الدايفيرجينس ببساطة ..... و استراتيجيات....

[samsam22]

الجزء الثاني - الدايفيرجينس و المؤشرات


تابع - طرق الدخول ( نقاط الدخول ) علي مؤشر الماكد


- 2-عكس المؤشر لاتجاهه


فيه فريق اخر قالك الطريقة الاولي و الانتظار حتي حدوث التقاطع

ممكن تدخل متأخر و تضيع علينا عدد من النقاط ..و احنا عايزيين ندخل بدري

فقالك احنا حندخل بمجرد انعكاس مقدمة مؤشر الماكد كالاتي

-------

الدخول بيع

1- بعد اعتماد الدايفيرجينس

2- ننتظر ان تتجه مقدمة مؤشر الماكد الي اسفل

3- ننتظر اغلاق الشمعة التي حدث عندها انعكاس مؤشر الماكد و اتجاه مقدمته لاسفل

4- و يتم الدخول بيع بعد اغلاق هذه الشمعة

5- مع مراعاة استمرار وجود الدايفيرجينس عند الدخول

--------------------------

الدخول شراء

1- بعد اعتماد الدايفيرجينس

2- ننتظر ان تتجه مقدمة مؤشر الماكد الي اعلي

3- ننتظر اغلاق الشمعة التي حدث عندها انعكاس مؤشر الماكد و اتجاه مقدمته لاعلي

4- و يتم الدخول شراء بعد اغلاق هذه الشمعة

5- مع مراعاة استمرار وجود الدايفيرجينس عند الدخول

----------------

مميزات و عيوب هذه الطريقة

- الفريق اللي بيستعمل هذه الطريقة غالبا بيدخل بدري ..عن الفريق الاخر اللي بينتظر حدوث التقاطع.

و بالتالي غالبا بيحصد عدد اكبر من النقاط

-----------------

- و لكن في نفس الوقت انه احيانا بعد اتجاه مقدمة المؤشر لاسفل في حالة البيع او لاعلي في حالة الشراء

قد لا يحدث التقاطع .. و يعود المؤشر بتغيير اتجاهه في عكس اتجاه الدخول ..و قد تحدث الخسارة

-------------------------

المرفقات

مرفق مثال يوضح طريقة الدخول بهذه الطريقة

يتبع

[samsam22]

الجزء الثاني - الدايفيرجينس و المؤشرات


تابع - طرق الدخول ( نقاط الدخول ) علي مؤشر الماكد


3- طريقة استخدام الهيستوجرام


و هي طريقة خاصة فقط عند استخدام مؤشر الماكد هيستوجرام

و اصحاب هذه الطريقة قالوا احنا حنستخدم طول بارات الهيستوجرام كوسيلة للدخول كالاتي

---------

الدخول بيع

1- بعد اعتماد الدايفيرجينس علي القمة الثانية

2- ننتظر اغلاق بار من بارات الهيستوجرام ..

.يكون طوله من خط الصفر ( ارتفاعه ) اقل من طول البار اللي قبله ..

و ايضا اقل من طول البار الهيستوجرام للقمة الثانية

3- و يتم الدخول بيع بعد اغلاق الشمعة الخاصة بهذا البار من الهيستوجرام

4- مع مراعاة استمرار وجود الدايفيرجينس

------------------

الدخول شراء

1- بعد اعتماد الدايفيرجينس علي القاع الثاني

2- ننتظر اغلاق بار من بارات الهيستوجرام .

.يكون طوله من مستوي الصفر اقل من طول البار الهيستوجرام اللي قبله

و ايضا اقل من طول البار الهيستوجرام للقاع الثاني

3- و يتم الدخول شراء بعد اغلاق الشمعة الخاصة بهذا البار من الهيستوجرام

4- مع مراعاة استمرار وجود الدايفيرجينس

--------------------------

مميزات و عيوب هذه الطريقة

تتشابه هذه الطريقة نوعا ما مع طريقة الدخول بتغيير مقدمة مؤشر الماكد
و بالتالي حنلاقي نفس المميزات و العيوب عن طريقة تقاطع خط الماكد و السيجنال و نجد ان

- الفريق اللي بيستعمل هذه الطريقة غالبا بيدخل بدري ..عن الفريق الاخر اللي بينتظر حدوث التقاطع.

