تجربتى الشخصية مع الخيارات الثنائية Binary Options
صفحة 1 من 8 1234567 ... الأخيرةالأخيرة
النتائج 1 إلى 15 من 107
  1. #1
    تاريخ التسجيل
    Oct 2012
    الإقامة
    مصر
    المشاركات
    106

    افتراضي تجربتى الشخصية مع الخيارات الثنائية Binary Options

    بسم الله الرحمن الرحمن
    أهلا بكم أحبائى فى مقر ذكرياتى
    من أول الفوركس و حتى الخيارات الثنائية
    حوالى عشر سنوات من الكفاح، مثلكم جميعا
    مثل أى شاب بدأت التفكير بالمال و الثراء و حتى حد الكفاية فكرت فيه، حتى أكون نفسى و أكون رجل أعمال المستقبل!
    بداية القصة:
    رسالة فى إيميل من شركة فوركس فيها رابط تحميل كتاب عن التجارة بالهامش
    كلكم عارفينه ... كتاب الفوركس للمبتدئين ...
    ساعتها كانت الدنيا مظلمة فى عينى و كل همى الحصول على المال، لكن بوسيلة محترمة طبعا
    أول ما نزلت الكتاب و هاتك يا قراية، 24 ساعة فى الـ24 ساعة
    مرة و اتنين و تلاتة و أعيد و أزيد فى الكتاب لحد ما قربت احفظه زى القرءان، سبحان الله ... متهيألى فيه سر فى القدرة العجيبة على السهر اللى جاتلى بسبب الكتاب ده!

    المهم من قبل ما أخلص الكتاب طبعا على طول سجلت حساب تجريبى فى شركة سويسرية كبيرة .. دوكاسكوبى
    و كان البرنامج جافا و أنا مش فاهم فيه حاجة خالص ... بس فتحت الحساب عشان احس إنى بقيت مستثمر و هلعب فى الفلوس ......

    بعد ما فتحت الحساب على طول جانى اتصال من خدمة العملا عندهم، و طبعا كان الحديث باللغة الإنجليزية
    خدمة العملاء العرب كانت فى طور البحث أيامها، و كان نادرا لما تلاقى خدمة عملاء عرب فى أى وسيط، باستثناء شركتين أو تلاتة و كانوا صهاينة، حبايبنا و شايلين همنا !!!

    و هكذا بدأت أول خطواتى فى حياتى الاستثمارية بحساب تجريبى على أسوأ منصات ممكن تتخيلوها، لكن المفاجأة إنى ربحت فيه!
    و توالى فتح الحسابات التجريبية فى أكثر من شركة، و توالت اتصالات خدمة العملاء و كأنى رجل أعمال عربى كبير .....
    نسيت أقول لكم إن شركة دوكاسكوبى كانت لا تقبل حسابات اقل من 25000 دولار ... و دلوقت سمعت إنها بتقبل 250 دولار .. ياه اكنت أيام ههههه

