⇜↻↺ النظام المـــــالي ↻↺ ⇝...كلام كبـــــار !

[MEMET]

السلام عليكم ورحمه الله وبركاته

كنت في مناقشة مع الاخ وليد " short " في موضوعه عن سبب انه لماذا لم ينشئ شركة وساطة عربيه تجمع كل المتداولين العرب الموجودين واللى اكثرهم موافقين,,,
في التصويت انا صوت بالموافقة ,,, لكـــــن سبب المناقشة لم يكن عن شركة الوساطة نفسها التى لا تمثل مشاكل ملموسة اكتر من مشاكل التمويــــل والبنوك ,,,,
ايه الفرق بين انظمة التمويل عندنا وعندهم ,,,, اقصد امريكا او بريطانيا كمثال للدول الرائدة اقتصاديا,,,
ووعدته اني هعرضله فكرتي بشكل متوسع عن طرق التمويل وعن الاسباب والعوائق اللى مكتفه البنوك بتاعتنا سياسيا واقتصاديا ودينيا
لكن عند كتابتي قاعد افكر ابتدي منييين,,,,,
شركة الوساطه عايزه بنك والبنك لازم يكون جامد في السوق وقادر وعنده امكانيات والامكانيات دي بتيجي من الربح وسياسات البنوك اللى بتجيبلهم ربح طب وقبل ما تكون البنوك بنوك اصلا الموضوع دا بيتم ازاي
كدا مسكــــــنا الخيط,,,,
نقول بسم الله نبــــــدأ,,,,,,

اي بنك لما بيفتح بيكون على اساس ايه؟؟؟
هتقولوا ...سبحان الله يا اخي بادي الموضوع بسؤال !!!!!

اول حاجه رأس مال كافي و نامـــي و خدبالك من كلمة نامي دي مش اي واحد وارث فلوس يروح يفتح بنك
يعني يكون رأس المال قائم على مشاريع متعددة ورابحه و الحكم بيكون لبنك الاحتياطي الفيدرالي FED.
طيب البنك الفيدرالي دا بيعمل ايه بقى بياخد الحكم الموافقه على اي اساس
بتقوم اللجنة الفيدراليه بمراجعة حسابات وقوائم وقيمة المشاريع و المؤسسات القائم عليها رأس المال دا
طيب رأس المال دا متكافيء مع قواعد الحد الادني لبنوك الدول اللى زينا كدا
تمام
طيب المشاريع دي عامله ايه في الاسواق الماليه ,,,نحللها ونشوف قيمتها الاسمية من قيمتها في السوق
تمام
طيب هل رأس المال مرتبط بديون,,,او اي طرق من طرق الرهن,,,صافي او كم نسبتها؟
تمام

طيب نظرة اكبر شويه نبص على اقتصاد الدولة المقصودة ...هل تتحمل اقتصاديا مزيد من التمويل!
يعني لو البنك الفيدرالي وافق على تمويل البنك دا بمعدل فايدة معين ...هتقدر تحقق نسبة الربح دي ولا هتقف عليه بخسارة ,,,
هل بنكها المركزي يطبق القرارات بتاعت الفيدرالي مظبوط ولا فيه خلل ,,,
تمام اوي
طب سياســـــــيا بقى الدولة دي عامله مشاكل في المنطقة ,,,داخلة على حرب ولا حاجه ,,,عندها مشاكل هههههه
وايضا اقتصـــــاديا ,,,حالة ركوود ,,,تضخم,,, وحجم البطالة عندهم اد ايه بيأثر طبعا
مستوى المعيشة ومعدل الدخل
هتقولي ايه ياعم الحاج كل دا ؟؟؟ايه اللى دخل البطالة في فتح البنك ,,,
هقولك واكتر كمان
دي فلوس نااااس ياعم الحاج ...اي غلط في المواضيع دي يعني خطأ في السياسة المالية Monetary policy يعني خسارة في المخزون و المسموح العالمي و مشاكل سيولة وازمات لا قدر الله,,,,
ف لازم دراسة الموضوع بشكل كلي و جزئي للتأكد من انه رأي صائب في الاتجاة الصحيح....دا بقى اسمه "استثمار" ..بنستخدم ما هو قليل ,لجني المزيد والمزيد من ثماره,,,,,