و بالتالي غالبا بيحصد عدد اكبر من النقاط

-----------------

- و لكن في نفس الوقت انه احيانا بعد ظهور بار من بارات الهيستوجرام بالمواصفات المطلوبة
و ان طوله اقل من طول البار الهيستوجرام اللي قبله و يتم الدخول

قد يحدث ان يغلق بعدها بار اخر من بارات الهيستوجرام ..و يكون اطول من ما قبله..
و اطول من البار الخاص بالقمة الثانية او القاع الثاني المعتمد للدايفيرجينس
و لا يحدث تقاطع بين الهيستوجرام و خط السيجنال .. و يحدث انعكاس ضد اتجاه الصفقة .. و قد تحدث الخسارة


-------------------------

المرفقات

مرفق مثال يوضح طريقة الدخول بهذه الطريقة



يتبع

[hanisma]

السلام عليكم

تسلم ايدك اخي سام سام

تسجيل حضور ومتابعه

[samsam22]

الجزء الثاني - الدايفيرجينس و المؤشرات


تابع - نقاط و طرق الدخول علي مؤشر الماكد


طريقة التنقل بين الفريمات


علشان يتغلب بعض المتداولين علي تأخر نقطة الدخول احيانا
ابتكروا طريقة اخري... و هي التنقل بين الفريمات.. لايجاد نقطة دخول اسرع و احيانا افضل

طب ازاي الكلام ده بيحصل ؟

تعالوا نشوف مع بعض

---------------

الفريق ده قالك لو كنت باشتغل مثلا علي فريم ال 4 ساعات .. و بدأ الدايفيرجينس يتكون
و كان واضح .... يعني قمتين او قاعين واضحين
و لم يحدث تقاطع لخط الماكد مع السيجنال
فقالوا ...... بدل من الانتظار 4 ساعات اخري...
انا اشوف الفريم اللي اصغر منه علطول....
و احاول اشوف نقطة دخول افضل و بدري كمان
بدلا من الانتظار 4 ساعات لغاية ما يحدث التقاطع علي ال 4 ساعات!!

فيروحوا فاتحيين فريم الساعة علشان يشوفوا نقطة دخول

و هنا ظهر فريقان

فريق قالك شروط الدخول علي فريم الساعة هي

1- وجود دايفيرجنس واضح علي فريم ال 4 ساعات
2- ان تتوافر نفس الشروط الخاصة بالقمم والقيعان ..
من حيث وجود القمم اعلي خط الصفر.. و علي ارتفاع مناسب للقيام بعمليات بيع
او وجود القيعان تحت خط الصفر.. و علي بعد مناسب منه للقيام بعمليات شراء

3- لايشترط حدوث دايفيرجينس علي فريم الساعة
4- يكون الدخول فقط بحدوث تقاطع خط الماكد مع السيجنال في اتجاه الصفقة
5- و يحدد الهدف و وقف الخسارة علي فريم الساعة
6- و اذا استمرت الصفقة و حدث التقاطع بين خطي الماكد و السيجنال ايضا علي فريم ال 4 ساعات
ممكن ان نزود علي الصفقة .. او نزيد من مقدار الهدف

-----------------

و جاء فريق تاني و قالك ان شروط الدخول علي الساعة هي

1- وجود دايفيرجنس واضح علي فريم ال 4 ساعات
2- لابد من وجود دايفيرجينس ايضا علي فريم الساعة
3- لا يشترط في الدايفيرجينس هنا ان تكون القمتين فوق خط الصفر .. علي الاقل قمة واحدة
و بالمثل لا يشترط وجود قاعين تحت خط الصفر .. علي الاقل قاع واحد
4-و يكون الدخول فقط بحدوث تقاطع بين خطي الماكد و السيجنال
5- و يحدد الهدف و وقف الخسارة علي فريم الساعة
6- و اذا استمرت الصفقة و حدث الكسر ايضا علي فريم ال 4 ساعات
ممكن ان نزود علي الصفقة .. او نزيد من مقدار الهدف

-----------------

دلوقتي ممكن واحد يسأل سؤال و يقول هو لازم الدخول من الفريم اللي قبله علطول ..
يعني ما ينفعش فريم كمان اقل زي ال 30 دقيقة او ال 15 دقيقة لو فيه دايفيرجينس علي ال 4 ساعات ؟

و الاجابة هو انه ينفع .. و لكن لا يفضل العمل به
الا لاصحاب الخبرة باساليب اخري تدعم الدخول بجانب الدايفيرجينس

و ايضا ان يكون الهدف و الستوب معمول علي الفريم الصغير!

