق

بس

بس ايه هو فى حاجه تانيه

ايوه طبعاً ده فى وفى وفى وفى كمان

طب قول قول الله يخليك , تعالى الأول نجيب اتنين شاى كده عشان افهم على رواقه

يا عم انت كده هتعطلنى عن شغلى

تعالى بس سيب الناس تشتغل براحتها شويه

طيب مش اكتر من ربع ساعه ماشى

ماشى بس قول

شوف يا سيدى

طبعاً انك تدخل ب 10 % من راس مالك ده كلام سليم مفيش مشكله , بس تعلى كده نسحب حسبه بسيطه مع بعض

اتفضل

لنفترض انا راس مالى 1000 دولار يبقى النسبه اللى لازم ادخل بيها كام ؟

10 % من ال1000 دولار يبقى 100 دولار

كلام سليم , ونفترض إن النقطه بتاعتى بدولار وانا حطيت ستوب لوز 300 نقطه مثلاً وضرب الأستوب لوز يبقى انا خسرت كام ؟

خسرت 300 دولار

تمام , وال300 دولار دول نسبتهم كام % من راس مالى ؟

300 دولار يعنى 30 %

ااااااااه شفت بقى , امال انت داخل ب 10 % على اى اساس

مش فاهم وضح اكتر

شوف يا سيدى , عشان تقول انا داخل ب 10 % من راس مالى يبقى لازم اقصى مبلغ ممكن تخسرة من راس مالك لا يتعدى ال 10 %

طيب معلش ممكن تدينى مثال ؟

حاضر يا سيدى ولا يهمك

يا سلام يا امير اتفضل , ( لو تبقى امير كده على طووووول )

بتقول ايه ؟

لالالا بقولك اتفضل قول

ماشى , اسمع علشان متخسرش اكتر من 10 % من راس مالك لازم تحسب حاجات كتير وتعالى نجيبها من الأول خالص وانت لسه فاتح الحساب او هتفتح حساب

اول حاجه راس مالك كام عشان تعرف هتفتح حساب ميكرو ولا مينى ولا ستاندر

طيب ودى هعرفها ازاى يا كول باشا

بسيطه جدا

عشان تفتح حساب ميكرو يبقى راس مالك نقول مثلاً من 100 دولار لحد 1000 دولار , وممكن تشتغل عليه مينى بس لازم تكون محترف شويه طبعاً

وعشان تفتح حساب مينى عندك من اول 1000 دولار لحد 5000 دولار , عشان تشتغل وانت مستريح ومن غير قلق

وعشان تفتح حساب استاندر عندك بقى من 5000 دولار إلى ما شاء الله

طب إن كان معايا مثلاً 50 دولار ده يبقى حساب ايه ؟

ده يبقى جغرافيا يا حبيبى مش حساب

لأ بتكلم بجد انا ظروفى مستمحش انى افتح حساب إلا بالمبلغ ده . ينفع اعمل بيه حاجه ؟

والله شوف , لو لقيت شركه ترضى انك تفتح بالمبلغ ده يبقى اكيد طبعاً هتشتغل عليه مايكرو

طب ايه الشركات اللى ممكن افتح فيها حساب بالمبلغ ده

لأ دى بقى عندك عم جوجل يقولك او زمايلك هنا يقولولك مش بتاعتى

طب كمل كمل

حلو الكلام وصلنا دلوقتى انت عارف حسابك هيكون نوعه ايه ماشى

تمام

لنفترض ان حسابك مايكرو هنقول 100 دولار مثلاً , وانك هتدخل صفقة دلوقتى يبقى عشان متخسرش اكتر من 10 % من حسابك يبقى لازم متخسرش اكتر من كام ؟

10 % من ال100 دولا يعنى 10 دولار

تمام , وانت فى الحساب المايكرو النقطه بتاعتك ب 10 سنت يعنى 0.10 دولار , يبقى المفروض متخسرش اكتر من كام نقطه ؟