    المهم.... و قررت افتح حسابى الحقيقى ....
    بعد حوالى 4 شهور بحث و قراءة و تجريب و لا أنسى إنى فى خلال بحثى عن منتديات عربية للفوركس لم أجد سوى الخليج للعملات و المتداول العربى
    و كان إخواننا كلهم أعضاء فى الخليج للعملات قبل ما يعملوا المتداول العربى
    و بدأت الرحلة فى المتداول العربى قراءة و متابعة و جلسات حوار و مناقشة
    و مع حسابى الحقيقى الأول .. طبعا كان صغير مثل أى شاب فى بداية حياته .. وفرت فلوس الحساب من كل حتة .. أنتم فاهمين طبعا!!!!
    و كان الحساب 150 دولار فى شركة قبرصية مش هاقول اسمها عشان أول ما بدأوا كانوا نصابين علنى ، و دلوقت بقوا نصابين سبور
    كانت مغمورة أول ما فتحت عندهم
    السبب غنى فتحت عندهم حساب إنى كنت بدور على شرطين: الأول... تقبل رصيد صغير .. و دى كانت بتقبل 50 دولار للحساب ..
    و التانى .. تكون الرافعة كبيرة 500:1 و فعلا لاقيتها عندهم
    لكن ماكنتش ببص على الثقة بشكل كبير و لا موضوع المارقبة المالية و التسجيل فى منظمات رقابية و لا هيئات رقابة ... كل الكلام ده بقيت ادقق فيه بعد ما نصبو علىً
    دبلرت الحساب فى يومين ... صفقة بلوط مينى عملت حاجة و سبعين دولار فى ساعتين لدرجة و التانية عدت ال200 نقطة و لم يغلقوها ... و طبعا منصتهم صفحة ويب قمة فى الانحطاط، علقت و هنجت الكمبيوتر و قرفتنى عشان مايقفلوش الصفقة هههه
    كلمتهم فى التليفون يقفلوا الصفقة و قلتلهم أنتم عاوزين تخسرونى شكلكم كدا ....
    و راحوا قافلين الصفقة على ربح حاجة و سبعين نقطة بعد ما السعر ارتد لفوق تانى، الصفقة كانت بيع

    أنا بحكيلكم الكلام ده ليه؟؟؟؟
    لأن هو ده نفس السيناريو اللى بيحصل مع كل واحد جديد فى هذا السوق
    تخبط فى الشركات و تخبط فيك

    تتهمهم و يتهموك ... و فى النهاية أنت الخسران لأنهم دايما كسبانين .. خسرت كسبت هم الكسبانين فى كل الحالات

    لسة القصة ماانتهتش
    و بدأت التفاعل فى المنتديات العربية خاصة المتداول العربى و الخليج و بدأت السماء تمطر دولارات .. كيييف؟؟؟

    نسيت أول لكم إن حسابى ده اتصفر مرتين
    الأولى الشركة قفلت لى صفقة على سعر لم يوجد فى أى برنامج و لا مزود أسعار فى العالم و واجهتهم، لأن الفرق كان حوالى 20 نقطة مش نقطتين و الا تلاتة
    فرجعوا و رجعوا الحساب كما كان و لغوا الربح بتاع الصفقة وش كدا

    و التانية منى أنا لأن لما فقدت الأمل إنى ممكن أسحب الفلوس دى روحت مغامر بيها فول مارجن و بالسلامة اتصفر الحساب .....

    و بدأت التداول فى حسابات كبيرة شوية من 12000 أول حساب كبير أتداول به حتى 57000 تانى حساب اتداول به و 15000 و 19000 و 7000 و 3000 و 1500 و كتير رميته فى هذا السوق ....
    الأرقام حقيقية بالترتيب على فكرة

    جربت جميع الشركات اللى ممكن تعرفوها و اللى ماتعرفوها
    الكبيرة و الصغيرة، العريقة و الحديثة، اللى فيها عربى و اللى ما فيها
    كلهم لا يهمهم سوى الربح منك لأنهم مرتبطين بضرائب يا حبيبى و ما أدراك بضرائب البروكرز و مرتبات موظفين و عمولات وكلاء و و و و و و ..... ماتعدش
    كل ده لا يسمح لهم يتهاونوا فى سنت واحد ياخدوه منك أو من وراك
    فحكاية إن الشركة فى صفك و مش عارف ايه انساها خالص
    الشركات كلها فى صف نفسها و موقفها المالى فقط
    العالم لا يعرف سوى لغة المال و المصالح فقط

    فيه شركات بتديك همولة على تخسير الزباين !!!
    و فيه شركات تديك على الربح!!!
    كله موجود
    الأولانية تعطيك عمولة على كل حساب تخسره و أنت مدير حسابات ممكن توصل العمولة 50% من الحساب
    يفضل الحساب داخل الشركة لا يشوف سوق و لا يشمه و أنت كمدير حساب تحط عليه صفقات كلها خسرانة و فى ظرف شهر أو أسبوع أو اتين تصفره و تاخد نسبتك
    تقوللى ليه الشركة مابتعملش من نفسها كده مباشر مع العميل؟
    أقولك لأنها لازم تظهر إنها نزيهة و إنها شريفة و إنك أنت اللى أسأت اختيار مدير حسابك و طبعا مدير الحساب مش هتشوف وشه بعد ما يخسرك، و فلوسك يقسموها مع بعض هههه