----------------------

و بكدة نكون انتهينا من شرح اهم طرق الدخول علي مؤشر الماكد
و ان شاء الله يتبقي شرح الاعدادات للمؤشر و هو شرح بسيط لن يطول ان شاء الله

--------------

و الان اترككم في رعاية الله
و اذا شاء الله ... لنا عودة ان شاء الله

بالتوفيق ان شاء الله

[samsam22]

الجزء الثاني - الدايفيرجينس و المؤشرات


اعددات مؤشر ال MACD


بعد ما عرفنا تحديد مكان الدايفيرجينس ...وطريقة الدخول علي مؤشر ال MACD
باقي نتعرف علي نقطة هامة جدا ....و هي اعدادات المؤشر

و اهمية هذه النقطة ترجع الي ... انه باختلاف الاعدادات بين المتداولين لنفس نوع المؤشر ..
حتختلف النتائج ... و حتختلف الفرص ... وحتختلف ايضا نقاط الدخول و الخروج ..و وقف الخسارة

-----------------

فباختلاف الاعدادات للمؤشر ... ممكن تلاقي ان دايفيرجينس ظهر عند متداول ... و ظهر له اشارة دخول
و متداول اخر في نفس اللحظة ...بيستعمل نفس نوع المؤشر بس باعدادات اخري
لم يظهر له دايفيرجينس و لم يكن عنده فرصة و لم يدخل

------------------

و تلاقي اذا نجحت الفرصة ... يقوم المتداول الاول رفع دماغه لفوق و نشوة الفرح تعلوه
و يقول للمتداول الاخر باستعلاء و ثقة

مش قولتلك ان فيه دايفيرجينس ...باعداداتي السحرية و قلتلك ادخل الصفقة ....انت ما دخلتش ...
واديني عملت 60 نقطة و انت قاعد تتفرج علي الشاشة

-----------------

و تلاقي مرة تانية نفس الشخصين ...الاول ظهر عنده دايفيرجينس
و دخل كالعادة بدري .. بنفس اعداداته اللي بيقول عليها سحرية
و التاني ما ظهرش عنده دايفيرجينس و ما دخلش
و تلاقي المرة ديه الصفقة خسرت
يقوم الثاني و الابتسامة تعلو وجهه بعد ما صاحبه خسر .. يقوله

بس قاعد تقولي اعدادات سحرية و اعدادت سرية .... و ان اعداداتك ما بتخسرش ..و انها اسرار عسكرية
و ادي النتيجة يا عم ...خسارة ..

يبقي تاني مرة تسمع كلامي ...و تدخل باعداداتي... واكيد مكسبك في الصفقة الاولي اللي فاتت .. كان ضربة حظ.

--------------

و مرة اخري تحصل نفس القصة بس بالعكس

--------------------

و مرة تلاقي نفس الشخصين اتفقوا علي الاعدادات السحرية ...
و لكن كل واحد اشتغل علي فريم مختلف ..
واحد منهم يقولك ان باشتغل بس علي الديلي .. و السوينجات ..
و صاحبه يقوله ان باحب الانتراداي ..
و اشتغل علي فريم الساعة او اقل فقط

و مرة واحد يخسر و التاني يكسب او ما يدخلش خالص
و العكس صحيح
و تحصل نفس النقاش و الجدال و السخرية من بعض

---------------------

طب ياتري ليه بيحصل كده ؟
و الاهم من كده .. مين فيهم اللي صح و مين فيهم اللي غلط ؟
و هل فيه اعدادات سحرية زي ما بيقول البعض ؟
و ايه اللي ممكن نعمله علشان الاتنين دول ما يضربوش بعض

تعالوا نشوف مع بعض حكاية الاعدادات

يتبع

[samsam22]