ايه ده هو كل حساب النقطه بتاعته ليها ثمن معين ؟

الله الله الله وقاعد بتتكلم معايا , يا عم سيبنى خلينا اشوف شغلى

اصبر يا عم الله يخليك فهمنى اكسب فيه ثواب

ماشى يا سيدى

الحساب المايكرو النقطه بتاعته ب 10 سنت او ( 0.1 دولار ) زى ما قولنا

ماشى

والحساب المينى النقطه بتاعته ب 1 دولار

والستاندر ايه ؟

ده بقى النقطه بتاعته ب 10 دولار

طب انا بس يقولك ده فلان ده النقطه بتاعته ب 200 دولار وده النقطه بتاعته ب 1000 دولار وكلام كبير كده

ما هو ده بقى يا سيدى يتوقف على عدد العقود اللى انت داخل بيه , يعنى لو حسابك ستاندر وداخل ب10 عقود بقت النقطه بتاعتك ب100 دولار ( 10 * 10 = 100 )

هممممممممم فهمت فهمت عشان كده بقى

تمام كده

ماشى كمل

نرجع لحسابنا اللى هو مايكرو وب100 دولا وانت المفروض متخسرش اكتر من 10 دولار والنقطه بتاعتك ب 10 سنت يعنى 0.10 دولار , المفروض بقى متخسرش اكتر من كام نقطه ؟

المفروض على كلامك كده مخسرش اكتر مننننننننناااااا ( 10 سنت النقطه والدولار فيه 100 سنت يعنى كل 10 نقط بدولار وانا المفروض مخسرش اكتر من 10 دولار يعنى 100 نقطه ؟

تماااااام المفروض فعلاً متخسرش اكتر من 100 نقطه

ميه ميه كمل يا عم كمل

يبقى انت دلوقتى حسابك نسبه المخاطرة فيه لازم تكون على اساس انك متخسرش اكتر من 10 % من راس مالك , وكده بقى تحسب كل مرة هتدخل فيها اى صفقة راس مالك كام وال10 % منه كام وتقسمهم على قيمه النقطه بتاعتك يطلعلك عدد العقود

طب الله يخليك عشان انا كده ممكن اتلخبط ممكن تعملهالى معادله عشان تريحنى

انت شكلك كده بتدور على قطع عيشى

يا عم ما عندك الكفره اهم اعمل فيهم اللى انت عاوزة ملقيتش غير العرب الغلابه وتعمل فيهم كده هيه ناقاصاك

طيب يا سيدى ماشى , تخيل واسمع معيا كده

هنسمى كل حاجه برمز معين

يعنى ايه ؟

شوف

هنقول مثلا

راس المال يعنى ( ر )

نسبه المخاطره اللى هيه ال10 % من راس مالك يعنى ( خ )

وقيمه النقطه بتاعتك يعنى ( ن )

وعدد النقط اللى المفروض متخسرش اكتر منها يعنى ( ع ن)

وعدد النقط الى المفروض متخسرهاش لكل العقود اللى داخل بيها ( ع ن ق )

وعدد العقود اللى المفروض تدخل بيها ( ق )

يبقى انا دلوقتى عاوز اعرف الأول عدد النقط اللى المفروض مخسرش اكتر منها تبقى المعادله عامله ازاى ؟

قول انت بقىىىىىى

شوف يا سيدى هنقول

خ = ( ر * 10) / ( 100 )

ده طبعاً على اساس انك مش عاوز تخسر اكتر من 10 % اما لو عاوز اقل ممكن تخلى ال10 دى 5 او 3 او 8 حسب مانت عاوز ماشى

تمام

وهنقول يا سيدى عشان اعرف عدد النقط اللى مخسرش اكتر منها يبقى

ع ن = خ / ن

قبل ما تقول اى حاجه هديك مثال بالأرقام عشان متوجعش دماغى

يا سلام عليك .... كده

اسمع

ان راس مالى دلوقتى... ( ر ) = 100 دولار

يبقى ( خ ) = ( ر * 10 ) / ( 100 )
يعنى ( 100 * 10 ) / ( 100 ) = 10 تمام

ماشى , والنقطه بتاعتى ب 10 سنت 0.1 دولار يبقى

ع ن = خ / ن يعنى ع ن = 10 / 0.1 = 100 نقطه

تمام كده

كده تمام قوى الف شكر

لأ لسه فى نقطه كمان

ايه ؟ ياعم قول

دلوقتى انت المفروض متخسرش اكتر من 100 نقطه صح

صح

طب لو حبت تدخل بأكتر من عقد عشان مثلاً تخرج بنص العقود عند هدف معين وتسيب الباقى يلملك الأرباح المرميه تعمل ايه ؟