    أما الشركات المحترمة، و دول نادرين جدا جدا ... مش عاوز أقول مش موجودين دلوقت
    فدول محايدين لا معك و لا ضدك و هو المطلوب ... سيبنى أتاجر يا اكسب يا أخسر بدون ما تتدخل فى شئ

    مش عارف انا عمال أحود بكم يمين و شمال ليه
    خلينا فى موضوعنا
    بعد حوالى 8 سنين فوركس أخدت القرار .....


    لا فوركس بعد اليوم

    ما هو أنا لو قعدت فى السوق ده هفضل كده محلك سر، ربح و خسارة ، خسارة و ربح
    مفيش جديد

    أى نعم عملت فلوس كتير منه لم اكن أحلم بها ... لكن أن زهقت من القاعدة أمام الجهاز و المتابعة و حركات الشركات و المؤشرات و و و و و و

    قرارى أخدته بعد ما وقعت عينى على موضوع عن الخيارات OPTIONS فى منتدى عربى مجاور ... بلاش أذكر اسمه احتراما لقواعد المتداول العربى الصارمة !

    المهم أخدت أقرأ و أقرا كل شئ عن الأوبشنز

    و فى النهاية قررت


    لا أوبشنز بعد اليوم

    ما هو نفس المشكلة، رافعة و مارجن و خسارة تصفر الحساب
    أنا عاوز حاجة تحافظ على مالى

    مفيش غير الأسهم
    و بدأت افتح حساب أسهم أمريكية
    فلوسى فى السهم، خسر هسيبه لحد ما يطلع تانى
    كسب هبيعه و خلاص

    لكن تغيرت نظرتى تماما للخيارات بعد ما عرفت نوع جديد اسمه الخيارات الثنائية Binary Options
    و لحسن الحظ كانت لسة جديدة و كتير من العرب مايعرفوهاش
    هتقولولى ليه اعتبرتها من حسن الحظ؟
    اقولكم لأنى بصراحة بتشائم من أى حاجة يدخل فيها لاعرب و يحطوا مناخرهم فيها
    على طول تبوظ و تفقد رونقها و مصداقيتها حتى
    و ادى انتم شايفين الفوركس اللى كان اقل حساب فيه ب20 و 30 ألف اصبح زى اللوبيا و الفول و الطعمية بشلن و خمسة قروش ممكن تفتح حساب .... هو دا استثمار؟؟؟!!!! دا استحمار و استهبال و لا سوق الخضار
    هو فيه بورصة بتفتح فيها حساب ب30 او 40 ريال يا عالم ؟؟؟!!!!!

    كل كم واحد راح عامل موقع و اشترى منصة و يقولك فتح حساب بخمسة و عشرة دولار
    و طبعا هم رايحين له رايحين لا محالة
    و خمسة منك و خمسة منى و يصبح مليونير و نصبح احنا حافيينير ههههه

    لما شوفت الخيارات الثنائية بصراحة أعجبتنى كثيرا
    لأنها محددة و فيها تخطيط و لا مجال فيها للتحايل

    أنت بتحدد حجم الخسارة اللى ممكن تتحمله، أو نسبة دخولك و اتجاهك و تضع الأمر
    إما ربح أو خسارة تتحملها
    و طبعا مش كل الصفقات هتخسرها و إلا بصراحة اكيد انت لا تصلح لهذا السوق و لا غيره
    يعنى باختصار إدارة مالية صارمة من البداية
    هتقولى ما هو أنا ممكن أدخل بنسب كبيرة و اصفر الحساب .. أقولك صح كلامك بس دا يعنى إنك بعيد تماما عن فهم إدارة راس المال و إنك مقامر بفلوسك مش تاجر و لازم هتخسر