الجزء الثاني - الدايفيرجينس و المؤشرات

تابع - اعدادات مؤشر ال MACD

زي ماشفنا في المشاركة السابقة ان اختلاف الاعدادات
...ادي الي اختلاف وجود دايفيرجينس او عدم وجوده...و ادي ايضا الي اختلاف نقاط الدخول و الخروج
وفي المثال اللي شرحناه عن الاثنين الاصحاب المختلفين في الاعدادات
ان هذا الاختلاف خلاهم حاليا تقريبا حيضربوا بعض

--------------

طب ايه معني الاعدادات ديه؟
وساعات نسمع حد يقول اعدادات المؤشر 12,26,9 .. و اخر يقول 15,26,1 ..
و اخر يقول 9,26,1 ..او اي اعدادات اخرب
تعالوا نشوف ده مع بعض

---------
احنا لما شرحنا فكرة عمل المؤشر قلنا ان الماكد هو الفرق بين EMA 12 و EMA26
و زي ماكلنا عارفين ان الرقم قبل الموفينج افرج هو رقم عدد الشموع اللي بيحسب عليها المتوسط
فلما نقول 12 يعني بنحسب متوسط 12 شمعة .. و لما نقول 5 يعني بنحسب متوسط 5 شموع

و لو اخدنا بالنا هنا حنلاقي انه فيه موفينج افرج سريع ..و اخر بطئ
و حنلاقي ان تغيير قيمة الموفينج السريع لقيمة اقل مثلا 5 .. مع الاحتفاظ بقيمة الموفينج البطئ 26
حيحدث الاتي

1- تقاطع الماكد مع خط السيجنال عند استعمال EMA5 بدلا من EMA12 ..
حيحدث مبكرا عن لو تم استعمال ال EMA12
و بالتالي حيعطينا اشارة دخول مبكرة

2- حنلاقي ايضا ان تقاطع الماكد مع خط الصفر عند استعمال EMA5 بدلا من EMA12 ..
حيحدث مبكرا عن لو تم استعمال ال EMA12
و بالتالي ايضا حيعطي اشارة دخول مبكرة

3- حنلاقي عند استعمال EMA5 بدلا من EMA12 ان شكل القمم و القيعان بيكون اكثر حدة و بالتالي اكثر وضوحا ..
و ايضا يختلف عدد القمم و القيعان

4- نظرا لان الماكد هو الفرق بين عدد 2 موفينج افرج ..
فحنلاقي انه ايضا سيختلف ارتفاع و شكل القمم و القيعان
و بالتالي شكل الدايفيرجينس عند استعمال EMA5 بدلا من EMA12


--------------------
واحد دلوقتي بيقول .. طب يفرق معانا ايه الكلام و الارقام ديه؟

اقوله حتفرق معاك في الشكل اللي بيرسمه المؤشر علي الشارت ..
لان قيمة ناتج معادلة المؤشر النهائي ... حيختلف باختلاف رقم الموفينج افرج و خاصة السريع الذي نستخدمه
و بالتلي حيختلف الرسم ..
و بالنسبة لمستخدم الدايفيرجينس .. حتختلف اماكن و توقيت حدوث القمم و القيعان ....
و ايضا عدد القمم و القيعان ....باختلاف الاعدادات
و بالتالي قد يظهر دايفيرجينس في اعدادات معينة ..و لا يظهر في الاعدادات الاخري

--------------

فلو قل رقم الموفينج المستخدم و خاصة السريع ..يعني قل رقم الاعدادات .. كلما كثر عدد القمم و القيعان علي المؤشر

و كلما كبر رقم الاعدادات ...كلما قلت عدد القمم و القيعان المرسومة

----------------
يعني ملخص الكلام ده
ان العلاقة بين الاعدادات .. و عدد القمم و القيعان علاقة عكسية
كلما كان رقم الاعدادات اقل .. زاد عدد القمم والقيعان
و كلما كان رقم الاعدادات كبير .. كلما قل عدد القمم و القيعان

------------

يعني ممكن نقول بالعامية .
لو واحد عايز قمم و قيعان اكثر ... يختار اعدادات قليلة و خاصة اعدادات الموفينج السريع
و لو واحد عايز قمم و قيعان اقل ...يبقي يختار اعدادات كبيرة