طب هتقولي اومال البنوك اللى بتخسر دي ايه ؟ والبنوك اللى فلست واللى واللى ,,,مش دي بردو كانت نفس الدراسات بتاعت الفيدرالي في البداية
اهي دي الاسئلة ولا بلاش ههههههه
هقولك اه مظبوط هيا كانت دراسات بشكل جزئي وكلي ونفس اللى قلته واكتر ,,,لكن خسرت لاسباب :

1-سياسة البنك في ادارة محفظته وتحقيق الربح المطلوب لدفع الفوائد والمتطلبات اللى عليه ,,,
واهم المتطلبات دي الديون اللى عليه واهم الديون دي الفوائد اللى عايزها البنك الفيدرالي من ناحية والمستثمرين من ناحية
عشان كدا من اهممممممم و اخطر الوظايف في البنوك في قسم ال Portfolio Management ....للى بيدور على شغل رواتبهم جامده ههههههه
هبوط في الاسواق المالية للبلد دي .....خسارة كبيرة طبعا للبنوك مفيهاش كلام,,,,
2- تاني حاجه احداث اقتصادية وسياسية هامة ادت الى اغلاقة ...سبب هاام جدا ومقنع
3- تالت حاجه ممكن يكون خالف قواعد البنك الكبير اللى مظبطنا البنك الفيدرالي مثلا بيدي قروض ببلاش ,,,بيعمل استثمارات بنسب مخاطرة اعلى من المحددة له ,,,, احتياطي السيولة عنده قليل عن المحدد او نفاذها بمعني انه لو واحدراح و عايز مليون دولار حالا من الحساب يحولوك من فرع لفرع لحد ما توصل للفرع الرئيسي متلاقيش غير شويه فضة فكة ,,,,,
4- رابع حاجه عمليات تلاعب وسرقة ونصب واحتيال من صحاب البنك دا Frauds....وماااا اكترها وبلاش نتكلم عشان الادارة متزعلش ,,,احـــــــم
او عمليات لعب من تحت لتحت بالاعتماد على التأمين بتاع البنك Moral hazards على اساس مثلا انه يسرق الخزنة ويمشي ويولع ف البنك وتيجي شركة التأمين تحقق تلاقي انه ماس كهربا ,,,,ههههه قديييمة
5-خامس حاجه ممكن تكون سياسات البنك غير شرعيه فادت الى اغلاقة!! بيتاجر في الممنوع لتحقيق ربح ,,,,
6-سادس حاجه ودي بتبقى مشاكل هايفة بيتم تجاهلها لحد ما بتكبر والبنك يحقق خساير منها ,,,,, لا تتجاهل صغائر الامور فقد تكون نهايتك وانت لا تعلم
زي ايه ياعم الحاج المشاكل دي ,,,,الدعم ,,,التسويق الكافي,,,,الامكانيات اللازمة كأساسيات في غيره من البنوك المحيطه به ,,,الاشتراك في مشاريع جديدة والتنويع ,,,,كل الحاجات دي بتأثر في خسارة البنك جزئيا وانا شخصيا لم اسمع انه بنك قفل عشان دعم ,,,ايه التفاهة دي

طيب تمام .....دلوقتي فتحنا البنك نعمل ايه بقى
أما سؤال غريب صحيح !!! عندك مـــــــــوارد وجايلك مســـــــاعدات قروض والمطلوب منك ربح ليك ولناس تانية ...هيا دي وظيفتك ...انك تطلع ربـــــح
واحد يقولي ايه دا يعني البنك اصلا معمول من قروض هقولك طبعـــــــــــــا ومش اي قروض كمان لها انواااااع واشكال....دي اهم حاجه في الكلام دا كله انك تفهم الكلمتين دول.
معنى كدا يامعلم ان النظام المالي كله والدايرة المالية كلها من ايداعات وسحب وشرا وبيع وقروض ورهن وبلاوي زرقا ,,,,,مبنية على الاقتراض !!!! ( كدا بقى هنتكلم في الممنوع وربنا يستر )
هقولك بالفم المليان .......نعــــــــــــــم
وهنقف هنا بقى عشان انا تعبت من الكتابة ونشوف النقط الغامضة في الموضوع " دا لو فيه اصـــــلا,,,," ونوضحــــــها,,,,
وعشان اشوف اذا كنت نسيت حاجه حد يفكرني ,,, غلطت ف حاجه حد يعدلي ,,,كدا يعني الناس لبعضها
و اي مداخلة ممن هو اعلم مني اكون سعيد بها جداااا
قـل للذي يدعي في العـلـم مـعـرفـــــــة,,,,, عـلمت شيئاً وغابت عنك أشـيـــــــــاء
وللحديث بقيـــــــة,,,,