    طبعا لم ادخل البينارى اوبشنز بفلوس حقيقية على طول كدا
    لازم أتستت حلوة أتستت دى .. كل كلامنا أصبح مزيكا .. أقصد لازم أختبر و أجرب الشركات و المنصات خاصة إنها شركات اول مرة أتعامل معها و منصات جديدة اغلبها غن لم يكن كلها ويب، يعنى صفحة نت مش برامج على الجهاز

    و بدأت الرحلة مع مجموعة شركات، و هاتك يا اكتشافات فى النصب و شغل الأونطة .. إذا كان ده على التجريبى أمال الحقيقى هيكون ايه؟! ارمى يا عم
    و صفصفت على شركتين تلاتة هم اللى فى السوق ده
    و الباقى .... لعيبة!!!

    مجال لعبهم عليك ايه؟
    - يحطوا اسبريد على الصفقة رغم إنهم بيقولوا لا يوجد اسبريد، و لو بتشتغل شورت ترم يا حبيبى انسى المكسب مع الاسبريد، لأن واحد بيب بتضيع الصفقة
    - كتير منهم بيعمل حاجة اسمها Calculating بعد الصفقة ما بتخلص، و هنا يلعبوا عليك فى انهم يطولوا مدة الحساب دى دقيقة أو دقيقتين و لو الصفقة بعد ما قفلت رجعت فوق أو تحت السعر اللى انت كسبان منه سواء شراء أو بيع يروحوا مخسرينك الصفقة، و ياما ناس خسرت بسبب اللعبة دى
    - و شركات تمنعك من قفل الصفقة يدوى بحجة إنك عملت ريفريش للصفحة أو دخلت من متصفح تانى
    و شغلات كتيرة ممكن تأثر عليك
    هتقوللى ما هو كدا فيها لعب اهو زى الفوركس و غيره
    أقولك لا طبعا ... كل اللعب ده لا يساوى شئ مع برنامج الميتاتريدر و البلج ان بتاعته عند الشركات اللى بتعطلك فى الفتح و القفل و ترحك السعر عليك و تزوده و الريكوت و بلاوى تانية كتيرة
    و اللعب ده كله موجود فى شركات معروفة ومكشوفة و لا مصداقية لها فى السوق اساسا
    عندى سجل لها سأحتفظ به و اللى عاوز يعرف الشركات النصابة يبعتلى خاص عشان الفضايح و هيعملولنا فيها شرفا و تلاقى مندوبهم هيدخل على الموضوع يقولك الحكايو الرواية و مش عارف ايه ..
    اللى عاوز حاجة فى الشركات الخاص موجود

    و أحلى حاجة فى البينارى اوشنز إنك بأقل الأدوات تمارس تجارتك بكل سهولة
    تحليل فنى بسيط، استراتيجية مربحة
    تحديد نسبة الدخول
    وضع الصفقة
    كل ده فى ثوانى بيتم و تخلص صفقتك
    طبعا عندهم حاجة حلوة زى الاسكالبينج و دى اسمها شورت ترم
    و الشورت ترم ده بيمتد من 60 ثانية إلى 5 دقائق فى بعض الشركات

    يعنى تعمل الأوردر و 60 ثانية تربح 70% من المبلغ المستثمر
    يعنى تعمل صفقة بـ100 دولار كول.. شرا يعنى .بعد 60 ثانية إذا ربحت تكسب 70 دولار
    و دى ياما عملت منها فلوس
    حطيت حساب 10000 و فى 3 أسابيع عملت منه 24000 بالشورت ترم ده