---------------

و هكذا يقول البعض ان الاقل افضل .. و يقول البعض ان الاكبر افضل
و لكل طريقة في الاعدادات خصائص
قد يراها البعض انها ممبزات و يراها اخرين علي انها عيوب

يتبع

[samsam22]

الجزء الثاني - الدايفيرجينس و المؤشرات

تابع - اعدادات مؤشر ال MACD


بعد كل الكلام الكتير اللي اتقال..نرجع للسؤال الهام و هو
ماهي الاعدادات الافضل للمؤشر؟

و الاجابة زي ما كلنا فهمنا و بقينا عارفين
انها حتختلف من شخص لأخر

--------
لكن ممكن نسأل السؤال بطريقة اخري .. و نقول
اي الاعدادات الاكثر شيوعا بين المتداولين ؟

و الاجابة هي

الكثير يستعملون او يفضلون الاعدادات الاصلية للمؤشر ...و هي اعدادات 12,26,9
و هي مناسبة.. و مصداقيتها ..و نتائجها جيدة
و يمكن الاعتماد عليها في معظم الفريمات

-----------------


طب سؤال تاني هنا و هل فيه اعدادات اخري مناسبة منتشرة نوعا ما بعد الاعدادات الاصلية ؟

و الاجابة هي

اكيد فيه زي ما شرحنا ..
فيه بيستخدم اعدادات 15,26,9 او اعدادات 5,26,9 و اعدادات12,52,9 مثلا ..
و النتاج ايضا جيدة .. و مصداقيتها جيدة..

---------------

طب واحد دلوقتي ممكن يسألني اي الاعدادات بتعتمد او تستخدم ؟
و الاجابة انا عن نفسي استعمل اعدادات 5,26,9 علي كل الفريمات تقريبا
و احيانا استخدم اعدادات5,34,5 علي الفريمات الكبيرة مثل اليومي


-------------------


و بكدة نكون انتهينا من مؤشر ال MACD
و هو اخر مؤشر يتم شرحه

يتبع

[samsam22]

الجزء الثاني - الدايفيرجينس و المؤشرات

خاتمة الجزء الثاني

في المشاركات السابقة تم شرح عدد من المؤشرات الشائعة الاستخدام لاستكشاف الدايفيرجينس
و تم ايضا شرح اماكن و طرق الدخول عند حدوث الدايفيرجينس
و تم ايضا شرح اعدادات كل مؤشر و الاعدادات الشائعة
و تأثير اختلاف الاعدادات علي مكان و شكل الدايفيرجينس

---------------

طب فيه واحد دلوقتي ممكن يسأل هل المؤشرات اللي تم شرحها هي كل المؤشرات المستخدمة لاستكشاف الدايفيرجينس؟

و الاجابة هي بالتأكيد لا... فيه مؤشرات اخري عديدة ممكن استخدامها لاستكشاف الدايفيرجينس.
بس احنا هنا شرحنا الاكثر انتشارا و شيوعا بين المتداولين.

-------------

و احد تاني بيسأل طب ممكن اسماء لبعض المؤشرات الأخري اللي بتستخدم في اكتشاف الدايفيرجينس؟

و الاجابة .. مافيش مشاكل .. عامة فكر في مؤشرات المومينتم فحتلاقي مثلا مؤشرات مثل
Rate of Change Indicator
Williams % R Indicator
Momentum Indicator

-------------------

واحد تاني بيسأل طب ايه هو افضل مؤشر لاستكشاف الدايفيرجينس؟


حارد عليه و اقوله .. ده يختلف من متداول لاخر ..
و صعب ان اي حد يقولك ان مؤشر معين هو افضل مؤشر للدايفيرجينس.
فكل متداول يختار المؤشر اللي هو حاسس انه بيستريح في استخدامه و فهمه اكثر
و الاهم انه ايضا يكون مناسب لطريقة متاجرته

------------

و احد حيسأل طب ازاي اعرف ان مؤشر معين مناسب لطريقة متاجرتي؟


و الاجابة هي بالتجربة .. بعني ممكن اضع اكثر من مؤشر للدايقيرجينس علي الشارت ..
.و اجرب و اشوف مين اللي بيعطي اشارات اكثر مصداقية
و في نفس الوقت بيدخلني صح مع الاستراتيجية اللي باستعملها.