[عبدالكريم]

موضوع ممتع ومعلومات دسمة ومفيدة

متابعين معك ياغالي

[khaldon999]

في انتظار بقية موضوعك الشيق
تحياتي

[Walid Basset]

متابعه

[Mo3Ty]

ممتاز
وتسجيل متابعة معاك

[leo]

كمل معاك

[MEMET]

موضوع ممتع ومعلومات دسمة ومفيدة

متابعين معك ياغالي

في انتظار بقية موضوعك الشيق
تحياتي

متابعه

ممتاز
وتسجيل متابعة معاك

اهلا اهلا بأساتذتنــــــا الكبــــــار,,, لي الشرف ان اكون حتى مستمع لكم فكيف اذا تكلمت وانتم تسمعون !!!
بارك الله فيكم ولمتابعتكم ,,,,سأوافيكم بتكملة لحكاية على بابا بتاعتنا دي اما نشوف هتوصلنا لفين,,,

[MEMET]

كمل معاك

اهلا ليو ,,, شفت ردك بعد الاقتباس ,,,نورت الموضوع ^

[:: EslaM IbraheM ::]

كلام عالي اوي اوي

هوا دا الشغل بجد كمل معاك متابع

موفق في اختيار الموضوع يا غالي

[MEMET]

كلام عالي اوي اوي

هوا دا الشغل بجد كمل معاك متابع

موفق في اختيار الموضوع يا غالي

الله يكرمك استاذ اسلام,,,,
رغم ان التحليل المالي نصيبه هنا مش كبير,,,لكن للتوضيح والافاده والاستفادة ممن هم مهتمين امثالك,,,
استنى لسه التكملة جاية ,,,ع السخااااان ,,,

[MEMET]

سلام عليكم ورحمه الله وبركاته
نكمل موضوعنــــــا ,,,,,,
واحد يقولي ,,,انت كل شويه البنك الكبير ,,,البنك الفيدرالي,,,,البنك اللى مظبطنا ,,,,بابا البنوك كلها ,,,,ايه ياعم هوا البنك دا ملوش كبير
بيجيب الفلوس دي كلها منين !!!! ....بيدي قروض للبنوك كلها و كأنها تكية ابوه !!!!
اوعى حد يقولي ماهو بياخد مكانها فوايد وبيصرف منها على بنوك تانية
الفوايد اللى بياخدها البنك الفيدرالي قليلة جدا بالنسبة للفلوس اللى بيقرضــــها للبنوك!!!
اللى هيا ال Federal Discount Rate,,,, لازم بالانجليزي عشان هنفرق بينها وبين فوايد كتيــــــــر ,,,,,ركــــز
عشان فيه فايده تانية اسمها Federal Funds Rate ,,,والفرق بينهم هوضحه بمثـــــال:

مش فيه بنوك جامده ...زي BNP Pribas
وبنوك متوسطة ...زي HSBC
وبنوك ضعيفة على اد حالها ....زي AL Mashreq Bank اللى في الامارات

اي بنك من دول اتزنق في فلوس وعنده مشاكل سيوله ,,,, يروح للبنك المركزي بتاع البد اللى هوا فيها ,,,,,يقوله سلفني انا محتااااااج
ماهو مش اي بنك هيروح لل FED كدا علطول ,,,,مش هيصـــة هيا ! الكبــــير كبــــير بردو
البنك المركزي يراجع ويعمل حساباته ويشوف متاح عنده المبلغ ولا لأ ,,,لو متاح بيدهولو بفايده ال Federal Funds rate اللى محددها البنك الفيدرالي بردو
طب لو مش متاح عند البنك المركزي المبلغ وطلع كحيان هوا كمان ,,,,بيروحو الاتنين للبنك الفيدرالي يقولولو احنا واقعين في عرضك ,,,سلفنا احنا غلااااابة,,,,
يسلفهم بانهي سعر فايده ؟؟؟؟ بال Federal Discount rate
طيب ...هيا كل البنوك اللى في العالم بتاخد بنفس النسبة ؟؟؟