    المهم .. أكمل بقية التجربة:::
    هتقولوا ازاى فتحت حساب تجريبى و أغلب الشركات دى مش بيسمح بفتح حسابات تجريبية إلا بعدشحن الرصيد؟
    الإجابة ... فيه عند الشركات دى نظام اسمه NO deposit bonus و ده بيسمح للعميل إنه يتاجر فى مبلغ بونص الشركة بتعطيه لك من غير ما تدفع حاجة بشرط انك لو ربحت لا تسحب الأرباح حتى تشحن الرصيد بنفس قيمة مبلغ البونص اللى عملته لك الشركة
    و طبعا ده مشاكله كتيرة جدا جدا جدا
    أولها إنهم بيشترطوا عليك تعمل عمليات تدول بحجم 20 او 30 ضعف البونص
    و تانيها إن كتير من الشركات اللى بتعمل الموضوع ده إما وهمية و نصابة او غير مراقبة و بالتالى تراوغك فى سحب الأرباح لدرجة ان بعضهم ممكن يقولك هنديك فلوسك اللى حطتها بس من غير ارباح و بالسلامة !
    و تالتها انك مش سوبر مان عشان تعمل 20 ضعف فى شهور أو تقعد متسمر أمام الجهاز لحد ما تعمل النسبة دى و كتير بيفشلوا طبعا

    أنا عملت 3900 يورو من 100 يورو فى حوالى شهرين فى موقع من هذه المواقع و طلبت السحب بعد ما أودعت حوالى 150 يورو ... و لا حياة لمن تنادى حتى الآن .... ههههه
    وهاتك ايميلات و شات و كل مرة يكلمونى و كان أول مرة يشوفونى ... شغل نصب على كيفكم ....

    بعد ما خلصت رحلة التجريب دى على كذا شركة كبيرة و صغيرة ، موقع ومؤسسة حقيقية
    فتحت حساب فى شركة كبيرة عريقة فى المجال و بالطبع البداية كانت بمبلغ بسيط للحذر طبعا
    ثم توالت النجاحات فى هذا المجال الرائع حقا

    بالمناسبة أنا سألت و بحثت عن شرعية البينارى أوبشن أو شرعية الخيارات الثنائية
    و وجدت تضارب كبير و كلام كتير
    حرام و حلال
    لدرجة إنى توقفت فترة عن العمل فيها
    لكن بعد فترة اتضح لى ان الموضوع فى مرحلة مثل الفوركس
    فاكرين لما كانوا بيقولوا على الفوركس قمار و تجارة عملة و حرام؟
    نفس الشئ فى الخيارات الثنائية
    و ده اللى خلانى أرجع للتداول فيها تانى

    و روحت فتحت حساب فى شركة جديدة كبيرة
    كانت و مازالت وسيط فوركس كبير و مشهور و قديم فى السوق و أخيرا أضافت البينارى أوبشن لحساباتها
    لكن المشكلة كانت فى البنك اللى رفض التحويل لهم بحجة منع التحويل للبروكرز حاليا بأوامر من البنك المركزى عشان خايفين من نقص احتياطى الدولار، و بيقولك البلد مستقرة و خايفين من تحويل 500 دولار برة ههههه
    مش موضوعنا
    أنا عندى حسابات مفتوحة اصلا و شغال فيها و لله الحمد

    بصراحة يا شباب المجال ده ممتع و مربح لقصى درجة ممكن تتخيلوها

    كل اللى هتحتاجه:
    استراتيجية محترمة
    أسلوب تداول تتبعه
    خطة مالية
    ربح بلا حدود إن شاء الله

    قريب هنزل موضوع عن استراتيجية مربحة جدا خاصة فى الشورت ترم
    و صور من كشوف الحسابات بربحها
    و فيديوهات الصفقات الربحانة
    و لا يهمكم !!!

