الموت صاحب مزاج
لابياخد الخاين
ولا الوحش
ولا اللى عامل للوطن عِلِّة !!
وأديه فى يومين اتنين
أخد مننا نجم
وتنَّا كمان بمانديلا؟ !!
طب ليه يا موت كده
تسحب من ضلوعنا الفدا
وتاخد النور من عينينه
وتاخد الشمس
أخدة مش هىَّ
وف يومين اتنين
تسرق مننا بسمة الغلابة
وصوت الحق
والحرية
ورايات النضال الحق
والله يا موت مالك حق
طب سبت إيه لأفريقية
وأرضها السمرا؟!
سبت إيه للغلابة
وسط السقيع والجوع
وقسوة الأيام
وتجار الكدب
وعشاق الرجوع للخلف؟!
لا مؤاخذة يا موت
مش كنت أخدت الخاين الكداب الجاسوس الجلف..
وسبت نجم شويتين
يسندنا بكلامه السيف
أو كنت سبت مانديلا
يعيش وسطينا رمز للأحرار
مش تاجر
ولا ضيف
مش كنت سبتهم
لحد مانعدِّى الشتا
ونعيش حلاوة الصيف؟
ويرقصوا لاتنين معانا وسط الميدان
ووسط عشاقهم من الغلابة
وسط الدايرة
والشلة
لا مؤاخذة ياموت
إزاى فى يومين اتنين
تحرمنا من نجم
ومانديلا؟ !
وتسيب لنا ياموت
فى جسد الوطن علة!!
لا يهمهم عدل
ولا حرية
ولا غلابة
ولا أرض محتلة !!
لا مؤاخذة يا موت
أنت المرة دى كنت قاسى
وإحنا زعلانين منك
ومش مسامحينك..