قول انت بردو بقىىىىىىى

اقول يا سيدى

تجيب ال100 نقطه دول وتشوف انتى عاوز تدخل بكام عقد .... 2 مثلاً

مثلاً

يبقى تقسم 100 / 2 = 50

يعنى لو دخلت بعقدين يبقى متخسرش اكتر من 50 نقطه لأن كل عقد ب50 نقطه يبقى العقدين ب 100 نقطه ...فهمت ؟

تمام , يعنى كده نقول بقى ان ( ع ن ق ) = ع ن / ق

تمام كده

يا كول باشا انا مش عارف اقولك ايه والله احرجتنى بزوقك وأدبك

متقولش حاجه عادى المهم تكون استفادت بس

استفادت ؟ دانا كنت عامل زى اللى تايه يا عم الله يباركلك يا رب ويرزقك شويه حسابات للكفرة كده تصفرهم يا رب ويوسع رزقك بيهم وتصفرلهم حساباتهم كمان وكمان .

سؤال اخير بقى الله يخليك

لاااااااااااا انت زودها بقى

معلش خليك كريم للأخر

اتفضل

ممكن تقولى بقى على حاجه اقدر احسب بيها الكلام ده كله

شوف يا سيدى

عندك شركه FXSOL فى البرنامج بتاعها فى آله حاسبه للفوركس
يعنى لو فتح البرنامج بتاعهم تدخل على قائمه Trading Tools وبعدين تضغط على Forex Calculator هتفتحلك مربع الأله الحسابه

وفى صورة يا عم من عندى عشان تعرف شكلها هتلاقيها فى المرفقات تحت





طبعا المربع اللى انا حطت عليه مربع اخضر ده تقد تحدد منه الحساب بتاعك مايكرو ولا مينى ولا استاندر

1000 يعنى ميكرو والنقطه هتلاقيها ب 0.10 دولار

10.000 يعنى مينى والنقطه هتلاقيها ب 1 دولار

100.000 يعنى ستاندر والنقطه هتلاقيها ب 10 دولا

والمربع اللى انا حاطت عليه مربع احمر ده تحدد منه الرافعه الماليه بتاعتك

وطبعا تعرف قيمه النقطه من Pip Value

بس يا سيدى اى اوامر تانيه


يا سلاااااااااام عليك انا كده بقى اتاجر وانا مطمن ومريح بالى على الأخر ومخافش منك

يا عم وانا كنت بخوف ماحنا اتفقنا خلاص
انتو اللى بتبعتولى الدعوه

لا ياعم لو جاتلك منى دعوه بعد كده يبقى ليك الكلام

لما نشوف , بس فى حاجه مهمه عاوز اقولهالك انت وزمايلك

اتفضل يا كول باش يا معلم كول استاذ كول

لو عرفت تتغلب على الطمع وتقدر تزود صبرك وتطبق اللى قولتلك عليه ده يبقى كده انت فى امااااااااااااااااان
ونقطه تانيه مهمه جدا

متسمحش لنفس تخسر اكتر من 30 % من راس مال ورى بعض

يعنى ايه ؟

يعنى لو الطريقه اللى انت شغال بيها ضربت منك استوب لوز 3 مرات ورى بعض وقف الشغل وراجع نفسك وراجع طريقتك لحد ما تتقنها على الأقل 20 مرة ورى بعض من غير ما تضرب منك استوب لوز

كده انت فى امان الأمااااااااااااااااااااااااااان

روح يا شيخ إلهى يوقعك فى محفظه البنك الدولى للصهاينه والكفره يا رب , قول آمين

آمين , عاوز منى حاجه تانيه

لا استغنى يا حبيبى طبعاً

عموما لو عزت حاجه هبقى اسأل زميالى بقى انا كده اودعك وداع الأخره إن شاء الله

يلا سلام

سلام

ـــــــــــــــــــــــــــــــــ

بس يا اخوانى الأحبه وده كان حوارى مع المعلم كول ويارب يكون الراجل قال حاجه افادتكو

وإن احاجتو اى حاجه انا حااااااضر

جزاكم الله كل الخير

[Mr.Lonely]

الله عليك ..