    بس امانة لما تربحوا بها لا تنسونى من دعائكم

    اخوكم ابوالعبادلة

  2. #2
    تاريخ التسجيل
    Aug 2012
    الإقامة
    المغرب
    المشاركات
    105

    افتراضي

    شكرا لك على الموضوع وأتمنى إننا نتعرف أكثر على هذا الميدان الجديد خصوصا انه مليان بالشركات النصابة إسرائيلية ولا ماعرفت اشنو.
    واصل أخي الكريم

  3. #3
    تاريخ التسجيل
    Oct 2011
    المشاركات
    151

    افتراضي

    بالتوفيق اخي وكل النجاح ان شاء الله
    البينري هو المستقبل ممكن الشركات الموثوقة اخي

  4. #4
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    اقتباس المشاركة الأصلية كتبت بواسطة ADIL FX مشاهدة المشاركة
    شكرا لك على الموضوع وأتمنى إننا نتعرف أكثر على هذا الميدان الجديد خصوصا انه مليان بالشركات النصابة إسرائيلية ولا ماعرفت اشنو.
    واصل أخي الكريم
    مرحبا أخى
    إن شاء الله يكون لنا مواضيع و لقاءات كثيرة حول البينارى اوبشن و افضل شركاته
    صدقت فعلا أغلب شركاته إسرائيلية صراحة أو بالوكالة فى بلاد اخرى

  5. #5
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    اقتباس المشاركة الأصلية كتبت بواسطة mokhtar26 مشاهدة المشاركة
    بالتوفيق اخي وكل النجاح ان شاء الله
    البينري هو المستقبل ممكن الشركات الموثوقة اخي
    جزاك الله خيرا و ان شاء الله النجاح يكون حليفنا جميعا
    الشركات الموثوقة كثيرة و سنذكرها كثيرا لكن ما أخشاه هو إننا ندخل فى جدل عقيم سواء مع المبتدئين الذين يجادلون فى أى شئ بلا دراية
    أو مع الوكلاء اللى بيقاتلوا عشان عمولتهم
    أو مع مندوبى الشركات اللى هينطولنا فى مواضيعنا لو جبنا سيرة شركاتهم
    تحياتى لك
    آخر تعديل بواسطة مراقب المنتدى ، 06-10-2013 الساعة 01:21 PM

  6. #6
    تاريخ التسجيل
    Jan 2012
    الإقامة
    مصر
    المشاركات
    554

    افتراضي

    بالتوفيق إن شاء الله ، بس من رأيى أهم حاجة هو الناحية الشرعية ، بس على رأيك هو الموضوع محتاج وقت على ما الناس تعرف البينارى أوبشن ويشرحه صح علشان يقدر ياخد رأى الشرع صح .
    وياريت بعد إذنك تضع هنا الشركات انت بتقول عليها نصابة ملف مرفق لأنى بقالى فترة بدور على شركة اسبريدها أقل ما يكون ، وخايف ادبس فى شركة من اياهم
    آخر تعديل بواسطة مراقب المنتدى ، 06-10-2013 الساعة 01:24 PM

  7. #7
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    اقتباس المشاركة الأصلية كتبت بواسطة hany.kashef مشاهدة المشاركة
    بالتوفيق إن شاء الله ، بس من رأيى أهم حاجة هو الناحية الشرعية ، بس على رأيك هو الموضوع محتاج وقت على ما الناس تعرف البينارى أوبشن ويشرحه صح علشان يقدر ياخد رأى الشرع صح .
    وياريت بعد إذنك تضع هنا الشركات انت بتقول عليها نصابة ،او تحطها هنا فى الموضع فى ملف مرفق لأنى بقالى فترة بدور على شركة اسبريدها أقل ما يكون ، وخايف ادبس فى شركة من اياهم
    هو فعلا جديد و هياخد شوية زى الفوركس على بال ما نعرف حكمه الصح ايه
    و إن شاء الله أنزل الشركات اللى تعاملت معها
    النصابة و الكويسة
    و على فكرة الحكم ده من خلال تعامل شخصى و مجموعة عملاء عرب عرفتهم فى نفس الشركات دى
    و انتم هتشوفوه من خلال التعامل معهم

    تحياتى و شكرى لشخصك الكريم
    آخر تعديل بواسطة مراقب المنتدى ، 06-10-2013 الساعة 01:25 PM