لا طبعا احنا مش لسه مفرقين بين البنوك الجامده والمتوسطة والضعيفة كله على حسب راس المال وارباحه واصوله ,,,,ايه ياعم ما تصحصح
على قد لحافك مدد رجليك,,,كل بنك بقى ولحافــــة ,,,

ال Federal Discount rate بينقسم ل:
Primary Discount rate : ودا على القروض الصغيرة اوي ,,,,اللى بتكون فترتها ليلة واحده ,,,ليلتين ,,,اسبوووع ,,,3 شهور بالكتير ....البنك قادر يسدد بعد ليلة واحده بيكسب كتير بقى هنقولو لأ!!!!
ايه دا ؟؟؟هوا فيه قه قروض بالليله ,,,,اااااااه دانتا لسه هتشوف العجب
Secondary Discount rate : ودا على القروض فترة متوسطة ....اكبر من 3 شهور لكام سنه ,,,بيكون اعلى من الاولاني وغاليا هوا دا الشائع
Seasonal Discount rate : ودا للبنوك اللى على اد حالها اللى وبيكون متوسط للاتنين التانيين
وطبعا فيه قواعد وحدود للبنوك اللى ممكن تنطبق عليهم واحد من دول ومتنطبقش على التاني,,,,
انا مش عايز اكتر من المصطلحات المكلــــــكعة والناشـــــفة بكرهها ,,,,لكن دول لابد منهم عشان التفرقة وللعلم بالاشياء.
دلوقتي بابا البنك الكبير سلفنا المبلغ بالفايده بتاعته + فايده البنك المركزي بتاع البلد ,,,هوا مش ساعدك ووقف جنبك لازم ياخد حسنته,,,
وعلى ما توصلنا بقى يا معلم شوف فايده على فايدة على فايده على شويه ضغوطات سياسية على شويه طمع وتلاعب وسرقة ,,,,بتوصلنا الفايدة مولــــــعة ,,,,,
ولا عزاء للسيـــــدات ,,,,

طيب نكمل الحكاية بتاعت البنك الفيدرالي,,,

واحد يقولي الله ! طب ولما هيا الفلوس دي مش هامه البنك الفيدرالي ولا بتأثر في ربح ولا نيلة ,,,,اومال بياخدها ليه !!!
طبعا لازم ياخدها بجانب مبادئ الاقتراض والمصلحه المشتركة بين اي مؤسسة مالية واخري ....عشان احنا محتاجيبن له ,,,,كل النظام المالي في العالم محتاجله ولازم يفضل محتاجله ,,,لازم يمسكك من العرقوب,,,
لما يفرض عليك القرض دا بنسبة كذا ,,,ورفع النسبة رقم عشري واحد فقط ,,,,شوف بيحصل ايه في الدول الغلابة اللى زي حالاتنا,,,
تلاقي القروض في السوق حاجه شبه مستحيله ماهو انتقام بقى
الاستثمارات تقل والناس يسيبوا البلد ويمشو ,,,
وتلاقي الاسعار عينك ماتشوف الا النور ,,,
وتلاقي اسواق الاسهم,,,قامت واترزعت في الارض ,,,
لحد ماييجي وقت التضخم فيه الواحد يروح يشتري شويه بطاطس بدفتر الشيكات ههههههههه,,,,العالم هيموت بعض بعد كدا عشان بيضتين وحته جبنة ههههههه

وغيرها طبعا من الحاجات اللى بيعملها البنك الفيدرالي في شرا وبيع الاوراق المالية وتحديد الاحتياطي والمسموح عشان يحدد طلب وعرض الاموال في العالم ...عشان يظبط السوق ميسبوش كدا عايم

