في الصباح وفي أحد مدن المملكه العربيه السعوديه في مدينة الرياض بالتحديد ..
الجو بارد جداً والسحب ممتلئه تستعد لأهطال كميات كبيره من المياه العذبه
طلاب المدارس يكرهون الذهاب للمدرسه وتقودهم خطوات الملل الى مقاعد الدراسه الممله ..
صوت الشاحنات وزحمة السيارات كلها تجمعت بصباح يوم جديد ..
يوم السبت ..سنة 1405 للهجره ..

راحت لغرفتها بسرعه وهي تبعد كل شي امامها وصوتها واصل للصاله السفليه الكبيره ..

في بيت ام سلطان ماتعودو هالنوع من الصراخ والاصوات المزعجه طول عمره هالبيت اللي عدد افراده قليل ينعم بالهدوء والسكينه والاستقرار ..

لحقتها للغرفه بسرعه : انتي شفيك تصارخين ابوك صحى على صوتك
هذا كان صوت ام سلطان امرأه قويه عرفت وشلون تمشي عيالها على العجين مايلخبطونه حياتهم نظاميه عندها 3 اولاد وبنتين .. الاولاد ماشاء الله مراكزهم عاليه .. اكبرهم سلطان مقاول والاوسط محمد مهندس زراعي والصغير فهد باقي يدرس بالثانويه
والبنات وحده مدرسه وهي نوره الكبيره والصغيره ساره وصلت للمتوسطه وماكملت حتى تعليمها متمرده من يوم انها صغيره وكانت جميله كل عيال الحي يحلفون بجمالها وكان ترتيبها بالعايله قبل الاخير يعني فهد اصغر منها بسنتين ..
:
:

ساره بتمرد وهي تبعد وجهها عن امها للجهه الثانيه : اف قلت لك مابي اتزوجه شكله مايعجبني ومتخلف هذا مو طموحي ودي بواحد كشخه رزه له مكان بالمجتمع
ام سلطان وهي تقرب منها بغضب : وش هالخرابيط ابوك اعطى كلمه للرجال تتزوجينه غصب مو طيب منك
ساره بصوت عالي : مـــــــــــــــــــــابيه انتم ماتفهمون مو غصب السالفه
ام سلطان وهي ترفع اصبعها السبابه وبنبرة تهديد : شوفي ياساره ان ماسمعتي الكلام ليصير شي((ن)) مايعجبك وهذا انا حذرتك السالفه مو على كيفك ولاتحسبين الزواج مثل دراستك
خلصت جملتها وطلعت من غرفة ساره بسرعه ..
ساره تحذف مخده كانت بيدها : اف غصب يبون يزوجوني لهذا المعفن انا مابيه
:
:
:
:
يوم السبت سنة 1425 للهجره
الزحمه ذاتها وذات الشوارع الممتلئه المزدحمه بالسيارات فهذه عادة الرياض شوارع مزدحمه بالسيارات ..الجو حارجاف جداً يصل الى 44 درجه مئويه ولكنه ليس بالشيء الغريب فهذه الرياض في فصل الصيف
:
:
:
فيلا كبيره بحديقه واسعه خدم وسواق وكل اساليب الرفاهيه ..
لبس شماغه المكوي بعنايه هذا هو من 20 سنه وهو يهتم بشماغه وثوبه ويدقق بطريقة الكوي ..
ضبط الشماغ وحط رشه من عطره الرجالي الهادىء وركز بشكله بالمرايا التفت اخذ شنطته السودا من السرير وناظرها بحنان : تبين شي يالغاليه
ساره وهي تناظره بحب : لا يابعد عيني مابي الا سلامتك
ابتسم لها ابتسامه ساحره وطلع
حطت يدها على خدها وهي تناظر ابو مشعل زوجها وحبيبها وهو فارسها اللي كل يوم تحبه زياده ..
نزل ابو مشعل الدرج بهدوء
باب الصاله الخارجي مقابل للدرج وعلى اليمين الصالون الفخم شاشة بلازما كبيره انتريه ابيض راقي وستائر فخمه كبيره وعاليه ..
التفت للصالون بعد ماوصل لأخر الدرج لقاها جالسه بالصالون ومندمجه بالتلفزيون قرب منها وناظر التلفزيون لقاها تناظر الـ mbc
ابو مشعل وهو يمسح على راسها : العنود
العنود التفتت له و ناظرته بحنان ووقفت له احترام : هلا يااحلى واحن ابو بالدنيا
ابو مشعل هو مثال الاب الديمقراطي المحب لأولاده ومايقصر عليهم بشي لو يطلبون عيونه اهم شي عنده بالحياه الاولاد والعمل والعمل يهمه عشانهم ..
العنود تناظر شنطته وتمسكها : وشو بابا دوام بالصبح ودوام بالليل
ابو مشعل وهو يبتسم لها بحب : معليه ياحبيبة بابا الشغل لراسي
مشعل يقاطعهم وهو داخل من باب الصاله : بابا اشيل الشغل عنك
ابو مشعل يبتسم له: انت كمل دراستك هذا اللي راح يفرحني
مشعل وهو يضرب صدره : ماعليك مايجيبها الا رجالها
ابو مشعل وهو يحط يده على كتف ولده : الله يبارك فيك ..ناظر ساعته ماركة Emporio Armani وبسرعه قال : فمان الله انا تأخرت
مشعل والعنود بصوت واحد وهم يناظرون ابوهم ينسحب من الصالون بهدوء : فمان الكريم
جلسة على الكنبه الفخمه وناظرت اخوها وهو يصعد الدرج
مستحيل يكون فيه شاب مثل اخوها انيق ووسيم طول وعرض وشعر اسود كثيف وناعم وملامح وجهه الشرقيه تزيده وسامه راحت للمرايا الكبيره اللي بالصالون وناظرت نفسها وهي تناظر بنفسها جسمها الممشوق وطولها شعرها الاسود الناعم عيونها العسليه بشرتها البيضا ملامحها البدويه رموشها الطويله والغمازات اللي بخدودها .. قالت بصوت خافت وبكل دلع : انا بعد حلوه وش زيني ..
العنود بنت مدلـلـه بس عاقله ودلوعه ونااااااااعمه بكل شي مشيتها تصرفاتها وحتى ضحكتها وكلامها

:

:

:

يوم الثلاثاء بالمستشفى سنة 1407 للهجره

وبأحد مستشفيات الرياض الخاصه ماسك يدها وهي على الكرسي المدولب والممرضه تسرع فيها لغرفة الولاده خايفه ياخالد خايفه كانت تردد هالجمله كل شوي وهو يضغط على يدها والخوف بقلبه بس يحاول بحبه يخفف عنها اخيراً دخلت غرفة الولاده وودعته بدمعه على خدها الناعم
انتظر وانتظر لساعات طويله والممرضه كل شوي تطلع وتقول له يروح البيت وهم يتصلون له بس هو كان مصر يسمع خبر ولادتها ..

وبعد 4 ساعات من الانتظار طلعت الممرضه مبتهجه : مبروك ولد
ناظرها بفرحه ومشاعره خانته وحركات يده صارت عشوائيه حس ان الدنيا ضحكت له : اب صرت اب ياربي مو مصدق التفت للممرضه بسرعه بسميه مشعل
الممرضه بهدوء : يتربى بعزك
وكلها دقايق وجاته ممرضه ثانيه : جتلك بنت كمان تتربى بعزك
خالد فتح عينه ومو مصدق قالها بدهشه كبيره : توأم؟.. فتح عينه بقوه وقال بعد دهشه دامت دقيقه : هذي العنود اللي تجي مع اخوها اكيد العنود وبسرعه تدارك الموضوع : ام مشعل كيفها
الممرضه تبتسم : بأحسن حال
اخيراً جلس على الكرسي بتعب وبدأ يفكر بمستقبل هالاولاد
:
:
:
:
الرياض..سنة 1425 للهجره يوم الأحد الساعه 2 الظهر

الشوارع زحمه والسيارات تتحرك ببطىء الجو حار جداً ومكيفات السيارات شغاله وياليتها تطفىء حر الرياض القاتل وصل عند الفيصليه ونزل ..
منيف وهو يناظر وحاط يدينه على خصره : احلف يابو الشباب لي ساعه انتظرك
مشعل : والله زحمه ماتعرف الرياض وقرفها يعني ..ومسك منيف من يده امش بس امش ترى ميت جوع
منيف يسحب يده : هذا اللي فالح فيه تلطعني ساعه وبعدين ولاتهتم يابرودك
مشعل بكل برود : انا بارد شسوي
وصلو عند المطاعم
منيف يلتفت لـمشعل : هاه من أي مطعم تبي
مشعل يأشر بلا مبالاة : أي واحد ماتفرق المهم اكل
منيف يضحك: يامفجوع
راح منيف وطلب لهم اكل اما مشعل كان واقف ينتظره ويلعب بجواله وكلها دقايق وجاه بلوتوث

+_(دلوعة الرياض)_+

ضغط قبول كذا بداعي الفضول لااكثر اول ماوصل البلوتوث فتحه لقى فيه
::عجبتني اذا ماعندك مانع اتصل وهذا رقمي 0000000000::
جا منيف شايل الاكل بيده مشعل حط الجوال بمخباته بسرعه واخذ من منيف الاكل وجلسو بطاوله قريب للممر..
البنت مرت بجنبهم وهي تناظر مشعل كانت مطلعه شوي من شعرها وفاكه وجهها ومتكحله ..
مشعل غصب عنه ناظرها بنت مره حلوه بيضه بشكل رهيب وعينها واسعه وحلوه وشعرها اللي كان طالع كان شوكلاته بس رهيب ..ابتسمت له وهو سعبل من ابتسامتها ..كانت ابتسامتها حلوه ..ساحره مثل ابتسامة اي انثى وناعمه وهادئه مثل ابتسامة الاطفال ..شرد لثانيه وهي تختفي عن ناظره وقطع هالانسجام وعالم الخيال منيف وهو يذب الاكلينكس بوجهه
: هيييييييييييي يابو الشباب وين وصلت
مشعل بفهاوه : هاه لا لا ولاشي ..واخذ المزاز وحطه بالبيبسي وجلس يشرررررررب
منيف هز راسه : الحمد لله والشكر تقل اول مره يشوف بنت
مشعل: أي بنت انت ووجهك انا موب راعي خرابيط انا واحد مالي بهالسوالف كل همي دراستي وبس
منيف وهو يلوي فمه : اها دراستك اجل طايب طايب
:

:

:

الرياض بنفس المستشفى سنة 1407 للهجره ..
للحين جالس على الكرسي والفرحه ماليه صدره رجوله ماتشيله مو مصدق الله يحبه لهالدرجه اللي منحه احلى سعاده ورزقه بهالطفلين ..
الدكتور وهو يقطع شروده : أخ عبد الرحمن
عبد الرحمن (ابو مشعل ) يرفع راسه بسرعه للدكتور : سم
الدكتور وملامح الاسى باينه على وجهه : سم الله عدوك مبروك ماجاك
عبد الرحمن بعد مااختفت الابتسامه من وجهه : الله يبارك فيك خير ساره فيها شي ؟
الدكتور : هي جاها نزيف حاد وماقدرنا نسيطر عليه
عبد الرحمن يحاول يروح غرفتها بس الدكتور مسكه من ساعده ومنعه : لحظه يااستاذ زوجتك بخير وهي نايمه الحين
عبد الرحمن وهو يناظر الدكتور مستغرب : اجل وين المشكله مو فاهم
الدكتور : اضطرينا نعمل لها اجراء بسيط لوقف النزيف ويمكن ماتكون قادره على الانجاب بعد كذا
عبد الرحمن يبتسم : اهم شي سلامتها هي عندي بالدنيا بعدين الحمد لله رزقني اثنين منها وش ابي اكثر من كذا
الدكتور بعد ماحط يده على كف عبد الرحمن : الله يكملك بدينك

الرياض ..سنة 1425للهجره يوم الأحد

ناظرت ساعتها الورديه اللي كانت تشير للساعه 4 العصر

كانت تتمايل على اغنية محمد حماقي ..عارفه احلى حاجه فيكي ايه بتحلي أي شيء عينك تيجي فيه امر دا ايه اللي تتساوي بيه وتعال اقول لك احلى حاجه فيكي ايه ..
تتمايل وهي تحط اكل للطيور اللي عندها بالحديقه من صغرها كانت تحب الطيور تحب تشوفها بالسما وكانت دايم تعلق عليها ومرات تحاول تصطادها ولما كانت بالابتدائيه واعطوهم مثال عصفور على حرف العين حفظت الحرف على طول ورجعت البيت وقالت لأمها انها تبي عصفور وامها طبعاً نفذت طلبها على طول هذي بنتها الوحيده ..

فتح الباب الخارجي ودخل وحط يده على كتفها : وش تسوي اختي الحلوه
العنود وهي ماده برطمها وتأشر على الكناري : شعلولي له يومين مريض
مشعل وهو يقرص اذنها : قلت لك لاتقولين لي شعلولي وش طولي وشعلولي
العنود تبرطم زياده : اخوي واحبك وابي ادلعك
مشعل يحك شعره : امحق دلع
العنود تضربه : عمره لااعجبك ..وتكتف يدينها وتبرطم مره ثانيه وتأشر على عصفورها وبكل دلع : بس عصفوري
مشعل وهو يبتسم : يازين دلعك اوديه البيطري كم عنوده عندي انا
العنود تقامز : الله يخليك لي يااحلى شعلولي بالدنيا وتنحاش بسرعه
مشعل يطرد وراها وهو يصارخ : تعالي ياغبيه ماقلت لاتقولين شعلولي
دخلت الصاله وهي تصرخ اول ماشافت امها تخبت وراها وهو اول مادخل وشاف امه وقف مكانه ..
ام مشعل وهي تناظرهم وتحاول تخبي العنود: خير شفيكم شفيك على اختك الضعيفه
مشعل وهو منقهر: ماما تسميني شعلولي
ام مشعل تبتسم : ياحليلها وهي تدلعك بس تلاقي اخت مثلها
مشعل : ايه ماقلنا شي تدلعني بس وش شعلولي
العنود وهي ورى ظهر امها ومطلعه راسها بحركه تضحك : شعلولي شعلولي شعلولي ..وتمد لسانها عناد
مشعل يفرك بيدينه : ياربي هذي اللي تبي تقهرني
ام مشعل تضحك : خل عنك الهياط وماعليك من اختك
العنود بدلع : ايه ماعليك من اختك بعدين انت كنت راضي
مشعل تقدم بسرعه ومسك اذنها : بنت بتعيدينها
العنود تمسك يده وتصارخ وهي تبعد عنه : اااااااي ماما شوفيه
ام مشعل : مشعل اترك اختك
مشعل يتركها : عشان خاطرك بس وانتي عصفورك مو موديه البيطري
العنود تقرب منه بدلع وتناظر فيه بنظره تعكس براءة الاطفال: واهون عليك
مشعل واللي حن قلبه لها ناظرها بطرف عين : هاه ايه تهونين
العنود وهي تمسح وجهها بسبابتها : ناظر زين اهون
مشعل يرفع حاجب واحد : لاماتهونين يالغبيه
العنود تبتسم : غبيه غبيه المهم تاخذ عصفوري البيطري
ام مشعل تضحك عليهم وبسرها تدعي عسى الله يحفظهم لها ولا يحرمها حسهم وحس ابوهم بالدنيا ابوهم اللي ماعمرها حبت أي انسان كثره ..
وهنا سرحت بتفكيرها ليوم عرسها طول العرس ماناظرت فيه وبعد ماصارو لوحدهم وبعد الحاح منه ناظرت فيه وهنا صرخت : انت عبد الرحمن
قال : لا جده
ساره مستغربه مره : بس انت كنت حالتك حاله و..
عبد الرحمن : لاتكملين انا تعمدت اطلع بهالصوره مابي اللي تاخذني تاخذني عشان اناقه او جمال او فلوس
وهنا ضحكت بهستيريا عشانها تزوجت منه غصب عنها لانه ماعجبه بس لهذا اليوم ماصارحته بهالحقيقه وحست انه دامها حبته وحبها ماله داعي تعلمه انها مغصوبه عليه ..
مشعل والعنود يهزون امهم : هي ماما وين وصلتي
مشعل يناظر العنود : لا امك منتهيه صلاحيتها
ام مشعل وهي تناظره : عيب ياولد لا تقول كذا
مشعل والعنود يضحكون : نامي نامي ياماما
ام مشعل تهز راسها وتروح عنهم غرفتها ..ومشعل والعنود يضحكون عليها
:

:

:

:

:

بأحد مستشفيات الرياض يوم الأحد الساعه 6 مساءً

واقف هو وزميله عند اسرة احد المرضى ..
يناظر بالدفتر المغطى بصفيحه معدنيه وماسك قلم بيده ..رفع يده ضبط نظارته : لا لا صرت احسن بكثير اليوم ياسالم ..وكيف الالم معك
سالم بصوت تعبان : الحمد لله يادكتور
ناظر سالم بحنان : ياللا شد حيلك نبيك تطلع بسرعه ملينا منك قال الاخيره وهو يضحك
حط القلم وطلع مع زميله وراح عند الممرضات
وبصوت كله ثقه : مافيه حالات جديده
جاوبته وحده من الممرضات بسرعه : لا يادكتور
بثقه اكبر: طيب انا بمكتبي
توجه هو وزميله للمكتب واول ماجلسو تنهد ..
علي : وش فيك تتنهد ياخوي
فهد: ابد بس الدنيا متعبتني
علي : أي دنيا ياخوي توك صغير على الهم
فهد يضحك : أي صغير ماتشوف الشيب اللي براسي
علي يبتسم : الشيب وقار بعدين وش زينك اللي يشوفك يقول عمرك 20
فهد يضحك مره ثانيه : ياخوي لاتبالغ
علي : انت ليش ماتتزوج ياخي اللي كبرك عندهم عيال
فهد : مابي اتزوج انا كذا مرتاح
علي: صدقني اذا تزوجت بترتاح
فهد يناقزه : ماشوفك يعني مرتاح
علي يضحك : لا يمكن حظك ازين من حظي
فهد بسرعه : لاياشيخ انا لعبة الحظ ماحبها ابي شي مضمون

الرياض يوم الخميس سنة 1411 للهجره

وقف سيارته بسرعه بجنب بيتهم وراح يحط الرساله عند عداد الكهربا وهو يحطها قطعه صوتها الناعم اللي كان عالي نوعاً ما +_فهد فهد
فهد التفت لها بسرعه : ياعيونه وشلون قدرتي تطلعين من بيتكم
شذا وهي واقفه عند الباب وتلتفت بسرعه وترجع تناظره : طلعت عشان اقول لك شيل رسالتك خلاص ماراح اقرا شي
فهد بعد ماذابت الفرحه بعينه : ليه شذا وش صار
شذا : ابوي جايب لي عريس وخلاص بتزوج
حس وقتها ان الارض تهز من تحته وان عينه تبي تخونه وتفر منها دمعه حس ان وده يرمي نفسه بحظنها ويبكي بس تمالك نفسه وقال ببرود : وأنــا
شذا بحزن : انت الله ييسر لك امرك ويرزقك بنت الحلال اللي احسن مني
فهد يصارخ : مابي احسن منك انا ابيك واحبك
شذا بعد مانزلت الدمعه من عينها : فهد روح انا مو نصيبك
فهد : ارفضيه لاتتزوجينه ماراح يجبرونك شذا انا دخلت طب عشانك بصير دكتور عشان ارفع راسك وراس عيالنا اللي راح نجيبهم خلاص شذا من بكره اترك الطب واشتغل حمال لو تبين واجي اطلبك من ابوك
شذا وهي منزله راسها تحاول تخبي دمعتها : ماراح ينفع هذا ولد صديق ابوي وابوي ملزم يزوجني له
فهد وخلاص الدمعه قربت تخونه ضرب على صدره بقوه وصرخ بصوت عالي : وانا والحقير اللي يحبك ماتقدرين ترفضين عشانه الله ياخذني وياخذ الحب اللي علقني فيك انا خلاص مابي اكمل انا كنت ادرس عشانك ابيك تتشرفين بشريك حياتك
شذا وهي تبكي وعيونها تترجاه : لا فهد واللي يسلمك ويخليك اذا بجد تحبني كمل دراستك وانا لو اقدرارفض رفضت بس انت تعرف ابوي فهد ابوس يدك كمل دراستك ابي اسمع عنك دكتور ناجح مسكت يده تبي تبوسها وهو سحبها بسرعه : مابيك تبوسين شي الله يستر عليك اخذ رسالته وراح من عند بيتهم بسرعه
وهي كانت تراقبه يختفي وكان هذا اخرلقاء بينهم

الرياض سنة 1425 للهجره يوم الاحد الساعه 9 بالليل
:
:
:
لف حي الروضه شارع شارع له ساعه وهو يلف ويتذكر لقائه الاخير فيها رغم الدراسه ورغم مرور السنين ماقدر ينسى شذا حبه الاول والاخير ..رافض فكرة الزواج نهائي مايتخيل ترضيه عيون غير عيونها ..همسه غير همستها .. ضحكه غير ضحكتها .. كل مره يتذكرها يحس انه طفل وده يجلس بحظن امه ويبكي يبكي بحراره يبكي فراقها يبكي حاجته لها يبكي هالحب اللي خلاه وحيد بدون اولاد وده يكون احسن اب بالدنيا بس مايقدر ..مايقدر يعيش مع انسانه غيرها ..
وهو يلف اخذ جواله اختار نكها بالجوال( وردة اللوتس) وضغط الزر الاخضر
ردت عليه بسرعه: هلا بأحلى خال بالدنيا
رد عليها وهو يضحك غصب عن حزنه مايدري وشلون العنود تريح قلبه وتفرحه هالبنت قريبه من قلبه: هلا بحبيتة خالها كيفك يالوتس
العنود بدلع: عصفوري مريض
فهد: افا شفيه
العنود : ماادري بس ماياكل ولاشي احسه يودع وشعلولي مو راضي يوديه البيطري
فهد وهو يتبسم: خلاص ياحبيبة خالك انا بكره اجيب له مضاد ويمشي الحال
العنود وهي مبسوطه: الله يخليك لي يااحلى خال بالدنيا

خلص مكالمته ووقف عند بيتهم دخل سيارته الكراج ونزل وقفلها بالريموت ..
اول مافتح الباب جاته امه تمشي وهي تترنح بمشيتها : قواك الله ياوليدي تبي اجهز لك عشا
فهد حب راس امه : لا يالغاليه ماابي
ام سلطان : لازم تاكل زين ياوليدي
فهد يبتسم : ماعليك اعرف وشلون الواحد لازم ياكل ويحافظ على صحته انتي بشريني كيفها رجلك
ام سلطان وهي تهمز رجلينها : والله تعورني شوي
فهد يرفع حاجب : اخذتي حبة الكالسيوم
ام سلطان بتذمر : ايه اخذتها ياربي الدكاتره لاحقيني الى البيت
فهد ضحك : الله يخليك لي يالغاليه
:

:

:

:
بيت ابو مشعل يوم الاحد الساعه 1 بعد منتصف الليل

ظلام يحيط بالمكان ولا يوجد سوى ضوء بسيط ينبعث من شاشة الجوال صوت الازرار وصوت انفاسه تتسارع كلما قرأ تلك الارقام صوت جهاز التكييف المركزي يبعث الى نفسه الاسترخاء
:
:
:
غرفه 6x7 جميله كلاسيكيه ذات تصميم بسيط ستائر بيضاء تحوي زخارف عسلية اللون وكل مابالغرفه عسلي اللون عدا غطاء السريركان ناصع البياض
:
:
مشعل وهو يناظر الجوال : ادق والا ماادق بس انا مالي بالبنات ولاعمري كلمة بنت ..وبعد تفكير .. لا بس هذي هي اللي راسله الرقم وكانت تناظرني بنظره غريبه و و ..وبعد تردد.. وحلوه ..فكر مره ثانيه .. معقوله عجبتها ؟ ..فكر اكثر .. لا لا هذي اكيد لعابه ..تراجع بسرعه .. استغفر الله يمكن جد انعجبت فيني واخيراً قرر انه يدق على صاحبة الرقم ..
بعد اقل من دقيقه جاه الصوت الناعم : الو
مشعل بتوتر : الو
البنت : نعم وش تبي
مشعل : انا اسف
البنت بعصبيه : شكلك فاضي ..وقفلت الخط بوجهه
مشعل يناظر الشاشه مستغرب : بال كل هذا ثقل طيب برسل مسج ..وبعد تفكير .. طيب وش اكتب انا اللي رقمتيه ..وضحك.. عشان ماعاد تكلمني واخيراً كتب +( انا الولد اللي بالفيصليه اليوم الظهر ..
وبعد 5 دقايق من ارسال المسج دقت عليه البنت ..
اعطاها بزي ودق عليها هو ..
مشعل : الو
نجلاء: هلاء
مشعل تبسم بعد ماسمع نبرتها مختلفه: شكلي ازعجتك ؟
نجلاء : لا بس انا كنت فاكرتك واحد يعاكس
مشعل : يحق لك انا ماعرفت عن نفسي
نجلاء : ماصار شي
مشعل بعد تردد : طيب دامك ماتبين معاكسات ليه ارسلتي لي رقمك
نجلاء سكتت دقيقتين وبعدها ردت : صراحه انت عجبتني وقلت مستحيل تجيبك الصدفه لي عشان كذا استغليت البلوتوث وارسلت رقمي
مشعل : اها ..ووشلون عرفتي ان اللي ارسلتيله الرقم بلوتوثي
نجلاء: عرفت من نوع الجهاز
مشعل: اها
نجلاء : ادري انا جريئه ..اسفه
مشعل : لا لا عادي .. ممكن اسألك وش اسمك
نجلاء : أي عادي اسأل
مشعل يضحك : وش اسمك
نجلاء : اسمي نجلاء
مشعل: حلو اسمك
نجلاء: وانت وش اسمك
مشعل: اسمي مشعل
نجلاء: انت بعد حلو اسمك كم عمرك
مشعل بعد تفكر : عمري 22 .. فكر كثير هو ليه كذب بعمره بس خاف لاتقول عليه البنت صغير او أي شي ..وانتي كم عمرك
نجلاء : 18
مشعل يكلم نفسه : كبري
نجلاء : وش قلت ماسمعت
مشعل بسرعه يحاول يتدارك الكلام : هاه لا اقول كبر اختي
نجلاء:الله يخليها لك
مشعل: الله يسلمك
نجلاء: وش تدرس مشعل
مشعل بسرعه وبدون تفكير: تو متخرج من الثانويه
نجلاء بأستغراب: ليه دايم تسقط
مشعل بندفاع: لاوالله اني شاطر
نجلاء: كيف توك متخرج
مشعل بأرتباك: الصراحه عمري 18
نجلاء تضحك: ليه كذبت
مشعل : خفت تقولين علي صغير وترى الرجال مو بعمره
نجلاء بنعومه: ادري
كملو السهره وهم يسولفون مع بعض سولف لها عن ايام الدراسه وعن اخته التوأم وكيف يحب امه وابوه وهي كلمته عن حبها للدراسه والنجاح وعن وحدتها ..

:

:

:

:

:

الرياض شارع التحليه سنة 1425للهجره يوم الاثنين الساعه 9 مساءً
صوت المسجله بالسياره عالي واكثر من عالي صوت الرقيع وراسه يميل يمين ويسار ..
طربق طربق .. اشتكي لبدرك بمواويلي وانثر اشواقي على ضيه آه وجداً هدني حيلي والهوا فتاك يابنيه ..ســــــــــــــــــــــرمد ,,الليل ..طربق طربق..ضوا ليلي واهجعو ربعي حوالي..
بندر بصوت عالي وهو داخل جو : نوره تشعل لي غرابيلي..اويلي ..ترك الدركسون وجلس يصفق ..
منيف طلع راسه من السياره اللي مقابلته:بندر جنيت
بندر بصوت عالي: لاحبيت
منيف يحب يدينه: الحمد لله والشكر
مشعل شارد: منيف كذا يسوي الحب بالواحد
منيف واللي كان راكب بجنب مشعل: لاياحبيبي هذا اسمه خرابيط
قطع كلامهم صوت جوال مشعل اللي اخذ جواله بسرعه واعطى المتصل بزي
منيف يناظره بأستغراب: ليه مارديت
مشعل بأرتباك:لابس مابي ارد
منيف واللي كان يعرفه زين رد عليه بدون اقتناع: اها

:

:

:

:

شرق الرياض الساعه10يوم الاثنين سنة 1425 للهجره

بيت كبير متواضع نوعاً ما ..مقلط كبير للرجال صاله واسعه 4 فرق بالطابق العلوي غرفه مخصصه للوالدين وغرفتين للبنات كل بنتين بغرفه والولد الوحيد له غرفه كبيره غرفته فخمه من جميع النواحي الوان راقيه بلازما صغيره على الجدار ثلاجه مليانه ع الاخر دولاب ملابس يحوي احدث الماركات تسريحه تحمل 3 انواع من العطور (VETIVERوjoop jumpوGREED) دورة مياه صغيره خلص من حمامه اللي دام ساعه كامله من يومه وهو يطول وهو يتسبح ..طلع من الحمام وريحة الفراوله تطخ من جسمه مجموعة ذا بودي شوب تقل عروس خخخخخخ..
دخلت عليه نوره وبسرعه حطت يدها على عينها قفل الباب ماتستحي انت
سلمان وهو يناظر نوره وهو لاف الفوطه على وسطه وباقي جسمه عاري وعضلاته باينه ومبرزه جمال جسمه: انتي اللي طقي الباب قبل تدخلين
نوره وللحين حاطه يدها على عينها: اقول تستر بس تستر
سلمان واللي طلع صوت كأنه يلبس: خلاص لبست
نوره شالت يدها وشافته للحين على وضعه ورجعت غمضت عينها بسرعه: يانصاب
سلمان يضحك : خلاص خلاص والله الحين لبست
فتحت عينها ببطىء وشافته للحين حاط الفوطه على وسطه بس لبس تي شرت: مصدق نفسك حلو
سلمان وهو يسرح شعره بغرور ويبوس المرايا: ايه مصدق نفسي..سلمان كان طول بعرض عضلات يدينه وبطنه مفصله تفصيل شعره اسود ناعم مطوله شوي عيونه تشبه سواد الليل وسمرت بشرته تسحر وكان يدري عن نفسه حلو وفيه بعض الغرور بنفسه
نوره: مالت عليك
سلمان بغرور:مالت علي العافيه ..ورش من كل عطر رشه واخذ بنطلونه ودخل الحمام لبسه وطلع ناظر نوره بأستغراب: وش تبين مستقعده لي
نوره بدلع: تودينا بكره السوق
سلمان :اول شي مولايق الدلع ثاني شي مو فاضي لك
نوره وهي تضم يدينها بترجي: تفكى طلبتك ابي اشتري ملابس حفلة صديقتي بعد بكره
سلمان بلا مبالاة :طيب افكر
نوره: بكوي لك ملابسك اسبوع وش قلت
سلمان واللي ماقدر يخفي ابتسامته:موافق
نوره تعرف من اين تأكل الكتف تدري عن اخوها يحب ملابسه دايم مرتبه ومكويه وامه مافيها حيل تكوي وماعندهم خدامه وهو يكوي ملابسه بنفسه