----------

واحد تاني بيسألني طب هل ممكن اضع اكثر من مؤشر علي الشارت و اللي يظهر فيه دايفيرجينس اتاجر به؟


و الاجابة . هو ممكن تضع اكثر من مؤشر .. بس ممكن يحدث تشتيت و لا ينصح بده حاليا.
و لكن ممكن بعد شرح الجزء الثالث ان نضع مؤشرين او اكثر لاسباب سيتم شرحها لاحقا ان شاء الله

---------

واحد بيقول معلش عندي سؤال اخير .. طب انت عن نفسك بتستعمل اي مؤشر ؟

و الاجابة هي .. اني باحب مؤشر ال CCIثم ال Stochastic ثم ال RSI و اخيرا ال MACD

-----------------

و بكده نكون انتهينا بحمد الله وشكره من شرح الجزء الثاني من موضوع الدايفيرجينس

و لو كان هناك اي جديد خاص بافكار للمؤشرات او مؤشرات خاصة مفيدة للدايفيرجينس ..

سنضيفها ان شاء الله لاحقا.

و ان شاء الله نبدأ في الجزء الثالث و هو الجزء الخاص باماكن الدايفيرجينس علي السعر

يتبع

[samsam22]

الجزء الثالث - الدايفيرجينس و السعر

مقدمة

بعد ما عرفنا في الجزء الاول يعني ايه دايفيرجينس

و فهمنا بيحدث ليه و فهمنا ايضا بيدل علي ايه لما يحدث

و اتعرفنا ايضا علي الانواع المختلفة للدايفيرجينس

و عرفنا اننا ممكن نستغل هذه الظاهرة في متاجرتنا

--------

و بعدين انتقلنا للجزء الثاني

و هو كان خاص بالمؤشرات اللي بتستخدم في استكشاف الدايفيرجينس

و اتعرفنا علي طرق استخدامها و افضل اماكن الدايفيرجينس عليها

و اتعرفنا ايضا علي اماكن الدخول بها و افضل الاعدادات

------------

فاضل نتعرف علي جزء مهم جدا و هو الدايفيرجينس و السعر

و في الجزء ده ان شاء الله حانتعرف علي افضل اماكن الدايفيرجينس علي السعر

و هذا الجزء ان شاء الله حيكون ممتع بكثير عن الجزء الثاني

و حنتعلم فيه ان شاء الله اساسيات قوية و هامة لاستعمال الدايفيرجينس

و كيفية تحقيق الاستفادة القصوي منه ..بطريقة اكثر امانا ان شاء الله

----

و ان شاء الله نبدأ عن قريب

و الان اترككم في رعاية الله

و اذا شاء الله ... لنا عودة ان شاء الله

بالتوفيق ان شاء الله

[MBR]

ماشاء الله تبارك الله

الله ينور طريقك ويسهل امورك احسنت بارك الله فيك

[samsam22]

ماشاء الله تبارك الله

الله ينور طريقك ويسهل امورك احسنت بارك الله فيك

اخي الكريم

شكرا علي مشاركتك الجميلة

و شكرا علي دعائك الجميل .. و لك و للجميع مثله ان شاء الله

و القادم افضل ان شاء الله

[samsam22]

الجزء الثالث - الدايفيرجينس و السعر


مقدمة


قبل ما نتكلم عن الدايفيرجينس و السعر .. تعالوا اسآلكم سؤال عن الدايفيرجينس لو لسه فيه حد فاكر

- حد لسه فاكر هو الدايفيرجينس لما بيحدث كان بينبهنا لايه؟

- بينبهنا ان فيه ضعف داخلي في الحركة الحالية للسعر .. و انه فيه احتمال لحدوث انعكاس

- الله ينور عليك اجابة تمام ..
------------------------

- و من الاجابة الجميلة ديه حنلاقي ان لما الدايفيرجينس بيحدث بيبقي نتيجة ضعف داخلي في الحركة

لكن اللي يهمنا هنا اننا لو شفنا الدايفيرجينس بيتكون

كان بيبقي في تفكيرنا ان هناك احتمال كبير ان السعر يعكس اتجاه تمام كده

- تمام

-----------------

- طب حد فاكر لما كنا بنتكلم عن المؤشرات و افضل الاماكن لتحديد الدايفيرجينس .. حددنا الاماكن ديه فين؟

- حددنا الاماكن ديه في مناطق التشبع .