اومال بيجيب الفلوس دي منيييين انا هتجنن ؟! ...اصبر و دلوقتي هقــــــولك,,,,

مش معنى انه البنك الكبير يعني بيطبع فلوس على مزاجه ,,,ومن يعتقد انها عملية معقدة حتما ولن يفهمها الصغــــار امثالي ,,,,هذا مجرد قنــــاع !
وهوضح المرة القادمة ان شاء الله تعالــــي " كيف يتم الاقتــــــــــــــراض ,,,,,,؟؟ " واثبات ان الفلوس اصلها قروض,,,
حكاية تانية خالص ومختلفة غير بتاعت النهارده ,,,,والله انا خايف من كتر الحكايات تنامو منـــي ههههههههه
( اعذرني يا اخ وليد كان لازم اجيب الفكرة م البداية ولم انسى محور موضوعنا واعذروني جميعا ان كنت ببعد لتوضيح بعض النقاط الهامة في البنك بتاعنا ان شاء الله )
احنا عملنا البنك وجهزناه ,,,,وبعدين كان مزنوق في فلوس وسلفناه,,,,لسه معاكم لحد ما نقول المعوقات والموانع انه ليه ميفتحش شركات وساطة زيهم باذن الله
وللحديث بقيـــــــة ,,,,,,

[khaldon999]

طرح جميل
في انتظار العراقيل
وياريت تطول شويه في الحلقة الجايه ...

[MEMET]

طرح جميل
في انتظار العراقيل
وياريت تطول شويه في الحلقة الجايه ...

اهلا خلــــدون,,,انا قلت افصلهم عن حكاية الاقتراض بس عشان نفهمها ونفكر فيها كويس
واذا كانت المعلومات دي بدائية لناس كتير ,,,فهيا بردو غايبة على ناس كتير
اشرب القهوة ونازلكو بالتكمــــلة,,,,

[MEMET]

ســـــــــلام عليكم ورحمة الله وبركـــــــــاته
نكمـــــــــــــــــــل,,,,
البنك المركزي بتاعنا لما بيروح لل FED يقوله لله ,,,,سلفني ,,,انا مزنوق في خمسة مليار دولار ضروووووري
ال FED بعد دراسة الموضوع يقوله وماله ياحبيبي,,, ابعتلي خمس ورقات سندات حكومية اللى هيا Treasury Bonds ( اومال بيقولك ال Risk free = T- Bonds ليه ! عشان بتاعت الحكوووومة هتروح مننا فيييين )
اول ما ال FED ياخد السندات ,,,يفلســــع ههههههههههه
لا مش هيضحك علينا طبعا ...هيطبع 5 مليار دولار الورق الاخضر بتاع عم فرانكلين ويبعته للبنك المركزي بتاعنا,,,,
ال FED بياخد السندات الحكومية بتاعتنا كضمان يعني ويحطها في حساب عنده كــــ احتياطي
وكدا يبقى ال FED طبع 5 مليار دولار عملة في مقابل ضمان سندات حكومية ....قرض اتخلــــــق من العدم
استنى لسه الموضوع مخلصش,,,,,
دلوقتي المعادلة متكافئة بينا وبين عمنا البنك الكبير ,,,بس فيه قانون من قوانين ال FED بيقول ان اي بنك لازملة احتياطي RESERVE ولازمله ALLOWANCE
احنا محتاجين ال RESERVE بيقول ايه بقى القانون دا
ان احتياطي اي بنك ممكن التصرف في 90% منه كديون طويــــــــــلة الاجل و 10% بس لازم يفضلو موجودين في حسابات البنك زي ما هما
طيب نطبق بقى في الحكاية بتاعتنا ال FED دلوقتي معاه سندات حكومية بقيمة 5 مليار دولار ( خصوصا ان ال Treasury Bonds صاحبة فترات سداد طويــــــلة 10 - 20 - 30 سنة ...)
90% EXCESSIVE ممكن يتصرف فيهم كديون طويله الاجل يعني 4 مليار ونص,,,,,,نشوف مين اللى عايز قروض يلا
10% REQUIRED هيفضلو زي ما هما في البنك يعني نص مليار فقط,,,,
يبقى احنا عملنا دلوقتي 5 مليار مقابل 5 سندات حكومية ,,,و ال 5 سندات حكومية عملولنا 4 مليار ونص كمان زياده
طيب ال 4 ونص مليار دول بقيمة ايا كان بقى سندات رهون مشاريع اسهم تأمينات ,,,بيبقو موجودين في الاحتياطي بتاع البنك بردو
وبيكرر نفس الحكاية ,,,
90% ديون يعني 4 مليار وخمسين مليون
10% هيفضلو زي ما هما يعني 450 مليون
احنا دلوقتي عملنا 5 مليار + 4.5 مليار + 4.05 مليار ,,,,,,13.55 مليار دولار ,,,,,اتخلقو من العدم والسبب الاساسي ,,,اقتــــراض
وهــــــــــــــــكـذا لحد ما يكون ال 90% احتياطي زائد = صفر ,,,,طبعا الارقام مبتكونش صغيرة كدا دا مثال ,,,
يقولك ياعم الحاج ايه الحلاوة دي ,,,,ما الفلوس بتطلع اهي زي الرز م الديون اومال معذبيننا ليه ومطلعين عيننا في القروض !!!!!
بس دا كدا تضخم ,,,مش واخدين بالكو ,,,,لأننا دلوقتي ال SUPPLY بيزيد ( الفلوس بتتخلق مع كل قرض ) وال DEMAND زي ما هوا !!!
وكل ما فيه SUPPLY زياده هيكون فيه قروض اكتر واكتر
وكل ما فيه قروض اكتر واكتر هيزيد ال SUPPLY اكتر ,,,يعني مشكلة تضخم Inflation ظهرت كمان