بصراحة موضوع جميل جدا...

ومفيد بالطبع..

جزاك الله كل خير

تحياتي وودي وتقديري

[MoOoDy]

موضوع تحفه و طريقته ممتازه
تسلم

[رنا]

يعطيك العافية على الاسلوب الي عندك في كتابت الحوار البسيط والواضح

[abufahad]

الله يطول عمرك ياعمرو ويجزاك الله كل خير

اعتقد المارجن كول كان منوم مغناطيسي عشان كذا طلع كل اسراره وفضح نفسه وياويله وياسواد ليله من الشركات والبنوك المركزية راح يضربوه ضرب ماخذه حمار في مطلع.


معلومات من درر لمن تقيد بها ... حفظك الله ياعمرو

[4539910]

درس مبسط فى ادارة رأس المال نتمنى من الاخوة المبتدئين يدرسوة
يعطيك العافية

[أبوسلطان]

رااااااااااااااااااااااااااااااااااااااااااااااااا ئع

[ehabbb]

عرض رائع و حوار مفيد ... جزاك الله كل خير يا عمرو

دا المارجن كول طلع مش شرير قوى

مرفق ترجمه للحوار على ملف اكسيل لسرعه الحساب

[عادل22]

السلام عليكم
شكرا أخى عمرو على هذه المعلومات القيمة و المفيدة
و أسلوب ممتاز و شيق فى الكتابة
( فعلا ده و لا أكبر سينارست فى السينما )
موفق دائما يارب و الله يبعد علينا المارجن كول أجمعين

[Amro]

الله عليك ..

بصراحة موضوع جميل جدا...

ومفيد بالطبع..

جزاك الله كل خير

تحياتي وودي وتقديري

وإياك اخى الحبيب وبارك الله فيك

اتمنى انك تكون استفدت فعلاً

موضوع تحفه و طريقته ممتازه
تسلم

بارك الله فيك اخى الحبيب وجزاك الله خيراً

يعطيك العافية على الاسلوب الي عندك في كتابت الحوار البسيط والواضح

بار الله فيك اخى الحبيب
وهذا من فضل ربى والحمد لله

الله يطول عمرك ياعمرو ويجزاك الله كل خير

اعتقد المارجن كول كان منوم مغناطيسي عشان كذا طلع كل اسراره وفضح نفسه وياويله وياسواد ليله من الشركات والبنوك المركزية راح يضربوه ضرب ماخذه حمار في مطلع.


معلومات من درر لمن تقيد بها ... حفظك الله ياعمرو

ويطولى عمرك اخى الحبيب ويبارك فيك

تقريباً هو كان متخدر لوحده

درس مبسط فى ادارة رأس المال نتمنى من الاخوة المبتدئين يدرسوة

يعطيك العافية

الله يعافيك اخى الحبيب
واتمنى ان يستفيد منه الجميع إن شاء الله

رااااااااااااااااااااااااااااااااااااااااااااااااا ئع

انت اللى رائع اخى الحبيب
ربى يباركلى فيك ويجزاك كل الخير

عرض رائع و حوار مفيد ... جزاك الله كل خير يا عمرو

دا المارجن كول طلع مش شرير قوى

مرفق ترجمه للحوار على ملف اكسيل لسرعه الحساب

وإياك اخى الحبيب ويبارك فيك ربى إن شاء الله

هو سهل فعلاً بس محتاج حرص بردو لا يغرك الكلام اللى قاله

[njjar]

السلام عليكم
بارك الله الله فيك

كان حوار ممتع

[nart]

بارك الله بيك اخي عمرو فعلا طريقه مشوقه للتعليم --- وهي من احد طرق التعليم الاليكتروني الحديث

( الحوار المباشر)

[المدارج]

بارك الله فيك
وجمعة مباركة ياباشا

[محمود علي]

موضوع فيه جهد واضح فعلا
جزاك الله كل خير اخي العزيز

[S@IF]

شكرا لك اخي العزيز