- تمام الله ينور عليك ..

------------

- طب حد فاكر ليه حددناه في مناطق التشبع؟

- حددناها في مناطق التشبع .. لأن احتمال حدوث انعكاس فيها بيكون اكثر من الاماكن الاخري علي المؤشر .

و لما كان الدايفيرجينس بينبه علي احتمال حدوث انعكاس ..

يبقي لما كنا بنضيف احتمال تاني لحدوث انعكاس من المؤشر باعتماد الدايفيرجينس اللي في اماكن التشبع ..

كنا بنزود من احتمالات نجاح الصفقة

- الله عليك .. كلام جميل قوي ماشاء الله و اجابة اكثر من اللي كنت متوقعها ..

ايه ياعم ده انت بتذاكر من ورايا و لا ايه !.

-------------

- بالضبط كلامك صح .. احنا كنا علشان نزود احتمال نجاح صفقة الدايفيرجينس

كنا بندور علي افضل اماكن للانعكاس من المؤشر و هي كانت اماكن التشبع

وباستخدام نفس الفكرة لايجاد افضل اماكن الدايفيرجينس علي السعر

احنا حندور علي الاماكن اللي بيكون احتمال انعكاس السعر فيها كثير ..

علشان نضيف تأكيد اخر ..و نزود من احتمالات نجاح صفقاتنا ان شاء الله

----------------------

الخلاصة

يبقي الفكرة العامة ..اننا لما نحاول نحدد افضل الاماكن لاعتماد الدايفيرجينس علي السعر

اننا ندور علي الاماكن اللي بيكون احتمال حدوث انعكاس عندها كبير.

--------------

- طب خليني اسألك سؤال تاني ..

ايه هي اشهر الاماكن اللي بتلاقي غالبية المتداولين المبتدئين او المحترفين مستنيينها

و بيتوقعوا فيها ان هناك احتمال ان السعر يرتد منها؟

- اعتقد انها الدعوم و المقاومات.

ماشاء الله .. الله ينور عليك ..

هي بالضبط كده الدعوم و المقاومات


-------------

- طب ايه ياتري الدعوم و المقاومات ديه؟

- و ليه السعر غالبا لما بييجي عندها تلاقيه ارتد في احوال كثيرة ؟

- هل هي اسوار مثلا او حوائط مرسومة علي الخرائط السعرية

- وهل السعر و هو ماشي بيشوف الخطوط او الحوائط ديه.؟

- هو السعر له عيون ؟

- وليه ساعات السعر لما يشوف الدعوم و المقاومات و ساعات قبل ما يوصلها يخاف و يتخض و يرتد ؟

- و ساعات السعر بيبقي شجاع و يشوف المقاومات و الدعوم ..

و يدخل عليها بكل قوة و ييتخطاها وكأنها مش موجودة

و يمشي السعر بعد ان يخترقها بيضحك و هو بيبص وراه

و سايب وراه ناس كتير مرمية علي الارض بيخبطوا علي راسهم و بيعيطوا

لان السعر تعداهم و ضحك عليهم و لم ينعكس او يرتد

---------

تعالوا مع بعض نشوف الكائن الغريب ده اللي اسمه الدعم و المقاومة

و نحاول نفهمه و نتخيله .. لانه مش حينفعنا فقط في الدايفيرجينس

و لكن فهم هذا الكائن الغريب .. حينفعنا ان شاء الله عامة في كل متاجرتنا

و حيخلينا نبص للشارت بطريقة مختلفة ان شاء الله.