طب ماتيجو نفكر العكس كدا ,,,,لو مفيش قروض ,,,مفيش SUPPLY ,,,
يعني نفترض " مجرد افتراض وهمي " ان البنوك بطلت تدي قروض ,,,هيبقى الجنية زي زمااااااان تاخد الجنية من هنا تروح تخطب وتشتري شقة وعربيه وتتجوز وتحط الباقي في البنـــك للزمن,,,,يعني قيمة الفلوس هتزيــــد,,,,
الدولار دلوقتي ب 5.74 جنية الله يرحم ايام زمان كان ب 2.5 جنية ومكنش حد بيشتريه,,,,

طيب فيه حاجه غايبة عنكو من ساعت ما جاوبتكو على سؤال كيف يتم الاقتــــــــــــــراض ,,,,,,؟؟
انتو نمتو مني ولا ايـــــــــه ؟؟؟
الفايـــــدة !!!! ,,,بنت عم القـــــرض علطول ,,,,اول ما تسمع كلمة قرض لازم معاه كلمة فايدة,,,,
منين بتيجي الفايده في الليلة دي كلها ؟؟؟ وازاي بتيجي !!! نفكر فيها مع بعض

البنك المركزي استلف من الFED مبلغ ولازم يترد خلال مده معينه مع فايدة
والبنك بتاعنا استلف من البنك المركزي مبلغ ولازم يترد مع فايدته خلال مده معينة
والبنك بتاعنا بيدي قروض لاصحاب المشاريع والمؤسسات قروض طويلة الاجل عشان يضمن فوائد مستمرة نقدر نستخدمها في قروض اصغر واصغر لحد ما توصل للعبد الغلبان اللى طمعان في متين جنية ياكل بيهم,,,ويردهم مع الفايده بردو هههههههه
وهذه هيا فكرة المشتـــــــقات اللى هيا ال Derivatives وهيا دي اللى وقعت اكبر بنوك امريكا LEHMAN BROTHERS في 2008
لم يكن افلاســــه على فكرة القروض فقط ولكن عن المشتقــــــات عموما داخل فيها جميع انواع الاقتراض
لتجد في الاخر اذا توقف دائرة الاشتقاق فلن تجد عندك اصول كفاية لسد احتياجات البنك حتى ال Intraday transactions,,,