  8. #8
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    أنا لاحظت إن كل الناس مركزين على معرفة الشركات النصابة
    هقولكم بعض الحاجات اللى تعرف منها الشركات النصابة من غير مساعدة
    ---------------------------------------
    كيف تعرف الوسيط الكذاب النصاب أو المخادع فى الخيارات الثنائية؟
    ------
    أولا: تلاقى لهم موقع إليكترونى و مفيش عناوين مقرات او تليفونات مكاتب
    ثانيا: تلاقى لهم شات لايف و مفيش أى ارقام تليفونات لخدمة العملاء
    ثالثا: تلاقى نموذج اتصال فقط من غير أى عنوان أرضى أو رقم تليفون فى صفحة الاتصال
    رابعا: تفتح الحساب من غير ما حد يكلمك و لا يقولك أنت عملت ايه و بكتيره ايميل يوصلك و فيه تفاصيل الإيداع
    خامسا: لا يطالبونك باى اوراق فى بداية فتح الحساب و يكلموك كتير على طرق الإيداع و رقم فيزتك و ضرورة الإيداع لتفعيل حسابك
    سادسا: فجاة تلاقيك خسرت صفقة و مفيش فرق عن السعر اللى دخلت به يردوا عليك إنك معملتش حساب الاسبريد أو إنك خسرت بفرق نقطة أو اتنين و هم دول الاسبريد، ساعتها تعرف غنهم حطوا اسبريد عشان يخسروك لأن مفيش اسبريد فى البينارى اصلا و كلهم فى مواقعهم بيقولوا كده
    سابعا: لما تضارب بمبلغ كبير فى صفقة واحدة تخسره بفرق نقطة و لما تتاجر بمبلغ صغير تكسب بنفس الفرق .. هتاخدوا بالكم منها لما تتكرر معكم
    ثامنا: لما تطلب السحب يتلككوا بحجة إنك مخلصتش اوراقك و لازم تبعتها و لما تبعتها يقولولك الترجمة و لازم تكون معتمدة و فجأة تلاقى نفسك مش عارف تثبت إنك صاحب الحساب!
    تاسعا: يعلنوا عن بونص ضخم و تودع و لما تطلب تسحب يقولك فاضلك 20 ضعف لحجم البونص تداول و كل ما تحسب يطلع انك خلصت و هم يقولولك لسة بدرى!
    عاشرا: راجع اى بى الشركة و السرفرات بتاعتهم هتلاقى اغلبها من مكان واحد و ملاكها هم ملاك أغلب الشركات فى المجال ده و لا توجد بيانات عنهم كثيرة
    وأغلب الشركات أو المواقع دى ملك شركات نت أو تصميم مواقع يعنى قاعدين يصمموا مواقع للنصب و جذب الزباين و متخصصين فى كده
    و كمان هتلاقى ملاكها شركات مجهولة أو غيير مشهورة و مغمورة و لا يعرف لها نشاط واضح
    حادى عشر: أغلب النصابين غير مرخص و لا مسجل فى اى مكان و لا حتى فى مالطة!
    و فيه نصابين مسجلين و مراقبين كمان!

    دى نبذة على السريع للى عاوز يعرف و يستكشف الشركات النصابة فى البينارى اوبشنز

  9. #9
    تاريخ التسجيل
    Jan 2012
    المشاركات
    122

    افتراضي

    بارك الله فيك أخي المحترم على الطرح وافادة اخوانك
    وبانتظارك
    باسم الله على بركة الله

  10. #10
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    اقتباس المشاركة الأصلية كتبت بواسطة love GOD مشاهدة المشاركة
    بارك الله فيك أخي المحترم على الطرح وافادة اخوانك
    وبانتظارك
    باسم الله على بركة الله
    أشكرك على كلماتك الطيبة
    و إن شاء الله ننطلق بلا حدود