يتبع

[hanisma]

بارك الله فيك وفي اهل بيتك

تسجيل متابعه

[samsam22]

الجزء الثالث - الدايفيرجينس و السعر


1- الدعوم و المقاومات





زي ما قلنا في المشاركة اللي فاتت.. انه يمكن تكون اشهر او اكثر الاماكن
اللي بيعتقد كثير من المتداولين ان احتمال حدوث انعكاس عندها بيكون احتمال كبير
هي مناطق الدعوم و المقاومات

---------------

و تلاقي دايما المتداولين اللي عايزيين يشتروا ..
منتظرين السعر يرخص و ينزل لسعر او لمستوي معين
علشان يشتروا بسعر رخيص
و بيسموا المستوي ده .. مستوي دعم او Support

و تلاقي المتداولين اللي عايزيين يبيعوا .
.. مستنيين السعر يرتفع الي سعر او مستوي معين
علشان يبيعوا من سعر عالي
و بيسموا المستوي ده .. مستوي مقاومة او Resistance

----------------------

و لما تيجي تقرأ في اي كتاب او موقع عن تعريف مستوي الدعم و مستوي المقاومة
تلاقي التعريف تقريبا واحد و يقولك

مستوي الدعم
هو مستوي يكون تحت السعر الحالي .. و عند وصول السعر له
يعمل كحاجز .. يمنع السعر من الهبوط اكثر
و يرتد منه السعر لاعلي

و مستوي المقاومة
هو مستوي فوق السعر الحالي .. و عند وصول السعر له
يعمل كحاجز . يمنع السعر من الصعود اكثر
و ينعكس منه السعر لاسفل

--------

و بعدين تلاقي البعض يحاول يقرب الصورة اكثر و يقولك

مستوي الدعم
عامل زي الارضية ( الارض) اللي في الحجرة
لو فيه شئ سقط او وقع عليه
فهو ببعمل كحاجز يمنع هذا الشئ من الوقوع اكثر من كدة


و مستوي المقاومة
عامل زي السقف اللي في نفس الحجرة
لو بترمي شئ لفوق
بيعمل كحاجز يمنع هذا الشئ من الارتفاع اكثر من السقف

-------------

و الجميع بلا استثناء يعرف معني الدعم و المقاومة اللي موجود في كل الكتب
و يمكن ديه اول حاجة اتعلمناها في الفوركس لما كنا مبتدئين .. الدعوم و المقاومات

و فيه منا كان او لسه بينظر لها علي انها خطوط مرسومة علي الشارت
.. و ان الناس او السعر شايفين هذه الخطوط
و انه السعر مجرد ما يلامسها .. غالبا حيرتد منها .. و اخرين يقولون لو السعر لامسها .. ده لازم يرتد

و الكثيرين تلاقيهم بيحطوا اوامر بيع عند المقاومات .. و اوامر شراء عند الدعوم
و ينتظروا الارتداد

و احيانا يرتد .. و احيانا لا يرتد و يخترق المستوي سواء كان دعم او مقاومة
و يستمر في الاتجاه الاصلي دون ارتداد

-------------------

و الكثير منا يستطيع ان يحدد و ان يتعامل مع الدعوم و المقاومات بشكل جيد
و هناك البعض الذي لا يستطيع تحديدها او التعامل معها بشكل جيد

و لكن الكثير منا ايضا .. ممن بيتعامل مع الدعوم و المقاومات بشكل جيد
لما تيجي تساله ايه هي الفكرة او السبب في تكون الدعوم و المقاومات
او ازاي هي بتتكون .. ما يعرفش يرد عليك

و الكثير ايضا ممن لا يستطيعوا تحديد الدعوم و المقاومات و لا يتعاملون معه بشكل جيد
قد تجد ان السبب في هذا
هو عدم مقدرتهم علي فهم طبيعة تكون الدعوم و المقاومات

و غالبا لو فهم الاثنين طبيعة تكون الدعوم و المقاومات
حيقدر القريق الاول انه يرفع من ادائه و يحسن نتايجه
و ان الفريق الثاني حيبدأ يتعلم ازاي يقدر انه يستفيد من الدعوم و المقاومات و يتحسن ادائه ايضا

طب علشان نحل المشكلة الصغيرة ديه
تعالوا مع بعض نشوف ببساطة
ازاي بتتكون مناطق الدعوم و المقاومات علي الشارت


يتبع

[hanisma]

تسجيل متابعه

بارك الله فيك وفي اهل بيتك أخي سام سام