حكاية " Lehman Brothers " البنك اللى فلس دا بقى

اولا ,,,لازم تفهمو دي ان اي BOND او BILL او SECURITY صادرة من البنك الفيدرالي او المركزي ( الحكومة يعني ) بيتم تجزئتها
تجزئتها ازاي ياعم الحج احنا بنبيع طماطم !!!!
يعني ال Treasury Bond ممكن لو احنا خدناها كبنك ( على اساس ان البنك الفيدرالي باعها لنا يعني ),,,,ممكن نجزأها شرايح Strips
نعمل شرايح Bonds قايمة على فايدة السند الحكومي دا فقط ,,,,للقروض الصغيرة قصيرة الاجل
ونعمل شرايح Bonds قايمة على المبلغ الاساسي لنفس السند الحكومي ,,,, للقروض المتوسطة وطويلة الاجل

سبب افلاس البنك دا انه كان بيعمل اشتقاق لطرق الاقتراض وبالاخص ( الرهن العقاري Morgtages )
واحد من الناس الكبار ( الحرامية الا من رحم ربي ) راح للبنك دا وقاله عايز اعمل قرية سياحيه ,,,قاله ومالو ياحبيبي خد فلوس اعمل قرية وامضيلي الورق دا Mortgage

البنك ادالو فلوس بضمان شويه ورق بقيمة نفس المبلغ ,,,,راح عامل Securitization للورق اللى معاه دا وعملها شرايح وباعها للناس الصغيرة على اساس انها Bonds و MBS
Mortgage backed securities يعني اسهم وسندات قايمة على اساس رهن عقاري ,,, ربح اعلى و مخاطرة اعلى طبعا عشان يجذبو الزبــــــون ,,,,
وبعدين ياخد المبالغ بتاعت بيع ال Bonds يحطها احتياطي لقروض بردو اقصر مدة منها ,,,واقصر واقصر ,,,
ماهو عايز يكسب اكتر بردو ...مش قلتلكو High Risk - High interest ,,,,منتاش مركز معايا !!!
دلوقتي لو صاحبنا الحرامي الكبير دا لو خد الفلوس وخلع ,,,, ( كالعادة احــــم ) ,,,شوف كام واحد اشترى شرايح ال Bonds دي وعايزها بعد فترة منتظر الربح بتاعه ,,كتـــير طبعا !
ودا دين على البنك طبعا لازم يتسدد يعني هيتسدد ,,,بيني وبينك الحكومة
البنك يبص على اصولة ,,,,ملقاش حاجه ,,,فلس وساب للحكومة ديون متلتله ,,,,,

يااخي انت بتدخلنا ف متاهاااات ,,,,مجاوبتنيش على سؤالي الفايده بتيجي منين !!!
جاوبتك ياعم بس انت مش واخد بالك ونايم
اذا كان اساس الفلوس اللى معانا قرض من ال FED واحنا متفقين على الكلام دا,,,,وال FED حطها في حساب او استثمرها في مجال اخر المهم اصبحت واقع وسبب خلقها هوا القرض
دلوقتي البنك بتاعنا مش هيلحق يسدد القرض مع الفايده الا اذا عمل ربح وفيييييير خلال مده معينة ,,,,يعني قروض بردو هههههههه
واللى هياخدها هيسددها في وقت معين ومع الفايدة ,,,,

مش ملاحظين حاجه !!!! ان الفلوس اتخلقت اصلا من غير فايدة ,,,,يبقى ازاي هترجع + الفايدة ؟؟؟؟
مصدر الفلوس دائما اقل من المطلوب سداده ,,,,
وبكدا يبقى لازم يبقى فيه افلاس في طرف من اطراف الدايرة الملخبطة دي كل شويه,,,,لاااااااازم

احنا عرفنا لحد دلوقتي البنك اساس عملة اقراض واقتراض,,,,احــــــم و سبل الاستثمارات كتير طبعا ( >>>الادارة )

المرة الجاية نشوف الشغل هيبقى ازاي,,,,
للحديث بقيـــــــــــة ,,,,,

[khaldon999]

شكرا جزيلا علي هذه المعلومات اما اذا حضرتك تقدر تفسر لي ايش الي كان ممكن يصير لو كان التمويل اسلامي
..
ما اقصده توضيح ايجابيات التمويل الاسلامي في هذه الحالة..
في انتظار باقي موضوعك