    طموحنا كبير و هدفنا اكبر

    و بصراحة بقول لكل اللى زهق من الفوركس جرب البينارى و ادعيلى

  11. #11
    تاريخ التسجيل
    Apr 2013
    الإقامة
    مصر
    المشاركات
    398

    افتراضي

    تجارة الخيارات الثنائية مخالف للدين الاسلامي .. اقرأ الفتوى بالكامل .. أسأل الله ان يرزقنا الحلال و يجنبنا الحرام ..
    اسف لو وضع اللينك مخالف .. بس دة للأهمية و الافادة ...

    fatwa.islamweb.net/fatwa/index.php?page=showfatwa&Option=FatwaId&Id=167993

  12. #12
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    الإخوة بيبعتوا رسايل على الخاص و أنا حتى الآن لا أملك صلاحية الرد إلا بعد 50 مشاركة
    و ياريت لو السؤال ممكن نستفيد منه كلنا ممكن نكتبه هنا فى الموضوع عشان الفايدة تعم

    بالمناسبة جانى سؤال من أخ كريم بيقول:
    اولا اتمنى لك التوفيق مع الخيارات الثنائية ......

    ارجو منك عزيزي ترشيح مجموعة شركات للفوركس للاختيار من بينها الانسب لي بما انك عندك خبرة بالشركات .... علما بأن مياغ الايداع حيكون ...... .

    اشكرك مرة اخرى لأهتمامك وسامحني لو اتقلت عليك . تحياتي وتقديري
    بصراحة سؤال مهم و فى نفس الوقت محرج
    فالمنتدى يتعامل مع شركات محترمة حقيقة
    و هناك شركات أخرى قوية فى المجال
    السوق مليان
    و كل وسيط له مميزات و عيوب
    و مفيش شركة خالية من العيوب
    إما اسبريد تعبان و إما خدمة عملاء تعبانة
    يا إما تنفيذ تعبان
    المهم لا يوجد شركة فيها كل المميزات ... أبدا لن تجدها ... و لو حد وجدها يقوللى !
    و طبعا عندك مجموعة شركات سويسرية كبيرة تحولت لبنوك دلوقت .. يعنى الرقابة عليها بقت حديد و مفيش لعب
    عطيتك خطوط عريضة و مش هذكر اسماء إلا لو رديت على رسالتك عشان محدش يقول بنسوق لحد
    احنا مش صغيرين للكلام الفارغ ده

    تحياتى

  13. #13
    تاريخ التسجيل
    Oct 2012
    الإقامة
    مصر
    المشاركات
    106

    افتراضي

    تكملة للإجابة على سؤال الأخ .... على فكرة أنا شخصيا بتعامل مع وسيط فوركس كثير من العرب فى المنتديات بيشتموا فيه و ياما قالوا كلام عليه
    لكن تخيلوا و لا كلمة من كلامهم لاقيتها فيه و سحب تمام و صفقات تمام و لا هفوة
    عارفين ليه؟
    لأن أغلب اللى بيتكلموا عليه وكلاء لشركات تانية و هكذا تدور عجلة التسويق !!!
    تحياتى

  14. #14
    تاريخ التسجيل
    Apr 2013
    الإقامة
    مصر
    المشاركات
    398

    افتراضي

    تجارة الخيارات الثنائية مخالف للدين الاسلامي .. اقرأ الفتوى بالكامل .. أسأل الله ان يرزقنا الحلال و يجنبنا الحرام ..
    اسف لو وضع اللينك مخالف .. بس دة للأهمية و الافادة ...

    fatwa.islamweb.net/fatwa/index.php?page=showfatwa&Option=FatwaId&Id=167993

  15. #15
    تاريخ التسجيل
    Feb 2009
    الإقامة
    الولايات المتحدة
    العمر
    32
    المشاركات
    2,962

    افتراضي

    فى انتظار فيدوهات الشرح لعلها تكمل ما بداته انا من شهر تقريبا فى موضوعى و الى هكمله برضو بس لعلى استفيد منك ف حاجة جديدة تضيف ال ما املكه , فى الانتظار ان شاء الله و دا لينك موضوعى

    http://forum.arabictrader.com/t179197.html

صفحة 1 من 8 1234567 ... الأخيرةالأخيرة