نزلت الدرج وهي مبتسمه ..
شروق تناظرها:هاه وافق
نوره بغرور:اكيد وهو يرفض لي طلب
ريم وهي تقلب بالقنوات بالتلفزيون:مالت عليك اعترفي بوشو اغريتيه
عهود تضحك وهي تدف الريم عشان تسكت
نوره وصلت ورمت نفسها بقوه على الكنبه :المهم انه بيودينا وخلاص استعدو
ريم :اللي يسمعك يقول رايحين رحله الله يخلف علينا بس غيرنا عندهم سواق اي مكان يبون يروحون راحو واذا ماحصل السواق عمي فهد يدلعهم
نوره تناظرها: مين هالناس العنود مثلاً
ريم:لاتعليق
نوره: المحبه من الله بعدين لاتحسدين البنت
ريم بقهر:اف انا مااحسدها يارب بس ابي اتزوج وافتك من هالعيشه
نوره تفكر:وش فيها هالعيشه
ريم ابد مافيها شي بس ممنوع كل شي

هذا كان بيت سلطان ..عنده ولد و4 بنات الولد سلمان هو الكبير 26سنه مدرس انجليزي والبنات عهود 16 سنه ..ريم 22 سنه تدرس خلصت السنه الثانيه علم حيوان ..شروق 24سنه تخرجت من الجامعه وماجاتها وظيفه..نوره 19 سنه خلصت الثانويه وجالسه بالبيت الدراسه مو طموحها

:

:

:

:

رفع راسه بأرهاق الساعه صارت 1 صباحاً اخيراً خلص مناوبته اخذ مفتاح سيارته ومشى وهو يقطع الممرات بسرعه غلبه التعب والنعاس
استوقفه علي عند الباب:هاه يابو الشباب خلصت مناوبتك
فهد بتعب:أي والله ورايح البيت
علي: الله معك انا الحين بدت مناوبتي
فهد يضحك : الله يعينك
طلع ركب سيارته قفل الباب وتسند على الكرسي وماشغل السياره وطار بأفكاره بعيد..
وقطع انسجامه صوت طق على نافذة السياره التفت بسرعه شغل السياره وفتح الدريشه ..
علي يناظره مستغرب:ليش مارحت
فهد بأرتباك:كنت ماشي
علي يناظر ساعته:تدري الساعه كم
فهد بثقه:1 و10 لاني شردت شوي
علي يضحك:الساعه 2 روح البيت بس روح شكلك نمت بالسياره اوصلك؟
فهد:لا لا ماله داعي يالله فمان الله
علي :فمان الكريم
:

:

:

:

بنفس الوقت وصل لغرفته بسرعه ورمى نفسه على السرير على بطنه ودق عليها..
نجلاء بصوت حزين: كنت مشغول
مشعل: لاكنت طالع مع الشباب
نجلاء:ابي اقول لك شي بس مستحيه
مشعل :قولي لاتستحين كلي اذان صاغيه
نجلاء : وحشتني
مشعل:...........
نجلاء:جريئه ادري
مشعل:لاعادي بس امداك تشتاقين لي
نجلاء: ايه اشتقت لك
مشعل:طيب
نجلاء:مشعل
مشعل: سمي
نجلاء:شكلك كم يوم وتبي تبطل تكلمني
مشعل:........
نجلاء:مابيك تعتبرني شي بس ابيك تكلمني
مشعل:تامرين امر
وكملو هالليله مثل اللي قبلها سوالف للفجر وماخلو شي الا وسولفو فيه
:

:

:

:

:

يوم الثلاثاء ربيع الاول سنة 1426للهجره ..يوم السبت..الساعه 3:30
تصايح بصوت عالي:اف وينه هالسواق الغبي ابي الساعه 4 انا ببيت صديقتي
ام مشعل: لاتصارخين ياحبيبتي الحين يجيك
العنود تاخذ شنطتها من الكنبه :طيب بنتظره برا
طلعت بسرعه ووقفت عن الباب الخارجي
وبنفس الوقت طلع ولد جيرانهم قمه بالوسااااااااااامه لابس نظاره شمسيه سحرها بمنظره اشعة الشمس المعكوسه عليه وضغطته لريموت السياره شكله وهو يركب سيارته الحمرا كل هذا تجمع عشان يسوي لها مشهد ساحر ركب سيارته وتحرك بعجله
السواق بصوت عالي: يااااااااااااعنود
العنود تلتفت له بسرعه: ياعنود بعينك اصغر بناتك انا
السواق: انا في ساعه ينادي
العنود:طيب
ركبت السياره وطول الطريق وهي تفكر بولد جيرانهم اللي سحرها منظره

:

:

:

صار له ساعه وهو بالكوفي وكل مادقت عطاها بزي اخيراً استأذن من اخوياه ووقف..
منيف يناظره: وين يارجال
مشعل: دقايق بس وراجع
منيف : وين بتروح طيب
مشعل : امي لها ساعه تدق بشوف وش تبي يعني بكلمها وبرجع
منيف :طيب
مشعل طلع من الكوفي ركب سيارته شغلها وشغل المكيف ودق عليها ..
نجلاء :هلا مشعل
مشعل: هلا نجلاء كنت عند اخوياي عشان كذا اعطيك بزي استحي اقول لهم اكلم بنت
نجلاء:وحشتني
مشعل: مايوحشك غالي
نجلاء: مشعل ماتحس فيني
مشعل: ليه وش سويت
نجلاء بصوت باكي: مشعل
مشعل: سمي
نجلاء : انا احبك

نهاية الجزء الاول ..اتمنى انكم استمتعتم بأول فصول روايتي هذا الفصل قصير نوعاً ما عشانه الاول ..

اذا شفت تفاعل واقبال كملت القصه واذا شفت انها مالاقت استحسانكم حذفتها

واشكر مقدماً كل قلم سيكتب لو حرف لنتقادي او تشجيعي

لكم كل التحيات القلبيه مني أنا براءهـ

,,...{ الفصل الثاني}..,,


لن اخفي عليكم اعزائي القراء انشغالي بأبطال قصتي المتواضعه ..فأحياناً تشغلني ساره الام الحنون واحياناً اخرى يأخذني خيالي الى عالم العنود ولن انسى رائحة العطر المركزه المنبعثه من سلمان وسواد الليل بشعر مشعل

:

:

:

اركان منازلهم تأسرني واحداث هذه الروايه تقيدني فلا ترتاح يدي حتى تبدأ بالكتابه ..

:

:

:
الرياض نفس الزمان اللذي توقفنا عنده..
بيت صغير جميل مكون من عائله متواضعه 3 اولاد وبنت وحيده..
العنود شارده اخذت رشفه من الشاهي وصرخت : آح حااااااااارلساني احترق
نوف وهي تضحك : تستاهلين من اول ماوصلتي وانتي مو معي
العنود باستنكار وهي تأشر بأصبعها على نفسها : انا؟
نوف رافعه حاجب : لاجدتي
العنود ببرود : الله يرحمها
نوف تاخذ مخده صغيره من الكنبه وتضربها فيها : ياشينك
العنود تضحك وترجع لشرودها الغير معتاد
:

:

:

:
الرياض عند شارع الأمير محمد بن عبد العزيز(شارع التحليه) بالتحديد قرب المقهى..
علامات الدهشه مازالت تحدد ملامح وجهه وجسمه بدأ يتصبب عرقاً وكأن درجة الحراره قد ارتفعت...
نجلاء : شفيك ساكت
مشعل : وش تبيني اقول
نجلاء: مشعل اقول لك احبك تقول وش تبيني اقول بس تدري انا الغلطانه نزلت من نفسي
مشعل بسرعه: نجلا اسمعي انا الحين منصدم ومشغول مع الشباب اذا رجعت البيت كلمتك
نجلاء ونبرة الحزن واضحه على صوتها :طيب
مشعل : مع السلامه
قفل وتنهد طفى السياره ودخل المقهى ووجهه متغير
منيف يناظره : خير يارجال
مشعل وللي عرف انه باين على وجهه :ابد بس الوالده تعبانه وتقول انها تدق على ابوي مايرد
منيف : وش تنتظر روح لها
مشعل : ايه بروح بس جيت استأذنكم
منيف: اذنك معك
:

:

:

:

الرياض بنفس البيت الصغير..
نوف بقهر: يابنت احس اني مكتومه
العنود : وليه
نوف : شين انك تكونين بنت وحيده
العنود : لاعادي انا بنت وحيده
نوف : انتي بنت وحيده مع ولد وحيد بس انا مع 3 اولاد ويكبروني بالسن ياشيخه احس اني مراقبه وكل تصرفاتي لازم يدرسونها قبلي
العنود : يابنت روقي وحاولي تتعاملين معاهم
نوف : ايه وش دراك انتي
نسيت اقولكم نوف صديقة العنود من الابتدائيه بنت جميله بيضاء البشره عيونها ناعسه وعدساتها مايله للأخضرار وجهها دائري وخدودها ممتلئه شعرها ناعم غير منسدل قوامها ساحر..
:

:

:

:

بحر جميل وسماء صافيه ولكن الرطوبه تملىء المكان هذه هي الشرقيه شوارع اقل زحمه من الرياض بحر كبير يمتد بين محافظات الشرقيه ..
سنة 1407 للهجره فجر الاربعاء..
بعالي صوته يصايح من عند الباب وهو ماسك حقيبة سفر صغيره بيده: ياللا يانوره استعجلي
نوره جات عنده وفيه دمعه صغيره بعينها: ياسالم مالي قلب اتركها
سالم: يابنت الحلال كلها يومين نبي نخلص اجرائات نقلك للشرقيه ونرجع مالها داعي ناخذ البنت معنا
نوره بعدم اقتناع: بس توها صغيره
سالم بأصرار : خلاص يانوره امي تهتم فيها نبي نروح نخلص ونرجع
نوره : طيب
طلعت معاه وركبت السياره وهي ماتبي تترك بنتها حتى لو دقيقه
بعدها بساعتين وعلى الطريق السريع صرخت بأعلى صوتها وهي تمسك الدركسون معاه: سالم انتبه
سالم يصارخ : يــــــــــارب..حرك الدركسون بسرعه
وماقدر يتدارك الموضوع تقلبت السياره وتوقفت على وضعيه غلط ومع قطرات من البنزين ومحرك السياره اشتعلت السياره
وبسرعه كبيره تجمهرت الناس حول الحادث ..الرجال المتجمهرين منهم من يصرخ وين النجده..واللي يقول لاحول ولاقوة الا بالله..واللي يقول طلعوهم من السياره..واللي يقول خلاص راحو للي ارحم
:

:

:

:
الرياض يوم الثلاثاء ربيع الاول سنة 1426للهجره ....الساعه 5 المغرب..
وصل البيت وجالس بغرفته محتار يدق عليها او لا ..جالس يفكر معقوله هالبنت حبتني بس انا عادي مااحبها عاجبتني ماانكر بس ماتوصل للحب بعدين اول شي ترقمني والحين تحبني جريئه هالبنت..رد عليه ضميره بسرعه خاف نفسك ببنات الناس يامشعل عندك اخت بعدين انت ليش تدق عليها..
اخيراً وبلحظه سريعه قرر يدق..
نجلاء بنبره حزينه :هلا
مشعل: شفيك
نجلاء: ابد
مشعل: نجلاء ادري منتظره مني كلمه ترضيك بس انا مو راعي خرابيط ماانكر انتي عاجبتني بس ماحس اني احبك مالنا 3 شهور نعرف بعض بعدين انا مو راعي علاقات لاتشوفيني دقيت تقولين راعي بنات انتي اول بنت اكلمها
نجلاء: وهذا اللي عاجبني فيك..مشعل انت اكيد شفتني اعطيتك الرقم قلت هذي تعرف الف غيري
مشعل بسرعه: لااستغفر الله مافكرت بهالشي ومستحيل اظلم بنات الناس
..,, اعزائي القراء لابد وانكم لاحظتم من سطوري ان مشعل الشاب الجذاب هو شاب طيب القلب ..وبالعامي على النيه ..قلبه ابيض منير ومشاعره شفافه يقدر أي انسان ولايظلم احد وورث هدوء الاعصاب من والده ..مشعل هو ذلك الشاب اللطيف اللذي ينجذب له كل من حوله ,,..
نكمـــــــــل..,
نجلاء : مشعل
مشعل: سمي
نجلاء:سم الله عدوك
مشعل:.........
نجلاء:ممكن طلب
مشعل:امري
نجلاء : ابي اقابلك
مشعل:نعم
نجلاء: شفيك
مشعل: لالا ماني راعي مقابل بعدين ماحبيتك باقي ليه اجلس معاك انا ماالعب على بنات الناس<<شفيه الولد خواف هع
نجلاء:انا طلبت اللقاء طلبتك مشعل
مشعل بعد تفكير وضميره يقله انت وش خسران تذكر شكل نجلاء الحلو وحس ان هاللقاء لحظه مو لازم يفوتها ابد :خلاص بس على شرط
نجلاء :اشرررررررررط
مشعل: كل شي علي وانا اللي بضبط لقاء على الكيف وش قلتي
نجلاء تضحك:موافقه
مشعل: لبى هالضحكه تدرين نجلاء حتى لو ماحس اني احبك بس انتي عاجبتني وارتاح لك وتعودت على ضحكتك الحلوه
نجلاء تسكت ومايسمع غير صوت نفسها
مشعل بتساؤل :استحيتي؟
نجلاء:ماتعودت منك كلام حلو
مشعل يضحك:ايه انا بارد طالع على ابوي ههههههههه
:

:

:

:
بنفس الوقت ببيت سلطان المتواضع ..
نازل من الدرج وريحة العطر تنتشر بكل مكان بنطلونه الأبيض حزامه الاسود قميصه اللي مبرز جمال جسمه كل هذا يعطينا منظر ساحر لشاب وسيم ..
نوره تمر من جنبه: وين على الله كل هالكشخه
سلمان يضبط القميص الابيض:مو شغلك يالعصلا
نوره بأستنكار:انا عصله
سلمان :اوووووه نوره مو وقتك طسي بس
طلع سلمان وهي تناظر فيه اخذت نفسها وطلعت غرفتها ودقت رقم بندر وبهالوقت جلسة تفكر يارب انا ليه اسوي كذا اخون ثقة اهلي فيني اففففففففف بس اهلي كاتمين نفسي وانا طفشانه رد عليها ضميرها بسرعه لاتعللين غلطك بـ الملل وهي تفكر فتح عليها الباب ابوها وهي نقزت من الخرعه لدرجه طاح جوالها من يدها
ابو سلمان:وش فيك تخرعتي كذا
نوره بأرتباك :لابس ماتوقعتك تجيني
ابو سلمان يضحك ويجلس بجنب بنته على السرير
نوره ناظرت ابوها شوي وبعد صمت: عساه خير؟
ابو سلمان: يعني مااجيك الا فيه شي؟مايصير اتطمن على بنتي
نوره مستغربه:الا بس ادري وراك شي يالغالي قول
ابو سلمان : يابنيتي مضايقني حالك
نوره بتساؤل:أي حال
ابو سلمان: شوفي السنه الدراسيه الجديده قريب تبدا وانتي راحت عليك السنه الماضيه لعب خلصتي الثانويه وما كملتي مثل اخوانك حرام تجلسين كذا هذي السنه بعد
نوره: مااحب الدراسه وماهي طموحي
ابو سلمان يفكر بعمق وعينه بالجدار تناظر ويملاها الحزن: عمتك كانت مدرسه يوم سميتك على اسمها توقعتك توصلين لمواصيل عاليه الله يرحمها كانت طموحه مجتهده بكل شي
نوره بتساؤل :كانت حلوه
ابو سلمان يمسح على شعر بنته: مثل حلاتك يابنيتي
نوره:والله يابابا مااحب الدراسه
ابو سلمان :طيب وش ميولك بدخلك معهد كمبيوتر او لغه ولاتجلسين كذا احب عيالي يملاهم الطموح مثل ابوهم وضحك ضحكه واثقه
ابو سلمان انسان متواضع قضى عمره بالعقارات والمقاولات انسان معروف بأتزانه بين الناس ومحبوب بشكل كبير ثقته وحكمته تقرب الناس منه ..مادلع عياله لابمال ولا بكلمات بس خوفه عليهم واضح يحسب حساب لكل يوم يمر عليهم ..ابو سلمان في كثير من الاحيان يكون مثال الاب الملتزم الشديد مايتعمد القسوه على عياله بس خوفه عليهم يحركه...
اثناء حوارهم دق جوال نوره..
ابو سلمان اخذ الجوال من الارض بدون لايناظر الشاشه واعطاه بنته ووقف: كلمي صديقتك وفكري بعدها بكلامي
بعد ماطلع ناظرت الشاشه شافت المتصل بندر ماردت عليه وجلست تبكي وضميرها كان يصرخ واثق فيك خايف على مستقبلك كذا تجازينه تخونين ثقته صح انك حقيره ..كل جوارحها كانت تصرخ ياخاينه لكن الشيطان كان يقول لها انتي ماغلطتي مكالمات بريئه ..مشاده غريبه كانت تدور بين ضميرها الخايف اللي يعرف الله وبين الشيطان اعوذ بالله منه
:

:

:

:

:

خط الرياض السريع سنة 1407 للهجره..
اشلاء سياره محترقه جثتين بأنتظار من ينتشلهما ليضعهما بحفره ضيقه يحاسبون بعدها على ايام فنت في هذه الدنيا كيف هو حال ارواحهم مطمأنه بعد ايمان وتقوى ام خائفه بعدما اطاعت الشيطان بأمر او أمرين متجاهلتاً الخوف من المولى عز وجل ..جسد بلا روح انتهى من هذه الدنيــا..
وهناك بالبعيد ببيت صغير بالشرقيه طفلة العامين الصغيره بين لعبها غير مدركه انها بهذه اللحظه خسرت اغلى شخصين بهذه الحياه
وبأن حادث سياره قد انهى حياة من ستسأل عنهم كل ماتبقى من حياتها

:

:
الشرقيه سنة 1426 للهجره الساعه السابعه من يوم الثلاثاء ربيع الاول
حطت الكحله وكثرة المسكره قلوس خفيف على الشفايف لبست عبايتها اللي على الكتف وتعطرت الا تسبحت بالعطر وناظرت بنفسها بالمرايا بثقه والغرور اللي بداخلها كان يصرخ انا حلوه..
طبعاً عرفتو مين اقصد هذي لجين بنت المرحومه نوره عايشه مع جدتها بالشرقيه ..جدها بعد وفاة ابوها مارضى بنت ولده تروح الرياض وحلف مايربيها غيره وبعدها بـ 15 سنه توفى جدها وكملت حياتها مع جدتها بحكم انها تعودت عليها وماتبي تتركها لحالها..,,
بنت تحمل بملامحها براءه غير طبيعيه ملامحها الطفوليه تسحر ..
شفه مرسومه رسم وعيون غزلان واسعه بشره بيضا صافيه شعر قصير اجعذ بني اللون قوام ممتلىء برشاقه أي شي تلبسه يطلع ساحر عليها
اخذت شنطتها وطلعت من غرفتها متجهه للباب الخارجي وهي تصرخ:جدتي انا طالعه مع السلامه
الجده بتعب وهي مو قادره تقوم:وين رايحه بهالليول يابنيتي اجلسي مكانك
لجين بطفش:اف بروح السوق جدتي ماعليك انتي بس
الجده:البنت مالها الا البيت وانا امك
لجين: اقول لاتكثرين كلام انا طالعه مع السلامه بس
الجده ناظرت الباب وهو يتقفل بعد خروج شجن هزت راسها بأسى :هذا حال البنت اللي مافيه رجال يحكمها وعمها الله يهداه مايجينا الا كل 3 اشهر مره
طلعت بسرعه ولقت صديقتها مع سواقها ينتظرونها
ركبت السياره وريحت عطرها ملت السياره حتى السواق ثارت غرائزه فتح الدريشه واخذ نفس مايبي الشيطان يتسلل لداخله عنده اطفال وده يعيشهم قال بعد ماراوده ابليس شوي: مدام وين روح
سحر تطالع شجن :هاه وين نروح
لجين وهي تضحك:هالكشخه وين يعني اكيد الراشد نصيد لنا كم صيده
سحر تضحك:وانتي بس هذي حياتك
لجين:والله دام فيه عيال اغبياء فيه وحده حالاتي تبي كل يوم تشتري وتلبس ههههههههههههه
سحرتضحك:ومن خير غيرك
لجين: اقول روقينا لاانزل من السياره وافتح عبايتي والف واحد يوقف ههههههههههههههههههههههه
سحر فاطسه:ياربي منك منتي بسهله وناظرت السواق وانت تسمعنا روح الراشد ياللا
:

:

:

:

الرياض الثلاثاء الساعه 8 مساءً
راجعه البيت واول ماوصلت سيارة السواق للبيت شافت سيارة ولد الجيران واقفه كانت تفكر بداخلها يعني هو هنا وجاها عتاب من ضميرها بسرعه انتي وش دخلك فيه ليه شاغله بالك فيه
دخلت البيت بسرعه وراحت للدرج تبي تروح غرفتها..
ام مشعل من عند باب المطبخ تصارخ:شفيك مستعجله ياحلوه
العنود:سلامتك ماما بس راسي وبروح انام
ام مشعل:ماتبين تتعشين
العنود:اكلت مع نوف
ام مشعل:طيب تبين اسبرين
العنود:لاماما بروح انام وخلاص..ايه صح تسلم عليك ام نوف
ام مشعل:الله يسلمها ويسلمك
طلعت غرفتها حطت عبايتها على السرير حتى ماعلقتها وراحت بعدت ستارة غرفتها اللي تطل على الشارع وتشوف منها بيت الجيران وجلست تراقب تقول يمكن يطلع ..طولت وهي تراقب بيت الجيران واخيراً تكلم ضميرها انتي ماتستحين وش دخلك فيه طلع رجع الحين من نظره انهبلتي فيه ماعمرك شفتي رجال يعني خافي ربك بس.. واثناء هالكلام وقبل ماتراجع نفسها وتصرفها بجديه طلع ولد الجيران بكامل اناقته حست قلبها فز وقالت بصوت مسموع:وه بس وه هذا وشلون ماشفته قبل ياربي وشلون افكر كذا اول مره اشوف واحد حلو؟؟..
ناظرت بطوله بجسمه بحلات شكله حسته مثل نجوم هليود جسم حلو وطول وعرض وبياض خفيف سكسوكه مرسومه رسم وعيون كلها رجوله فتحت فمها وهي تناظر حلاوته مو معقول هالادمي..
ناظر فوق وكأنه شافها ركز نظره ومرر اصابعه بشعره الناعم المقصوص بعنايه..
هي شافت نظراته وسدلت الستاره بسرعه وسندت ظهرها للدريشه:ياربي معقوله شافني ..لا لا اكيد لا الغرفه ظلام مااتوقع شاف ..ياربي هذا معقوله من الرياض يهبل
انسدحت على السرير وهي تتنفس بغرابه وتقول لنفسها عييييييييييييييييييب
:

:
بنفس البيت بس بالغرفه المقابله بعد تفكير فكر وعرف انه ماله غير منيف
دق عليه ..
منيف:هلا والله
مشعل: هلا بك زود
منيف:اخبار الوالده
مشعل بأستغراب:الوالده.؟
منيف:ايه ماتقول تعبانه
مشعل واللي تذكر كذبته:ايه ايه الحمد لله ابره وصارت احسن الحمد لله
منيف:الحمد لله
مشعل:منيف ابي اسألك
منيف:اسأل
مشعل:ابي مطعم للعوايل يكون عليه القيمه على قولتهم
منيف بأستغراب:وش تبي بمطعم العوايل انت
مشعل: ابد بس اختي لوعت كبدي وهي تحن علي انت مافيك فايده اخ على الفاضي ومن هالكلام اللي يسم البدن قلت لها خلاص لك اللي يسرك وش تامرين عليه قالت ودني مطعم وابيه فخم وتوهقت فيها
منيف: تبيه اليوم
مشعل: لابكره اليوم خلاص راح الوقت
منيف : اممممممم روح مطعم الريف الايطالي اللي بشارع التحليه حلو وحركات بس غالي
مشعل:عادي ..بس لايكون زحمه
منيف:ايه زحمه وبكره الربوع يعني اعتقد زحمه
مشعل:طيب هات رقمه
منيف: اصبر بجيب لك الرقم وبرجع ادق
مشعل :اوكي
قفل وبعد ربع ساعه دق منيف واعطاه الرقم ..
اخذ مشعل رقم المطعم ودق عليهم..
رد عليه اللبناني:الو
مشعل:الو مطعم الريف
اللبنانيه:أي هو بزاتو
مشعل:اقول ياخوي ودي احجز طاوله بكره الساعه 8
اللبنانيه:بس نحنا مابنمشي بالحجز مابنظمن الزحمه
مشعل:بس انا بكره عيد ميلاد خطيبتي وابي اسويلها شي مرتب ودي تجهزون لي طاوله واول مااوصل ابي القى فيها العصاير والمقبلات وراح ادفع قيمة الحجز واذا جا زبون قبلي وتوهق على طاوله وكان فيه عطله للمحل بدفع قيمة العطله
اللبناني:انت بتأمر يااستاذ الساعه 8 الطاوله جاهزه
مشعل مبسوط:الله يسعدك ياشيخ بس علمني وين يصير المطعم
اللبناني : مابيضيع بشارع التحليه عند استديو ريما
مشعل: خلاص سجل الحجز بأسم مشعل بن خالد
قفل و دق على نجلاء..
نجلاء:الو
مشعل:هلا والله
نجلاء:هلابك
مشعل:خلاص بكره نطلع سوى نتعشى على الساعه 8 يناسبك؟
نجلاء:أي وقت عادي
مشعل:طيب وين امرك
نجلاء:بالبيت بعطيك الوصف
مشعل مستغرب:عادي امرك ببيتكم
نجلاء بسرعه:ايه محد راح يشوفك دق علي وبنزل لك
مشعل:طيب
:

:

بعدها بأقل من ربع ساعه في المستشفى بالتحديد..
فهد بأبتسامه ساحره: هاه سستر خلصو المرضى
السستر الفلبينيه وبلهجه مكسره: ايه هذا كان اخر مريض
فهد: اوكي خذي الباب معك
طلعت الممرضه وقفلت الباب وراها ..
وهو اخذته الافكار وغلب الحزن على ملامحه ومثل عادته اخذ سماعة التلفون وبدأ يدق رقم بيتهم اللي حافظه ومايعتقد انه راح ينساه بيوم وكل مره يكون عنده امل انه يسمع صوتها ويحرق شوي من الشوق اللي بداخله
ردعليه صوت رجالي :الو الو
فهد:.................
الصوت الرجالي:ماترد ياتعبان هذا انتم للحين على حركات قلة الادب ..وقفل الخط بوجهه بعنف
تنهد بحسره وضرب راسه بقوه على الطاوله وخاطب نفسه بعنف :ماتستحي على الشيب اللي براسك ماتستحي للحين تحب بوحده متزوجه خاف ربك بس انا مو شايب هي سبب شيبي آآآآآآآآآآآه يابي ارحمني من ذكراها ..
راح للمغسله غسل شعره وحرك راسه يمين ويسار بسرعه خصلات شعره الناعمه اللي يملاها شيب الحزن صارت تتحرك بحريه
ماراح اقول لكم ان فهد ورغم عمره اللي بالثلاثين والحزن اللي يرسم ملامحه الا انه اجمل شخصيات روايتي .. دكتور له هيبته اسمر البشره طويل شعره اسود كثيف ناعم حواجبه مرسومه وعيونه واسعه شفه محدده تزينها سكسوكه تزيد من شكله وقار والنظاره اللي على عينه تزيد من جماله اكثر واكثر أي مراهقه ممكن تنعجب بـ فهد وتعتقد انه بالعشرين رغم الكم شيبه اللي براسه..
:

:

:

:
الشرقيه الساعه 8:30 ..الراشد بالتحديد
تتمايل بمشيتها ريحة عطرها صوت كعبها عبايتها اللي مفصله جسمها شنطتها اللي لاصقه بـأبطها عيونها المكحله البارزه من تحت اللثمه كل هذا يلفت انتباه أي رجال ولو كان حجرنظارات الرجال لها كانت تزيدها غرور وثقه كانت تحس بالنصر كل مالمحت عين تتبعها بأعجاب..
دخلت محل ساعات وهي تناظر بساعه وتقلبها بيدها الناعمه..
جاها صوت من خارج المحل:ياليتني الساعه بس
لجين تطنش ولاكأنها تسمع
نفس الصوت:عطينا وجه ياحلوه
لجين تشد سحر: تعالي نطلع من هالمحل
تطلع من المحل وتمشي بسرعه
نفس الصوت :شدعوه عاد
لجين ولاكأنها تسمع ..دايم هذا اسلوبها ماتعلم المتحرش انه عادي عندها تحرشه وان لها غايه من هذا وان نفسها السيئه سولت لها هذا..
بعدها بساعه ونفس الولد مصر يشبكها ..عند المطاعم بالتحديد..
واقفه تطلب لها من ماكدونالدز..
نفس الادمي:ادفع عنك الحساب
لجين ناظرته:انت وش تبي ماتستحي على وجهك
الرجال: اويلي على الصوت الناعم..بدفع عنك بحكم الوطنيه شفيها
لجين بعد تفكير:بتدفع متأكد؟
الرجال :أي والله
لجين بخبث :طيب
ناظرت سحر:اقول تعالي فيه واحد ملزم يدفع تعرفين الشعب السعودي اهل الجود والكرم تعالي اطلبي اللي تبين
سحر تضحك: وش اطلب؟
لجين تناظر الفلبيني : عطني من كل وجبه حبتين وخلهم كلهم سوبر سايز
الفلبيني بعد ماسجل الطلب : 320 ريال
لجين تناظر بالرجال:ادفع
الرجال فتح محفظته ودفع ولاهمه
لجين انسحرت بجيبه والا هو ماهمها رغم وسامته وشماغه المكوي بعنايه وريحة عطره ماهزها بس جيبه هزها وبقوه
لجين تتصنع الخجل:ياربيه مين يبي ياكل هذا كنت ابي احشرك
الرجال وهو يتبسم:خلاص تعالي معاي نلف نوزعهم على الفقارا
لجين:وش قالو لك بطلع معك عشانك دافع 300 ريال
الرجال:اوعدك وعد رجال مااسوي شي نوزعها واوديك بيتكم..وقرب منها:مااخذ شي من بنت غصب
لجين بعد تفكير وبعد حسابات:اوكي موافقه
سحر تشدها:وش اللي موافقه مجنونه انتي
لجين تسحب يدها: عادي تجربه خليني ابي افلها
سحر بقهر:غبيه ماتوقعتك تتمادين كذا
لجين:اف لاتصيرين جدتي الثانيه بروح معه يعني بروح معه
اخذ كيسين كبار وناداها:بنت
التفتت له:بنت بعينك
الرجال يضحك:شيلي وانتي ساكته هع
لجين تضحك:اوكي
شالت كيسين كباروناظرت خويتها:اقول سحر ارجعي مع السواق
سحر ناظرتها وهي تروح وميته قهر من حركتها..
مشت معه وهم يمشون..
الرجال:بناديك بنت
لجين والوضع عندها عادي:لانادني لجين
الرجال: الله الله وش هالاسم الحلو
لجين من ذوقك ..وانا وش اناديك؟
احمد:ناديني احمد.لاني محسوبك احمد عبد العزيز
لجين:هههههههه لاخفيف دم
احمد:ايه دايم يقولون لي دمك شربات
لجين : بالله عليك
واخذوها سوالف من المصعد الى باب السياره الـ كاديلاك الرماديه الفخمه فتح لها الباب وركبت بغرور..
طول الليل كانو يوقفون عند المطاعم والشوارع اللي فيها ناس تشحذ ويعطونهم وجبات وكانو يفطسون ضحك على اشكالهم ..
بعد ماخلصو فيها احمد: اروح اشتري لناعشا ونجلس ناكل على البحر
لجين:ياذا البحر اللي ميتين عليه عيال الشرقيه
احمد:يعني ماتبين
لجين : لاعادي
راح اقرب مطعم شرى سندوتشات وببسي وراح وقف سيارته بالكورنيش وطلع الاكل تربع بكرسيه وجلس مقابلها..
لجين شالت لثمتها وابتسمت
احمد واللي انسحر ببياضها وجمالها:ماشاء الله كل هذا جمال
لجين واللي تدري انها حلوه وعاميها جمالها:لاتبالغ
احمد :أي مبالغه ياشيخه ماتشوفين شكلك بالمرايا
لجين :الا اشوف
احمد اعطاها الهمبرجر..ياللا كلي عشان تسمنين
لجين بسرعه:بسم الله علي
احمد يضحك:هذي عقدتكم يالبنات
بعد مااكلو اخذها للبيت وهي نازله ناداها بسرعه:لجين
لجين تنزل لمستواه وتناظره من برا:نعم؟
احمد:ابي رقمك
لجين بعد سكوت وتسوي فيها منحرجه:ماعندي جوال
احمد:اوما ماعندك
لجين تعطيه شنطتها:فتشها
احمد:لاشدعوه
لجين:ياللا مع السلامه
احمد:لجين دقيقه
لجين:وش بعد ..لايكون تبي الرقم الثابت
احمد فطس ضحك عليها:لا لا بس بكره المغرب بجي بحط شغله عند الباب الساعه 7 اطلعي خذيها طيب؟
لجين :طيب
دخلت البيت وهي مبسوطه يومها كان فله ..طبعاً تدرون ومتأكدين ان لجين عندها جوال ..احمد ماهو اول واحد يرقمها او يعاكسها وكل واحد طلعت منه بمكاسب ماديه مافيه رجال لمسها تاخذ منه اللي تبيه وبس تمل منه او يقرفها بسوالف هي ماتبيها تتركه وتدور غيره..
واللي لازم تلاحظونه من ورى اسلوب احمد انه نفس طقتها راعي بنات
:

:

:

:
الرياض يوم الاربعاء الساعه 1:30 الفجر ..
موقادره تنام كل شوي تقوم تفتح الستاره وماتشوف سيارته توقف شوي تنتظره ومايجي احد ترجع فراشها تتقلب الى ان ينتهي بها الحال عند الدريشه..بهذا الوقت ولما وقف عقرب الثواني على 30 ثانيه شافت سيارته
فز قلبها وهي تناظره ..
نزل من سيارته قفلها ودخل بيتهم ..كل هذا مااستغرق اكثر من دقيقتين
راحت فراشها وانسدحت: حالك صعب يالعنود وش هالغباء اللي براسك لك 4 ساعات بالغرفه عشان تشوفينه وهو نازل من السياره الله ياخذ غبائك نامي بس نامي
:
طالع من المطعم مع خويه الساعه 3 الظهر..
طلع نظارته الشمسيه لبسها وزادت شكله جمال..ناظر خويه وبكل ثقه:هاه وين رايح يابو الشباب
مساعد: بروح القهوه تروح؟
سلمان يناظر بساعته :لالا قهوه هالحين رح لحالك
مساعد:تعال معي يارجال
سلمان:لا مابي اشوى اني جاي بسيارتي وانت بسيارتك
ركب سلمان سيارته الـ جاكوار XK8 وبعد ماتعدى المطعم بشوي جاته اشاره حمرا وقف عند الاشاره وعلى يمينه وقفت سياره مرسيدس يسوقها هندي وفيها بنت ورى التفت هو يمينه بلامبالاه لقى البنت تناظر فيه جلس يناظرها مستغرب من نظرتها .. شوي الا والبنت منزله لثمتها وتتبسم له..سلمان لوى فمه ودار وجهه عنها..
سلمان رغم غروره بنفسه واعجابه الشديد بحاله الا انه ماكان راعي بنات نهائي يحب يكون انيق ويلفت الانظار لكن مايهتم للبنات ويكره البنت اللي كذا تذب حالها على الرجال ويستصغر البنت اللي تبدأ بالتحرش ويستصغر الرجال اللي ينزل لمستوى التحرش ببنت..
اول ماتحرك بسيارته :الحمد لله والشكر كأنها اول مره تشوف واحد حلو
:

:
بيت سلطان المتواضع والساعه تشير3:30
اخذت جوالها ودقت رقم العنود بنت عمها
العنود ترد بمرح: هلاوغلا حي هالصوت
نوره :هلا بك زود
العنود:وينك نواره يالقاطعه
نوره:ابد عنوده شسوي تعرفين سجن انفرادي
العنود:شدعوه بلاهياط عمي ماراح يقول شي لو قلتي بروح لبنت عمي
نوره:خلاص اشوف لي يوم
العنود: والله انا قلت لابوي خل نطلع سوى بهالصيفيه نروح المزرعه حنا وانتم وبيت عمي محمد
نوره بفرحه:والله ياليت عنوده طفشانين بالبيت
العنود تضحك:خلاص اكلمه نحدد يوم قبل تخلص الاجازه
نوره:عنوده ابي منك شغله
العنود:امري ياقلبي
نوره:ابي فستانك اللي لبستيه بزواج صديقتك زواج بنت خالتي قريب ومتوهقه
العنود بسرعه:الفستان وراعيته تحت امرك تعالي خذيه
نوره :انا مااقدر بشوف سلوم اذا يقدر
العنود :خلاص اوكي قولي لسلوم
نوره بخبث:اشوفك تدلعين اخوي
العنود تضحك:اقلدك
نوه تضحك:لالاتقلدين انا بس ادلع اخوي هههههههه
العنود:ان شاء عمتي خلاص بجهز لك الفستان
نوره:اوكي وانا بروح اشوفه
قفلت وقبل تطلع تشوفه بغرفته او لا فتح الباب رايق ويغني ..
راحت له بسرعه:اخوي حبيبي بعد عمري
سلمان يناظرها بنص عين:اخلصي شتبين بلا مجاملات
نوره: ابي شي من بيت عمتي ساره
سلمان:اسف
نوره:طلبتك
سلمان:قلت اسف
وجا يبي يمشي مسكته بقوه:طلبتك ياخوي
سلمان:بوسي يدي
نوره تصفق يده:وخر بس
سلمان :اوخر طيب لو تفحطين تحت رجلي مارحت
نوره:شدعوه
سلمان بعد تفكير:اروح وتكوي ملابسي اسبوع؟
نوره بقهر:اف استغلالي
سلمان:موافقه او اطلع غرفتي انام.؟
نوره بحزن:موافقه
سلمان بفرح:هيــــــــا انا رايح كلميهم يجهزون شغلتك مابي اوقف
اول ماطلع دقت على العنود تبلغها بس العنود ماردت عليها..
:

:

:
بيت فخم بأرقى احياء الرياض ..صوت العود العالي بالجناح الراقي غرفه بأثاث اوربي فاخر وصاله مستطيله صغيره تحمل كرسيين وطاوله وتلفزيون دولاب ملابس كبير يمكن التجول داخله مرتب بعنايه ورائحة معطر الملابس تفوح منه حمام (وانتم بكرامه) واسع يحوي جاكوزي دائري ستايله ساحر بلونه الازرق السماوي ..
جالس على الكرسي وبيده عوده ويغني ..ليله لو باقي ليله لعبد الرب ادريس وصوته الجميل يسحر أي مستمع اللي يسمعه مايعطيه 16 سنه يقول اكبر ..ولد كول بكل شي ولبسه دايم ستايل ..هذا فارس ولد محمد..
محمد ابو فارس تارك عياله على راحتهم على الاخرومدلعهم دلع بالغالب يمكن يوصلهم للتمادي ومهما حاول يقسى عليهم مايقدر ..
زوجة ابوفارس مثله واكثر بطريقة معاملتها لعيالها بعد سنين من الزواج وبعد علاج خلفو ولدهم الكبير فارس وبرضو بعد عناء وسنين خلفو بنتهم الصغيره حور اللي عمرها 7 سنوات بنت نعومه تاخذ العقل بيضه وعيونها عسليه فاتحه مره وشعرها بني كثيف ..
دخلت حور على اخوها: يثير(يصير) اجلس اسمعك
فارس يناظرها:يصير ياحلوه بس بشرط
حور بتدمر:وش شرطك اخلث(اخلص)
فارس:قولي يصير مو يثير
حور بصوت عالي:وانا وش قلت قلت يثير
فارس يضحك:ادري قلتي يثير ابيك تقولين يصير
حور وهي تمد الكلمه:يـــــــــــثيــــــــر
فارس فاطس ضحك:يابنت انا سمعت العالم تغلط بحرف السين مو الصاد والله انك غريبه
حور :لاني بنت محمد مو حي الله
فارس يناظر فيها:من وين لك هالكلام الكبير
حور:اسمع بنات الصف السادس يقولنه بالمدرسه واكيد اهم مو احسن مني بشي
فارس فطس ضحك:انا متأكد انك فاهمه معنى هالكلمه غلط
حور:اعطيك حلاوه وتتركني بحالي وتغنيلي
فارس :بدون حلاوه وش تبين اغني لك
حور تفكروبعد تفكير 5دقايق: غني محمد عبده الاماكن
فارس :تامرين امر
مسك العود وجلس يغني وحور مستانسه مره وهي تسمعه
:

:

:
وصل بيت عمه الساعه 5:30 لانه وقف بالمحطه وشاف خويه هناك واخذتهم السوالف
طق الجرس اكثر من مره محد فتح له وكان الباب مو مقفول قال لنفسه ياولد هذا بيت عمك عادي تفتح الباب وتدخل يمكن جرسهم خربان فتح الباب ودخل واول ماطاحت عينه عليه بنت حلوه على اليمين جالسه قبال المسبح على كرسي المرجوحه تتمرجح وحاطه سماعات بأذنها سحره هالمنظر وفتنه هالجمال بدون قصد صار يناظر بقوامها شعرها الناعم اللي كل شوي تمرر يدها البيضا عليه عشان ترفعه وصار كل شوي يتقدم خطوه وبلا شعور صار لاصق بالمرجوحه ويراقبها كأنه يشوف مسلسل لاويتبسم كل ماسمعها تغني مع راشد بصوت عالي كله نشاز مأثره عليها السماعات وصوتها العالي ..
العنود حست بطيف جنبها التفتت وشافت سلمان اللي لها سنين ماشافته وناسيه شكله ولاتدري مين هذا وتملك قلبها الخوف وبلا شعور صرخت صرخه مدويه آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآآآآآآآآآآآ
بسرعه سلمان حط يده على فمها عشان يسكتها :انا سلمان ولد عمك
بس العنود ماسمعته وش يقول من صوت الاغاني العالي بأذنها بس تشوفه يحرك شفته وتبي تتكلم مو قادره من يده رفعت يدها بسرعه شالت السماعات
سلمان بسرعه: اقول لك انا سلمان ولد عمك لاتفضحينا..وشال يده اللي على فمها
العنود تاخذ نفسها :مالت عليك انا من زمان عنك
سلمان بغرور:ادري صرت شاب يسحر
العنود:من زين شكلك الحين بعدين ماتستحي داخل بهالطريقه
سلمان :عادي بيت عمي بعدين لقيت الباب مفتوح ومحد رد على الجرس
العنود:استح على وجهك جاي لاصق بجنبي ماتشوف ماعلي عبايه
سلمان واللي حس فعلاً انه غلطان واستغل انها كانت ماتسمع:ناديت اكثر من مره مو ذنبي انك ماتسمعين
العنود:ولو حتى لو بيت عمك البيت له حرمه
سلمان ساكت ونظراته تتقلب على العنود
العنود: انقلع عن وجهي جالس يناظر فيني استحي على وجهك ..وبصوت عالي :مــــــــــــــــــاتشوف انه ماعلي عبايه رووووووووووح
سلمان بقهر:من زينك اناظر فيك الخدامه احلى منك
العنود واللي استفزها كلامه اشرت على نفسها: انا الخدامه ازين مني انقلع برا بسرعه
سلمان واللي حس ان كلامه استفزها : انا مو جاي لك يالشينه جاي اخذ غرض لاختي
العنود معصبه: والغرض مني ومابي اعطيك بوديه مع السواق وياللا انقللللللللللللللللللللع ودفته بقوه وبقهر
سلمان طلع من بيت عمه وهو معصب ركب سيارته وساقها بسرعه : انا تقول لي من زين شكلك انا تطردني وتقول لي انقلع وجاه صوت ضميره بسرعه:بس هذي بنت عمك ..سلمان يطرد الخير من قلبه ويخلي العصبيه تسيطر عليه :حتى لو بنت عمي
العنود استفزت الغرور اللي بسلمان هو دايم يشوف حاله رجل وسيم مايمكن لاي عين تتجاهل وسامته هو صح وسيم بس الغرور يقتل صاحبه
:

:

:

:
الشرقيه بنفس اليوم الاربعاء الساعه 7:5 م
طلعت عند الباب تناظر يمين ويسار ماشافت شي
احمد : تدورين شي
لجين فزت:بسم الله وش جايبك انت
احمد بخبث: جيت اجيب الشغله اللي تدورينها
لجين:ماادور شي محدد انت قلت بجيب لك شغله
احمد يطلع الجوال ويمده لها: لا انتي تدرين بجيب جوال
لجين بتصنع:ماادري ووخر عني مابيه
احمد :اقول خذيه بلا حركات بايخه جايبه من طيب نفس والله والفلوس ماتهمني
لجين قهرها غروره:قلت لك مابيه
جات تبي تدخل مسكها احمد مع زندها: لجين خذيه
لجين سحبت يدها بسرعه وناظرت فيه وعينها شوي وتطلع وبنبره كلها تهديد وتحذير:اذا تجرب تحط يدك علي مره ثانيه بتندم
احمد بسرعه:اسف ماقصدت خذي الجوال واعتبريه عربون اسف مايرضيك متعني وشاريه وشاري شريحه عشان اكبه زباله
لجين:...............
احمد:ياللا لجين لاتطولينها ويجي احد يشوفنا
لجين واللي تبي تخوفه بعد ماتجرأ ومسك زندها:ايه لايجي عمي ويذبحني ويذبحك
احمد:ايه مالها داعي
لجين :هات ..اخذت الجوال منه ودخلت
واول ماوصلت غرفتها وبعدها بـ دقيقتين بالتحديد سمعت صوت نغمة رنين ميوزك رومنسي دورت بالكيس ولقت الجوال ناظرت الشاشه لقت حمودي يتصل ضحكت من قلب وردت عليه
احمد:شفيك تضحكين
لجين :حمودي اجل
احمد:عادي امون
لجين :طيب ياللي تمون
احمد:لجين
لجين: ايوه
احمد: لجين انا اسف بجد قلت لك انا ماالمس بنت غصب كانت غلطه
لجين: سامحتك
احمد: تدرين لجين
لجين بدلع: what?
احمد:يالبيه
لجين:اخلص
احمد : شدعوه
لجين : بتقول اولا
احمد:بقول ياقويه
لجين:اسمعك
احمد: انا تعرفت على بنات كثار
لجين تقاطعه: ادري واضح هالشي
احمد : اصبري بكمل
لجين : الحين يقول بس انتي غير عنهم ههههههههه
احمد: لاوجع ماراح اقول كذا انتي هين غير احسك واحد من الشباب
لجين عصبت:كل هالحلا والانوثه وواحد من الشباب
احمد يضحك: لاوالله امزح المهم بكمل ادري تقولين اخلص بداخلك بس بكمل
لجين تضحك: يازينك فاهمني بجاملك وبقول كمل
احمد فطس ضحك:ياشينك ياام خنافر
لجين تلمس خشمها :والله خشمي حلو
احمد : والله وانا اشهد بس شلون يعني مااكمل سالفتي
لجين: كمل سالفتك البايخه
احمد : وين وصلنا
لجين بطفش: مطول
احمد يضحك:لا لا خلاص بكمل ايه عاد اقول لك تعرفت على بنات كثير
لجين: سمعتها اللي بعدها
احمد : لاتقاطعين كل مره تقاطعين بعيد من جديد هههههههههه
لجين متأزمه: والله شكلي ابتلشت
احمد: ايه بقوه عاد اقول لك عرفت بنات كثير وسكت
لجين:.........................
احمد يضحك:انتظرك تقاطعيني عشان اعيد واستفزك
لجين : ترى احمد اللي قالك انك خفيف دم نصاب
احمد فاطس: لاخلاص يابنت لاتغيرين رايك فيني بكمل كل بنت اعرفها اللي تسوي فيها اول مره تتعرف واللي تسوي بريئه واشكال واشكال
لجين:وانا
احمد يضحك:انتي هين مبين متعرفه على مليون غيري
لجين:وجع تراك ماتستحي
احمد:تو تدرين بس انتي غير تدرين ليه
لجين:ليه؟
احمد:مستغرب منك لاسويتي معجبه ولاشي ولاحتى تدلعين علي الا شوي وتضربيني بالجزمه مو المفروض انا خروف ودك تسحبين منه فلوس
لجين ضحكت وبعدها جاوبته: شوف دامك صريح وماتستحي بصير مثلك بصراحه انا لاتعرفت على خروف اسوي اللي انت قلته عشان اسحب منه فلوس هو غبي يستاهل بس انت غير انت مايحتاج اسوي شي عشان تدفع لحالك تسوي مايهمك فيها
احمد بأسف: ليه طيب تسوين كذا ماتخافين على نفسك
لجين : الا اخاف ويخسي واحد يلمس شعره مني بس اذا هو غبي يستاهل
احمد : اها يعني انا غبي
لجين: لاقلت لك انت ماتنتظرني استغفلك او استخف بعقلك
احمد : اها
لجين : ولاتسوي فيها تنصحني وتقول ماتخافين على نفسك وانت ذيب كنت جاي تستغلني
احمد: انا قلت لك ماالمس بنت غصب عنها ولاحظت لما لمست يدك كيف سويتي عشان كذا قلت لك ماتخافين
لجين: طيب
احمد يبي يغير الموضوع: روحي بس يالخدامه غسلي صحون مع امك هههههههههههههههه
لجين بحزن : امي وابوي ماتو بحادث
احمد واللي انصدم وانحرج : اسف
لجين: احمد بكلمك بعد شوي
احمد بسرعه ونبرة الاسف واضحه على صوته: اسف لجين ماقصدت والله
لجين : عادي شفيك ماتو وانا عمري سنتين حتى مااذكرهم بس جدتي تناديني بشوف وش تبي وبرجع اكلمك
:

:

:

:
الرياض الساعه 8 واقف عند باب بيت نجلاء بعد مادق ووصفت له البيت..
جات اول ماشافته ركبت معاه قدام وريحة عطرها ملت المكان مشعل اول ماجلست وشم الريحه ارتبك وصار يبالع ..
نجلاء: شفيك ساكت
مشعل وهو مركز بالطريق:ابد سلامتك بس انا من النوع اللي ماحب اتكلم وانا اسوق<<مشعل كان يكذب بهذا الكلام
نجلاء:اها يعني اسكت
مشعل:ياليت الى ان نوصل بس
اول ماوصلو وقف سيارته وقبل ينزلون التفت لها
مشعل بعد مااخذ نفس:معليه نجلاء ممكن تغطين وجهك
نجلاء بأستغراب : ليش؟
مشعل: كذا مااحب انزل معاك وانتي كاشفه استحي بصراحه تغطي واول مانجلس بالكبينه افتحي وجهك
نجلاء : طيب
غطت وجهها ونزل ونزلت هي تمشي بجنبه ..
مشعل يكلم نفسه: ياربي ليش وافقت اطلع معها وش جايب لنفسي انا
اول مادخل وشاف ديكور المطعم الراقي الهادي واللي عباره عن غرف وكل غرفه لها باب وديكورها راقي ابتسم عجبه المكان مشعل يحب الاماكن الهاديه ..بس كل ماشاف الغرف قال بداخله :الله ياخذك يامنيف
راح للمحاسب انا مشعل بن خالد حاجز هنا كابينه ..
اللبناني : أي هلا والله بس عطلتني ياسيدي متأخر ربع ساعه
مشعل يتبسم له:ماعليك اضبطك
اللبناني: مشكورياسيد مشعل ونادا بصوت عالي ..ياسليم تعال خذو للكبينه
مشى مشعل ومعاه نجلاء واول مادخلو الكبينه وجلس جات نجلاء وجلست بجنبه ..
مشعل يناظرها بأرتباك : ليه ماجلستي مقابلي
نجلاء : ابي احسك قريب مني
هنا وبعد هالكلمه قلب مشعل صار ينبض بقوه وحاول قد مايقدر يمسك ارتباكه مايبي يبين لها انه متوهق عشانه اول مره يجلس مع بنت كذا: طيب اوكي
نجلاء والحزن بدا على وجهها :مشعل تبي تتركني لانك ماتحس بأنك تحبني
مشعل: لا ماقلت كذا
نجلاء بعد مانزلت دموعها على خدها: مشعل انا حبيتك ومااتخيل اعيش بدونك
مشعل يكلم نفسه وهو يحس بأنفاسها قريبه منه: اعوذ بالله استغفر الله استغفر الله ..وجاه صوت الشيطان وضميره السيء : بنت بجنبك وانت مثل اللوح تحرك سوي شي البنت تبكي
واخيراً نسى ان يتعوذ من الشيطان وحكمته اللحظه ورفع يده مسح دمعتها وقربها له وبصوت محب: لاتبكين نجلا


عند ذلك الشارع وبعد هذا المفترق يطير الطائر وحده بلا رفقه فقد اختار ان يكون وحيداً ..وفي البعيد وحيث يطير تراه عيوناً ملئها الحزن وبكت بحسره لفراق لندم لألم يعتصر داخل روحاً سكنتها..
:
:
ابطال روايتي هذه قد يحاربون الشيطان وربما ينقادون له قد تعميهم ملذات الدنيا وتأخذهم الاهواء وربما العكس فلا تغرهم الدنيا ولا هواها فذكر الله يملىء صدورهم وعقولهم واعيه بشكل كافي ليميزون الصواب من الخطأ
:
:
هذه الايام كانت صعبه بالنسبه لي فحروفي كالشتات ضائعه تدور بداخلي وترهقني تحرم عيني النوم
لايمكن لي ان انام اتوسد وسادتي واتقلب بليلي عيوني تريد النوم وعقلي يشغله التفكير بأبطال روايتي بحياتهم بأفكارهم بما سينتهي عليه حالهم
:
:
كوب صغير يملئه الكاكاو الساخن وضعته قرب طاولتي ..
وهاهي اصابعي تنطلق لتكتب احداث جديده يحركها ابطال روايتي..
:
:
:
الفصل الثالث
الرياض سنة 1409للهجره وبأحد احياء الرياض الهادئه..
واقف بأحد الزوايه قرب بيت مهجور تقريباً من الساعه 5:30 الصبح ناظر ساعة يده شافها الساعه 6 تأفف وطلع هوا حار من صدره :متى هذي تبي تطلع
وبعد ماخلص كلمته الاخيره شافها طالعه فز قلبه من مكانه وابتسم ابتسامه لااراديه حس برجفه خفيفه بجسمه ..
راح بسرعه مشى وراها بعد ماابتعدت عن بيتهم بشوي ..
بصوت اقرب للهمس: شذا شذا
شذا تمشي بدون لاتلتفت لايمين ولايسارماتشوف الا دربها
فهد يكلم نفسه:ياحبني لك وبصوت عالي :شـــــــــذا
التفتت له شذا بسرعه وهي متخرعه ناظرت فيه شوي وبعدها قالت بصوت واضح:فهد وش جايبك هنا من الصبح ماتستحي
فهد:بشوفك وحشتيني
شذا تناظر يمين ويسار:روح بس لايشوفك احد
فهد يحرك كتوفه:مابي اروح
شذا وباقي شوي وتبكي:تكفى روح اخاف وحده من خوياتي تمشي بنفس الطريق وتشوفك
فهد:ماعلي من احد بوصلك لباب المدرسه
شذا بسرعه:نعم وش قلت انا ماحب هالحركات الف مره قلت لك
فهد:يعني ماتحبيني؟
شذا بقهر:احبك الله ياخذ قلبي
فهد: لاتدعين على قلبي
شذا بعد ماعدلت شنطتها: انا بمشي عنك انت ماعندك سالفه
مشت وهويمشي وراها وقفت مره ثانيه وطالعت فيه بقهر:فهد وبعدين
فهد بلا مبالاه:قلت لك بوصلك لباب المدرسه
شذا بعصبيه:وانا قلت لك لالالالالالالالا
فهد بروقان:لاتعصبين ياقلبي ..ومد لها يده:احمل عنك الشنطه
شذا تتنهد:ياربي منك خاف الله فيني عيب هالحركات
فهد يتبسم:والله بوصلك امشي وماعليك مني اعتبريني خمامي الشارع
شذا :تنكت اف منك ..وصارت تمشي بخطوات سريعه وكل ماالتفتت تلقاه وراها ويسرعه مثلها ..
بعد ماوصلت المدرسه وهي متجها لباب المدرسه مر من جنها عشان يكمل طريقه وبصوت شبه مسموع:احبك يابنت
:

:

:
الرياض سنة 1426للهجره يوم الاربعاءالساعه 9 مساءً
مطعم الريف الايطالي تحديداً..
نجلاء تشرب العصير بدلع وهي مستحيه..
مشعل: نجلا مستحيه مني
نجلاء وهي منزله راسها:لا مشعل عادي
مشعل يتبسم: ايه واضح
مد يده يبي ياخذ كلينكس من الطاوله وبنفس الوقت مدت يدها نجلاء ولامست يدها يده ..سحبت يدها بسرعه وبنبره هادئه:اسفه
مشعل حس بنبضاته تتسارع وحس ان اللحظه تخونه حاول يكون ثابت وتبسم : عادي
نجلاء: تصدق مشعل
مشعل:ايه اصدق قولي
نجلاء:حلمي اكمل دراستي برا ومعدلي عالي
مشعل: خلاص اذا معدلك عالي يمكن تحصلين على منحه من الدوله
نجلاء:لاموعالي لذي الدرجه ..وكملت كلامها بسرعه :انت ماودك تكمل دراسه برا
مشعل بسرعه:لالالا مااقدر اتغرب يوم واحد بعيد عن هوى الرياض كفيل انه ينهيني
نجلاء :ليه هذا مستقبل والدراسه برا افضل ..وشردت شوي وبعد ماتنهدت:ياليت اروح
مشعل:طيب اذا هذا حلمك روحي مع أي احد من اخوانك
نجلاء بحزن:مااقدر ميزانيتي ماتسمح وماعندي احد يروح معي
مشعل يتبسم: مالك الا الدراسه هنا
نجلاء انقهرت من كلامه بس حاولت تكون طبيعيه جداً
:

:
الرياض وبنفس الوقت والزمان ..
بيت عبد الله ابو نوف..
تصارخ بصوت عالي وهي واقفه عند باب غرفتها: جيب الجوال مالك شغل فيني
سعود: الالي شغل فيك وغصب عنك
نوف: عندي ابو هو مسؤول عني
سعود بقهر: انا اخوك الكبير
نوف تصارخ: ابي جوالي
سعود يقرب منها وبصوت عالي: مافيه جوال مين تكلمين لك ساعه واسلوبك بالكلام كان غريب وصوتك واطي
نوف تناظره بقهر: لاتشك فيني حرام عليكم انا تعبت كنت اكلم خويتي وموضوع خاص مافيها شي اذا مو مصدق دق اخر رقم
سعود بعد تردد ناظر الجوال وراح للمكالمات الاخيره دق اخر رقم وجاه الصوت الناعم : هلا نوف
قفل بسرعه وذب الجوال بوجهها وبصوت كله استفزاز: خذي جوالك ومره ثانيه خلك واضحه حركات الدس مانحبها
اخذت جوالها ودخلت غرفتها وبكت بقهر اسلوب اخوانها المبالغ فيه بالتعامل معها ومحاكمتها دائماً بتهمه واضحه او بدون تهمه
:

:

:
الشرقيه والساعه تشير للعاشره مساءً..
طلعت من الحمام وانتم بكرامه شعرها المبلول كان يزين وجهها الناعم صوت الجوال اللي اهداه لها احمد ..
راحت للجوال وكان احمد المتصل ..
لجين:هلا والله
احمد:هلابك زود..اخبارك
لجين:بخير وانت اخبارك
احمد:بخير..وينك ادق ماتردين
لجين:كنت اتروش
احمد:اها طيب اكلتي.؟
لجين بأستغراب: لا ليه
احمد:طيب انا على الباب جايب لك عشا
لجين بسرعه:ليه تجي عند البيت مجنون لو شافك احد
احمد:تفقدت الطريق مافيه احد واطلعي خذيه تركته على الباب ومشيت وبالعافيه
لجين:الله يعافيك ومشكور على العشا
احمد:العفو
بعد ماقفلت طلعت ولقت الكيس عند الباب اخذته ودخلت البيت جهزت اللي بالكيس عشان تاكل مع جدتها..
:

:

:
الرياض الساعه 1 بعد منتصف الليل يوم الخميس..بالمستشفى
خلص دوامه وكان طالع ..مشى بممر قسم الطوارىء متجه للباب سيارته كانت واقفه هناك..
وهو ماشي مر بشكل سريع وفجأه نبض قلبه بسرعه حس برعشه غريبه احساس له سنين ماحسه..
التفت بسرعه يبي يشوف السبب..
لقى مجموعه من الناس حريم ورجال والممر زحمه..
استغرب هالموضوع وقرر يطنش..
ركب سيارته وساقها بسرعه وبدون احساس لقى نفسه واقف بشارع مقابل لبيت حبيبته شذا ..كان يناظر البيت بحزن يتذكرها يتذكر ضحكتها طيبة قلبها قوتها تماسكها حشمتها ..
حس انه متحطم فراقها وبعدها حطم كل شي فيه..
فجأه حس بلل بخده اليمين رفع يده ومسح على خده ولقى دمعه فرت غصب من عينه..
وبدا حواره مع نفسه:تبكي يافهد شف كم عمرك رجال والشيب مالي راسك تبكي كأنك طفل مو قادر تنساها ماعاد فيه حريم بالعالم خلاص ..تنهد وطرد هالافكار من راسه ..ساق سيارته للبيت بسرعه واول ماوصل البيت راح الحمام وانتم بكرامه حط راسه بالمغسله غسل شعره بالمويه رفع راسه وصار يحركه يمين ويسار والمويه تطير مغمض عينه بقوه ويبي يطرد كل الافكار اللي براسه
:

:
مر اسبوع على مكالمات مشعل الدائمه لـ نجلاء ومراقبة العنود لولد الجيران ..لجين ومكالماتها مع احمد اللي تستمر لساعه او ساعتين ..
:

:
الرياض 1426 للهجره يوم الاربعاء الساعه 10 صباحاً ..
طالعين من البيت وبيدهم شناط الرحلات الصغيره ..
العنود بعد ماشافت سيارة اخوها من خلف زجاج الباب طلعت من الكراج ووقفت عند المدخل الرئيسي للباب مشت بسرعه : ياللا يا ماما جا مشعل
ام مشعل وقفت وشالت شنطتها وكيس مليان اكل وخرابيط : مشينا ..وناظرت بالشغاله : خذي باقي الاغراض
الشغاله : حاظر مدام
طلعت العنود وجاها مشعل ياخذ شنطتها ..وهي تعطيه الشنطه سحرها منظر ولد الجيران وهو طالع يركب سيارته ..
ولد الجيران وهو يفتح باب سيارته عشان يركب رفع يده وبصوت عالي : السلام مشعل
مشعل التفت وهو مبتسم : وعليكم السلام هلا ياسر
ياسر : هلا بك زود ..اخبارك
مشعل : بخير ياجعلك بخير وراك ماتسير
ياسر : ابد ياخوي شوية مشاغل
مشعل : الله يعينك
ياسر : يعين الجميع ياللا فمان الله
مشعل : فمان الكريم
وبعد ماركب ياسر سيارته وتحرك ..لف مشعل للعنود وضربها على راسها : احلفي عاد
العنود ببراءه : وشو
مشعل وهو يأشر على السياره : اركبي بس ماباقي شي وتسلمين على الرجال معي خير ان شاء الله
العنود بأرتباك : عادي
مشعل : حلوه عادي المفروض تركبين السياره على طول اول ماشفتيني اكلمه
العنود نزلت راسها : ماكان قصدي والله
مشعل بهدوء: طيب اركبي
:

:

:
وبنفس الوقت وببيت ابو سلمان بالتحديد ..
نوره بحماس: ياللا يابنات نروح السياره
عهود : انا متحمسه مره
ريم : وانا بعد
نوره : مين بيركب مع ابوي ومين مع سلمان
نوره : بركب مع سلمان وبجلس قدام بعد
عهود : لا والله
نوره راحت تركض بسرعه : كل واحد وشطارته
عهود : اف منها
بعد ماتوزعو بالسيارات ..امهم والهنوف بسياره ..و باقي البنات مع سلمان بالسياره تحركو بطريقهم للمزرعه
سلمان يناظر اخواته من المرايا اللي بالسياره : وراكم نشبتو كلكم عندي
الاخوات بصوت واحد : انت احسن
سلمان وهو عاقد حواجبه : بالله عليكم
نوره بسرعه تمد يدها للمسجله وتشغلها ..
سلمان يتبسم : اها انا احسن بتقلبون السياره مسخره هاه
نوره والابتسامه شاقه الحلق: لا شدعوه ياخوي
سلمان يهز راسه : انا من شفتكم ناشبين عرفت ان نشبتكم مو لله ..بعدين وش شنطة السفر حجم اكس لارج اللي جايبينها معكم ذي
نوره تضحك : هذا الله يسلمك قلنا بدال لانحمل كل وحده شنطه صغيره ونسوي فيها البنات الحركات وزحمة شنط على الفاضي جمعنا اغراضنا كلها بشنطه وحده
سلمان بقهر : الله يفشلكم انا مالي شغل فيها لايجي على بالكم بحمل هالشي الكبير اللي جايبينه معكم
نوره تناظر اخواتها : حنا نشيلها يابنات صح
خواتها بصوت واحد : صح
سلمان متنرفز : ياربي منكم مافيه برستيج
نوره بلا مبالاه : خلينا البرستيج لك
علت على صوت المسجله .. وعلى انغام اغنية عبد المجيد عبد الله كانت تناظر الشارع بفرح وتشوف السيارات اللي رايحه واللي جايه ..كتمها جو البيت ومو مصدقه انهم رايحين يقضون لهم يومين بمزرعة عمها ..
بعد نص ساعه بالتحديد وصلو الى المزرعه ..
فتح البواب الباب الكبير اللي دخلت منه السياره ..
واول مااستقرت السياره ناظرت نوره بالبنات : ياللا نشيل شنطتنا
سلمان بسرعه وهو منقهر: اقول ضفي وجهك انتي وياها انا بشيلها
البنات بصوت واحد : ياسلام عليك.. وراحو يركضون لداخل الفيلا
المكان كان عباره عن مزرعه كبيره مره تتوسطعها فيلا واسعه..
عباره عن دور ارضي فقط ..الفيلا 4 غرف نوم ومجلسين واحد للرجال والثاني للنساء ومطبخ داخلي وخارجي و3 حمامات وانتم بكرامه وصاله كبيره
الباب الرئيسي للصاله كان يطل على مدخل السيارات والمزرعه مباشره ومجلس الرجال كان يطل على الاسطبلات والمطبخ الداخلي كان له بابين ..باب يطل على المطبخ الخارجي وباب يطل على المسبح الكبيــــــــــــــر وعلى يسار المطبخ كان باب مجلس الحريم وكلها تطل على المسبح وبنهاية المسبح باب يطلعنا على المزرعه على طول ..
المسبح كان راقي جداً وعلى طول كان مملوء مويه والمويه بأغلب الاحيان تكون دافيه عمق المسبح كان تقريباً 10 متر .. حول المسبح فيه كراسي طويله وفيه بالمساحه الفاضيه يسار المسبح طاولة طعام ناعمه تكفي 8 اشخاص..
اول مادخلو مجلس الحريم كانت جدتهم جالسه وتهمز رجولها : هلا والله ببنات وليدي الحلوين
بنات ابو سلمان رحبو فيها بحب وكل وحده قربت منها وطبعة بوسه على جبينها
الجده : الله يرضى عليكم يابنات
العنود وهي تضحك : ماشاء الله سنعات
نوره : وخري بس
ريم بدفاشه : والله من يومنا سنعات ونعرف السنع
العنود تغيرت ملامح وجهها مستغربه رد ريم عليها وبصوت هادي : انا امزح
نوره بسرعه وهي تبي تتدارك الموضوع : ههه حتى ريومه تمزح بس هي كذا اسلوبها
ام مشعل تناظر بالعنود : روحي يالعنود مع بنات عمك للغرفه رتبو اغراضكم وانا بروح مع مرت عمك
العنود : طيب ماما
قسمو الغرف الـ 4 غرفتين للحريم وغرفتين للرجال الغرف اللي قرب مجلس الحريم للحريم واللي قرب مجلس الرجال للرجال وكل غرفتين كان يجمعهم ممر بحمام وانتم بكرامه ..الغرف كانت عباره عن 3 اسره ناعم دولاب ملابس كبير وواسع تسريحه ناعمه ..
اول ماوصلت العنود مع البنات الغرفه ..
سكتت شوي وهي تناظر الغرفه وبعدها قالت : مثل ماانتم شايفين الغرفه 3 سراير وحنا 5 يعني فيه من راح ينام على مراقد
ريم بسرعه : انا مابي انام على الارض
نوره وهي مقهوره من اسلوب اختها : خلاص انا انام على الارض عادي
العنود بأبتسامه : خلاص نواره افرش بجنبك ننام انا وانتي على الارض وش رايك
نوره بأبتسامه : خلاص اتفقنا
تقاسمو البنات السراير وطلعت العنود المراقد من الدولاب الاخير وبدت تفرش لها ولبنت عمها وباقي البنات يرتبون اغراضهم بالدولاب ..
الغرفه الثانيه كان سرير لأم مشعل وسرير لأم سلمان وسرير لأم فارس
والجده ماتنازلت عن النوم بمجلس الحريم خخخخخخخ
:

:
غرف الرجال .. الغرفه الاولى سرير لأبو مشعل وسرير لأبو سلمان وسرير لأبو فارس .. والغرفه الثانيه سرير لمشعل وسرير لسلمان وسرير لفارس ..
فهد وهو واقف بالممر اللي يجمع الغرفتين وشوي يناظر يمين غرفة اخوانه وشوي يناظر يسار غرفة عيالهم ..
فهد بصوت عالي : احلفو عاد وانا وين انام لايكون بكون الفقير اللي ينام على الارض
مشعل وهو يتبسم : افا عليك ياخالي فيه سرير بالمخزن الحين اروح اجيبه لك واضبطه وافرشه
فهد وهو يفرد عضلاته : ايه خلكم حلوين معاي والا ترى اعذبكم بهاليومين انا ماخذ اجازه اطراريه من المستشفى عشان ارتاح مو عشان انام على الارض واتكسر
مشعل يحك شعره : طيب بس تعال معي نجيب السرير مايرضيك اشيله لحالي
فهد : تو قبل دقيقه تضرب على صدرك وحالتك حاله
مشعل منحرج: بس اتوقع انه ثقيل ومو مفكوك
سلمان واللي مبسوط بالعضلتين اللي بصدره : اقول انا بجيبه بس تعال ورني وينه
راح مشعل مع سلمان واضطرو يفكون جزء من السرير عشان يقدرون يمررونه عبر الباب وبعد ماوصلو بالسرير للممر اللي يجمع الغرفتين وبصوت واحد : وين نحطه
ابو سلمان : هنا
فارس : لا هنا
مشعل : انا مع فارس بنحطه بغرفتنا
ابو مشعل : لا لا حطوه بغرفتنا
سلمان : لابغرفتنا
فهد كان يناظر الوضع وساكت
مشعل : وش رايك خالي وين نحطه
فهد :والله مدري ماتفرق حطوه بأي مكان
سلمان : خلاص غرفتنا
ابو فارس بسرعه : لا لا مايصير لازم ينام معنا
سلمان : مايصير دامه عزوبي يعني ينام معنا لو يصير عمره 50 سنه
فهد يضحك : ايه صح انا توني صغير بنام مع الشباب ..وناظر اخو بطرف عين : وعزوبي
ابو فارس يضحك : ايه يالعزوبي روح نام معهم
ابو سلمان وابو مشعل يضحكون بصوت واحد
ومشعل وسلمان يدخلون السرير للغرفه ..
وبعد مارتبو الاغراض وكل شي بدا الترتيب للغدا
:

:

:
الشرقيه بنفس اليوم والساعه تشير للـ 12:30 ظهراً
جالسه على السرير والجوال على اذنها وبصوت عالي: احمد قلت لك مااقدر يعني مااقدر
احمد منقهر: صار لي ساعه احاول فيك لجين لاتصيرين كذا
لجين متنرفزه : احمد شفيك اقولك مااقدر اطلع من البيت
احمد : على مين لجين تقدرين انا ادري
لجين: وش اللي على مين
احمد : اعرفك انا والله انك تقدرين بس انتي ماتبين
لجين بثقه : لامااقدر
احمد بأصرار : الا تقدرين يعني بالليل والوقت متأخر تقدرين تروحين الراشد وغيره الظهر والوقت بدري ماتقدرين
لجين : اف منك احمد مابي اطلع
احمد : لجين اخر كلام نص ساعه وانا عندك تجهزي
لجين بسرعه : احمد
احمد يقاطعها : مافيه عذر جاي يعني جاي بتغدا معك
لجين : طيب
احمد وهو يتبسم : أيـــــــــوه خلك سنعه
لجين : مالت عليك
قفلت الجوال وقامت تروشت بسرعه ولبست رفعت شعرها بطريقه ناعمه تكحلت حطت قلوس ناعم لبست عبايتها وكالعاده ملتها عطر ..وراحت لجدتها : جدتي انا طالعه
الجده بتعب: وين رايحه
لجين: بروح بيت صديقتي عازمتني على الغدا انا وكل صديقاتي
الجده بطيبه : طيب يابنتي خذي بالك من نفسك
لجين : ان شاء الله
شوي وسمعت صوت الجوال اخذته من الشنطه كان احمد المتصل اعطته بزي وطلعت له بسرعه ..وبعد ماركبت السياره وتحرك ناظرت فيه : انت ليه عنيد
احمد : انا كذا
لجين : اول مره اشوف واحد يعامل بنت كذا
احمد : والله انا لاجيت اسوي احبك ولا خاق معك وابي احد يتغدا معي عاد مالقيتك الا انتي
لجين تضربه بالشنطه : ياثقل دمك استحي على وجهك
احمد : مستحي قبل اشوفك
لجين : وش قصدك
احمد : امزح معك الحين تقلبها زعل طالعين نتغدا وننبسط
لجين : بس نتغدا وترجعني البيت
احمد وهو يضحك : هذا بعدك
لجين : مااتفقنا كذا
احمد : انا اتفقت مع نفسي
لجين بكل نعومه وبراءه : ياربي منك
احمد : اللي يسمعك كذا يقول وش هالبنت البريئه مايدرون ان تحت السواهي دواهي
لجين : احمد ترى بجد بزعل
احمد : لاخلاص بس هذا الحق
لجين : تبي تستفزني؟
احمد : لا لا امزح خلاص بسكت
لجين : أيــــــــــــــــوه
احمد يضحك: لاتقلديني
بعدها بنص ساعه ..وبمطعم ابو نواس بالتحديد..
اخذ قطعه من الدجاج وغمسها بالحمص اللبناني ..اكل شوي وبعدها ناظرها ..
احمد بتساؤل : لجين انتي من زمان عايشه مع جدتك بس
لجين : ايه من لما توفى جدي بس ترى عمي يجينا دايم
احمد : خل عنك بس لايجي ولاشي انا مو الذيب المفترس اللي ودك تخوفينه برشاش فاضي
لجين نزلت راسها وبعد اقل من دقيقه رفعته ونظرة الحزن بعيونها : انا ماعمري حسيت انه فيه احد بهالدنيا مهتم لي من وعيت على هالدنيا وجدي وجدتي كبار يبي لهم من يشيلهم وخوالي بالرياض كل(ن) لاهي بشغله وعياله وعمي يجي لنا كل شهرين مره محد يهتم لي عايشه او ميته حتى مطالبي مافيه من يلبيها جدتي عايشه على فلوس الجمعيه اللي يادوب يكفونا اكل ومصرف بس انا قلت دام هالحياه كذا تسوي فيني انا لازم اتصرف
احمد : وتصرفك صح بنظرك هذا اللي تسوينه غلط
لجين واللي اول مره تتكلم بهالصراحه : اموت يعني والا اجلس اشحذ عشان البس والا تبيني ادق على خوالي اقلهم انا انتظر مساعدتكم عشان حالتي لله وانتم ماتدرون عني والا اطلب عمي البخيل الاناني اللي ماهمه الا نفسه
احمد : لجين انا بعد الحياه ظلمتني امي ماتت وانا صغير وابوي تزوج وحده ماتخاف الله فيني وطول عمره مايهتم لي وحرمته تضربني وكل ماشكيت عطاني فلوس يسكتني وللحين مغرقني فلوس ومع هذا ماغلطت وقلت يستاهلون اغلط
لجين بتذمر : شف مين يتكلم ..يعني الولد يتحرش ببنات يكون صح؟
احمد وهو يبتسم لها بهدوء : واللي يقول لك يالجين اني مو راعي بنات والله العظيم كل اللي تعرفت عليهم بحياتي 3 بنات وانتي من ظمنهم وحده هي اللي عاكستني والثانيه دقيت رقمها بالغلط وانتي كنت مع اخوياي وقالو لي لطشها بالكلام لانهم شافو لبسك وشكلك ومالومهم بس انا حبيت اسوي فيها ذيب خصوصاً يوم شفتك انسانه مايهمها شي
لجين واللي استفزها كلامه : الا يهمني بس مالقيت طريقه ثانيه والا انا ماحب هالطريقه
احمد : ماتحبين وانتي لبسك يلفت حتى الحول
لجين بعصبيه : اوه احمد مين حطك وصي علي
احمد : طيب طيب ..انتي ليه ماكملتي دراستك
لجين : معدلي مايسمح ولاعندي اخذ دورات او اروح جامعه بفلوس
احمد : طيب سجلي بمعهد لغه انا بدفع تكاليفه
لجين : ............
احمد : اعتبريني اخوك
لجين بقهر : لاشكراً مابي اخوه بعد هالعمر
احمد : طيب صديقك حبيبك اللي تبين ..انتي ماخذه فلوس قبل من غيري يعني عادي
لجين واللي استفزها كلام احمد بزياده وقفت واخذت شنطتها : قوم ودني البيت
احمد بصوت ثابت : اقول انثبري انا مو قصدي بس انتي سياستك غلط مو كل واحد بيسكت عشانك تسحبينه فلوس بحجة انه خروف ويستاهل فيهم من راح يذلك على الريال او يمكن يوصلك لشي انتي ماتبينه انتي مهما كنت قويه بالاخير بنت وينضحك عليك
لجين :............
احمد يكمل : طيب اسمعي انا بلبي احتياجاتك وانتي بطلي حركاتك اللي بتوصلك لطريق مسدود
لجين مستغربه : وش تستفيد؟
احمد : والله ولاشي ولاابي منك شي بس حسيتك وحيده بهالدنيا وكسرتي خاطري
لجين توقف مره ثانيه : انا مو منتظره شفقه منك
احمد يمسكها ويجلسها غصب : اقول اجلسي انا ماقصدت كذا بعدين حتى انا وحيد بهالدنيا امي الله يرحمها وابوي مايدري عني واخوان ماعندي
لجين : طيب
احمد : خل نتفق تكونين لي ام وصديقه وانا اكون لك اب وصديق وش رايك؟
لجين : وش تستفيد
احمد : يابنت الحلال مابي استفيد شي والله يالجين مابي منك شي بس الام دورها تعطي حب وحنان واهتمام والاب دوره يعطي رعايه واهتمام ويصرف بعد وبكذا يكون الموضوع صح
لجين وبعد تفكير وبعد ماحست ان هالشي يمكن بجد يبعدها عن الحاجه لفلان وغيره : اوكي
احمد : بس بشرط
لجين : بدينا بالمذله
احمد بأسلوب مرح : انا ابوك يابنت
لجين تقلده : وانا امك ياولد
احمد يضحك : اشرط او لا ؟؟
لجين : اوكي اشرط
احمد : تبطلين حركاتك هذي ومشاويرك كلها انا باخذك لها وماتطلعين الا بشوري
لجين واللي ماعجبها : لا والله
احمد : هذا دور الاب تبين والا كيفك روحي بحالك والوجه من الوجه ابيض
لجين واللي برايها انه يذلها وهي ماتحب احد يذلها : ايه بروح
احمد وقف بسرعه : انا ابي مصلحتك صدقيني ماراح ازيدها عليك ولاامنعك من شي بالعكس بدلعك بس مالها داعي يتحرش فيك الف واحد
لجين فكرت تجرب السالفه وان ماعجبتها مايقدر احمد يجبرها : اوكي موافقه
:

:

:
الرياض ..المزرعه يوم الأربعاء والساعه تشير للـ7:30 ..
الرجال كانو بالمطبخ الخارجي يجهزون للمشوي اللي بيسونه للعشا..
سلمان كان لحاله بالمطبخ الداخلي ..
مسك الباب المطل على المطلخ الخارجي :بقفل الباب بنادي اختي
اغلب الرجال:اوكي
بعد ماقفل الباب نادى نوره اللي شافها عند المسبح قبل يقفل الباب :نوره تعالي شوي
جاته نوره بسرعه: ايوه
سلمان بخبث : روحي نادي بنت عمتك واخواتك يساعدونك جهزو للعشا وسووى لنا سلطه انا بروح المطبخ الخارجي وانتي ناديهم
نوره:اوكي بس انت اطلع
سلمان :اكيد بطلع نادي بنت عمتك معكم
نوره:اوكي
راحت نوره بسرعه اما سلمان راح قريب الثلاجه وماكان واضح انه بالمطبخ وكل امنيته كان ان العنود تجي قبل خواته ..
:

:
اول مادخلت نوره مجلس الحريم كانت العنود جالسه مع جدتها..
نوره:عنودي روحي المطبخ عشان نجهز سلطه وخرابيط للعشا وانا بروح الغرفه انادي باقي خواتي
العنود:اوكي تم
قامت العنود بسرعه وراحت المطبخ ..
اول مادخلت ولمحها سلمان انتظرها تجي عند الثلاجه وهالشي كان متوقعه بما انه حدد طلبه وقال ابي سلطه..
سوى فيها يضبط حبل جزمته ..ووقف بسرعه اول مافتحت الثلاجه ..
العنود تخرعت وصارت تناظره بخوف
سلمان : خير جايه المطبخ كذا بدون عبايه ماتدرين الرجال هنا بعدين فلنفرض انهم بالمطبخ الخارجي انا بعرضي وطولي ماشفتيني او تسوي فيها ماشفتي صحيح ماتستحين بسرعه انقلعي حطي عليك شي
العنود من خوفها والاحراج اللي صادها ماعرفت ترد عليه ونزلت دمعه من عينها ..
طلعت من المطبخ تبكي وجسمها يرجف من الربكه مشت قريب المسبح تبي توصل للكرسي وتجلس ..بس حست بدوخه فضيعه طول عمرها مدلعه ومدلـله اول مره احد يعاملها بهالقسوه..
الدوخه اللي براسها افقدتها توازنها وطاحت ضرب راسها بحد المسبح وهوى جسمها بالمسبح ..
نوره وهي جايه مع اخواتها شافو هالمشهد ..
ريم تصارخ:البنت طاحت
نوره مرتبكه:ياربي مااعرف اسبح
عهود:بسرعه تصرفي
نوره راحت المطبخ تركض وبصوت مسموع:بنادي سلمان
راحت المطبخ طقت باب المطبخ الخارجي وبصوت عالي :سلمان تعال ضروري
سلمان جا وهو ماله خلق:وش تبين؟
نوره مرتبكه: العنود بسرعه طاحت بالمسبح وماتتحرك
سلمان بسرعه:وشو ..وراح يركض للمسبح وبدون تفكير رمى نفسه بالمسبح بكل ملابسه ..نزل لها وهي بقاع البركه مسكها وطلع بسرعه راح لدرج المسبح ومسكها بكل قوته ورقى الدرج وشالها سدحها بجنب المسبح وصار يهزها : عنود عنود ..وجهها كان شاحب وبنفسجي نوعاً ما ..حس بقلبه ينبض بقوه ومرتبك مره ..
نوره تبكي:ياربي بتموت البنت
سلمان رفعها حط رجلينه تحت ظهرها رفع ركبتينه شوي ومسك دقنها بيده وقفل خشمها باليد الثانيه وقرب فمه من فمها وصار ينفخ ينفخ ويهزها ..
وعنود ماتستجيب له..
سلمان يصايح على نوره: روحي بسرعه جيبي عبايه ولاتقولين لأحد ..
راحت نوره بسرعه ..
حط يده تحت راسها وصار يضغط باليد الثانيه على صدرها وهو باقي شوي وينهار حاس انها تموت بين يديه ..سحب يده يبي يرجع يسوي تنفس صناعي وشاف يده مليانه دم فتح عينه على وسعها :وش هذا
ريم وهي خايفه: ضربت بالمسبح وهي طايحه
سلمان بصوت يائس:عنود لاتموتين ..مسح يده بثيابه بسرعه ..ورجع حط فمه على فمها يسوي لها تنفس صناعي وبعدها ضرب على ظهرها ..
كحت العنود وطلع شوية مويه من فمها ..
سلمان بفرح:ايوه يالعنود ياللا ..
كمل يحاول يخليها تتنفس ويضرب على ظهرها ..
وهي تكح وتتنفس بصعوبه مره
جات نوره وبيدها العبايه..لف سلمان العنود بالعبايه الراس اللي حق خواته..وشالها بسرعه ..
وهو يوقف: روحو جهزو للعشا ولاتعلمون احد انا بدق على جوال نوره اطمنكم مابي عمتي تعرف تروح فيها
وطلع يركض والعنود بيده تتنفس بصعوبه
حطها بالكرسي الخلفي وشغل سيارته وساق بسرررررررررررررعه
وكل شوي يلتفت :انا اسف يالعنود انا حمار وغبي يارب مايصير لك شي
:

:

:
الشرقيه 1405 للهجره الساعه 11 ليلاً ..
جالسه على السرير متوسده مخدتين كبار وبحظنها طفلة الايام الصغيره
وهو واقف بجنبها يناظرون بالبنت بحب وحنان..
نوره وهي تتأملها : سالم
سالم: امري
نوره:مايامر عليك عدو..ودي اربيها احسن تربيه
سالم:ان شاء الله
نوره وهي تتبسم:ابيها تكون احسن البنات والكل يمدح بأخلاقها العاليه ابيها فاهمه واعيه مؤدبه والحشمه تملاها
سالم:امين الله يسمع منك
نوره تضحك:بس مابي اجيب غيرها
سالم :ليه لا نبي نجيب لها اخوه كثر 5 بنات و6 اولاد زياده
نوره :شدعوه سالم
سالم:ايه ابي اترس البيت عيال
نوره:لا ولد زياده وخلاص
سالم:لا قلت لك 11 زياده بسويهم فريق كره
نوره بتعب:باقي مانسيت التعب
سالم:خلاص اذا نسيتي نخلف غيرها
نوره:اهم شي عندي بنيتي ودي اربيها احسن تربيه..وناظرت سالم بحب:تتوقع بشوف عيالها
سالم :ان شاء الله ..الله يمد بعمرك وتشوفين عيال عيالها


:

:
الشرقيه سنة 1426 للهجره الساعه 7:45 مساءً
لجين فاطسه ضحك:احلف عاد اقول ودني البيت من الظهر وانا معك
احمد: مالي خاطر ارجعك البيت مسليتني
لجين بقهر :ليه ارقوزه عندك
احمد:لاحاشاك
لجين: أيـــــــــــــــــــــوه
احمد يضحك:قايل لك لاتقلدين..وبعد تفكير :اوريك بيتنا؟
لجين بسرعه:نعم نعم ودني البيت لااصفقك
احمد يضحك:احلى ياقويه
لجين:جد احمد خلاص ودني البيت اخاف جدتي مااكلت للحسن
احمد:خلاص نشتري اكل ونروح لها
لجين:شفيك تتكلم بصيغة الجمع
احمد مبتسم على الاخر :بنزل معك
لجين تضحك بأستخفاف: لايكون فاكر جدتي خرفت عندها شوية تركيز تسألني وين رايحه ومنين جايه
احمد يفكر:شوية تركيز هاه اقول جاي معك يعني جاي معك
لجين: والله احمد باقي فيها عقل والله
احمد :طيب خلاص نشتري لها عشا واوديك البيت ولاتنسي فكري بمعهد تسجلين فيه
لجين:حاظر بابا
احمد:اشوفك صدقتي
لجين:ايه بعيش الدور
:

:

:
الرياض ..الساعه 8:00مساءً بالمزرعه..
دخل ابو فارس المطبخ الداخلي شاف بنات اخوه يجهزون السلطه والعصير..
ناظر فيهم :وين العنود عنكم
نوره منزله راسه بالصحن تقطع خيار وهي تبكي من خوفها
ريم بسرعه: تتروش الحين شوي وتجي
ابو فارس :اها طيب اغسلو لنا صحون عشان نحط المشوي فيها ..
ريم:ان شاء الله عمي
وراح للمطبخ الخارجي وقبل يقفل الباب:الاوين سلمان
ريم:راح يشتري لنا شغله من الصيدليه
ابو فارس مبتسم:اها اوكي
عهود:الله يفشلك مالقيتي غي هالعذر
ريم:ايه الصيدليه بعيده وهذا شي ضروري يطلع عشانه
عهود تناظر ريم:شوفي اختك مره زعلانه
ريم:الله يستر وترجع عنود بالسلامه انا اللي ماحبها زعلني منظرها وشكلها حسيتها ميته..
ماخلصت جملتها وسمعت صوت مناشق نوره

:

:
وبجزء ثاني من المزرعه كان ماسك جواله وابتسامته مغطيه وجهه
قالها وهو يمشي وبصوت خافت :وحشتيني
نجلاء:انت بعد وحشتني
مشعل: تمنيتك معي
نجلاء مبسوطه:جد مشعل اشتقت لي
مشعل: أي والله ..
نجلاء:......
مشعل: اقول لك شي
نجلاء :قول
مشعل: احس اني بديت احبك
نجلاء:اتمنى تحبني لاني اموت فيك
مشعل: يابعد روحي مدري وش عاجبك فيني
نجلاء:كلك على بعضك عاجبني
:

:
بالسياره وهو يسوق بسرعه ..وكل شوي يلتفت لبنت عمته المرميه على الكرسي الخلفي
صوت نفسها بدا يختلف وصارت تشاهق وكأنها تاخذ انفاسها الاخيره
سلمان وهو متوتر وخايف وبصوت عالي:ياربي لا عنود لاتروحين انا ماادري ليه عاملتك كذا تكفين عنود لاتتركيني..